ເຜີຍແຜ່ຄວາມຮູ້ຜົນຮ້າຍຂອງທາດໄຍຫີນ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 05/08/2020 10:09:06 ຈຳ​ນວນ​​ຢ້ຽມ​ຊົມ 2047 ຄັ້ງ

   ທາດ​ໄຍ​ຫີນ​ແມ່ນ​ແຮ່​ທາດ​ທຳ​ມະ​ຊາດ ທີ່​ມີ​ປະ­ໂຫຍດ​ທາງ​ດ້ານ​ການ​ຄ້າ ຕັ້ງ­ແຕ່​ອະດີດ​ຈົນ​ເຖິງ​ປັດ­ຈຸ­ບັນ ຍ້ອນ​ມີ​ຄວາມ​ແຂງ­ແຮງທົນ​ທານ​ຕໍ່​ການ​ກັດ​ຂອງ​ສານ​ເຄ​ມີ ແຕ່​ໜ້າ​ເສຍ ດາຍ​ທາດ​ດັ່ງ­ກ່າວ​ພັດ​ເປັນ​ອັນ ຕະ­ລາຍ​ຕໍ່​ສຸ­ຂະ­ພາບ​ຂອງ​ຄົນ ເຮົາ​ບໍ່​ສາ­ມາດ​ເບິ່ງ​ເຫັນ​ທາດ​ໄຍ​ຫີນ​ດ້ວຍ​ຕາ​ເປົ່າ​ໄດ້ ຍ້ອນ​ຝຸ່ນ​ໄຍ​ຫີນ​ນ້ອຍ​ຫຼາຍ ຖ້າ​ຫາກ​ຫາຍ­ໃຈ​ເອົາ​ຝຸ່ນ​ໄຍ​ຫີນ​ເຂົ້າ​ໄປ​ໃນ​ປອດ​ແລ້ວ ມັນ​ຈະ​ກໍ່­ໃຫ້­ເກີດ​ມະ​ເຮັງ​ປອດ, ຫຼອດ​ສຽງ ຫຼື ມະ​ເຮັງ​ເຫຍື່ອ​ຫຸ້ມ​ປອດ. ອົງ­ການ​ອະນາ​ໄມ​ໂລກ​ໄດ້​ລາຍ​ງານ​ໃຫ້​ຮູ້​ວ່າ​ໃນ​ແຕ່​ລະ​ປີ​ຈະ​ມີ​ຄົນ​ເສຍ​ຊີ­ວິດ​ເປັນ​ຈຳ­ນວນ​ຫຼວງ­ຫຼາຍ ຍ້ອນ​ພະ­ຍາດ​ທີ່​ເກີດ​ຈາກ​ທາດ​ໄຍ​ຫີນ ແລະ ຈະ​ຍັງ​ມີ​ຜູ້​ຖືກ​ເຄາະ​ຮ້າຍ​ສືບ­ຕໍ່​ໄປ​ອີກ​ຫຼາຍ​ທົດ​ສະ​ວັດ ຖ້າ​ຫາກ​ຍັງ​ບໍ່​ຢຸດ­ຕິ​ການ​ນຳ​ໃຊ້​ທາດ​ໄຍ​ຫີນ ດັ່ງ­ນັ້ນ​ເພື່ອ​ໃຫ້​ເຫັນ​ເຖິງ​ຜົນ​ຮ້າຍ​ຂອງ​ທາດ​ໄຍ​ຫີນ​ສູນ​ກາງ​ສະ­ຫະ­ພັນ​ກຳ ມະ­ບານ​ລາວ ( ສກລ ) ຮ່ວມ​ກັບ​ອົງ­ການອາ​ຟີ​ດາ ​ຈຶ່ງ​ໄດ້​ຈັດ​ຕັ້ງ​ພິ­ທີ​ເຜີຍ­ແຜ່​ຂໍ້​ມູນ​ຄວາມ​ຮູ້​ກ່ຽວ​ກັບ​ຜົນ​ຮ້າຍ​ຂອງ​ທາດ​ໄຍ​ຫີນ​ຕໍ່​ສຸ­ຂະ­ພາບ​ໃຫ້​ແກ່​ນັກ​ສຶກ ສາ​ວິ​ທະຍາ​ໄລ​ເຕັກ­ນິກ​ຊັບ​ພະ​ວິ­ຊາ ຂຶ້ນ​ເມື່ອບໍ່​ດົນ​ມາ​ນີ້ ທີ່​ວິ­ທະ­ຍາ ໄລ​ດັ່ງ­ກ່າວ ໃຫ້​ກຽດ​ເຜີຍ­ແຜ່​ໂດຍ​ທ່ານ ອະ­ທິ​ລັດ ອຸ­ດົມ​ເດດ ຮອງ​ຫົວ­ໜ້າ​ກົມ​ປົກ​ປ້ອງ​ແຮງ​ງານ ສກລ ຊຶ່ງ​ມີ ນັກ​ສຶກ­ສາ​ເຂົ້າ​ຮ່ວມ​ຮັບ​ຟັງ​ຢ່າງ​ພ້ອມ​ພຽງ.
