ສະພາແຫ່ງຊາດສະຫຼຸບວຽກງານ 6 ເດືອນຕົ້ນປີ ພ້ອມທັງເຊື່ອມຊຶມມະຕິ 8 ສະໄໝທີ X ຂອງພັກ


...

06.08.2019 10:19     

   ຄະນະບໍລິຫານງານພັກສະພາແຫ່ງຊາດໄດ້ຈັດກອງປະຊຸມສະຫຼຸບການເຄື່ອນໄຫວວຽກງານ 6 ເດືອນຕົ້ນປີ ແລະ ແຜນການເຄື່ອນໄຫວ 6 ເດືອນທ້າຍປີ 2019 ພ້ອມທັງຈັດຕັ້ງເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 8 ສະໄໝທີ X ຂອງພັກປະຊາຊົນ ປະຕິວັດລາວຂຶ້ນໃນວັນທີ 5 ສິງຫານີ້, ທີ່ສະພາແຫ່ງຊາດ ໂດຍການເປັນປະທານຂອງສະຫາຍ ແສງນວນ ໄຊຍະລາດ ຄະນະ ເລຂາທິການສູນກາງພັກ ເລຂາພັກ ຮອງປະທານສະພາແຫ່ງຊາດ ມີພາກສ່ວນກ່ຽວຂ້ອງເຂົ້າຮ່ວມ.
ໃນພິທີໄດ້ຮັບຟັງການລາຍງານການເຄື່ອນໄຫວວຽກງານ 6 ເດືອນຕົ້ນປີ ແລະ ແຜນການເຄື່ອນໄຫວ 6 ເດືອນທ້າຍປີ 2019 ໃຫ້ຮູ້ວ່າ: ຄະນະບໍລິຫານງານພັກສະພາແຫ່ງຊາດໄດ້ຊີ້ນຳການກະກຽມດຳເນີນກອງປະຊຸມໃຫຍ່ຂອງຮາກຖານພັກຈຳນວນໜຶ່ງທີ່ບົ່ງຕົວແຕ່ງຕັ້ງຂຶ້ນກັບຄະນະພັກຮາກຖານ ຄະນະເລຂາທິການສະພາແຫ່ງຊາດ, ປັດຈຸບັນສຳເລັດກອງປະຊຸມໃຫຍ່ 2 ໜ່ວຍຄື: ໜ່ວຍພັກກົມຈັດຕັ້ງ-ກວດກາ ແລະ ໜ່ວຍພັກກົມສື່ມວນຊົນ ໂດຍອີງໃສ່ກົດລະບຽບສະໄໝທີ X ຂອງພັກ ແລະ ອີງໃສ່ມາດຖານ, ເງື່ອນໄຂ ແລະ ຄວາມສະດວກໃນການປະຕິບັດ ໜ້າທີ່ວຽກງານ ຄະນະບໍລິຫານງານພັກສະພາແຫ່ງຊາດ ຈຶ່ງໄດ້ຕົກລົງແຍກໜ່ວຍພັກກົມຈັດຕັ້ງ-ກວດກາ ອອກເປັນ 2 ໜ່ວຍຄື : ໜ່ວຍພັກກົມຈັດຕັ້ງ-ພະນັກງານ ແລະ ໜ່ວຍພັກກົມກວດກາ.
ດ້ານວຽກງານວິຊາສະ ເພາະ ບັນດາຮາກຖານພັກທີ່ກ່ຽວຂ້ອງໄດ້ສຳເລັດການຮຽບຮຽງກົດໝາຍທີ່ຜ່ານການພິຈາລະນາຮັບຮອງເອົາໃນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII ຈຳນວນ 8 ສະບັບ, ໄດ້ກວດກາເນື້ອໃນຮອບດ້ານຮ່າງກົດໝາຍຈຳນວນ 10 ສະບັບທີ່ຈະນໍາເຂົ້າພິຈາລະນາ ແລະ ຮັບຮອງເອົາໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ຄືຮ່າງກົດໝາຍສ້າງໃໝ່ຈຳນວນ 5 ສະບັບ ແລະ ຮ່າງກົດໝາຍປັບປຸງຈຳນວນ 5 ສະບັບ, ອອກມະຕິຮັບຮອງເອົາວິໄສທັດຮອດປີ 2030, ຍຸດທະສາດການພັດທະນາຮອດປີ 2025 ແລະ ແຜນພັດທະນາອົງການກວດສອບແຫ່ງລັດຮອດປີ 2021 ພ້ອມນີ້ຍັງຄົ້ນຄວ້າໜັງສືສະເໜິີຂອງລັດຖະບານກ່ຽວກັບການຂໍພິຈາລະນາບັນຫາສຳຄັນຂອງຊາດຈຳນວນ 14 ເລື່ອງ.
ສຳລັບແຜນການເຄື່ອນ ໄຫວວຽກງານ 6 ເດືອນທ້າຍປີ 2019 ຄະນະບໍລິຫານງານພັກ ຕ້ອງໄດ້ເພີ່ມທະວີການຕິດຕາມ, ຊຸກຍູ້, ກວດກາການຈັດຕັ້ງປະຕິບັດຕົວຈິງ ເປັນປະຈຳ, ບັນດາຮາກຖານ ພັກຕ້ອງຫັນເປັນແຜນການ ເຄື່ອນໄຫວລະອຽດໃນແຕ່ລະເດືອນ ຫຼີກເວັ້ນການສະຫຼຸບສັງລວມພໍແລ້ວມື, ເອົາໃຈໃສ່ຊຸກຍູ້ ແລະ ເສີມຂະຫຍາຍດ້ານດີ, ເປັນເຈົ້າການກຳຈັດຂໍ້ຂາດຕົກບົກຜ່ອງຂອງວຽກງານພາຍໃນຮາກຖານພັກຂອງຕົນຢ່າງແທ້ຈິງ, ສະມາຊິກພັກ-ພະນັກງານທຸກສະຫາຍຕ້ອງຍົກສູງຄວາມຮັບຜິດຊອບ, ຄວາມເປັນເຈົ້າການໃນການຈັດຕັ້ງປະຕິບັດໜ້າທີ່ວຽກງານທີ່ໄດ້ຮັບມອບໝາຍໃຫ້ມີປະສິດທິຜົນສູງ ແລະ ຖືເອົາຜົນສຳເລັດໃນການປະຕິບັດໜ້າທີ່ວຽກງານເປັນໄມ້ຫຼາວັດແທກຄວາມສາມາດຂອງສະມາຊິກພັກ-ພະນັກ ງານແຕ່ລະສະຫາຍ.
ໃນຕອນທ້າຍປະທານກອງປະຊຸມກໍໄດ້ເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກຄັ້ງທີ 8 ສະໄໝທີ X ຂອງພັກໃຫ້ບັນດາສະມາຊິກພັກ-ພະນັກງານເຂົ້າໃຈຢ່າງເລິກເຊິ່ງ, ກຳແໜ້ນ ແນວທາງຂອງພັກເພື່ອນຳມາໃຊ້ເຂົ້າໃນການປະຕິບັດວຽກງານຕົວຈິງໃຫ້ປະສົບຜົນສຳເລັດ.
(ຂ່າວ-ພາບ : ສຸກສາຄອນ)