ສະຫາຍ ບຸນຍັງ ວໍລະຈິດ ຕອບສຳພາດຂອງສະຖານີວິທະຍຸ ກະຈາຍສຽງ ແລະ ໂທລະພາບສູນກາງ ຈີນ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 04/08/2020 08:48:41 ຈຳ​ນວນ​​ຢ້ຽມ​ຊົມ 1463 ຄັ້ງ

ສະຫາຍ ບຸນ​ຍັງ ວໍລະ​ຈິດ ເລຂາທິການ​ໃຫຍ່ ປະທານ​ປະເທດ ແຫ່ງ ສປປ ລາວ ໄດ້​ຕອບ​ຄຳ​ສຳພາດ​ຂ່າວ ຕໍ່​ນັກ​ຂ່າວ ສະຖານີ​ວິທະຍຸ​ກະ ຈາຍສຽງ ແລະ ໂທລະພາບ​ສູນ​ກາງ​ຈີນ (CMG) ກ່ຽວ​ກັບ ມາດ​ຕະການ​ສະກັດ​ກັ້ນ ແລະ ຮັບ​ມື​ກັບ​ພະຍາດ​ໂຄ​ວິດ-19 ຂອງ ສປ ຈີນ ໃນ​ວັນ​ທີ 31 ກໍລະກົດ 2020 ຜ່ານ​ມາ​ນີ້.
ໃນ​ການ​ຕອບ​ຄຳ​ສໍາ​ພາດ, ສະຫາຍ ບຸນ​ຍັງ ວໍລະ​ຈິດ ໄດ້​ຕີ​ລາຄາ​ສູງຕໍ່​ພັກ, ລັດຖະບານ ສປ ຈີນ ທີ່​ໄດ້​ມີ​ມາດ​ຕະການ​ສະກັດ​ກັ້ນ ແລະ ຮັບ​ມື​ກັບ​ພະ ຍາດ​ດັ່ງກ່າວ​ຢ່າງ​ທັນ​ການ ແລະ ມີ​ຜົນສຳເລັດ​ຢ່າງ​ໃຫຍ່​ຫຼວງ ຊຶ່ງ​ເຫັນ​ໄດ້​ຢ່າງ​ຈະແຈ້ງ​ຈາກ​ການ​ນໍາ​ພາ​ຂອງສູນ​ກາງ​ພັກ​ກອມ​ມູ​ນິດ​ຈີນ ທີ່​ມີສະຫາຍ​ເລຂາທິການ​ໃຫຍ່ ປະທານ​ປະເທດ ສີຈິ້ນ​ຜິງ ເປັນ​ແກນ​ກາງ, ໄດ້​ຊີ້​ນໍາ​ລັດຖະບານ ແລະ ທົ່ວ​ສັງຄົມ ດຳເນີນ​ມາດ​ຕະການ​ຢ່າງ​ເຂັ້ມ​ງວດ, ມີ​ປະສິດ​ທິ​ຜົນ​ຢ່າງ​ທັນ​ການ, ປະຊາຊົນ​ຈີນ 1.400 ລ້ານ​ຄົນ ໄດ້​ສາມັກຄີ​ເປັນ​ປຶກ​ແຜ່ນ​ຮ່ວມ​ແຮງ​ຮ່ວມ​ໃຈ​ສຸມ​ທຸກ​ກໍາ​ລັງ​ໃນ​ທົ່ວ​ສັງຄົມ, ທຶນຮອນ, ເຕັກນິກ​ວິທະຍາສາດ ແລະ ແພດ​ໝໍ ໃນ​ການ​ຄວບ​ຄຸມ​ການ​ແຜ່​ລະບາດ​ຂອງ​ພະຍາດ​ດັ່ງກ່າວ ຈຶ່ງ​ເຮັດ​ໃຫ້ ສປ ຈີນ ສາມາດ​ຄວບ​ຄຸມ​ການ​ແຜ່​ລະ ບາດ​ຂອງ​ພະຍາດ​ໄດ້​ໂດຍ​ພື້ນຖານ ແລະ ໄດ້​ມີ​ການ​ຟື້ນ​ຟູ​ການ​ຜະລິດ​ທາງ​ເສດຖະກິດ​ຢ່າງ​ມີ​ຈຸດ​ສຸມ.
