ທະນາຄານແຫ່ງ ສປປ ລາວ ສາຂາພາກເໜືອ ແຂວງຫຼວງພະບາງ ໄດ້ຈັດກອງປະຊຸມເຜີຍແຜ່ຂໍ້ຕົກລົງວ່າດ້ວຍການຜັນຂະຫຍາຍ ການຈັດຕັ້ງນະໂຍບາຍສິນເຊື່ອເພື່ອກະຕຸ້ນເສດຖະກິດ ແລະ ນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນ ຂຶ້ນໃນວັນທີ 25 ກັນຍາ ນີ້ ທີ່ຫ້ອງປະຊຸມເມືອງບໍ່ແຕນ ແຂວງໄຊຍະບູລີ ເປັນກຽດເຂົ້າຮ່ວມຂອງ ທ່ານ ສົມສະໜຸກ ໄຊອຸດົມ ເຈົ້າເມືອງບໍ່ແຕນ, ມີທ່ານນາງ ໂພທິຈັນ ທຳມະເທວາ ຫົວໜ້າທະນາຄານແຫ່ງ ສປປ ລາວ ສາຂາພາກເໜືອ ແຂວງຫຼວງພະບາງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ. ກອງປະຊຸມໄດ້ຮັບຟັງການຜ່ານຂໍ້ຕົກລົງສະບັບເລກທີ 765/ທຫລ, ລົງວັນທີ 22 ສິງຫາ 2023 ວ່າດ້ວຍການຜັນຂະຫຍາຍການຈັດຕັ້ງປະຕິບັດນະໂຍບາຍສິນເຊື່ອ ເພື່ອກະຈາຍແຫຼ່ງທຶນສູ່ທ້ອງຖິ່ນ ແລະ ຂໍ້ຕົກລົງສະບັບເລກທີ 766/ທຫລ, ລົງວັນທີ 22 ສິງຫາ 2023 ວ່າດ້ວຍການຜັນຂະຫຍາຍການຈັດຕັ້ງປະຕິບັດນະໂຍ ບາຍສິນເຊື່ອເພື່ອກະຕຸ້ນເສດຖະກິດ. ກອງປະຊຸມຄັ້ງນີ້ຈັດຂຶ້ນເພື່ອເປັນການຜັນຂະຫຍາຍເນື້ອໃນຈິດໃຈຂອງກອງປະຊຸມສະພາແຫ່ງຊາດ ແລະ ທິດຊີ້ນຳຂອງລັດຖະບານເພື່ອສົ່ງເສີມ ແລະ ສະໜອງສິນເຊື່ອໃຫ້ໂຄງການລົງທຶນພັດທະນາເສດຖະກິດ-ສັງຄົມ ແລະ ທຸລະກິດພາຍໃນໃຫ້ເຂັ້ມແຂງມີການຂະຫຍາຍຕົວ ຊຶ່ງນະໂຍບາຍສິນເຊື່ອເພື່ອກະຕຸ້ນເສດຖະກິດ ແມ່ນສຸມໃສ່ຂະແໜງການຜະລິດ, ການຄ້າ ແລະ ການບໍລິການທີ່ເປັນປາຍແຫຼມ ເພື່ອທົດແທນການນຳເຂົ້າ-ສົ່ງເສີມການສົ່ງອອກສິນຄ້າ, ການສ້າງວຽກເຮັດງານທຳ ແລະ ປະກອບສ່ວນເຂົ້າໃນການຮັກສາສະຖຽນລະພາບ ມະຫາພາກດ້ານການເງິນ-ເງິນຕາໃຫ້ເຂັ້ມແຂງ ພັດທະນາເສດຖະກິດໃຫ້ມີການຂະຫຍາຍ ຕົວແບບຍືນຍົງ ໂດຍສະເພາະຢູ່ທ້ອງຖິ່ນໃນຂອບເຂດທົ່ວປະເທດ.

ຂ່າວ-ພາບ: ສາຍຄຳ ບຸນຍາວົງ