ໜັງສືພິມ ປະຊາຊົນ

ກອງປະຊຸມໃຫຍ່ໜ່ວຍພັກ ບໍລິຫານ - ການເງິນ ຫ້ອງວ່າການແຂວງໄຊຍະບູລີ ຄັ້ງທີ III

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 23/06/2020 09:58:12 ຈຳນວນຢ້ຽມຊົມ 2825 ຄັ້ງ

ກອງປະຊຸມໃຫຍ່ ຄັ້ງທີ III ຂອງໜ່ວຍພັກ ບໍລິຫານ-ການເງິນ ຫ້ອງວ່າການແຂວງໄຊຍະບູລີ ໄດ້ຈັດຂຶ້ນເມື່ອບໍ່ດົນ ຜ່ານມາ ທີ່ສະໂມສອນຫ້ອງວ່າການແຂວງໄຊຍະບູລີ ໂດຍການເຂົ້າຮ່ວມຂອງສະຫາຍ ເພັດພິໄຊ ສູນວິໄລ ກໍາມະການພັກແຂວງ ເລຂາຄະນະພັກຮາກຖານ ຫົວໜ້າຫ້ອງວ່າການແຂວງ, ມີແຂກຮັບເຊີນຈາກໜ່ວຍພັກອ້ອມຂ້າງເຂົ້າຮ່ວມ.
ສະຫາຍ ໂອນາ ທອງດາ ເລຂາໜ່ວຍພັກ ຮອງຫົວໜ້າຫ້ອງວ່າການແຂວງໄດ້ກ່າວເປີດກອງປະຊຸມ ພ້ອມທັງຜ່ານຮ່າງບົດລາຍງານການເມືອງທັງສອງພາກ ຊຶ່ງໄດ້ຍົກໃຫ້ເຫັນຜົນງານດ້ານດີ, ດ້ານອ່ອນ, ຂໍ້ ຄົງຄ້າງ ແລະ ບົດຮຽນທີ່ຖອດຖອນໄດ້ຈາກການປະຕິບັດໜ້າ ທີ່ວຽກງານວິຊາສະເພາະໃນໄລ ຍະ 5 ປີທີ່ຜ່ານມາ, ໜ່ວຍພັກ ບໍລິຫານ-ການເງິນເປັນໜ່ວຍພັກໜຶ່ງທີ່ເຄື່ອນໄຫວພາຍໃຕ້ການຊີ້ນຳໂດຍກົງຂອງຄະນະພັກຮາກຖານຫ້ອງວ່າການແຂວງ, ມີພາລະບົດບາດເປັນເສນາທິການໃຫ້ແກ່ຄະນະພັກຮາກຖານຫ້ອງວ່າການແຂວງ ແລະ ເປັນແກນນຳໃນການສຶກສາອົບຮົມດ້ານການເມືອງ - ແນວຄິດ ໃຫ້ແກ່ສະມາຊິກພັກ, ພະນັກງານ-ລັດຖະກອນ ປະຕິບັດແນວທາງຂອງພັກ, ກົດລະບຽບຂອງພັກ, ມະຕິ, ຄຳສັ່ງ, ຂໍ້ກໍານົດຕ່າງໆຂອງພັກ ແລະ ບັນດານິຕິກຳຕ່າງໆຂອງລັດມີຜົນສຳເລັດເປັນຢ່າງດີ, ໜ້າທີ່ການເມືອງຕົ້ນຕໍແມ່ນເຄື່ອນໄຫວວຽກງານບໍລິຫານຮັບໃຊ້, ຮັບແຂກທັງພາຍໃນ ແລະ ຕ່າງປະເທດ, ເອື້ອອຳນວຍຄວາມສະດວກທຸກໆດ້ານໃນ ການເຄື່ອນໄຫວປະຕິບັດໜ້າ ທີ່ໃຫ້ແກ່ການນຳພາຍໃນແຂວງ, ຮັບຜິດຊອບວຽກງານຄຸ້ມຄອງ-ສຳເນົາເອກະສານຂາເຂົ້າ-ຂາອອກ, ຕິດຕາມການຈໍລະຈອນເອກະສານຜ່ານປະຕູດຽວທີ່ເຂົ້າ - ອອກຫ້ອງການ, ເກັບກໍາ, ຕິດຕາມ ແລະ ຂຽນຂ່າວການເຄື່ອນໄຫວຂອງການນໍາແຂວງສົ່ງໃຫ້ໜັງສືພິມ, ວາລະສານ, ສະຖານີວິ ທະຍຸ ແລະ ໂທລະພາບຂອງແຂວງ ແລະ ສູນກາງ, ປັບປຸງ ແລະ ກໍ່ສ້າງພາຍໃນພັກ ຕາມກົດລະບຽບພັກ, ຂະຫຍາຍສະມາຊິກພັກພາຍໃນໜ່ວຍໃຫ້ມີຄວາມເຂັ້ມແຂງ, ໜັກແໜ້ນ, ຮັບປະກັນເຮັດຫຼ້ອນໜ້າທີ່ການເມືອງ ແລະ ວິຊາສະເພາະທີ່ໄດ້ຮັບມອບໝາຍ, ເປັນໃຈກາງປະສານສົມທົບກັບບັນດາຂະແໜງການພາຍໃນ ແລະ ພາຍນອກ ໃນການກະກຽມຮັບໃຊ້ວຽກງານຕ່າງໆ.
ກອງປະຊຸມຍັງໄດ້ປ່ອນບັດເລືອກຕັ້ງເອົາຄະນະໜ່ວຍພັກຊຸດໃໝ່ ໂດຍມີຜູ້ຮັບສະ ໝັກ 5 ສະຫາຍ, ເລືອກເອົາ 3 ສະຫາຍ, ກອງປະຊຸມໄດ້ເປັນເອກະພາບກັນຮັບຮອງເອົາສະຫາຍ ໂອນາ ທອງດາ ເປັນເລຂາໜ່ວຍພັກ, ສະຫາຍ ທອງສະຫວັດ ຈັນທະລາ ເປັນຮອງເລຂາ ແລະ ສະຫາຍ ນາງ ສຸດດາວອນ ພົມສີ ເປັນປະທານກວດກາໜ່ວຍພັກຊຸດໃໝ່.
(ຂ່າວ-ພາບ: ອຸ່ນເຮືອນ ໂພທິລັກ)

ຂ່າວທີ່ໄດ້ຮັບຄວາມນິຍົມ