ສຳເລັດກອງປະຊຸມຄົບຄະນະບໍລິຫານງານພັກ ແຂວງຊຽງຂວາງ


...

12.08.2019 11:57     

   ກອງປະຊຸມຄົບຄະນະບໍລິຫານງານພັກແຂວງຊຽງຂວາງ ຄັ້ງທີ 8 ສະໄໝທີ VII ໄດ້ຈັດຂຶ້ນໃນລະຫ່ວາງວັນທີ 8-9 ສິງຫານີ້ ທີ່ຫ້ອງວ່າການແຂວງ ໂດຍການເປັນປະທານຂອງທ່ານ ບຸນຕົ້ນ ຈັນທະພອນ ເລຂາພັກແຂວງ ເຈົ້າແຂວງໆຊຽງຂວາງ, ມີຄະນະປະຈຳພັກແຂວງ, ກຳມະການພັກແຂວງ ແລະ ຫົວໜ້າພະແນກການເຂົ້າຮ່ວມ. ທ່ານ ບົວສອນ ສີນວນທອງ ຮອງເລຂາພັກແຂວງ ຮອງເຈົ້າແຂວງຊຽງຂວາງ ໄດ້ລາຍງານການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 7 ສະໄໝທີ VII ແລະ ບາງວຽກງານຈຸດສຸມໃນຕໍ່ໜ້າ, ການຈັດຕັ້ງແຜນພັດທະນາເສດຖະກິດ-ສັງຄົມ ແລະ ແຜນງົບປະມານ 6 ເດືອນ ຕົ້ນປີ 2019 ແລະ ຄາດໝາຍສູ້ຊົນ 6 ເດືອນທ້າຍປີ 2019, ກວດກາຄືນແຜນກຳນົດພະນັກງານນຳພາ-ຄຸ້ມຄອງ ເພື່ອກະກຽມດ້ານບຸກຄະລາກອນ ແລະ ຄວາມພ້ອມໃຫ້ແກ່ກອງປະຊຸມໃຫຍ່ 3 ຂັ້ນຂອງຕົນ, ຜ່ານແຜນກະກຽມດຳເນີນກອງປະຊຸມໃຫຍ່ອົງ ການແນວລາວສ້າງຊາດ ແລະ ອົງການຈັດຕັ້ງມະຫາຊົນ, ປັບປຸງກົງຈັກຫ້ອງການຄຸ້ມຄອງ ມໍລະດົກໂລກໄຫຫີນ, ກວດກາຄືນແຜນງານປັບປຸງຍົກລະດັບຂອງການປິ່ນປົວ ການຄຸ້ມຄອງດ້ານສາທາລະນະສຸກ ອາຫານ ແລະ ຢາ. ກອງປະຊຸມຄັ້ງນີ້ ໄດ້ຮັບຮອງເອົາແຜນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມໃນ 6 ເດືອນທ້າຍປີ 2019 ຊຶ່ງທ່ານເຈົ້າແຂວງໆຊຽງຂວາງໄດ້ກ່າວວ່າ: ສຸມໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ ໂດຍເພີ່ມທະວີຄວາມຮັບຜິດຊອບ, ເອົາໃຈໃສ່ເປັນພິເສດ, ເອົາໃຈໃສ່ປົກປັກຮັກສາພືດລະດູຝົນ, ແຕ່ລະເມືອງ ພະແນກການກະກຽມສຸມໃສ່ກອງປະຊຸມໃຫຍ່ຂອງຕົນ, ສ້າງຂະບວນການ ວຽກງານພັກ ວຽກງານປາບປາມຢາເສບຕິດຢ່າງແຂງແຮງ ແກ້ໄຂການຈັບຈ່ອງດິນ, ກວດກາຄືນການສຳປະທານດິນ ຫັນເຂົ້າສູ່ກົດໝາຍ, ຄະນະຈັດຕັ້ງແຂວງເປັນໃຈກາງ ແລະ ພາກສ່ວນກ່ຽວຂ້ອງລົງຊຸກຍູ້ ຕິດຕາມການຈັດຕັ້ງດຳເນີນກອງປະຊຸມໃຫຍ່, ສຸມໃສ່ເກັບລາຍຮັບ ຕິດພັນກັບການສຳປະທານທີ່ດິນ, ກວດກາບັນດາໂຄງການຕ່າງໆ ຈັດຕັ້ງປະຕິບັດ, ກວດ ກາຄືນການສຳປະທານດິນຢູ່ດ່ານສາກົນນຳ້ກັ່ນ, ຄະນະວິໄນຂອງແຂວງສົມທົບກັບພະແນກການກວດກາຄືນ ແລະ ຈັດຕັ້ງປະຕິບັດວິໄນໃຫ້ວ່ອງໄວ, ເດັດດ່ຽວສືບຕໍ່ແກ້ໄຂຄະດີສໍ້ລາດບັງຫຼວງ, ຮີບຮ້ອນປັບປຸງ ສັບຊ້ອນຫ້ອງການຄຸ້ມຄອງມໍລະດົກໂລກ, ເປັນເຈົ້າການຮັບໂຄງການອີຟັດເຂົ້າມາພັດທະນາ, ກະກຽມຮັບທົ່ງໄຫຫີນ ແລະ ງານມະຫະກຳກິລາແຫ່ງຊາດ.
( ຂ່າວ: ບຸນມີ ແສງທຸມມີ)