ອາສາສະໝັກຍີ່ປຸ່ນ ຊ່ວຍພັດທະນາຫຼາຍຂະແໜງການ ຂອງ ສປປ ລາວ


...

11.07.2019 9:28     

   ທ່ານ ທອງລຸຸນ ສີສຸລິດ ນາຍົກລັດຖະມົນຕີ ໄດ້ຕ້ອນຮັບອາສາສະໝັກຍີ່ປຸ່ນນຳໂດຍ ທ່ານ ໂຢຊິຮາຣຸ ໂຢເນະຢາມະ ຫົວໜ້າຫ້ອງການຜູ້ຕາງໜ້າອົງການໄຈກາ ປະຈຳ ລາວ ພ້ອມອາສາສະໝັກຍີ່ປຸ່ນຈຳ ນວນ 32 ທ່ານ ທີ່ມາເຮັດວຽກຢູ່ ສປປ ລາວ ປະຈຳປີ 2019 ເຂົ້າຢ້ຽມຂໍ່ານັບ ໃນຕອນເຊົ້າວັນ ທີ 10 ກໍລະກົດນີ້ ທີ່ສຳນັກງານນາຍົກລັດຖະມົນຕີ. ໃນໂອກາດດັ່ງກ່າວ, ຜູ້ ຕາງໜ້າກົມຮ່ວມມືສາກົນ ກະຊວງແຜນການ ແລະ ການລົງທຶນ ໄດ້ລາຍງານຕໍ່ທ່ານນາຍົກລັດຖະມົນຕີວ່າ: ນັບແຕ່ປີ 1965 ຈົນເຖິງປັດຈຸບັນ, ອົງການໄຈກາໄດ້ສົ່ງອາສາສະໝັກຍີ່ປຸ່ນຈຳນວນ 1.000 ກວ່າຄົນ ມາປະກອບສ່ວນປະຕິບັດໜ້າທີ່ວຽກງານຂອງຕົນຢູ່ ສປປ ລາວ ນັບທັງສູນກາງຮອດທ້ອງຖິ່ນຍົກເວັ້ນ ແຂວງຜົ້ງສາລີ ແລະ ແຂວງຫົວພັນ ເນື່ອງຈາກການຄົມມະນາຄົມບໍ່ສະດວກ, ໃນຈຳນວນອາສາສະໝັກ 32 ທ່ານ ຍິງ 19 ທ່ານ ນີ້ໄດ້ມາປະຈຳຢູ່ໃນຂະແໜງຕ່າງໆ ເຊັ່ນ: ຂະແໜງສຶກສາທິການ ແລະ ກິລາ, ຂະແໜງສາທາລະນະສຸກ, ກະສິກຳ ແລະ ປ່າໄມ້, ພັດທະນາຊົນນະບົດແລະ ຂົງເຂດອື່ນໆ. ໃນໂອກາດດັ່ງກ່າວ ທ່ານນາຍົກລັດຖະມົນຕີ ໄດ້ກ່າວສະແດງຄວາມຕ້ອນຮັບ ແລະ ຊົມເຊີຍຕໍ່ອົງການໄຈກາກໍ່ຄືອາສາສະໝັກຍີ່ປຸ່ນທີ່ໄດ້ມາປະຕິບັດໜ້າທີ່ຂອງຕົນຢູ່ ສປປ ລາວ ໃນຄັ້ງນີ້ເພື່ອເປັນການປະກອບສ່ວນເຫື່ອແຮງສະຕິປັນຍາເຂົ້າໃນການຊ່ວຍເຫຼືອດ້ານວິຊາການຢູ່ໃນແຕ່ລະຂະແໜງການຕ່າງໆ ສະແດງອອກໃນຫຼາຍປີຜ່ານມາ ອາສາສະໝັກຍີ່ປຸ່ນ ໄດ້ມີບົດບາດອັນສຳຄັນຕໍ່ການພັດທະນາຊັບພະຍາກອນມະນຸດ ຂອງລາວມີຜົນສຳເລັດຢ່າງໜ້າພາກພູມໃຈ, ຕາງໜ້າລັດຖະບານແລະ ປະຊາຊົນລາວບັນດາເຜົ່າ ຂໍສະແດງຄວາມຂອບໃຈຕໍ່ອົງການໄຈກາກໍ່ຄືອາສາສະໝັກຍີ່ປຸ່ນທີ່ມາຊ່ວຍເຫຼືອລາວໃນເທື່ອນີ້ຈົ່ງປະສົບຜົນສຳເລັດຕາມຄວາມມຸ້ງມາດປາດຖະໜາ ແລະ ໃຫ້ສືບຕໍ່ສົ່ງອາສາສະໝັກມາຊ່ວຍ ສປປ ລາວ ເລື້ອຍໆໄປ. (ຂ່າວ-ພາບ: ພູວຽງຄຳ)