ເຊື່ອມຊຶມບົດບາດຜູ້ຊົງຄຸນວຸດທິກັບການ ປົກປັກຮັກສາອະນຸລັກສິ່ງແວດລ້ອມ


...

12.07.2019 8:45     

   ສູນກາງແນວລາວສ້າງຊາດ (ສນຊ) ຮ່ວມກັບແນວລາວສ້າງຊາດ ເມືອງນາກາຍ ແຂວງຄຳມ່ວນໄດ້ຈັດກອງປະຊຸມເຊື່ອມຊຶມບົດບາດຜູ້ຊົງຄຸນວຸດທິກັບການປົກປັກຮັກສາອະນຸລັກສິ່ງແວດລ້ອມ-ສັງຄົມ ແລະ ທຳມະຊາດ ຂຶ້ນໃນວັນທີ 9 ກໍລະກົດ ຜ່ານມາ ທີ່ເມືອງນາກາຍ ແຂວງຄຳມ່ວນ, ໂດຍການເປັນປະທານຮ່ວມຂອງທ່ານ ຄຳໃບ ດຳລັດ ກຳມະການສູນກາງພັກ ຮອງປະທານສູນກາງແນວລາວສ້າງຊາດ, ທ່ານ ໂອໄດ ສຸດາພອນ ກຳມະການສູນກາງພັກ ເລຂາພັກແຂວງ ເຈົ້າແຂວງຄຳມ່ວນ, ມີທ່ານ ເຍ່ຍເກີຢ່າ ໜໍຈໍຈົງຕົວ ຮອງປະ ທານ ສນຊ, ທ່ານ ແສງທອງ ພະຄຸນທອງ ປະທານແນວລາວສ້າງຊາດແຂວງ, ມີບັນດາທ່ານ ຕາງໜ້າພະແນກການ, ແນວລາວສ້າງຊາດ, ອົງການຈັດຕັ້ງມະຫາຊົນ ແລະ ຜູ້ຊົງຄຸນວຸດທິຂອງແຂວງ ແລະ ເມືອງເຂົ້າຮ່ວມ. ໃນກອງປະຊຸມຜູ້ເຂົ້າຮ່ວມໄດ້ຮັບຟັງການລາຍງານຄວາມເປັນມາຂອງໂຄງການສ້າງຄວາມເຂັ້ມແຂງໃຫ້ແນວລາວສ້າງຊາດ ໃນການສົ່ງເສີມ ແລະ ປົກປ້ອງສິດຜົນປະໂຫຍດຂອງປະຊາຊົນບັນດາຊົນເຜົ່າ ໃຫ້ມີສ່ວນຮ່ວມ ໃນການຄຸ້ມຄອງນຳໃຊ້ຊັບພະຍາກອນທຳມະຊາດ ແລະ ສິ່ງແວດລ້ອມແບບຍືນຍົງ, ການລາຍງານການເຊື່ອມຊຶມບົດບາດຜູ້ຊົງຄຸນວຸດທິບັນດາຊົນເຜົ່າກັບການປົກປັກຮັກສາອະນຸລັກສິ່ງ ແວດລ້ອມ-ສັງຄົມ ແລະ ທຳມະຊາດ ຢູ່ແຂວງຄຳມ່ວນໃນ ໄລຍະຜ່ານມາແລະທິດທາງ ແຜນການໃນຕໍ່ໜ້າ ຊຶ່ງໄດ້ຍົກ ໃຫ້ເຫັນວ່າໃນໄລຍະຜ່ານມາ ຜູ້ຊົງຄຸນວຸດທິໄດ້ເປັນຄັນທຸງ ເຕົ້າໂຮມຄວາມສາມັກຄີ, ປຸກ ລະດົມປະຊາຊົນບັນດາຊົນເຜົ່າ ປະກອບສ່ວນເຂົ້າໃນຂົງເຂດວຽກງານວັດ ທະນະທຳ-ສັງຄົມ ແລະ ຂົງ ເຂດເສດຖະກິດ ຢ່າງຕັ້ງໜ້າ ເປັນຕົ້ນ: ໄດ້ປຸກລະດົມລູກຫຼານເຂົ້າໂຮງຮຽນຕາມເກນອາຍຸ, ຝຶກອົບຮົມວິຊາອາຊີບສີມືແຮງງານ, ສຶກສາອົບຮົມໃຫ້ປະຊາຊົນມີຄວາມຕື່ນຕົວມີດຸໝັ່ນຂະຫຍັນພຽນຕໍ່ການເພີ່ມພູນຜະລິດຜົນໃຫ້ກາຍເປັນສິນ ຄ້າສ້າງລາຍຮັບ ເພື່ອແກ້ໄຂຊີ ວິດການເປັນຢູ່ຂອງປະຊາຊົນໃຫ້ດີຂຶ້ນເທື່ອລະກ້າວ, ປຸກ ລະດົມປະຊາຊົນເຂົ້າຮ່ວມ ເປັນເຈົ້າການ ໃນການປົກປັກຮັກສາສິ່ງແວດລ້ອມ ແລະ ປຸກລະດົມປະຊາຊົນເຂົ້າຮ່ວມຂະບວນການສ້າງຄອບຄົວ ແລະ ບ້ານສາມັກຄີປອງດອງຕິດພັນກັບ ການແກ້ໄຂຄວາມທຸກຍາກ. ພ້ອມກັນນີ້, ກໍໄດ້ມີການປະ ກອບຄຳຄິດຄຳເຫັນແລກປ່ຽນບົດຮຽນໃນການປົກປັກຮັກສາ ສິ່ງແວດລ້ອມ-ສັງຄົມ ແລະ ທຳມະຊາດຢູ່ເມືອງນາກາຍຢ່າງກົງໄປກົງມາ, ເຮັດໃຫ້ຜູ້ຊົງຄຸນວຸດທິໄດ້ຮັບຮູ້ ແລະ ກຳແໜ້ນເນື້ອໃນຈິດໃຈຂອງກອງປະຊຸມໄດ້ຢ່າງເລິກເຊິ່ງ. ໂອກາດນີ້, ທ່ານ ຄຳໃບ ດຳລັດ ໄດ້ມີບາງຄຳເຫັນເນັ້ນຕື່ມວ່າ: ໃຫ້ຄະນະນຳຂອງແຂວງ, ຂອງເມືອງ ແລະ ຜູ້ຊົງຄຸນວຸດທິຈົ່ງເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ແກ່ປະຊາຊົນບັນດາເຜົ່າກ່ຽວກັບການສ້າງຄວາມສາມັກຄີປອງດອງ ເພື່ອເຮັດໃຫ້ປະຊາຊົນມີຄວາມສາມັກຄີ, ມີຄວາມເປັນເອກະພາບກັນ ແລະ ຮັກແພງຊຶ່ງກັນ ແລະ ກັນ; ເຜີຍແຜ່ແນວທາງນະໂຍບາຍຂອງພັກ-ລະບຽບກົດໝາຍຂອງລັດໃຫ້ປະຊາຊົນໄດ້ຮັບຮູ້ ແລະ ເຂົ້າໃຈຢ່າງຖືກ ຕ້ອງ, ສືບຕໍ່ຊຸກຍູ້ຂະບວນການ ສ້າງຄອບຄົວ ແລະ ບ້ານສາມັກ ຄີປອງດອງຕິດພັນກັບການ ແກ້ໄຂຄວາມທຸກຍາກຂອງປະ ຊາຊົນບັນດາເຜົ່າ, ເອົາໃຈໃສ່ສຶກສາອົບຮົມທົ່ວສັງຄົມ ໂດຍເລີ່ມຈາກຮາກຖານບ້ານ, ສຳ ນັກງານ, ອົງການ ເພື່ອຈັດຕັ້ງປະຕິບັດແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ; ສົ່ງເສີມໃຫ້ປະຊາຊົນປົກປັກຮັກສາວັດທະນະທຳ, ຮີດຄອງປະເພນີອັນດີງາມຂອງ ແຕ່ລະຊົນເຜົ່າ, ສຶກສາອົບຮົມໃຫ້ປະຊາຊົນປົກປັກຮັກສາ, ອະນຸລັກສິ່ງແວດລ້ອມທຳມະຊາດ, ສ້າງໃຫ້ສັງຄົມມີຄວາມເປັນລະບຽບຮຽບຮ້ອຍ ແລະ ເປັນເມືອງທີ່ມີຄວາມສະອາດ, ພ້ອມນີ້ຕ້ອງເພີ່ມທະວີໃນການປົກປັກຮັກສາເຂດປ່າສະຫງວນ ແລະ ປູກໄມ້ທົດແທນເຂດປ່າ ໄມ້ຊົມໃຊ້; ເອົາໃຈໃສ່ສຶກສາ ອົບຮົມຊາວໜຸ່ມ-ເຍົາວະຊົນ ຮຸ່ນສືບທອດພາລະກິດຂອງ ຊາດໃຫ້ເປັນຄົນດີ, ມີຄວາມຮູ້ ຄວາມສາມາດ ແລະ ມີນ້ຳໃຈຮັກຊາດອັນສູງສົງ. (ຂ່າວ: ສນຊ)