ກະຊວງ​ແຜນການ ແລະ ການ​ລົງທຶນ (ຜທ) ໄດ້​ຈັດ​ກອງ​ປະຊຸມ​ເຜີຍແຜ່​ເຊື່ອມ​ຊຶມ​ມະຕິ​ກອງ​ປະຊຸມ​ຄົບ​ຄະນະ ຄັ້ງ​ທີ 10 ຂອງ​ຄະນະ​ບໍລິຫານ​ງານ​ສູນ​ກາງ​ພັກ   ສະໄໝ​ທີ X  ແລະ ບັນດາ​ນິຕິ​ກໍາສໍາ​ຄັນ​ຕ່າງໆ​ຂອງ​ພັກ ໃນ​ວັນ​ທີ 10 ກໍລະກົດ​ນີ້, ພາຍ​ໃຕ້​ການ​ເປັນ​ປະທານ​ຂອງ ສະຫາຍ ສອນ​ໄຊ  ສີ​ພັນ​ດອນ  ກໍາ​ມະ​ການ​ກົມ​ການເມືອງ​ສູນ​ກາງ​ພັກ ຮອງ​ນາຍົກລັດຖະມົນຕີ ເລຂາ​ຄະນະ​ບໍລິຫານ​ງານ​ພັກ ລັດຖະມົນຕີ ກະຊວງ​ແຜນການ ແລະ ການ​ລົງ​ທຶນ.
   ຈຸດປະສົງກອງ​ປະຊຸມ​ຄັ້ງ​ນີ້, ເພື່ອ​ໃຫ້​ຄະ​ນະ​ນໍາ, ສະມາຊິກ​ພັກ, ພະນັກ​ງານ​-​ລັດຖະກອນ​ມີ​ຄວາມ​ຮັບ​ຮູ້​-​ເຂົ້າໃຈ, ກຳ​ແໜ້ນ,  ແລະ ມີ​ຄວາມ​ເປັນ​ເອກະ​ພາບ​ສູງ​ຕໍ່​ບັນ​ດາ​ເນື້ືອ​ໃນ​ສໍາ​ຄັນ​ຂອງ​ມະຕິ​ຕ່າງໆ​ຂອງ​ກົມ​ການເມືອງ​ສູນ​ກາງ​ພັກ ໃນ​ແຕ່​ລະ​ໄລຍະ ເພື່ອ​ຫັນ​ມະຕິ​ດັ່ງກ່າວ​ເປັນ​ທິດ​ທາງ, ວຽກ​ງານ ແລະ ເປັນ​ແຜນ ​ປະຕິບັດ​ງານ​ລະອຽດ​ຂອງ​ຄະ ນະ​ພັກກະຊວງ, ບັນດາ​ໜ່ວຍ​ພັກ, ຍົກ​ສູງ​ຄວາມ​ເປັນ​ເຈົ້າ​ການ ແລະ ຄວາມ​ສາມາດ​ໃນ​ການ​ນໍາ​ຂອງ​ວຽກ​ງານ​ຂອງ​ຕົນ.
    ສະຫາຍ ສອນ​ໄຊ ສີ​ພັນ​ດອນ ໄດ້​ໃຫ້​ກຽດ​ເຜີຍແຜ່ມະຕິ ກອງ​ປະຊຸມ​ຄົບ​ຄະນະ ຄັ້ງ​ທີ 10 ຂອງ​ຄະນະ​ບໍລິຫານ​ງານ​ສູນ​ກາງ​ພັກ ໄດ້​ຍົກ​ໃຫ້​ເຫັນ​ກ່ຽວ​ກັບ​ການ​ຜັນ​ຂະຫຍາຍ ມະຕິ​ກອງ​ປະຊຸມ​ຄົບ​ຄະນະ​ບໍລິຫານ​ງານ​ພັກ​ສູນ​ກາງ​ພັກ ຄັ້ງ​ທີ 7, 8, 9 ສະໄໝ X ຕິດ​ພັນ​ກັບ​ຄວາມ​ຄືບ​ໜ້າການຈັດ​ຕັ້ງ​ປະຕິບັດ​ແຜນ​ພັດທະນາ​ເສດ​ຖະ​ກິດ​-​ສັງຄົມ, ງົບປະມານ, ເງິນຕາ ປະ​ຈໍາ​ໄຕ​ມາດ 1 ປີ 2020 ແລະ ທິດ​ທາງຕໍ່ໜ້າ, ຄະນະ​ບໍລິຫານ​ງານ​ສູນ​ກາງ​ພັກ ໄດ້​ຕີ​ລາຄາ​ສູງ​ຕໍ່​ກັບ​ການ​ຜັນ​ຂະຫຍາຍ ແລະ ຈັດ​ຕັ້ງ​ປະຕິບັດ ມະຕິ​ດັ່ງກ່າວ ຜ່ານ​ມາ​ພັກ ແລະ ລັດຖະບານ, ອົງການ​ປົກຄອງ​ແຕ່​ລະ​ຂັ້ນ ໄດ້​ເພີ່ມ​ທະວີ​ການ​ຊີ້​ນໍາ​ແກ້​ໄຂ​ຄວາມ​ຫຍຸ້ງຍາກ​ດ້ານ​ເສດຖະກິດ​ມະຫາ​ພາກ ກໍ​ຄື​ການຈັດຕັ້ງ​ປະຕິບັດ​ແຜນ​ພັດທະນາ​ເສດ​ຖະ​ກິດ​-​ສັງຄົມ, ແຜນ​ງົບ​ປະ​ມານ​-​ເງິນຕາ ແນ ໃສ່ສ້າງ​ຄວາມ​ໜັກ​ແໜ້ນ, ເຂັ້ມ ແຂງ ແລະ ເປັນ​ລະບົບໃຫ້​ແກ່​ພື້ນຖານ​ເສດຖະກິດ​ແຫ່ງ​ຊາດ.
