ໜ່ວຍພັກກົມກວດກາກະຊວງ ພບ ດຳເນີນກອງປະຊຸມໃຫຍ່


...

01.08.2019 8:57     

   ໜ່ວຍພັກກົມກວດກາ ກະຊວງພະລັງງານ-ບໍ່ແຮ່ ໄດ້ຈັດກອງປະຊຸມໃຫຍ່ ຄັ້ງທີ III ຂອງຕົນຂຶ້ນ ໃນວັນທີ 29 ກໍລະກົດຜ່ານມາ ພາຍໃຕ້ ການເປັນປະທານຂອງສະຫາຍ ຄໍາມະນີ ອິນທິລາດ ເລຂາຄະ ນະພັກ ລັດຖະມົນຕີກະຊວງ ພະລັງງານ-ບໍ່ແຮ່, ສະຫາຍ ຄໍາຫຼ້າ ວິຈິດວົງສາ ເລຂາໜ່ວຍ ພັກກົມກວດກາ, ມີພາກສ່ວນກ່ຽວຂ້ອງເຂົ້າຮ່ວມ. ສະຫາຍ ຄໍາຫຼ້າ ວິຈິດວົງສາ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດວຽກງານໃນໄລຍະທີ່ຜ່ານມາ ພ້ອມທັງວາງແຜນການເຄື່ອນໄຫວໃນຕໍ່ໜ້າ ຊຶ່ງໄດ້ຍົກໃຫ້ເຫັນດ້ານດີ, ດ້ານອ່ອນ ແລະ ບົດຮຽນທີ່ຖອດຖອນໄດ້, ຄະນະໜ່ວຍພັກກົມກວດກາ ໄດ້ຖືສໍາຄັນວຽກງານການເມືອງແນວຄິດ, ເອົາໃຈໃສ່ສຶກສາອົບຮົມ ໃຫ້ສະມາຊິກພັກ-ພະນັກງານພາຍໃນກົມເປັນປົກກະຕິ, ເອົາໃຈໃສ່ເຊື່ອມຊຶມກໍາແໜ້ນແນວທາງນະໂຍບາຍຂອງພັກ-ລັດ, ມີຫຼັກໝັ້ນຮູ້ຈໍາແນກໄດ້ມິດ-ສັດຕູ, ຝຶກຝົນຫຼໍ່ຫຼອມຄຸນສົມບັດສິນທໍາປະຕິວັດ, ມີນໍ້າໃຈຮັກຊາດ ແລະ ປະຊາຊົນ, ເພີ່ມທະວີຄວາມຮັບຜິດຊອບ ຄວາມເປັນເຈົ້າການຕໍ່ວຽກງານ, ສາມັກຄີຮັກແພງຊ່ວຍເຫຼືອຊຶ່ງກັນ ແລະ ກັນ, ມີຄວາມຊື່ສັດ ປະຢັດ ແລະ ປອດໃສ. ໄລຍະຜ່ານມາ, ໄດ້ສໍາເລັດການລົງຕິດຕາມ, ກວດກາ ແລະ ຊຸກຍູ້ ການເຄື່ອນໄຫວວຽກງານກວດກາພັກ ແລະ ປະເມີນການກໍ່ສ້າງໜ່ວຍພັກເຂັ້ມແຂງຮູ້ນໍາພາຮອບດ້ານ 45 ເປົ້າໝາຍ. ສະນັ້ນ ຜ່ານການເຄື່ອນໄຫວວຽກງານກວດກາດັ່ງກ່າວ ເຫັນວ່າ ດ້ານດີຂອງໜ່ວຍພັກແມ່ນ ດ້ານການເມືອງແນວຄິດ; ດ້ານການກໍ່ສ້າງໜ່ວຍພັກແຂງ-ຮູ້ນໍາພາຮອບດ້ານ, ພິເສດ ໃນປີ 2018 ໄດ້ຮັບຮອງເອົາແຜນ ການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນແລ້ວ 44 ໜ່ວຍພັກ (ຈໍານວນໜ່ວຍພັກທັງໝົດ 46 ໜ່ວຍພັກ) ສ່ວນໜ່ວຍພັກທີ່ຍັງບໍ່ທັນສໍາເລັດ ແມ່ນພວມຈັດຕັ້ງປະຕິບັດ. ໄລຍະຜ່ານມາ ບັນດາຄະນະໜ່ວຍພັກຮາກຖານ ໄດ້ປະຕິບັດຕາມ 5 ຫຼັກການ 3 ທິດນໍາຂອງພັກ ໂດຍມີແບບແຜນວິທີເຮັດວຽກຖືເອົາຫຼັກການລວມສູນປະຊາທິປະໄຕ ເຮັດວຽກນໍາພາເປັນໝູ່ຄະນະ ບຸກຄົນຮັບຜິດຊອບ, ຮ່ວມຊີວິດພັກ ປະຈໍາເດືອນ ຖືເອົາການຕໍານິຕິຊົມຕົນເອງ ແລະ ຕໍານິສົ່ງຂ່າວຊຶ່ງກັນ ແລະ ກັນ ເພື່ອພ້ອມກັນກ້າວໜ້າເປັນສໍາຄັນ ແລະ ເສຍເງິນສະຖິຕິພັກເປັນປົກກະຕິ,ເອົາໃຈໃສ່ຂະຫຍາຍສະມາຊິກພັກ ປັບປຸງກໍ່ສ້າງການຈັດຕັ້ງໃຫ້ເຂັ້ມແຂງ, ຖືສໍາຄັນວຽກງານປ້ອງກັນຊາດ-ປ້ອງກັນຄວາມສະຫງົບ. ສຳລັບວຽກງານກວດກາລັດ ໄດ້ຕິດຕາມກວດກາເປັນປົກກະຕິ ຢູ່ບັນດາກົມ, ຫ້ອງການ, ສະຖາບັນ ລວມ 25 ເປົ້າໝາຍ, ລົງຕິດຕາມຊຸກຍູ້ຮາກຖານພະແນກສາຍຕັ້ງ ລວມ 73 ເປົ້າໝາຍ, ລັດວິສາຫະກິດໄຟຟ້າລາວ ສາຂາແຂວງ ລວມ 73 ເປົ້າໝາຍ, ຫ້ອງການຄຸ້ມຄອງລະບົບສົ່ງ 5 ເປົ້າໝາຍ (ສໍາເລັດທັງໝົດ) ແລະ ລັດວິສາຫະກິດກໍ່ສ້າງ ແລະ ຕິດຕັ້ງໄຟຟ້າສາຂາແຂວງ ລວມ 19 ເປົ້າໝາຍ (ສໍາເລັດທັງໝົດ); ກວດກາການລົງທຶນຂອງລັດ ຕາມແຜນການເຄື່ອນໄຫວວຽກງານກວດກາແມ່ນມີ 23ໂຄງການ. ໃນກອງປະຊຸມ ຍັງໄດ້ມີການປ່ອນບັດເລືອກຕັ້ງເອົາຄະນະພັກຊຸດໃໝ່ ແລະ ໄດ້ເລືອກເອົາສະຫາຍ ຄໍາຫຼ້າ ວິຈິດວົງສາ ເປັນເລຂາໜ່ວຍພັກກົມກວດກາ, ສະຫາຍ ຈັນທະເລດ ວໍລະບຸດ ເປັນຮອງເລຂາໜ່ວຍພັກກົມກວດກາ, ສະຫາຍ ວົງທອງ ທີມະຫາໄຊ ເປັນປະທານກວດກາໜ່ວຍພັກກົມກວດກາ. ( ຂ່າວ: ແສງຈັນ)