ສຊປລ ຈະເປີດກອງປະຊຸມລັດຖະມົນຕີຊາວໜຸ່ມອາຊຽນ ໃນກາງເດືອນນີ້


...

11.07.2019 9:34     

   ສູນກາງຊາວໜຸ່ມ ປະຊາ ຊົນ ປະຕິວັດລາວ (ສຊປລ) ໄດ້ຈັດພິທີຖະແຫຼງຂ່າວໃນການກະກຽມຄວາມພ້ອມຈັດກອງປະຊຸມລັດຖະມົນຕີຊາວໜຸ່ມອາຊຽນ ຄັ້ງທີ 11 ແລະ ກອງປະຊຸມປິ່ນອ້ອມອື່ນໆ ຂຶ້ນໃນວັນທີ 9 ກໍລະກົດຜ່ານມາ, ທີ່ ສຊປລ ໂດຍການໃຫ້ກຽດຖະແຫຼງຂ່າວຂອງທ່ານ ອາລຸນໄຊ ສູນນະລາດ ກຳມະການສຳຮອງສູນກາງພັກ ເລຂາຄະນະບໍລິຫານງານ ສຊປລ, ມີທ່ານຮອງເລຂາຄະນະບໍລິຫານງານ ສຊປລ, ບັນດາທູດອາຊຽນ, ແຂກຖືກເຊີນທີ່ກ່ຽວຂ້ອງ, ພ້ອມດ້ວຍສື່ມວນຊົນຈາກພາກສ່ວນຕ່າງໆເຂົ້າຮ່ວມ. ທ່ານ ອາລຸນໄຊ ສູນນະ ລາດ ກ່າວວ່າ: ກອງປະຊຸມລັດ ຖະມົນຕີຊາວໜຸ່ມອາຊຽນ ຄັ້ງ ນີ້ຈັດຂຶ້ນເປັນຄັ້ງທຳອິດ, ສຳ ລັບ ສຊປລ ທີ່ໄດ້ຮັບກຽດເປັນ ເຈົ້າພາບຈັດກອງປະຊຸມລັດຖະ ມົນຕີຊາວໜຸ່ມອາຊຽນຄັ້ງທີ 11 ແລະ ກອງປະຊຸມລັດຖະມົນຕີຊາວໜຸ່ມອາຊຽນ+3 ຄັ້ງທີ 7 ແລະ ກອງປະຊຸມກະກຽມ ໃຫ້ແກ່ ກອງປະຊຸມປິ່ນ ອ້ອມອື່ນໆ ນັບແຕ່ມື້ສ້າງຕັ້ງຄະນະຊາວໜຸ່ມ ມາໄດ້ 64 ປີ, ຄັ້ງນີ້ຖືເປັນຄັ້ງທຳອິດເພື່ອເປັນການສ້າງຂະບວນການໃຫ້ແກ່ການຈັດກອງປະຊຸມໃຫຍ່ຜູ້ແທນຊາວໜຸ່ມລາວ ທົ່ວປະເທດຄັ້ງທີ VIII ທີ່ຈະມາເຖິງ ແລະ ວັນສຳຄັນຕ່າງໆຂອງຊາດ, ສະນັ້ນການຈັດກອງປະຊຸມຄັ້ງນີ້ຈະໄດ້ດຳເນີນໄປພາຍໃຕ້ຫົວຂໍ້" ເສີມຂະຫຍາຍບົດບາດຂອງຊາວໜຸ່ມໃນການພັດທະນາແບບຍືນຍົງ ແລະ ເຊື່ອມສານກັບພາກພື້ນ" ຊຶ່ງຫົວຂໍ້ດັ່ງກ່າວໃນຖານະຊາວໜຸ່ມລາວທີ່ໄດ້ຮັບກຽດເປັນເຈົ້າພາບໄດ້ມີຄວາມເປັນເອກະພາບດ້ວຍສອງເຫດຜົນຊຶ່ງທຸກປະເທດໃຫ້ຄວາມສົນໃຈຕໍ່ການພັດທະນາແບບຍືນຍົງ, ສຳຄັນອີກອັນໜຶ່ງນອນຢູ່ໃນວິໄສທັດຂອງຊາດພວກເຮົາແຕ່ນີ້ຫາປີ 