ໂດຍ​ເຫັນ​ໄດ້​ເຖິງ​ຄວາມ​ຮັບຜິດຊອບ​ຂອງ​ຕົນຕໍ່​ຊາ ຕາກຳ​ຂອງ​ມວນ​ມະນຸດ, ເຖິງ​ວ່າ ສປ ຈີນ ຍັງ​ມີ​ຄວາມ​ຫຍຸ້ງຍາກ ຍ້ອນ​ຜົນ​ກະທົບ​ຈາກ​ພະຍາດ​ໂຄ​ວິດ-19, ແຕ່​ກໍຍັງ​ໄດ້​ໃຫ້ການ​ຊ່ວຍເຫຼືອ 150 ປະເທດ, ເຂດ​ແຄວ້ນ ແລະ ອົງການ​ຈັດ​ຕັ້ງ​ສາກົນ ໃນ​ການ​ຕ້ານ ແລະ ຮັບ​ມື​ກັບ​ພະຍາດ​ດັ່ງກ່າວ, ທັງ​ໄດ້​ເປັນ​ເຈົ້າ​ການ​ສະເໜີ​ຂໍ້​ລິ​ເລີ່ມ ແລະ ມາດ​ຕະການ​ຕ່າງໆ​ໃນ​ການ​ສະກັດ​ກັ້​ນ-​ປ້ອງ​ກັນ​ພະຍາດ​ດັ່ງກ່າວ ແລະ ການ​ຮັກສາ​ຄວາມ​ໝັ້ນ​ທ່ຽງ​ທາງ​ດ້ານ​ເສດຖະກິດ​ໂລກ ຜ່ານ​ຫຼາຍ​ເວທີ​ການ​ຮ່ວມ​ມື​ສາກົນ​ທີ່​ສຳຄັນ ຊຶ່ງ​ບັນດາ​ປະເທດ​ໃນ​ໂລກ ໄດ້​ຕີ​ລາຄາ​ສູງ​ຕໍ່​ຄວາມ​ສາມາດ​ຮອບດ້ານ ຂອງ ສປ ຈີນ ທີ່​ມີ​ພັກ​ກອມ​ມູ​ນິດ​ຈີນ​ເປັນ​ຜູ້​ນໍາ​ພາ ໃນ​ການ​ປະຕິບັດ​ພັນທະ​ສາກົນ​ຂອງ​ຕົນ, ມີ​ຄວາມ​ຮັບຜິດຊອບ​ສູງ​ຕໍ່​ການ​ຄົງ​ຕົວ​ຢູ່​ຂອງ​ມວນ​ມະນຸດ, ໄດ້​ສະ​ສົມ​ບົດຮຽນ​ອັນ​ປະເສີດໃຫ້​ແກ່​ວົງ​ຄະນາ​ຍາດ​ສາກົນ​ໃນ​ການ​ຮັບ​ມື​ກັບ​ພະຍາດ​ດັ່ງກ່າວ ເຮັດ​ໃຫ້​ບັນດາ​ປະເທດ​ເຫັນ​ວ່າ ການ​ຕໍ່ສູ້​ກັບ​ພະຍາດ​ໂຄ​ວິດ-19 ຍັງ​ແມ່ນ​ບັ້ນ​ຮົບ​ໃຫຍ່​ທີ່​ອາດ​ຍືດ​ເຍື້ອ​ຍາວ​ນານ​ຂອງ​ປະຊາ​ຄົມ​ໂລກ ທີ່​ຕິດ​ພັນ​ກັບ​ວິວັດທະນາ​ການ​ຂະຫຍາຍຕົວ​ຂອງ​ສັງຄົມ​ມະນຸດ ທີ່​ມີ​ການ​ຮ່ວມ​ມື ແລະ ມີ​ຜົນ​ປະໂຫຍດ​ຮ່ວມ​ກັນ​ນັບ​ມື້​ຫຼາຍ​ຂຶ້ນ ​ຊຶ່ງ​ບໍ່​ມີ​ປະເທດ​ໃດ​ສາມາດ​ຢູ່​ລຳພັງ ແລະ ແກ້​ໄຂ​ບັນຫາ​ດ້ວຍ​ຕົນ​ເອງ​ພຽງ​ຝ່າຍ​ດຽວ​ໄດ້.
ສະຫາຍ ບຸນ​ຍັງ ວໍລະຈິດ ຍັງ​ໄດ້​ສະແດງ​ຄວາມ​ຂອບໃຈ ຢ່າງ​ຈິງ​ໃຈ ທີ່​ພັກ ແລະລັດຖະ ບານ​ຈີນ ໄດ້​ໃຫ້ການ​ຊ່ວຍ ເຫຼືອ​ ດ້ານ​ອຸປະກອນ​ການແພດ, ແບ່ງປັນ​ບົດຮຽນ​ອັນ​ປະ ເສີດ ແລະ ໄດ້​ສົ່ງ​ໜ່ວຍ​ແພດ​ໝໍ​ຊ່ຽວຊານ​ຂອງ​ຈີນ ມາ​ຊ່ວຍ​ໃຫ້​ຄຳ​ແນະນຳ​ໃນ​ການ​ສະກັດ​ກັ້ນ, ຄວບ​ຄຸມ ແລະ ປິ່ນປົວ​ຜູ້​ທີ່​ຕິດເຊື້ອ​ພະຍາດ​ໂຄ​ວິດ-19 ຢູ່ ສປປ ລາວ ຢ່າງ​ທັນ​ການ, ອັນ​ເປັນ​ການສະແດງ​ໃຫ້​ເຫັນ​ເຖິງ​ນໍ້າ​ໃຈ​ມິດຕະພາບ​ທີ່​ສະໜິດສະໜົມ ແລະ ການ​ເປັນ​ຄູ່​ຮ່ວມ​ຊາຕາກຳ ລະຫວ່າງ ສອງ​ພັກ, ສອງ​ລັດ ແລະ ປະຊາຊົນ​ສອງ​ຊາດ ລາວ​-​ຈີນ ຢ່າງ​ເປັນ​ຮູບ​ປະ​ທຳ.
ໃນ​ໂອກາດ​ດຽວ​ກັນ, ສະຫາຍ ບຸນ​ຍັງ ວໍລະ​ຈິດ ຍັງ​ໄດ້​ຢືນຢັນ​ຄືນ​ວ່າ ພັກ ແລະ ລັດຖະບານ​ລາວ ຍາມ​ໃດ​ກໍ​ຢຶດ​ໝັ້ນ​ສະໜັບສະໜູນ​ນະໂຍບາຍ​ຂອງ​ພັກ ແລະ ລັດຖະບານ​ຈີນ ໂດຍ​ສະເພາະ​ແມ່ນ ແນວ​ຄວາມ​ຄິດ​ໃນ​ການ​ສ້າງ​ປະຊາ​ຄົມ​ຄູ່​ຮ່ວມ​ຊາ​ຕາ​ກໍາ​ຂອງ​ມວນ​ມະນຸດ ທີີ່ ສະຫາຍ​ເລຂາທິການ​ໃຫຍ່, ປະທານ​ປະເທດ ສີ ຈິ້ນ​ຜິງ ໄດ້​ສະເໜີ​ອອກ. ການ​ທີ່​ການ​ນໍາ​ສູງ​ສຸດ ຂອງ ສອງ​ພັກ ລາວ​-​ຈີນ ໄດ້​ຕົກລົງ​ຍົກ​ລະດັບ​ການ​ພົວພັນ​ຂຶ້ນ​ເປັນ​ຄູ່​ຮ່ວມ​ຊາ​ຕາ​ກໍາ ລາວ​-​ຈີນ ໄດ້​ເປັນ​ການ​ເສີມ​ຂະຫຍາຍ​ແນວ​ຄິດ​ລິ​ເລີ່ມ ກ່ຽວ​ກັບ​ການ​ເປັນ​ປະຊາ​ຄົມ​ຮ່ວມ​ຊາ​ຕາ​ກໍາ​ຂອງ​ມວນ​ມະນຸດ ຊຶ່ງ​ໃນຕໍ່ໜ້າ ສອງ​ຝ່າຍ​ຈະ​ໄດ້​ຮ່ວມ​ກັນ​ຈັດ​ຕັ້ງ​ປະຕິບັດ​ແຜນ​ແມ່​ບົດ​ດັ່ງກ່າວ​ໃຫ້​ປະກົດ​ເປັນ​ຈິງ ເພື່ອ​ນໍາ​ເອົາ​ຜົນ​ປະໂຫຍດ​ຕົວ​ຈິງ​ໃຫ້​ແກ່​ປະຊາຊົນ​ສອງ​ປະເທດ​ພວກ​ເຮົາ.
ໃນ​ໂ​ອກາດ​ນີ້, ສະຫາຍ ບຸນ​ຍັງ ວໍລະ​ຈິດ ຍັງ​ໄດ້​ຕາງໜ້າ​ໃຫ້​ພັກ, ລັດຖະບານ ແລະ ປະ ຊາຊົນ​ລາວ​ບັນດາເຜົ່າ ສະ ແດງ​ຄວາມ​ເຫັນໃຈ​ຕໍ່​ເຫດການ​ໄພ​ນໍ້າ​ຖ້ວມ​ຄັ້ງ​ໃຫຍ່​ຢູ່​ບັນດາ​ແຂວງ​ພາກ​ໃຕ້ ຂອງ ສປ ຈີນ ໃນ​ໄລຍະ​ມໍ່ໆ​ນີ້, ທັງ​ໄດ້​ສະແດງ​ຄວາມ​ເຊື່ອ​ໝັ້ນ​ວ່າ ພາຍ​ໃຕ້​ການ​ຊີ້​ນໍາ-ນໍາ​ພາ​ຢ່າງ​ໜັກ​ແໜ້ນ, ເຂັ້ມ ແຂງ​ຂອງ​ສູນ​ກາງ​ພັກ​ກອມ​ມູ​ນິດ​ຈີນ ແລະ ດ້ວຍ​ຄວາມ​ເອົາໃຈໃສ່​ຊ່ວຍເຫຼືອ​ຢ່າງ​ໃກ້ຊິດ ຂອງບັນດາ​ສະຫາຍ​ການ​ນໍາ​ຂັ້ນ​ສູນ​ກາງ ກໍ​ຄື ອຳນາດ​ການ​ປົກຄອງ​ທ້ອງຖິ່ນ, ປະຊາຊົນ​ຈີນ ຈະ​ສາມາດ​ຜ່ານ​ຜ່າ​ຄວາມ​ຫຍຸ້ງຍາກ​ໃນ​ເທື່ອ​ນີ້ ແລະ ຟື້ນ​ຟູ​ຊີວິດ​ການ​ເປັນ​ຢູ່​ໃຫ້​ກັບ​ຄືນ​ສູ່​ປົກກະຕິ​ໄດ້​ໂດຍ​ໄວ.
(ຂ່າວ: ຄະນະ​ພົວພັນ​ຕ່າງ ປະເທດ​ສູນ​ກາງ​ພັກ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110