ຫົວ​ຂໍ້ : ຄຳມ່ວນ ຈະສູ້ຊົນເຮັດໃຫ້ການປົກຫຸ້ມ ຂອງປ່າກວມ 70%

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 26/03/2020 09:43:02 ຈຳ​ນວນ​ຜູ້​ເຂົ້າ​ຢ້ຽມ​ຊົມ 334 ຄັ້ງ

   ກອງ​ປະຊຸມ​ໃຫຍ່ ຄັ້ງທີ VII ຂອງ​ຄະນະ​ພັກ​ຮາກ​ຖານ​ພະ​ແນ​ກ​ກະ​ສິ​ກໍາ ແລະ ປ່າໄມ້​ແຂວງ​ຄໍາ​ມ່ວນ ໄດ້​ເປີດ​ຂຶ້ນ​ເມື່ອ​ບໍ່​ດົນ​ມາ​ນີ້ ໂດຍ​ການ​ເປັນ​ປະ ທານ​ຂອງ​ສະຫາຍ ບຸນ​ຈັນ ໄຊ​ປັນຍາ ເລຂາ​ຄະນະ​ພັກ​ຮາກ​ຖານ ຫົວໜ້າ​ພະ​ແນ​ກ​ກະສິກຳ ແລະ ປ່າໄມ້​ແຂວງ, ເປັນ​ກຽດ​ເຂົ້າ​ຮ່ວມ​ມີ​ສະຫາຍ ໂອ​ໄດ ສຸດາ​ພອນ ກຳມະການ​ສູນ​ກາງ​ພັກ, ເລຂາ​ພັກ​ແຂວງ ເຈົ້າແຂວງ​ຄຳ​ມ່ວນ, ມີ​ບັນດາ​ເລຂາ​ພັກ​ຮາກ​ຖານ​ພະແນກການ​ອ້ອມ​ຂ້າງ, ໜ່ວຍ​ພັກ​ຫ້ອງການ​ກະສິກຳ ແລະ ປ່າໄມ້ 10 ເມືອງ ຕະຫຼອດ​ເຖິງ​ສະມາຊິກ​ພັກ​ຈຳນວນ 204 ສະຫາຍ​ໃນ​ທົ່ວ​ຮາກ​ຖານ​ເຂົ້າ​ຮ່ວມ.
   ສະຫາຍ ບຸນ​ຈັນ ໄຊ​ປັນຍາ ໄດ້​ກ່າວ​ເປີດ​ກອງ​ປະຊຸມ​ຢ່າງ​ເປັນ​ທາງ​ການ ພ້ອມ​ທັງ​ຜ່ານ​ຮ່າງ​ບົດ​ລາຍ​ງານ​ການເມືອງ ຕີ​ລາຄາ​ຜົນສຳເລັດ​ການຈັດຕັ້ງ​ປະຕິບັດ​ວຽກ​ງານ​ໃນ​ໄລຍະ 5 ປີຜ່ານມາ ​ຊຶ່ງ​ໄດ້​ຍົກ​ໃຫ້​ເຫັນຮາກ​ຖານ​ພັກ​ພະ​ແນ​ກ​ກະ ສິກຳ ແລະ ປ່າໄມ້​ແຂວງ ມີ​ຄະນະ​ພັກ 5 ສະຫາຍ, ຍິງ 1 ສະຫາຍ, ມີ 12 ໜ່ວຍ​ພັກ​ຂຶ້ນ​ກັບ, ສະມາຊິກ​ພັກ​ທັງ​ໝົດ 214 ສະຫາຍ, ຍິງ 61 ສະ​ຫາຍ. ໃນ​ໄລຍະ​ຜ່ານ​ມາ ຄະນະ​ພັກ​ໄດ້​ເອົາໃຈໃສ່​ໃນ​ການ​ຊີ້​ນຳ​-​ນຳພາ ວຽກ​ງານ ສຶກສາ​ອົບຮົມ​ທາງ​ດ້ານ​ການເມືອງ​ແນວ​ຄິດ ຕິດ​ພັນ​ກັບ​ການເຄື່ອນໄຫວ​ທາງ​ດ້ານ​ວຽກ​ງານ​ວິຊາ​ສະເພາະ​ເປັນຕົ້ນ​ແມ່ນ ວຽກ​ງານ​ການ​ປູກຝັງ ດ້ານ​ການ​ຜະລິດ​ເຂົ້າ ບັນລຸ​ໄດ້ 307.620 ໂຕນ, ເທົ່າ​ກັບ 83,70% ແຜນການ, ເນື້ອທີ່​ເກັບ​ກ່ຽວ 80.013 ເຮັກຕາ, ເທົ່າ​ກັບ 84,54%, ສະເລ່ຍ​ເຂົ້າເປືອກ​ຕໍ່​ຄົນ ໄດ້ 720 ກິ ໂລ​ຕໍ່​ຄົນ​ຕໍ່​ປີ, ມີ​ສ່ວນ​ແຮ​ໄວ້ 189.422 ໂຕນ, ການ​ປູກ​ພືດ​ສໍາ​ຮອງ ບັນລຸ​ໄດ້ 129.778 ໂຕນ, ລື່ນ​ແຜນການ 6,40% ໃນ​ນີ້​ປູກ​ຫຼາຍ​ກ່​ວາ​ໝູ່​ແມ່ນ: ສາ ລີ​ຫວານ, ມັນຕົ້ນ, ກ້ວຍ​ຫອມ, ອ້ອຍ, ຢາສູບ ແລະ ພືດ​ຜັກ​ຊະນິດ​ຕ່າງໆ. ດ້ານ​ວຽກ​ງານ​ການ​ລ້ຽງສັດ ແລະ ການ​ປະມົງ ແມ່ນ​ໄດ້​ເອົາໃຈໃສ່​ໃນ​ການ​ຊຸກຍູ້​ການ​ລ້ຽງສັດ​ແບບ​ເປັນ​ຟາມ, ວາງ​ແຜນການ​ລ້ຽງສັດ, ການ​ຄຸ້ມ ແລະ ຮັກສາ​ສຸຂະພາບ​ສັດ ເຮັດ​ໃຫ້ການ​ລ້ຽງສັດ​ໄດ້​ມີ​ການ​ຂະຫຍາຍຕົວ​ຕາມ​ລຳດັບ, ສາມາດ​ຕອບ​ສະໜອງ ຊີ້ນ, ປາ, ໄຂ່ ໂດຍ​ສະເລ່ຍ​ການ​ບໍລິໂພກ​ໄດ້ 59,85 ກິໂລ​ຕໍ່​ຄົນ​ຕໍ່​ປີ ລື່ນ​ແຜນການ 5,35 ກິ​ໂລ​ຕໍ່​ຄົນ​ຕໍ່​ປີ, ວຽກ​ງານ​ພັດທະນາ​ຊົນ​ນະ​ບົດ. ມາ​ຮອດ​ປັດຈຸ​ບັນ​ແຂວງ​ຄຳ​ມ່ວນ​ມີ 569 ບ້ານ, ໄດ້​ປະກາດ​ບ້ານ​ພັດທະນາ 432 ບ້ານ ເພີ່ມ​ຂຶ້ນ 12%, ມີ​ຄອບຄົວ​ພັດທະນາ 71.960 ຄອບຄົວ, ຄອບຄົວ​ທຸກ​ຍາກ​ຍັງ​ເຫຼືອ 763 ຄອບຄົວ, ບ້ານ​ທຸກ​ຍາກ 10 ບ້ານ, ຫຼຸດ​ລົງ 2 ບ້ານ. ພິເສດ​ແມ່ນ​ໄດ້​ປະກາດ​ຮັບຮອງ​ເອົາ​ບ້ານ ແລະ ຄອບຄົວ​ແບບຢ່າງ​ທາງ​ດ້ານ​ກະສິກຳ ແລະ ປ່າໄມ້ 68 ບ້ານ, ມີ 8.382 ຄອບຄົວ. ສຳລັບ​ແຜນການ 5 