2030 ໄດ້ກຳນົດຈະແຈ້ງວ່າລາວຈະພັດທະນາປະເທດໃຫ້ເປັນສີຂຽວ ແລະ ຍືນຍົງ ຊຶ່ງສອດຄ່ອງກັບແນວຄິດຂອງສະຫະປະຊາຊາດ ການພັດທະນາແບບຍືນຍົງ, ໃນກອງປະຊຸມດັ່ງກ່າວໄດ້ສອດຄ່ອງກັບແຜນດຳເນີນງານຂອງຊາວໜຸ່ມໃນ 7 ແຜນງານ 40 ໂຄງການຊຶ່ງໄດ້ຖືກຮັບຮອງໃນກອງປະຊຸມຊາວໜຸ່ມ ເປັນການລວມຍອດຂອງສະຕິປັນຍາຂອງຄົນຮຸ່ນໜຸ່ມຂອງລາວກໍ່ຄືການຮັດແໜ້ນຄວາມສາມັກຄີຂອງບັນດາປະເທດອະນຸພາກພື້ນເພື່ອຈັບມືໃນການພັດທະນາແບບຍືນຍົງ ຊຶ່ງຈຸດປະສົງຂອງກອງປະຊຸມນີ້ມີຢູ່ 5 ຈຸດປະສົງໃຫຍ່: 1. ພວກເຮົາຈະໄດ້ພ້ອມກັນທົບທວນກ່ຽວກັບແຜນດຳເນີນງານຂອງອາຊຽນແຕ່ປີ 2016-2020 ; 2. ຕີລາຄາຄືນບັນດາໂຄງການທີ່ລັດຖະມົນຕີຊາວໜຸ່ມອາຊຽນໄດ້ວາງອອກໃນສອງປີຜ່ານມາ ເພາະວ່າສອງປີໃດຈະໄດ້ມີການຈັດກອງປະຊຸມລັດຖະມົນຕີໜຶ່ງຄັ້ງ, ສະນັ້ນຄັ້ງນີ້ ສປປ ລາວ ເປັນເຈົ້າພາບກໍ່ຈະໄດ້ມີການທົບທວນຄືນອັນໃດເຮັດໄດ້ ແລະ ເຮັດບໍ່ໄດ້ ; 3. ຈະໄດ້ພິຈາລະນາຄືນຂອບການຮ່ວມມືຂອງອາຊຽນໃນຂົງເຂດຊາວໜຸ່ມແຕ່ປີ 2021-2025 ຊຶ່ງຢູ່ໃນແຜນດຳເນີນງານດັ່ງກ່າວຄາດວ່າລາວເຮົາຈະມີຂໍ້ລິເລີ່ມໃນການດຳເນີນງານໃນໂອກາດເປັນເຈົ້າພາບ; 4. ຈະໄດ້ຈັດບັນດາກິດຈະກຳປິ່ນອ້ອມໂດຍສະເພາະງານວາງສະແດງສິນຄ້າເປັນເຈົ້າພາບໂດຍສະມາຄົມນັກທຸລະກິດໜຸ່ມແຫ່ງຊາດ ແລະ 5. ພິທີມອບລາງວັນໃຫ້ຊາວໜຸ່ມດີເດັ່ນ ພ້ອມດຽວກັນຈະມີກອງປະຊຸມເປັນລັກສະນະສົນທະນາ ຊຶ່ງກອງປະຊຸມຈະໄດ້ດຳເນີນນັບແຕ່ວັນທີ 16-20 ເດືອນ ກໍລະກົດ, ສ່ວນສະຖານທີ່ດຳເນີນກອງປະຊຸມມີສອງບ່ອນຄື: ກອງປະຊຸມສ່ວນໃຫຍ່ແມ່ນໄດ້ຈັດຂຶ້ນຢູ່ໂຮງແຮມລາວ ພລາຊາ ແລະ ສຳລັບງານລ້ຽງແມ່ນຈະໄດ້ຈັດຂຶ້ນຢູ່ໂຮງແຮມແລນມາກ, ກິດຈະກຳປິ່ນອ້ອມໄດ້ມີການທັດສະນະສຶກສາເພື່ອໃຫ້ນັກທຸລະກິດໜຸ່ມທີ່ມາຮ່ວມງານໄດ້ຖອດຖອນບົດຮຽນ.ໃນໂອກາດດັ່ງກ່າວໄດ້ມີກອງປະຊຸມພົບປະຫຼາຍຝ່າຍ ແລະ ສອງຝ່າຍເພື່ອກ້າວໄປເຖິງການເຊັນສັນຍາຮ່ວມມືກັນ. ສັງລວມແລ້ວກອງປະຊຸມຄັ້ງນີ້ຖືເປັນຄັ້ງທຳອິດທີ່ຊາວໜຸ່ມລາວໄດ້ຮັບກຽດເປັນເຈົ້າພາບອັນທີສອງພວກເຮົາຈະໄດ້ກຳກາລະໂອກາດນີ້ເພື່ອພ້ອມກັນປະຕິບັດບົດບາດຂອງຊາວໜຸ່ມໃນການພັດທະນາແບບຍືນຍົງເພື່ອນໍາເອົາຜົນປະໂຫຍດທັງໝົດມາສູ່ຄົນຮຸ່ນໜຸ່ມຂອງພວກເຮົາ, ຫວັງຢ່າງຍິ່ງວ່າຜູ້ແທນທີ່ເຂົ້າຮ່ວມຈະໃຫ້ຄວາມສຳຄັນໃຫ້ການເຂົ້າຮ່ວມ ແລະ ສະໜັບສະໜູນ. ມາຮອດປັດຈຸບັນການຫ້າງຫາກະກຽມໜ້າວຽກຕ່າງໆເຫັນວ່າມີຄວາມພ້ອມ, ຄາດໝາຍຂອງກອງປະຊຸມພວກເຮົາຈະໄດ້ບົດຮຽນໃນການເປັນເຈົ້າພາບຈັດກອງປະຊຸມ, ເພື່ອສະແດງບົດບາດຂອງຊາວໜຸ່ມລາວໃນເວທີພາກພື້ນ ແລະ ສາກົນ, ຮັດແໜ້ນຄວາມສາມັກຄີສ້າງສາຍພົວພັນກັບບັນດາປະເທດທີ່ເຂົ້າມາຮ່ວມໂດຍສະເພາະແລກປ່ຽນບົດຮຽນໃນການຄຸ້ມຄອງ, ບົດຮຽນໃນການພັດທະນາຊາວໜຸ່ມຊຶ່ງແຕ່ລະປະເທດຈະມີນະໂຍບາຍຕໍ່ຊາວໜຸ່ມແຕກຕ່າງກັນຖືໂອກາດມາແລກປ່ຽນບົດຮຽນຊຶ່ງກັນ ແລະ ກັນ, ເພື່ອສະໜອງຜົນປະໂຫຍດໃຫ້ແກ່ສັງຄົມລະຫວ່າງນັກທຸລະກິດໜຸ່ມດ້ວຍກັນ, ການຈັດກອງປະຊຸມຊຸດນີ້ໃຫ້ຮັບປະກັນຄວາມສະຫງົບ ແລະ ນໍາເອົາຜົນປະໂຫຍດມາໃຫ້ຄົນຮຸ່ນໜຸ່ມ, ສ້າງພິທີການໃຫ້ກາຍເປັນແບບຢ່າງ. (ຂ່າວ-ພາບ: ພູວັນ)