ກອງ​ປະຊຸມ​​ໃຫຍ່​ຄັ້ງທີ V ຂອງ​ສະຫະພັນ​ແມ່ຍິງ ອົງການ​ໄອ​ຍະ​ການ​ປະຊາຊົນ​ສູງ​ສຸດ (ອອປສ) ໄດ້ເປີດ​​ຂຶ້ນ​ໃນວັນ​ທີ 23 ກໍລະກົດ​ນີ້ ທີ່​ສູນ​ການ​ຮ່ວມ​ມື​ສາກົນ ແລະ ການ​ຝຶກ​ອົບຮົມ (ICTC), ພາຍ​ໃຕ້​ການ​ເປັນ​ປະທານ​ຂອງ ສະຫາຍ ນາງ ພອນ​ເພັດ  ອຸ່ນ​ແກ້ວ ຄະນະ​ບໍລິຫານ​ງານ​ສູນ​ກາງ​ສະຫະພັນ​ແມ່ຍິງ​ລາວ ປະທານ​ສະຫະ ພັນ​ແມ່ຍິງ ອົງການ​ໄອ​ຍະ​ການ​ປະຊາຊົນ​ສູງ​ສຸດ ໂດຍ​ການ​ເຂົ້າ​ຮ່ວມ​ເປັນ​ກຽດ ຂອງ ສະຫາຍ ຄຳ​ສານ ສຸ​ວົງ ກຳມະການ​ສູນ​ກາງ​ພັກ ຫົວໜ້າ​ອົງການ​ໄອ​ຍະ​ການ​ປະຊາຊົນ​ສູງ​ສຸດ, ສະຫາຍ ນາງ ບົວ​ຈັນ ສີ​ຫາ​ນາດ ຄະນະ​ບໍລິຫານ​ງານ​ພັກ ຮອງ​ປະທານ​ຄະນະ​ບໍລິຫານ​ງານ​ສູນ​ກາງ​ສະຫະພັນ​ແມ່ຍິງ​ລາວ, ມີ​ແຂກ​ຖືກ​ເຊີນ, ສະມາຊິກ​ສະຫະພັນ​ແມ່ຍິງ ອອປສ ແລະ ສະ​ຖາ​ບັນ​ຄົ້ນຄວ້າເຂົ້າ​ຮ່ວມ.
  ກອງ​ປະຊຸມ​ໃຫຍ່​ຄັ້ງ​ນີ້, ໄດ້​ພິຈາລະນາຄົ້ນຄວ້າ ແລະ ຮັບຮອງ​ບົດ​ລາຍ​ງານ​ການ ເມືອງ​ຂອງ​ຄະນະ​ບໍລິຫານ​ງານ​ສະຫະພັນ​ແມ່ຍິງ ອົງການ​ໄອ​ຍະ​ການ​ປະຊາຊົນ​ສູງ​ສຸດ​ຄັ້ງ​ທີ V ແລະ ທິດ​ທາງ​ແຜນການ 5 ປີ​ຕໍ່ໜ້າ 2020-2024. ຕະຫຼອດ​ໄລຍະ​ຊຸມ​ປີ ຜ່ານມາ ຄະນະ​ບໍລິຫານງານ​ ສະຫະພັນ​ແມ່ຍິງ ອອປສ ໄດ້​ ຕັ້ງໜ້າ​ປັບປຸງ​ການຈັດຕັ້ງຂອງ​ ຕົນ​ໃຫ້​ມີ​ຄວາມ​ໜັກ​ແໜ້ນເຂັ້ມ ແຂງ, ເປັນ​ລະບົບມີ​ການປ່ຽນ ແປງ​ດີ​ຂຶ້ນ​ເທື່ອ​ລະ​ກ້າວ, ເຮັດ ​ໃຫ້ການ​ຈັດ​ຕັ້ງ​ເຕີບ​ໃຫຍ່​ຂະ ຫຍາຍຕົວ​ທາງ​ດ້ານ​ປະລິມານ ແລະ ຄຸນ​ນະ​ພາບ. ປັດຈຸ​ບັນ​ມີ​ແມ່ຍິງ​ທັງ​ໝົດ 97 ສະຫາຍ, ທຽບໃສ່​ກອງ​ປະຊຸມ​ໃຫຍ່ຜ່ານ​ມາ ແມ່ນ​ເພີ່ມ​ຂຶ້ນ 6 ສະຫາຍ, ມີ​ຄະນະ​ບໍລິຫານ​ງານ​ສະຫະ ພັນ​ແມ່ຍິງ 5 ສະຫາຍ, ປະ ກອບ​ມີ 7 ໜ່ວຍ ແຕ່​ລະ​ໜ່ວຍ​ມີ​ຄະນະ​ໜ່ວຍ 3 ສະຫາຍ ໃນ​ນັ້ນ​ມີ​ຜູ້​ຮັບຜິດຊອບ​ວຽກ​ງານ​ກວດກາ 1 ສະ​ຫາຍ. ຜົນງານ​ອັນ​ພົ້ນ​ເດັ່ນ​ທີ​່ຜ່ານ​ມາ ເອື້ອຍ​ນ້ອງ​ແມ່ຍິງ​ຈຳນວນ​ຫຼາຍ​ໄດ້​ມີ​ຜົນງານ​ດີເດັ່ນ​ໃນ​ການ​ປະກອບ​ສ່ວນ​ເຄື່ອນ​ໄຫວ​ວຽກ​ງານ​ຕ່າງໆ​ຂອງ​ຕົນ ຊຶ່ງ​ຜ່ານ​ການເຄື່ອນໄຫວ​ດັ່ງກ່າວ ກໍ​ໄດ້​ຮັບ​ການ​ຍ້ອງຍໍ​ຊົມເຊີຍ​ຈາກ​ພັກ​-​ລັດ, ການ​ນຳ​ອົງການ, ອົງການ​ຈັດ​ຕັ້ງ​ສະຫະພັນ​ແມ່ຍິງ ແລະ​ ພາກ​ສ່ວນ​ອື່ນໆ ກວມ 37% ດັ່ງນີ້: ໄດ້​ຮັບ​ຫຼຽນ​ໄຊ​ແຮງ​ງານ​ຊັ້ນ I 2 ສະຫາຍ, ຫຼຽນ​ໄຊ​ແຮງ​ງານ​ຊັ້ນ II 19 ສະຫາຍ, ຫຼຽນ​ໄຊ​ແຮງ​ງານ​ຊັ້ນ III 9 ສະຫາຍ, ຫຼຽນ ​ກາ​ແຮງ​ງານ 6 ສະຫາຍ, ໃບ​ຍ້ອງຍໍ​ລັດຖະບານ 33 ສະ ຫາຍ, ໃບ​ຍ້ອງຍໍ​ຫົວໜ້າ ອອປສ   183 ສະຫາຍ. 
   ພ້ອມ​ນັ້ນ​ຍັງ​ໄດ້​ພ້ອມ​ກັນ​ໃຊ້​ສິດ​ປະຊາທິປະໄຕ​ຂອງ​ຕົນ ປ່ອນ​ບັດ​ຄັດ​ເລືອກ​ເອົາ​ຄະນະ​ບໍລິຫານ​ງານ​ສູນ​ກາງ​ສະຫະ ພັນ​ແມ່ຍິງ​ລາວ, ປະທານ​ສະ ຫະພັນ​ແມ່ຍິງອົງການ​ໄອ​ຍະ​ ການ​ປະຊາຊົນ​ສູງ​ສຸດ ຊຸດ​ໃໝ່ ຄັ້ງ​ທີ V  ບົນ​ພື້ນຖານຫຼັກການ​ລວມ​ສູນ​ປະຊາທິປະໄຕ ທັງ​ຖືກຕ້ອງ ແລະ ສອດຄ່ອງ​ກັບ​ມາດຖານ​ເງື່ອນໄຂ​ທີ່​ກໍາ​ນົດ​ໄວ້ ຊຶ່ງເລືອກ​ເອົາ 7 ສະຫາຍ ກອງ​ປະຊຸມ​ຄັ້ງ​ປະຖົມ​ມະລືກ​ເລືອກ​ໄດ້ ສະຫາຍ ນາງ ພອນ​ທິບ ສາ​ວະລີ ເປັນ​ປະທານ​ຄະນະ​ບໍລິຫານ​ງານ​ສະຫະພັນ​ແມ່ຍິງ ອອປສ ແລະ ທ່ານ ນາງ ແສງ​ສຸດາ ສີ​ປະເສີດ ເປັນ​ຮອງ​ປະທານ ແລະ ເປັນ​ປະທານ​ກວດກາ.