ປີ​ຕໍ່ໜ້າ ສູ້​ຊົນ​ຜະລິດ​ເຂົ້າ​ໃຫ້​ໄດ້ 422.984 ໂຕ່ນ, ສະເລ່ຍ​ໃສ່​ຫົວ​ຄົນ 930 ກິໂລ, ຜະລິດ​ພືດ​ໃຫ້​ໄດ້ 147.281 ໂຕ່ນ, ຜະລິດ​ຊີ້ນ, ປາ, ໄຂ່ ເພື່ອ​ບໍລິໂພກ​ໃຫ້​ໄດ້ 63 ກິໂລ​ຕໍ່​ຄົນ​ຕໍ່​ປີ, ຮອດ​ປີ 2024 ເຮັດ​ໃຫ້​ອັດຕາ​ສ່ວນ​ການ​ປົກ​ຫຸ້ມ​ຂອງ​ປ່າໄມ້​ກວມ​ເອົາ 70% ໃນ​ເນື້ອທີ່​ປ່າໄມ້​ທົ່ວ​ແຂວງ 1.142.050 ເຮັກຕາ, ສ້າງ​ເມືອງ​ເຂັ້ມແຂງ​ຮອບດ້ານ​ໃຫ້​ໄດ້ 3 ເມືອງ, ສ້າງ​ບ້ານ​ໃຫຍ່​ໃຫ້ການ​ເປັນ​ຕົວ​ເມືອງ​ນ້ອຍ​ໃນ​ຊົນນະບົດ​ໃຫ້​ໄດ້ 4 ຈຸດ​ສຸມ, ສ້າງ​ບ້ານ​ພັດທະນາ​ໃຫ້​ໄດ້ 50 ບ້ານ, ສ້າງ​ຄອບຄົວ​ພັດທະນາ 3.000 ຄອບຄົວ, ສ້າງ​ບ້ານ​ແບບຢ່າງ​ດ້ານ​ກະ​ສິກຳໃຫ້​ໄດ້ 50 ບ້ານ ແລະ 3.500 ຄອບ​ຄົວ. ກອງ​ປະຊຸມ​ຄັ້ງ​ນີ້ ຍັງ​ໄດ້​ປ່ອນ​ບັດ​ເລືອກ​ເອົາ​ຄະນະ​ພັກ ຊຸດ​ໃໝ່ ​ ຊຶ່ງ​ກອງ​ປະຊຸມ ໄດ້​ເຫັນ​ດີ​ເປັນ​ເອກະ​ພາບ​ກັນ​ເລືອກ​ເອົາ​ສະຫາຍ   ບຸນ​ຈັນ ໄຊ​ປັນຍາ ເປັນ​ເລຂາ​ພັກ​ຮາກ​ຖານ, ສະຫາຍ ສຸ​ກັນ ອິນ​ທະນຸ​ຮັກ ເປັນ​ຮອງ, ສະຫາຍ ຄຳ​ພັນ ອ່ອນ​ດາລາ, ສະຫາຍ ນົງຄານ ແສງ​ສຸລິນ, ສະຫາຍ ຄຳ​ແສງ ແສງ​ທອງ​ນາ​ລິນ, ສະຫາຍ ຄຳ​ແກ້ວ ລັດ​ຖະ​ຍອດ ແລະ ສະຫາຍ ສິລິ​ຄອນ ຂຸນ​ໂນ​ລາດ ເປັນ​ຄະນະ​ພັກ​ຊຸດໃໝ່. ໃນ​ນີ້​ໄດ້​ເຫັນ​ດີ​ເປັນ​ເອກະ​ພາບ​ເລືອກ​ເອົາ​ສະຫາຍ ສຸ​ກັນ ອິນ​ທະນຸ​ຮັກ ເປັນ​ປະທານ​ກວດກາ​ພັກ ແລະ ສະຫາຍ ຄຳ​ພັນ ອ່ອນ​ດາລາ ເປັນ​ຮອງ​ປະທານ​ກວດກາ​ພັກ.
(ຂ່າວ: ກອງ​ຄຳ)

 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110