ຫົວ​ຂໍ້ : ສາວນ້ອຍລາວ ໄດ້ແຊັມຂີ່ມ້າທີ່ປະເທດໄທ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 25/03/2020 08:55:03 ຈຳ​ນວນ​ຜູ້​ເຂົ້າ​ຢ້ຽມ​ຊົມ 750 ຄັ້ງ

  ນາງ ມຸທິຕາ ພົມ​ມະ​ຫານ ສາວ​ນ້ອຍ​ອາຍຸ​ພຽງ 13 ປີ ຕາງໜ້າ​ຈາກ ສປປ ລາວ ສ້າງ​ຜົນງານ​ໄດ້​ຢ່າງ​ໂດດ​ເດັ່ນ ແລະ ເປັນ​ຄັ້ງ​ປະຫວັດສາດ ໃນ​ວົງ​ການ​ກິລາ​ຂີ່​ມ້າ​ລາວ ສາມາດ​ຍາດ​ໄດ້​ແຊັມ​ການ​ແຂ່ງຂັນ​ຂີ່​ມ້າ​ຂ້າມ​ສິ່ງ​ກີດຂວາງ ຫຼື ລາຍການ “PONY THAILAND CHAMPION SHIP 2020” ໃນ​ຮຸ່ນ​ອາຍຸ 20 ປີ ຈັດ​ຂຶ້ນ​​ໃນຕົ້ນ​ເດືອນ​ມີນາ  ຢູ່​ແຂວງ​ຣະ​ຢອງ ປະເທດ​ໄທ ລາຍການ​ດັ່ງກ່າວ​ມີ​ນັກ​ກິລາ 50 ກວ່າ​ຄົນ ເຂົ້າ​ຮ່ວມ.
  ທ່ານ ສົມ​ພອນ ແສງ​ສຸ​ລີ ຄູ​ຝຶກ ແລະ ທັງ​ເປັນ​ຜູ້ນຳ​ພາຄະ​ນະ​ເຂົ້າ​ຮ່ວມ​ລາຍການ​ດັ່ງກ່າວ ໄດ້​ລາຍ​ງານ​ໃຫ້​ຮູ້​ວ່າ: ລາຍການ​ດັ່ງກ່າວ​ເປັນ​ລາຍການ​ຊີງ​ແຊັມ​ທົ່ວ​ປະເທດ​ໄທ ແຕ່​ປີ​ນີ້​ເປັນ​ປີ​ທີ 2 ທີ່​ເຈົ້າພາບ​ໄດ້​ເຊີນ​ນັກກິລາ​ຈາກ​ລາວ​ເຂົ້າ​ຮ່ວມ ເນື່ອງ​ຈາກ​ລາວ​ເຮົາ​ຍັງ​ບໍ່​ທັນ​ມີ​ສະຫະພັນ​ກິລາ​ປະເພດ​ນີ້ ແລະ ຍັງ​ຂາດ​ຜູ້​ສະໜັບສະໜູນ ແຕ່​ຍ້ອນ​ຢາກ​ສົ່ງເສີມ​ນັກກິລາ​ພວກ​ເຮົາ ຈຶ່ງ​ໄດ້​ສົ່ງນັກກິລາ 2 ຄົນ ກໍ​ຄື ນາງ ມຸທິຕາ ພົມ​ມະ​ຫານ ແລະ ນາງ ສົມ​ພູ ແສງ​ສຸ​ລີ ໄດ້​ຮັບ​ໂອກາດ​ເຂົ້າ​ແຂ່ງຂັນ ທັງ​ສອງ​ມີ​ອາຍຸ​ພຽງ​ແຕ່ 13 ປີ​ເທົ່າ​ກັນ ເຂົ້າ​ຮ່ວມ​ແຂ່ງຂັນ​ລາຍການ​ດຽວ ກໍ​ຄື ລາຍການ Jumping