ໜັງສືພິມ ປະຊາຊົນ

ສຳເລັດກອງປະຊຸມໃຫຍ່ສະມາຊິກພັກ ຄັ້ງທີ IV ຄະນະພັກຮາກຖານ ສທຄ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 02/07/2020 09:07:54 ຈຳນວນຢ້ຽມຊົມ 2817 ຄັ້ງ

ກອງປະຊຸມໃຫຍ່ສະມາ ຊິກພັກ ຄັ້ງທີ IV ຂອງຄະນະພັກຮາກຖານສະຖາບັນການທະນາຄານ (ສທຄ) ໄດ້ສໍາເລັດລົງເມື່ອບໍ່ດົນມານີ້ ທີ່ສະໂມ ສອນ ສທຄ ນະຄອນຫຼວງວຽງຈັນ ພາຍໃຕ້ການເປັນປະທານຂອງສະຫາຍ ສັນຕິ ພົນເມືອງລາວ ເລຂາຄະນະພັກຮາກຖານ - ຫົວໜ້າ ສທຄ ໂດຍການໃຫ້ກຽດເຂົ້າຮ່ວມຂອງສະຫາຍ ສອນ ໄຊ ສິດພະໄຊ ກໍາມະການສໍາຮອງສູນກາງພັກ ເລຂາຄະນະພັກ - ຜູ້ວ່າການທະນາຄານແຫ່ງ ສປປ ລາວ (ທຫລ), ມີພາກສ່ວນກ່ຽວ ຂ້ອງເຂົ້າຮ່ວມ.
ກອງປະຊຸມ ໄດ້ພ້ອມກັນຄົ້ນຄວ້າ ແລະ ຮັບຮອງເອົາຮ່າງລາຍງານການເມືອງຂອງຄະນະພັກຮາກຖານ ສທຄ ທີ່ສະເໜີ ໂດຍສະຫາຍ ນາງ ພຸດສະດີ ພົມພິພັກ ຄະນະພັກຮາກຖານ ສທຄ ທີ່ໄດ້ສັງເກດຕີລາຄາຜົນງານໃນການຈັດ ຕັ້ງປະຕິບັດມະຕິກອງປະຊຸມ ໃຫຍ່ ຄັ້ງທີ III ຕະຫຼອດໄລຍະ 5 ປີແຫ່ງການຊີ້ນໍາ-ນໍາພາ ຊຶ່ງຢູ່ໃນເງື່ອນໄຂສະພາບແວດລ້ອມພາຍໃນ ແລະ ຕ່າງປະ ເທດມີການຜັນແປ ໂດຍສະ ເພາະ ພະຍາດລະບາດ, ການຜັນຜວນຂອງອັດຕາແລກປ່ຽນ ແລະ ອັດຕາດອກເບ້ຍ. ແຕ່ພາຍໃຕ້ການຊີ້ນໍາ-ນໍາພາຢ່າງໃກ້ຊິດຂອງຄະນະພັກ - ຄະນະຜູ້ວ່າ ທຫລ, ຄະນະພັກຮາກຖານ ສທຄ ໄດ້ມີຄວາມພະ ຍາຍາມປຸກລະດົມກໍາລັງແຮງພາຍໃນ ເພື່ອຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ III ຂອງອົງຄະນະພັກ ທຫລ ໂດຍສະເພາະສຸມໃສ່ຈັດຕັ້ງປະຕິບັດມະຕິກອງປະຊຸມໃຫຍ່ຂອງຕົນ ແລະ ແຜນຍຸດທະສາດໄລຍະຍາວຂອງ ສທຄ ດ້ວຍຜົນສໍາເລັດຫຼາຍດ້ານ.
