ສນຊ ເປີດນຳໃຊ້ຫໍມູນເຊື້ອ ຢ່າງເປັນທາງການ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 14/07/2020 08:50:38 ຈຳ​ນວນ​​ຢ້ຽມ​ຊົມ 1876 ຄັ້ງ

    ພິທີ​ເປີດ​ຫໍ​ມູນເຊື້ອ​ແນວ​ລາວ​ສ້າງ​ຊາດ ແລະ ເປີດ​ແອັບ ໄດ້​ຈັດ​ຂຶ້ນ​ໃນ​ວັນ​ທີ 13 ກໍລະກົດ ນີ້ ທີ່​ແນວ​ລາວ​ສ້າງ​ຊາດ ໃຫ້​ກຽດ​ເຂົ້າ​ຮ່ວມ​ເປີດ​ຢ່າງ​ເປັນ​ທາງ​ການ​ຂອງ​ທ່ານ ໄຊ​ສົມ​ພອນ ພົມວິຫານ ປະທານ​ສູນ​ກາງ​ແນວ​ລາວ​ສ້າງ​ຊາດ (ສນຊ), ມີ​ບັນດາ​ພະນັກງານ​ການ​ນຳ, ພະນັກງານ​ອາ​ວຸ​ໂສ​ບໍາ​ນານ  ແລະ ແຂກ​ຖືກ​ເຊີນ​ເຂົ້າ​ຮ່ວມ.
       ທ່ານ ຈັນທະ​ວົງ ແສນ​ອາມາດມົນ​ຕີ ຮອງ​ປະທານ ສນຊ ໄດ້​ລາຍ​ງານ​ຄວາມ​ເປັນ​ມາ ແລະ ຂະບວນ​ການ​ກະກຽມ​ວາງສະແດງ​ຫໍ​ມູນເຊື້ອ​ຂອງ​ສູນ​ກາງ​ແນວ​ລາວ​ສ້າງ​ຊາດ​ວ່າ: ໃນ​ການ ເປີດ​ຫໍ​ມູນ ເຊື້ອ ແລະ ເປີດ​ແອັບ​ໃນ​ຄັ້ງ​ນີ້​ເປັນ​ການ​ສ້າງ​ຂະບວນ​ການ​ໜຶ່ງ​ທີ່​ສໍາ​ຄັນ​ເພື່ອ​ຂໍ່າ​ນັບ​ຮັບ​ຕ້ອນ​ວັນ​ສ້າງຕັ້ງ​ແນວ​ລາວສ້າງ​ຊາດ​ຄົບຮອບ 70 ປີ ແລະ ວັນ​ສໍາ​ຄັນ​ອື່ນໆ​ລະດັບ​ຊາດ​ເປັນຕົ້ນ: ວັນຊາດ​ທີ 2 ທັນວາ ຄົບຮອບ 45 ປີ, ວັນ​ເກີດ​ປະທານ ໄກສອນ ພົມວິຫານ ຄົບຮອບ 100 ປີ,ວັນ​ຄົບຮອບ​ວັນ​ສ້າງຕັ້ງ​ອົງການ​ຈັດ​ຕັ້ງ​ມະຫາຊົນ​ປີ​ໃຫຍ່, ຂໍ່າ​ນັບ​ຮັບ​ຕ້ອນ​ການ​ດໍາ​ເນີນ​ກອງ​ປະຊຸມ​ໃຫຍ່ 3 ຂັ້ນ; ພາຍຫຼັງ​ເປີດ​ຫໍ​ມູນເຊື້ອ​ແມ່ນ​ຈະ​ໄດ້​ດໍາ​ເນີນ​ໃນ​ຮູບ​ແບບ​ທົດ​ລອງ​ໄປ​ຊົ່ວ​ໄລຍະ​ໜຶ່ງ. ຈຶ່ງ​ຈະ​ເປີດ​ໃຫ້​ເຍົາວະ​ຊົນ ລູກຫຼານ ແລະ ກໍາ​ມະ​ການ​ແນວ​ລາວ​ສ້າງ​ຊາດ​ແຕ່​ລະ​ຂັ້ນ​ໄດ້​ມາ​ທັດສະນະ​ສຶກສາ ຢ້ຽມຢາມ ເປັນປົກກະຕິ​ຕໍ່​ເນື່ອງ ແລະ​ຍັງ​ຈະ​ສືບຕໍ່​ປັບປຸງ​ບາງ​ສ່ວນ​ໃນ​ຫໍ​ມູນເຊື້ອ​ຕື່ມ​ອີກ. ຫໍ​ມູນເຊື້ອ ສນຊ ເປັນ​ຕຶກ ເກົ່າ ແກ່​ທີ່​ມີ​ຮູບຊົງ​ສວຍ​ງາມ,ສ້າງ​ຂຶ້ນ​ໃນ​ປີ 1902-1904, ພາຍ​ໃຕ້​ການ​ຊີ້​ນໍາ-ນໍາ​ພາ ຂອງ​ຄະນະ​ພັກ​-​ຄະນະປະ​ຈໍາ​ສູນ​ກາງ​ແນວ​ລາວ​ສ້າງ​ຊາດ, ຄະນະ​ຮັບ ຜິດຊອບ ໄດ້​ປະສານ​ສົມທົບ ກັບ​ຄະນະ​ກົມ ຫໍ​ພິພິທະພັນ​ປະທານ​ໄກສອນ ພົມວິຫານ ແລະ ອະນຸສອນ​ສະຖານ​ຜູ້​ນໍາ​ປະຕິວັດ, ອະນຸສອນ​ສະຖານ​ປະທານ ສຸພາ​ນຸ​ວົງ ແລະ ກໍາ​ມະ​ການ​ສູນ​ກາງ​ແນວ​ລາວ​ສ້າງ​ຊາດ ໄດ້​ພາກັນ​ອອກ​ແບບ ໃຫ້​ເປັນ​ຫໍ​ມູນເຊື້ອ ແລະ ຈັດ​ວາງ​ດ້ວຍ ພາບ ສີ ສຽງ​ ອັນ​ເໝາະ​ສົມ ແລະ ທັນ​ສະໄໝ ດ້ານ​ໃນ​ຂອງ​ຫໍ​ມູນເຊື້ອ​ປະກອບ​ມີ ການ ວາງສະແດງຮູບ​ພາບ, ວິ​ດີ​ໂອ ແລະ ວາງສະແດງ​ວັດຖຸ​ພັນ, ຫ້ອງ​ອ່ານ ແລະ ຫ້ອງ​ສາຍ​ຮູບ​ເງົາ. ຈຸດປະສົງ​ເພື່ອ​ສ້າງ​ໃຫ້​ເປັນ​ບ່ອນ​ທັດສະນະ​ສຶກສາ​ອົບຮົມ ລູກ​ຫຼານ​ເຍົາວະ​ຊົນ​ຊາວ​ໜຸ່ມ ນັກຮຽນ​ນັກ​ສຶກສາ, ກໍາ​ມະ​ການ​ແນວ​ລາວ​ສ້າງ​ຊາດ​ແຕ່​ລະ​ຂັ້ນ, ພະນັກ​ງານ​-​ລັດຖະກອນ ຕະຫຼອດ​ຮອດ​ປະຊາຊົນ​ບັນດາເຜົ່າ, ຄົນ​ເຊື້ອ​ຊາດ​ລາວ​ທີ່​ອາໄສ​ຢູ່​ຕ່າງປະເທດ ແລະ ແຂກ​ຕ່າງປະເທດ​ທີ່​ມາ​ທ່ອງ​ທ່ຽວ ແລະ​ ເຮັດວຽກ​ຢູ່ປະເທດ​ເຮົາ ໄດ້​ເບິ່ງ​ໄດ້​ຟັງ ແລະ ໄດ້​ເຫັນ​ແລ້ວ​ໃຫ້​ມີ​ຄວາມ​ເຂົ້າໃຈ​ກ່ຽວ​ກັບ​ປະຫວັດ​ມູນເຊື້ອ, ການ​ເຕີບໃຫຍ່ຂະຫຍາຍຕົວ ແລະ ຜົນງານ​ຂອງ​ແນວ​ລາວ​ສ້າງ​ຊາດ​ໃນ​ແຕ່​ລະ​ໄລຍະ​ທີ່​ມີ​ຊື່​ເອີ້ນ​ຕ່າງ​ກັນ.  (ຂ່າວ: ຍຸ​ພິນ​ທອງ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110