show class boptimum time ທັງ​ນີ້ ກໍ​ຖື​ວ່າ​ເປັນ​ການ​ຫາ​ປະສົບ​ການ​ໃໝ່ໆ ຫຼັງ​ຈາກ​ປີ​ກ່ອນ​ກໍ​ໄດ້​ຮັບ​ເຊີນ​ຈາກ​ເຈົ້າພາບ ແຕ່​ບໍ່​ປະສົບ​ຜົນສຳເລັດ ແຕ່​ປີ​ນີ້​ແມ່ນ​ຜົນງານ​ເກີນ​ຄາດໝາຍຜ່ານ​ການ​ແຂ່ງຂັນ​ປະກົດ​ວ່າ: ຮອບ​ຄັດ​ເລືອກ​ມື້​ທີ 1 ນາງ ມຸທິຕາ ກັບ ນາງ ສົມ​ພູ ສາມາດ​ຍາດ​ໄດ້​ອັນ​ດັບ​ທີ 4 ແລະ ທີ 5 ຕາມ​ລຳດັບ ແລະ ຮອບ​ຄັດ​ເລືອກ​ມື້​ທີ 2 ໄດ້​ນາງ ສົມ​ພູ ຍາດ​ອັນ​ດັບ​ທີ 5 ແຕ່ ນາງ ມຸທິຕາ ບໍ່​ຕິດ​ອັນ​ດັບ ຈາກ​ຜົນງານ​ຮອບ​ຄັດ​ເລືອກ ເຮັດ​ໃຫ້​ທັງ 2 ຜ່ານ​ເຂົ້າ​ໄປ​ຊີງ​ໄຊ​ໃນ​ຮອບ​ສຸດ​ທ້າຍ ປະກົດ​ວ່າ ນາງ ມຸທິຕາ ສາມາດ​ຍາດ​ໄດ້​ແຊັມ ສ່ວນ ນາງ ສົມ​ພູ ແມ່ນ​ໄດ້​ອັນ​ດັບ​ທີ 8 ສະຫຼຸບ​ນັກກລາ​ຈາກ​ລາວ ສາມາດ​ຕິດ​ອັນ​ດັບ​ໄດ້​ທຸກໆ​ມື້ ເປັນ​ຜົນສຳເລັດ​ເກີນ​ຄວາມ​ຄາດ​ຫວັງ ເຖິງ​ຢ່າງໃດ​ກໍ​ດີ ພວກ​ເຮົາ​ຈະ​ນຳ​ເອົາ​ປະສົບ​ການ​ເຫຼົ່າ​ນີ້ ໄປ​ພັດທະນາ​ຢ່າງ​ຕໍ່​ເນື່ອງ ເພື່ອ​ສົ່ງເສີມ​ການ​ຮັກສາ​ມູນເຊື້ອ​ໃຫ້​ນັກ​ກິລາ​ມີ​ປະສົບ​ການ​ເພີ່ມ​ຂຶ້ນ ແລະ ຈະ​ໄດ້​ເຂົ້າ​ຮ່ວມ​ແຂ່ງຂັນ​ລາຍການ​ອື່ນໆ​ອີກ​ໃນ​ຄັ້ງ​ຕໍ່ໆ​ໄປ ໂດຍ​ສະເພາະ​ໃນ​ເດືອນ​ພຶດສະພາ 2020 ກໍ​ຈະ​ມີ​ການ​ແຂ່ງຂັນ​ຊີງ​ແຊັມ​ປະເທດ​ໄທ ແລະ ທາງ​ສະມາຄົມ​ກິລາ​ຂີ່​ມ້າ​ໄທ ກໍ​ໄດ້​ເຊີນ​ທາງ​ສະມາຄົມ​ກິລາ​ສັດ​ລາວ ເຂົ້າ​ຮ່ວມ​ອີກ​ຄັ້ງ.
(ຂ່າວ:ວົງ​ຈອນ​ກິລາ)
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110