ຄະນະພັກຮາກຖານ ຖືເອົາການສຶກສາອົບຮົມການເມືອງ-ແນວຄິດເປັນບັນຫາກົກ ແລະ ຕິດພັນກັບທຸກການ ເຄື່ອນໄຫວວຽກງານດ້ວຍຫຼາຍຮູບການທີ່ເໝາະສົມ ເຮັດໃຫ້ສະມາຊິກພັກ - ພະນັກງານກຳ ໄດ້ແນວທາງນະໂຍບາຍຂອງພັກ ແລະ ຖືເອົາລະບອບສ່ອງແສງສາຍງານ, ກໍາສະພາບແຕ່ລະບັນຫາໃຫ້ຈະແຈ້ງ ເປັນເນື້ອໃນສໍາຄັນໃນການດໍາເນີນຊີວິດການເມືອງພາຍໃນພັກ ແລະ ອົງການຈັດຕັ້ງມະຫາ ຊົນ ເພື່ອສໍາຫຼວດກວດກາ, ຕໍານິກໍ່ສ້າງຊ່ວຍເຫຼືອກັນ. ຈາກການປະຕິບັດຄືດັ່ງກ່າວ ເຮັດໃຫ້ສະພາບແນວຄິດຂອງຖັນແຖວ ສະມາຊິກພັກ - ພະນັກງານແຕ່ລະຂັ້ນ ມີແນວຄິດອຸ່ນອ່ຽນທຸ່ນທ່ຽງ, ມີຄວາມເປັນເອກະພາບ ຕໍ່ກັບແນວທາງການບໍລິຫານງານຂອງຂັ້ນເທິງ, ມີຄວາມຫ້າວຫັນ, ສຸມກໍາລັງເຫື່ອແຮງ, ສະຕິປັນຍາເຂົ້າໃນການປະຕິ ບັດໜ້າທີ່ ທີ່ໄດ້ຮັບມອບໝາຍເປັນຢ່າງດີ.
ສທຄ ໄດ້ປັບປຸງຕໍາລາຮັບໃຊ້ການຮຽນ-ການສອນໃນແຕ່ລະພາກຮຽນໃຫ້ມີຄວາມສົມບູນທາງດ້ານເນື້ອໃນ, ປະ ລິມານ ແລະ ຄຸນນະພາບ ຊຶ່ງສໍາເລັດການສ້າງ, ຮຽບຮຽງ, ປັບປຸງຕໍາລາ 28 ວິຊາ ແລະ ນໍາໃຊ້ເຕັກໂນໂລຊີທີ່ທັນສະໄໝເຂົ້າໃນການຮຽນ-ການສອນ; ຈັດຝຶກອົບຮົມໃນຫົວຂໍ້ຕ່າງໆ 40 ຫົວຂໍ້ ແລະ ໄດ້ຄົ້ນຄວ້າວິທະຍາສາດສໍາເລັດ 18 ຫົວ ຂໍ້, ນໍາພານັກສຶກສາ ສທຄ ຝຶກງານຢູ່ ທະນາຄານຈໍາລອງໄດ້ 6 ຊຸດ ມີ 4.402 ຄົນ ແລະ ຮັບນັກສຶກສາຝຶກງານຈາກພາກ ສ່ວນພາຍນອກ 4 ຊຸດມີ 170 ຄົນ; ພັດທະນາລະບົບຄຸ້ມຄອງຫໍສະໝຸດ ໂດຍໄດ້ນໍາໃຊ້ລະ ບົບໂປຣແກຣມ PMB ແລະ E-book ເຂົ້າໃນການຄຸ້ມຄອງບໍລິຫານ, ຈັດການ ແລະ ບໍ ລິການຂໍ້ມູນຂ່າວສານຕ່າງໆ, ຄຸ້ມຄອງການປະພຶດຂອງນັກສຶກສາ ໂດຍຈັດຕັ້ງໂຄສະນາເຜີຍແຜ່ຜົນຮ້າຍຂອງຢາເສບຕິດ, ວຽກງານປ້ອງກັນອັກຄີ ໄພ ແລະ ປາຖະກະຖາປະຖົມນິເທດໃນເວລາເປີດຮຽນໃໝ່; ຈັດກິດຈະກໍາກິລາ, ສິລະປະວັນນະຄະດີ, ຖາມຕອບວິທະ ຍາສາດ, ໄປທັດສະນະສຶກສານອກສະຖານທີ່, ອອກແຮງງານລວມຕ່າງໆຢ່າງເປັນປົກກະຕິ. ນອກຈາກນັ້ນ, ຍັງບໍລິ ຈາກເລືອດ 8 ຄັ້ງ 901 ເທື່ອຄົນ; ລະດົມເຄື່ອງຊ່ວຍ ເຫຼືອສັງຄົມ ມູນຄ່າ 203.286. 500 ກີບ. ນອກນັ້ນ ຍັງສ້າງສະ ໂມສອນອະດີດນັກສຶກສາ ແລະ ຄັງສະຫວັດດີການນັກສຶກສາຂຶ້ນ. ພ້ອມນີ້, ຍັງມີການພົວພັນກັບສະຖາບັນການສຶກສາພາຍໃນ-ຕ່າງປະເທດ ແລະ ຜົນງານດ້ານອື່ນໆ.
