ໜັງສືພິມ ປະຊາຊົນ

ໄຊຍະບູລີ ປະກາດການຈັດຕັ້ງ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 06/05/2020 10:14:11 ຈຳນວນຢ້ຽມຊົມ 3924 ຄັ້ງ

ໃນວັນທີ 5 ພຶດສະພານີ້, ແຂວງໄຊຍະບູລີ ໄດ້ຈັດພິທີປະກາດການຈັດຕັ້ງພະນັກງານການນໍາ ອອກພັກການຮັບອຸດໜູນບໍານານ ແລະ ແຕ່ງຕັ້ງພະນັກງານຫຼັກແຫຼ່ງພະແນກການ - ອົງການ ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງ ໂດຍເປັນກຽດເຂົ້າຮ່ວມຂອງທ່ານ ສົມລິດ ເປືອກແກ້ວ ຮອງເລຂາພັກແຂວງ ປະທານສະພາປະຊາຊົນແຂວງ, ມີພະນັກງານການນໍາ, ຫົວໜ້າ ແລະ ຮອງຫົວໜ້າພະແນກການ ພ້ອມດ້ວຍພະນັກງານຫຼັກແຫຼ່ງຈາກພະແນກທີ່ກ່ຽວຂ້ອງເຂົ້າຮ່ວມ.
ໃນພິທີ, ທ່ານ ຄໍາສີ ແພງສະຫວັນ ຫົວໜ້າພະແນກພາຍໃນແຂວງ ໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າແຂວງໄຊຍະບູລີ ສະບັບເລກທີ 1357 ວ່າດ້ວຍການອະນຸມັດໃຫ້ ທ່ານ ບຸນລື ສົມສັກດີ ຮອງຫົວໜ້າພະແນກຍຸຕິທໍາແຂວງ ອອກພັກການຮັບອຸດໜູນບໍານານ. ຈາກນັ້ນ, ທ່ານ ຈັນເພັງ ແສນຄໍາ ຮອງຫົວໜ້າຄະນະຈັດຕັ້ງແຂວງໄຊຍະບູລີ ໄດ້ຂຶ້ນຜ່ານຂໍ້ຕົກລົງຂອງ ທ່ານເຈົ້າແຂວງໄຊຍະບູລີ ວ່າດ້ວຍການໂຍກຍ້າຍ, ສັບຊ້ອນ ແລະ ແຕ່ງຕັ້ງພະນັກງານ ຢູ່ບັນດາພະແນກການອ້ອມຂ້າງແຂວງ ໃນນີ້ໄດ້ໂຍກຍ້າຍ ທ່ານ ນາງ ສົມຈັນ ບຸດດີ ຮອງປະທານສະຫະພັນກໍາມະບານແຂວງ ໄປຮັບໜ້າທີ່ໃໝ່ເປັນຮອງປະທານອົງການແນວລາວສ້າງຊາດແຂວງ, ໂຍກຍ້າຍ ທ່ານ ນາງ ພູນເພັດ ກິ່ງແກ້ວ ຮອງຫົວໜ້າຄະນະຈັດຕັ້ງແຂວງ ໄປຮັບໜ້າທີ່ໃໝ່ເປັນຮອງເລຂາໜ່ວຍພັກ ຮອງປະທານສະຫະພັນແມ່ຍິງແຂວງ, ສັບຊ້ອນ ແລະ ແຕ່ງຕັ້ງ ທ່ານ ນາງ ມະນິ ພອນ ຄໍາພູວົງ ຮອງຫົວໜ້າຫ້ອງການບໍລິຫານ, ແຜນການ - ການເງິນ ແລະ ຮ່ວມມືສາກົນຂຶ້ນເປັນຫົວໜ້າຫ້ອງການບໍລິຫານ, ແຜນການ - ການເງິນ ແລະ ຮ່ວມມືສາກົນ ທີ່ຂຶ້ນກັບພະແນກຍຸຕິທໍາແຂວງ, ສັບຊ້ອນ ແລະ ແຕ່ງຕັ້ງ ທ່ານ ສົມລິດ ອ່ອນຕາ ອະດີດຫົວໜ້າຫ້ອງການບໍລິຫານ, ແຜນ ການ - ການເງິນ ແລະ ຮ່ວມມືສາກົນ ພະແນກຍຸຕິທໍາແຂວງ ຂຶ້ນເປັນຮອງຫົວໜ້າພະແນກຍຸຕິທໍາແຂວງ ແລະ ໂຍກຍ້າຍ ທ່ານ ອຸ່ນເຮືອນ ຍອດແກ້ວ ອະດີດຫົວໜ້າຂະແໜງສົ່ງເສີມ ວຽກງານຍຸຕິທໍາ ພະແນກຍຸຕິທໍາແຂວງ ໄປຮັບໜ້າທີ່ໃໝ່ຢູ່ໂຮງຮຽນການເມືອງ ແລະ ການປົກຄອງແຂວງ.
ໂອກາດດັ່ງກ່າວ ທ່ານ ສົມລິດ ເປືອກແກ້ວ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ບັນດາສະຫາຍຍາດມາໄດ້; ພ້ອມທັງເນັ້ນໜັກວ່າ: ການອະນຸມັດໃຫ້ພະນັກງານອອກພັກຜ່ອນຮັບເບ້ຍບໍານານ ແມ່ນເປັນ ການປະຕິບັດນະໂຍບາຍຢ່າງຖືກ ຕ້ອງຂອງພັກ-ລັດ, ຕໍ່ພະນັກງານ - ລັດຖະກອນ ທີ່ຮອດອາຍຸກະສຽນ ທີ່ໄດ້ກໍານົດໄວ້ໃນລະບຽບກົດໝາຍ. ພ້ອມດຽວກັນ, ການໂຍກຍ້າຍ, ສັບ ຊ້ອນ ແລະ ແຕ່ງຕັ້ງພະນັກງານໃນຄັ້ງນີ້ ແມ່ນເປັນການປັບປຸງກົງຈັກການຈັດຕັ້ງ ໃຫ້ມີຄວາມໜັກແໜ້ນທາງດ້ານການເມືອງ-ແນວຄິດ, ເຂັ້ມແຂງທາງດ້ານການຈັດຕັ້ງ, ສາ ມາດຕອບສະໜອງໄດ້ຕາມຄວາມຮຽກຮ້ອງຕ້ອງການ ຂອງໜ້າທີ່ການ ເມືອງໃນໄລຍະໃໝ່; ໂດຍເນັ້ນໜັກໃຫ້ຜູໄດ້ຮັບການແຕ່ງຕັ້ງມອບໝາຍໜ້າທີ່ໃໝ່ ຈົ່ງສືບຕໍ່ນໍາພາຈັດຕັ້ງປະຕິບັດ ວຽກງານວິຊາສະເພາະ ໃຫ້ມີຜົນສໍາເລັດຕາມການມອບໝາຍ.
(ຂ່າວ: ສາຄອນ ໄຊສົມຮັກສາ)

ຂ່າວທີ່ໄດ້ຮັບຄວາມນິຍົມ