   ຈາກ​ນັ້ນ  ສະຫາຍ ນາງ ບົວ​ຈັນ ສີ​ຫາ​ນາດ ໄດ້​ໂອ້​ລົມ​ເນັ້ນ​ຫຼາຍ​ບັນຫາ​ທີ່​ສຳຄັນ ໃຫ້​ສະຫະພັນ​ແມ່ຍິງ ອອປສ ເອົາໃຈໃສ່​ຕື່ມ​ເປັນຕົ້ນ​ຕ້ອງ​ໄດ້ ເພີ່ມ​ທະວີ​ການ​ສຶກສາອົບ ຮົມ​ການ​ເມືອງ​-​ແນວ​ຄິດໃຫ້​ສະມາຊິກ​ສະຫະພັນ​ແມ່ຍິງ ແລະ ພະນັກ​ງານ​-​ລັດຖະກອນ​ ໃນ​ຂອບ​ເຂດ​ຄວາມຮັບຜິດ ຊອບ​ຂອງ​ຕົນຢ່າງເປັນປົກ ກະຕິ, ສະມາຊິກ​ສະຫະພັນ​ແມ່ຍິງ​ທຸກ​ສະຫາຍຕ້ອງ​ຕັ້ງ ໜ້າ​ຝຶກ​ຝົນ​ຫຼໍ່​ຫຼອມ​ຕົນ​ເອງ​ຢ່າງຮອບດ້ານ ດ້ວຍ​ວິທີ​ການ​ຊອກ​ຮູ້​ຮໍ່າ​ຮຽນ​ຈາກ​ປະສົບການ​ ຕົວ​ຈິງ ແລະ ຮຽນ​ຈາກ​ສະ​ຖາ​ບັນ​ຕ່າງໆ, ເອົາໃຈໃສ່​ປັບປຸງ​ລະບອບ​ແບບແຜນ​ວິທີ​ເຮັດ​ວຽກ​ຂອງ​ຕົນ, ມີ​ຄວາມ​ເປັນ​ເອກະ​ພາບ​ພາຍ​ໃນ​ຄະນະ​ເຮັດ​ວຽກ​ຕາມ​ຫຼັກການ​ລວມ​ສູນ​ປະຊາທິປະໄຕ, ຕັດສິນ​ບັນຫາ​ເປັນ​ໝູ່​ຄະນະ, ບຸກຄົນ​ຮັບຜິດຊອບ, ການ​ເຄື່ອນ ໄຫວ​ວຽກ​ງານ​ຕ້ອງ​ມີ​ແຜນການ, ມີ​ຈຸດ​ສຸມ, ມີ​ການ​ຕິດຕາມ​ກວດກາ, ມີ​ການ​ສະຫຼຸບ​ຖອດ​ຖອນ​ບົດຮຽນ, ເຄື່ອນ​ໄຫວ​ວຽກ​ງານ​ຢ່າງ​ເອົາ​ຈິງ​ເອົາ​ຈັງ ແລະ ຮັບປະກັນ​ທາງ​ດ້ານ​ປະສິດ​ທິ​ຜົນຂອງ​ວຽກ​ງານ​ທີ່​ຕົນ​ຮັບ ຜິດຊອບ, ຄະນະ​ບໍລິຫານ​ງານ, ຄະນະ​ໜ່ວຍ ແລະ ສະມາຊິກ​ ສະຫະພັນ​ແມ່ຍິງທຸກ​ສະຫາຍ ຕ້ອງ​ເປັນເຈົ້າ​ການ​​ໃນ​ການ ຜັນຂະຫຍາຍ​ເນື້ອ​ໃນ​ແຜນ ການເຄື່ອນໄຫວ​ວຽກ​ງານ​ຂອງ​ສະຫະພັນ​ແມ່ຍິງ​ເຂົ້າ​ສູ່​ການ​ປະຕິບັດ​ຕົວ​ຈິງ​ໃນ​ຂົງເຂດ​ວຽກ​ງານ​ທີ່​ຕົນ​ຮັບຜິດຊອບ​ໃຫ້​ມີ​ຜົນສຳເລັດ, ເປັນ​ເຈົ້າ​ການຈັດຕັ້ງ​ປະຕິບັດ​ເນື້ອ​ໃນຂໍ້​ແຂ່ງຂັນ 3 ດີ ຕິດ​ພັນ​ກັບ​ຂະ ບວນ​ການ​ສ້າງ​ໜ່ວຍ​ພັກ​ປອດ​ໃສ ເຂັ້ມແຂງ ໜັກ​ແໜ້ນ ແລະ ການຈັດຕັ້ງ​ປະຕິບັດ​ເນື້ອ​ໃນ​ຂໍ້​ແຂ່ງຂັນ 3 ມີ 4 ຮັບປະກັນ ຂອງ​ອົງການ​ໄອ​ຍະ​ການ​ປະຊາຊົນ​ວາງ​ອອກ​ໃຫ້​ປະກົດ​ຜົນ​ ເປັນ​ຈິງ.   
(ຂ່າວ: ອອປສ)