ຄະນະພັກຮາກຖານກຸ່ມ ລົບປາກດີ ເມືອງໂຂງ ແຂວງຈຳປາສັກ ໄດ້ເປີດກອງປະຊຸມໃຫຍ່ຄັ້ງທີ V ຂຶ້ນ ຢ່າງເປັນທາງການ, ເພື່ອສັງເກດ ແລະ ຕີລາຄາຄືນໃນການຊີ້ນຳໆພາລວມ ການປະຕິບັດວຽກງານຕະຫຼອດໄລຍະ 5 ປີ 2019-2023 ຂອງຄະນະພັກຮາກຖານກຸ່ມລົບປາກດີ ຂຶ້ນຫວ່າງບໍ່ດົນມານີ້, ໃຫ້ກຽດເຂົ້າຮ່ວມເປັນປະທານກອງປະຊຸມຄັ້ງນີ້ໂດຍ ສະຫາຍ ນາງ ຄຳພູ ລິດທິສັກ ກຳມະການພັກແຂວງ ເລຂາພັກເມືອງ ເຈົ້າເມືອງໆໂຂງ, ສະຫາຍ ຄຳສິງ ບຸນຈະເລີນ ຄະນະປະຈຳພັກເມືອງ ທັງເປັນຜູ້ຊີ້ນຳວຽກງານຮອບດ້ານກຸ່ມລົບປາກດີ, ມີຮອງຫົວໜ້າຄະນະຈັດຕັ້ງເມືອງ, ເລຂາ, ຮອງເລຂາຄະນະພັກຮາກຖານ, ອົງການຈັດຕັ້ງມະຫາຊົນ, ແຂກຖືກເຊີນ ແລະ ຜູ້ແທນສົມບູນເຂົ້າຮ່ວມ 46 ສະຫາຍ ຍິງ 7 ສະຫາຍ.
ໂອກາດນີ້, ສະຫາຍ ນາງ ອ່ອນຄຳ ໂພທິສານ ກຳມະການພັກເມືອງ ເລຂາຄະນະພັກຮາກຖານກຸ່ມລົບປາກດີ ໄດ້ຂຶ້ນຜ່ານບົດສະຫຼຸບການຊີ້ນຳໆພາຕະຫຼອດໄລຍະ 5 ປີຜ່ານມາ ໂດຍຍົກໃຫ້ເຫັນໂດຍສັງເຂບວ່າ: ຄະນະພັກພວກເຮົາໄດ້ຖືເອົາວຽກງານແນວຄິດເປັນກົກ, ເອົາໃຈໃສ່ກວດກາ, ປັບປຸງວຽກງານພັກ ໄປຄຽງຄູ່ກັນນັ້ນກໍໄດ້ຖືເອົາວຽກງານກວດກາລັດ ເພື່ອແນໃສ່ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງ ແລະ ອົງຄະນະພັກເມືອງໃຫ້ປະກົດຜົນເປັນຈິງ. ນອກຈາກນັ້ນ, ກໍໄດ້ຖືເອົາການດຳເນີນຊີວິດການເມືອງ, ສຳຫຼວດກວດກາຕຳນິຕົນເອງ ແລະ ສົ່ງຂ່າວບັນດາສະມາຊິກດ້ວຍກັນຢ່າງເປັນປົກກະຕິ. ສະນັ້ນ, ຈຶ່ງສາມາດປະຕິບັດໄດ້ຄວາມສາມັກຄີພາຍໃນພັກຢ່າງໜັກແໜ້ນ, ບຸກຄົນມີຄວາມຮັບຜິດຊອບຕໍ່ໜ້າທີ່ຂອງຕົນທີ່ໄດ້ຮັບການມອບໝາຍປະສົບຜົນສຳເລັດເປັນຢ່າງດີ. ໂດຍລວມແລ້ວ ຄະນະພັກຮາກຖານກຸ່ມລົບປາກດີ ພວກເຮົາມີໜ່ວຍພັກຂຶ້ນກັບທັງໝົດ 13 ໜ່ວຍ, ມີຈຳນວນສະມາຊິກພັກທັງໝົດ 163 ສະຫາຍ ຍິງ 43 ສະຫາຍ, ຕະຫຼອດໄລຍະ 5 ປີຜ່ານມາສາມາດຂະຫຍາຍສະມາຊິກພັກໃໝ່ເພີ່ມຂຶ້ນ 20%, ມີສະມາຊິກພັກສົມບູນຈຳນວນ 155 ສະຫາຍ ຍິງ 30 ສະຫາຍ, ສະມາຊິກພັກສຳຮອງ 9 ສະຫາຍ ຍິງ 1 ສະຫາຍ; ໃນນີ້ ມີສະມາຊິກພັກແຂງຈຳນວນ 145 ສະຫາຍ ຍິງ 30 ສະຫາຍ ແລະ ກາງ 10 ສະຫາຍ.
ກອງປະຊຸມໃຫຍ່ ຄັ້ງທີ V ຄະນະພັກຮາກຖານກຸ່ມ ລົບປາກດີ ກໍໄດ້ມີການປ່ອນບັດຄັດເລືອກເອົາຄະນະພັກຮາກຖານຊຸດໃໝ່ ຊຶ່ງມີຜູ້ລົງສະໝັກຈຳນວນ 11 ສະຫາຍ, ເລືອກເອົາ 9 ສະຫາຍ, ຜູ້ແທນສົມບູນທີ່ເຂົ້າຮ່ວມກອງປະຊຸມ ໄດ້ເປັນຕົວແທນໃຫ້ແກ່ບັນດາສະມາຊິກພັກໃນທົ່ວກຸ່ມໃຊ້ສິດປະຊາທິປະໄຕຂອງຕົນປ່ອນບັດຄັດເລືອກ ແລະ ເປັນເອກະສັນເລືອກເອົາສະຫາຍ ນາງ ອ່ອນຄຳ ໂພທິສານ ເປັນລາຂາ, ສະຫາຍ ພູມາ ປັດຊາຈັກ ຮອງເລຂາ, ສະຫາຍ ບຸນປອນ ສີສຸພັນ ປະທານກວດກາ, ສະຫາຍ ດົງ ສຸກຈະເລີນ, ສະຫາຍ ສຸພີ ວົນນະລັງສີ, ສະຫາຍ ບຸນເຕີມ ຈຳປາແກ້ວມະນີ, ສະຫາຍ ອິນປອນ ເທບພະຈັນ, ສະຫາຍ ພັຕ ບຸນຮູ້ ສີເມືອງ ແລະ ສະຫາຍ ຮທ ບຸນມີ ທອງທະວີ ເປັນຄະນະ.
ຂ່າວ-ພາບ: ພຸດທະສິນ ວົງວິໄລທອງ