ກອງປະຊຸມ ຍັງໄດ້ສະເໜີທິດທາງລວມ ແລະ ໜ້າທີ່ຕົ້ນຕໍໃນການຊີ້ນໍາ-ນໍາພາໃນ 5 ປີ ຕໍ່ໜ້າ ແລະ ທີ່ປະຊຸມຍັງພ້ອມກັນໃຊ້ສິດປະຊາທິປະໄຕຂອງຕົນ ເລືອກເອົາຄະນະພັກຮາກຖານ ສທຄ ສະໄໝທີ IV ປະ ກອບດ້ວຍ 5 ສະຫາຍ ໂດຍເລືອກເອົາສະຫາຍ ສັນຕິ ພົນເມືອງລາວ ເປັນເລຂາຄະນະພັກຮາກຖານ ສທຄ ຊຸດໃໝ່, ສະຫາຍ ນາງ ທ່ອນມີ ແກ້ວກິນນາລີ ເປັນຮອງເລຂາ ແລະ ສະຫາຍ ສະຫວັນດວງຈິດ ແສງເດືອນ ເປັນປະທານກວດກາ. ພ້ອມນີ້ ຍັງເລືອກເອົາຜູ້ແທນສົມບູນ 6 ສະຫາຍ, ສຳຮອງ 2 ສະຫາຍ ເຂົ້າຮ່ວມກອງປະຊຸມໃຫຍ່ ຄັ້ງທີ IV ຂອງອົງຄະນະພັກ ທຫລ.
ໃນໂອກາດດັ່ງກ່າວ, ສະ ຫາຍເລຂາຄະນະພັກ ທຫລ ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະພັກຮາກຖານຊຸດເກົ່າທີ່ໄດ້ຊີ້ນໍາ - ນໍາພາສະມາຊິກພັກ, ພະນັກງານ ປະຕິບັດໜ້າ ທີ່ການເມືອງ ສາມາດຍາດໄດ້ ຜົນງານໃນຫຼາຍໆດ້ານ ແລະ ມີທິດຊີ້ນໍາໃນແຕ່ລະວຽກງານຢ່າງພາວະວິໄສ ແລະ ມີຈຸດສຸມ. ນອກຈາກນີ້, ສະຫາຍ ຍັງມີຄວາມເຊື່ອໝັ້ນວ່າ: ໃນຕໍ່ໜ້າຄະນະພັກຮາກຖານຊຸດໃໝ່ ຈະນໍາພາຖັນແຖວສະມາຊິກພັກ-ພະນັກງານ ສືບຕໍ່ຈັດຕັ້ງປະຕິບັດມະຕິກອງປະຊຸມໃຫຍ່ຂອງຕົນ ໃຫ້ບັນລຸຜົນສໍາເລັດ ແລະ ຍາດໄດ້ໝາກຜົນ ອັນໃໝ່ ໃຫຍ່ຫຼວງກວ່າເກົ່າ. (ຂ່າວ-ພາບ: ຣັດສະໝີ ດວງສັດຈະ)

ຂ່າວທີ່ໄດ້ຮັບຄວາມນິຍົມ