ມອບ-ຮັບ ແລະ ເປີດການນຳໃຊ້ຕຶກອາຄານ ກະຊວງຍຸຕິທຳຫຼັງໃໝ່


...

03.07.2019 9:22     

   ພິທີມອບ-ຮັບ ແລະ ເປີດການນຳໃຊ້ຕຶກອາຄານກະຊວງຍຸຕິທຳຫຼັງໃໝ່ໄດ້ຈັດຂຶ້ນໃນວັນທີ 2 ກໍລະກົດ ນີ້, ທີ່ບ້ານໂນນສະອາດ ເມືອງໄຊທານີ ນະຄອນຫຼວງວຽງຈັນ ໂດຍມີທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທຳ, ມີທ່ານ ພົນຕີ ແອສະໄໝ ເມືອງວັນໄຊ ຮອງລັດຖະມົນຕີກະຊວງປ້ອງກັນປະເທດ, ມີບັນດາທ່ານການນຳພັກ-ລັດ, ແຂກຖືກເຊີນ, ພະນັກງານທີ່ກ່ຽວຂ້ອງເຂົ້າຮ່ວມ. ໃນພິທີ, ທ່ານພັນເອກ ສີສະຫງວນ ອິນທະຈັກ ຜູ້ ອຳນວຍການລັດວິສາຫະກິດກໍ່ສ້າງ-ຂົວທາງ ແລະ ຕິດຕັ້ງໄຟຟ້າຄົບວົງຈອນໄຊສົມບູນ ໃນນາມຜູ້ຮັບເໝົາໂຄງການກໍ່ສ້າງໄດ້ກ່າວລາຍງານ ແລະ ກ່າວມອບໂຄງການວ່າ: ໂຄງ ການກໍ່ສ້າງອາຄານກະຊວງ ຍຸຕິທຳຫຼັງໃໝ່ປະກອບມີ 3 ສັນຍາຄື: ສັນຍາທີ 1 ສັນຍາຮັບເໝົາໂຄງການກໍ່ສ້າງອາຄານກະຊວງຫຼັງໃໝ່ ຊຶ່ງໄດ້ເລີ່ມລົງມືກໍ່ສ້າງມາແຕ່ປີ 2013 ລວມມູນຄ່າ 129 ຕື້ກວ່າກີບ, ປະກອບມີ 5 ໜ້າວຽກຄື: ວຽກອາຄານ, ວຽກລິບ, ວຽກແອເຢັນ, ວຽກລະບົບສະກັດກັ້ນ ແລະ ຕ້ານອັກຄີໄຟ, ວຽກລະບົບສື່ສານ, ສ່ວນສັນຍາທີ 2 ສັນຍາກໍ່ສ້າງຕາຂ່າຍໄຟຟ້າ 22 KV ແລະ ຕິດຕັ້ງໝໍ້ແປງ 1600 KVA ລວມມູນຄ່າ 2 ຕື້ກວ່າກີບ, ປະກອບມີ 3 ໜ້າວຽກຄື: ຕັ້ງເສົາ 12 ແມັດ 3 ຕົ້ນ, ເຮັດຕາຂ່າຍແບບຝັງດິນຍາວ 220 ແມັດ, ຕິດຕັ້ງໝໍ້ແປງ 1600 KVA 1 ໜ່ວຍ ແລະ ສັນຍາທີ 3 ສັນຍາກໍ່ສ້າງໂຄງການປັບປຸງພື້ນທີ່ ແລະ ກໍ່ສ້າງພື້ນຖານໂຄງລ່າງຢູ່ຂອບເຂດຕຶກກະຊວງ ລວມມູນຄ່າ 19 ຕື້ກວ່າກີບ ປະກອບມີ 10 ໜ້າວຽກຄື: ວຽກຖົມດິນ ແລະ ປູກຫຍ້າຂອບເດີ່ນ, ກໍ່ສ້າງທາງເບຕົງເສີມເຫຼັກເຂົ້າຫາຕຶກ ແລະ ເດີ່ນດ້ານໜ້າ, ກໍ່ສ້າງລານຈອດລົດໃຫຍ່ດ້ວຍເບຕົງເສີມເຫຼັກ, ກໍ່ສ້າງຮ່ອງລະບາຍນຳ້ເປື້ອນ, ກໍ່ສ້າງຖັງບໍາບັດນຳ້ເປື້ອນ, ກໍ່ສ້າງປະຕູໂຂງ ແລະ ກຳແພງອ້ອມເດີ່ນ, ກໍ່ສ້າງເຮືອນພັກ ແລະ ຫ້ອງນຳ້, ກໍ່ສ້າງປ້ອມຍາມ, ກໍ່ສ້າງເຮືອນຈອດລົດໃຫຍ່ ແລະ ລົດຈັກ, ກໍ່ສ້າງເຮືອນມ້ຽນຂີ້ເຫຍື້ອ, ຜ່ານການກໍ່ສ້າງອາຄານກະຊວງຍຸຕິທຳຫຼັງໃໝ່ໃຊ້ເວລາ 53 ເດືອນມາຮອດປັດຈຸບັນສຳເລັດ 100% ແລະ ໃນມື້ນີ້ຈຶ່ງໄດ້ຈັດຕັ້ງພິທີມອບ-ຮັບຢ່າງເປັນທາງການ, ໃນໂອກາດດຽວກັນນີ້ທາງບໍລິສັດຍັງໄດ້ຊຸກຍູ້ປັດໄຈເປັນເງິນ ແລະ ວັດຖຸໃຫ້ກະຊວງຍຸຕິທຳລວມມູນຄ່າ 1 ຕື້ກວ່າກີບ. ໃນພິທີທ່ານ ບຸນສະຫວາດ ບຸບຜາ ຮອງລັດຖະມົນຕີກະຊວງຍຸຕິທຳ ໄດ້ໃຫ້ກຽດກ່າວຮັບ ແລະ ເປີດນໍາໃຊ້ອາຄານກະຊວງຍຸຕິທຳຫຼັງໃໝ່ວ່າ: ອາຄານຫຼັງໃໝ່ຂອງກະຊວງຍຸຕິທຳນີ້ເປັນສັນຍາລັກແຫ່ງການເຕີບໃຫຍ່ຂະຫຍາຍຕົວ, ອາຄານຫຼັງນີ້ໄດ້ສະແດງໃຫ້ເຫັນເຖິງຄວາມເປັນຫ່ວງເປັນໄຍຂອງລັດຖະບານ ເພື່ອສ້າງຄວາມເຂັ້ມແຂງໃຫ້ຂະແໜງຍຸຕິທຳພວກເຮົາ.ຈາກນັ້ນໃນພິທີໄດ້ມີການເຊັນບົດບັນທຶກມອບ-ຮັບອາຄານ ລະຫວ່າງກະຊວງຍຸຕິທຳ ແລະ ບໍລິສັດຜູ້ຮັບເໝົາ ແລະ ຄະນະປະທານໄດ້ເຂົ້າຮ່ວມຕັດແຖບຜ້າເພື່ອເປີດນໍາໃຊ້ອາຄານກະຊວງຍຸຕິທຳຫຼັງໃໝ່ຢ່າງເປັນທາງການ. (ຂ່າວ: ພູວັນ, ພາບ: ສຳນານ)