ເພີ່ມທະວີມະຫາສາມັກຄີທົ່ວປວງຊົນ ທັງຊາດ


30.07.2019 14:45     

   ເພີ່ມທະວີມະຫາສາມັກຄີ ທົ່ວປວງຊົນທັງຊາດ ແມ່ນໜຶ່ງ ໃນບັນດາ 4 ຄຳຂັວນທີ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກ ໄດ້ວາງອອກໂດຍມີເນື້ອໃນຄວາມໝາຍສຳຄັນວ່າ: ການເພີ່ມທະວີມະຫາສາມັກຄີທົ່ວປວງຊົນລາວທັງຊາດ ເປັນໜ້າທີ່ຍຸດທະສາດຍາວນານຂອງພັກເຮົາ ໃນໄລ ຍະຜ່ານມາກໍຄືປັດຈຸບັນ ແລະ ໃນອະນາຄົດ, ຄວາມສາມັກຄີທົ່ວປວງຊົນໄດ້ເປັນ, ພວມເປັນ ແລະ ຈະເປັນກຳລັງແຮງສັງລວມ ແລະ ເປັນປັດໄຈຕັດສິນການຄົງຕົວ ແລະ ຂະຫຍາຍຕົວຂອງຊາດລາວເຮົາ ບົດຮຽນປະຫວັດສາດ ໄດ້ຊີ້ໃຫ້ເຫັນວ່າ ຈະແມ່ນຢູ່ປະເທດໃດກໍດີ ແລະ ພາກພື້ນໃດກໍດີ, ການສ້າງສາພັດທະນາຈະດຳເນີນໄປໄດ້ດ້ວຍດີ ແລະ ມີຜົນສຳເລັດ, ປະຊາຊົນບັນດາເຜົ່າຈະມີຄວາມອຸ່ນອຽນທຳມາຫາກິນ ກໍຕໍ່ເມື່ອ ປະເທດນັ້ນ ພາກພື້ນນັ້ນມີຄວາມສະຫງົບ, ປະຊາຊົນໃນປະເທດນັ້ນ ມີຄວາມສາມັກຄີເປັນອັນໜຶ່ງອັນດຽວກັນ ກົງກັນຂ້າມ ຫາກປະຊາຊົນໃນປະເທດນັ້ນ ເກີດຄວາມແຕກແຍກ, ຂັດແຍ່ງ, ແບ່ງພັກແຍກພວກປະເທດນັ້ນ ສັງຄົມນັ້ນ ກໍຈະເກີດມີຄວາມວຸ້ນວາຍ, ສັງຄົມບໍ່ມີຄວາມສະຫງົບ, ການ ທຳມາຫາກິນຂອງປະຊາຊົນ ແລະ ການສ້າງສາພັດທະນາປະເທດຊາດ ກໍຈະພົບຄວາມຫຍຸ້ງຍາກ ເພາະສະນັ້ນ ການເພີ່ມທະວີມະຫາສາມັກຄີເປັນເອກະພາບທົ່ວປວງຊົນພາຍໃນຊາດ ຈຶ່ງເປັນປັດໄຈພື້ນຖານຕັດສິນການຄົງຕົວ ແລະ ຂະຫຍາຍຕົວຂອງຊາດລາວເຮົາ.
ເພື່ອເຮັດໃຫ້ຄວາມສາມັກຄີທົ່ວປວງຊົນພາຍໃນຊາດ ມີ ຄວາມເປັນປຶກແຜ່ນແໜ້ນໜານັ້ນ ພວກເຮົາຕ້ອງເອົາໃຈໃສ່ບາງບັນຫາຄື:
- ເພີ່ມທະວີພັນທະພາບ ກຳມະກອນ, ຊາວກະສິກອນ, ນັກຮຽນຮູ້ປັນຍາຊົນປະຕິວັດ ໃຫ້ມີຄວາມແໜ້ນແກ່ນ.