    ໃນ​ຕອນ​ທ້າຍ ສະຫາຍ​ຍັງ​ໄດ້​ຊີ້​ນໍາ​ແຜນ​ວຽກ​ຈຸດ​ສຸມ​ຂອງ​ກະຊວງ​ແຜນການ ແລະ ການ​ລົງທຶນ 6 ເດືອນ​ທ້າຍ​ປີ.  ຈາກ​ນັ້ນ, ສະຫາຍ ນ. ຄໍາ​ຈັນ ວົງ​ແສນ​ບູນ ຮອງ​ເລຂາ​ຄະນະ​ບໍລິຫານ​ງານ​ພັກ ຮອງ​ລັດຖະມົນຕີ​ກະຊວງ​ແຜນການ ແລະ ການ​ລົງທຶນ  ໄດ້​ໃຫ້​ກຽດ​ເຜີຍແຜ່ມະຕິ ຂອງ​ກົມ​ການເມືອງ​ສູນ​ກາງ​ພັກ ສະບັບ​ເລກ​ທີ 108/ກມສພ, ລົງ​ວັນ​ທີ 30 ເມສາ 2020 ວ່າ​ດ້ວຍ​ວຽກ​ງານ​ແນວ​ໂຮມ ແລະ ວຽກ​ງານ​ມະຫາຊົນ​ຂອງ​ພັກ ໃນ​ໄລຍະ​ໃໝ່ ແລະ ມະຕິ ຂອງ​ກົມ​ການເມືອງ​ສູນ​ກາງ​ພັກ ສະບັບ​ເລກ​ທີ 111/ກມສພ, ລົງ​ວັນ​ທີ 22 ພຶດສະພາ 2020 ວ່າ​ດ້ວຍ​ການ​ເພີ່ມ​ທະວີ​ວຽກ​ງານ​ປ້ອງ​ກັນ​ຄວາມ​ສະຫງົບ​ໃນ​ສະພາບ​ໃໝ່. ສະຫາຍ ກິ​ແກ້ວ ຈັນທະ​ບູ​ຣີ ຄະນະ​ປະ​ຈໍາ​ພັກ ຮອງ​ລັດຖະມົນຕີ​ກະຊວງ ຜທ ໄດ້​ໃຫ້​ກຽດ​ເຜີຍແຜ່ມະຕິ ຂອງ​ກົມ​ການເມືອງ​ສູນ​ກາງ​ພັກ ສະບັບ​ເລກ​ທີ 112/ກມສພ, ລົງ​ວັນ​ທີ 2 ມິຖຸນາ 2020 ວ່າ​ດ້ວຍ​ການ​ຍົກ​ສູງ​ຄຸນ​ນະ​ພາບ​ການ​ດຳເນີນ​ຕາມ​ຂະບວນ​ຍຸຕິ​ທຳ ແລະ ມະຕິ ຂອງ​ກົມ​ການເມືອງ​ສູນ ກາງ​ພັກ ສະບັບ​ເລກ​ທີ 107/ກມສພ, ລົງ​ວັນ​ທີ 30 ເມສາ 2020 ວ່າ​ດ້ວຍ​ການ​ພັດທະນາ​ນະຄອນຫຼວງ​ວຽງ​ຈັນ ຕື່ມ​ອີກ. 
(ຂ່າວ: ແສງ​ຈັນ)