- ຕັ້ງໜ້າປະຕິບັດສິດສະເໝີພາບ ແລະ ເສີມສ້າງຄວາມປອງດອງລະຫວ່າງເຜົ່າ ແລະ ຊັ້ນຄົນຕ່າງໆ, ກຳຈັດແກ້ໄຂທຸກປະກົດການ ແລະ ການກະທຳທີ່ຈະກໍໃຫ້ເກີດຄວາມຂັດແຍ່ງ, ຄວາມອາຄາດບາດໝາງກັນລະຫວ່າງເຜົ່າ ຫຼື ລະຫວ່າງຊັ້ນຄົນຕ່າງໆ.
- ເພີ່ມທະວີການສຶກສາ ອົບຮົມທົ່ວປວງຊົນໃຫ້ຮັບຮູ້ ແລະ ເຂົ້າໃຈຢ່າງເລິກເຊິ່ງກ່ຽວກັບມູນເຊື້ອແຫ່ງຄວາມສາມັກຄີຮັກແພງ, ເອື້ອເຟື້ອເພື່ອແຜ່ຊ່ວຍເຫຼືອກັນ ຢູ່ຮ່ວມກັນດ້ວຍ ຄວາມປອງດອງ ແລະ ພ້ອມພຽງກັນສ້າງສາພັດທະນາບ້ານ ຊ່ອງ ແລະ ປະເທດຊາດ.
- ເພີ່ມທະວີສະຕິລະວັງ ຕົວຕໍ່ການເຄື່ອນໄຫວຂອງອິດທິກຳລັງປໍລະປັກ ແລະ ພວກຄົນບໍ່ດີທີ່ຫວັງມ້າງເພທຳລາຍຄວາມສາມັກຄີປອງດອງລະ ຫວ່າງເຜົ່າ ແລະ ຊັ້ນຄົນຕ່າງໆ ສະກັດກັ້ນກົນອຸບາຍສວຍໃຊ້ ບັນຫາເຜົ່າ ແລະ ສາສະໜາເພື່ອແບ່ງແຍກຄວາມສາມັກຄີ ກໍຄວາມຫຍຸ້ງຍາກໃນສັງຄົມ.
- ຕັ້ງໜ້າເອົາໃຈໃສ່ຕໍ່ການປູກຈິດສຳນຶກກ່ຽວກັບຄວາມສາມັກຄີປອງດອງລະຫວ່າງເຜົ່າໃຫ້ຄົນຮຸ່ນສືບທອດ.
- ສ້າງໂອກາດ ແລະ ເງື່ອນໄຂໃຫ້ລູກຫຼານຂອງຊົນເຜົ່າຕ່າງໆ ໄດ້ຮັບການສຶກສາ ແລະ ມີວີຊາສະເພາະ.
- ສືບຕໍ່ປະຕິບັດນະໂຍບາຍຊຸກຍູ້ສົ່ງເສີມພະນັກງານ ຊົນເຜົ່າ.
- ສືບຕໍ່ປະຕິບັດນະໂຍບາຍສົ່ງເສີມເພດຍິງ, ຄວາມສະເໝີພາບລະຫວ່າງຍິງ-ຊາຍ.
- ເສີມຂະຫຍາຍສິດເປັນ ເຈົ້າຂອງປະຊາຊົນບັນດາເຜົ່າ, ຍົກລະດັບຄວາມຕື່ນຕົວການເມືອງໄປຄຽງຄູ່ກັບການປັບປຸງ ຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນບັນດາເຜົ່າ ໃຫ້ນັບມື້ນັບດີຂຶ້ນ.
- ສືບຕໍ່ປະຕິບັດນະໂຍບາຍອັນສະເໝີຕົ້ນສະເໝີປາຍ ຕໍ່ພີ່ນ້ອງເຊື້ອຊາດລາວຢູ່ຕ່າງ ປະເທດທີ່ມີຈິດໃຈຮັກເຊື້ອແພງຊາດ ໃຫ້ເຂົາເຈົ້າມີເງື່ອນໄຂປະກອບສ່ວນດ້ານສະຕິປັນຍາ, ຄວາມຮູ້ຄວາມສາມາດ ແລະ ທຶນຮອນເຂົ້າໃນການສ້າງສາພັດທະນາປະເທດຊາດ ສູ່ຄວາມວັດທະນະຖາວອນ.