   ທ່ານ ອະ­ທິ​ລັດ ອຸ­ດົມ​ເດດ ໃຫ້​ຮູ້​ວ່າ: ເກືອບ 60 ປະ ເທດ​ລວມ​ທັງ​ບັນ­ດາ​ປະ­ເທດ​ທີ່​ພັດ ທະ­ນາ​ແລ້ວ​ໄດ້​ຫ້າມ​ນຳ​ໃຊ້​ທາດ​ໄຍ​ຫີນ​ທຸກ​ຊະ­ນິດ​ຢ່າງ​ເດັດຂາດ ຊຶ່ງ​ຜະ­ລິດ​ຕະ​ພັນ​ທີ່​ມັກ​ມີ​ສ່ວນ​ປະ­ສົມ​ຂອງ​ທາດ​ໄຍ​ຫີນ​ມີ​ວັດ​ສະ​ດຸ​ກໍ່­ສ້າງ, ທີ່​ພັກ­ອາ ໄສ, ພາ­ຫະ­ນະ ແລະ ອຸ­ປະ­ກອນ​ເຄື່ອງ­ໃຊ້​ໃນ​ຊີ­ວິດ​ປະ­ຈຳ​ວັນ​ເຊັ່ນ: ກະ­ເບື້ອງ​ມຸງ​ຫຼັງ­ຄາ, ວັດ​ສະ​ດຸ​ອັດ​ຮອຍ​ຝາ​ເຮືອນ​ແຕກ, ແຜ່ນ​ຝາ​ຊີມັງ​ກັນ​ຄວາມ​ຮ້ອນ, ສະ​ນວນ​ກັນ​ຄວາມ​ຮ້ອນ​ເທິງ​ຫຼັງ­ຄາ, ວັດ​ສະ​ດຸ​ປູ​ພື້ນ, ກະ­ໂລ້​ໄຍ​ຫີນ, ວັດ​ສະ​ດຸ​ຕົບ­ແຕ່ງ​ພາຍ​ໃນ, ຝາ, ເພ­ດານ, ສີ​ທາ​ຮອງ​ພື້ນ​ຝາ, ອຸ­ປະ­ກອນ​ໄຟ­ຟ້າ, ກອບ​ປົກ​ດອກ­ໄຟ, ສາຍ​ສະ​ນວນ​ກັນ​ໄຟ, ກ່ອງ​ຟິວ, ປັກ​ໄຟ, ຜ້າ​ເບກ, ຊິນ​ກັນ​ຊຶມ ແລະ ຄາດ, ເຄື່ອງ­ໃຊ້​ພາຍ​ໃນ​ເຮືອນ, ຕູ້­ເຢັນ, ຊ່ອງ​ດູດ​ຄວັນ  ​ເຄື່ອງ​ເຮັດ​ຄວາມ​ຮ້ອນ, ເຄື່ອງ​ອົບ​ຜ້າ, ເຄື່ອງ​ອົບ​ຜົມ, ເປົ່າ​ຜົມ, ເຄື່ອງ​ລ້າງ​ຖ້ວຍ, ເຕົາ​ອົບ, ເຄື່ອງ​ສຳ­ອາງ ແລະ ອື່ນໆ ຊຶ່ງ​ທາດ​ໄຍ​ຫີນ​ທຸກ​ຊະ ນິດ​ເປັນ​ໜຶ່ງ​ໃນ​ສານ​ກໍໃຫ້­ເກີດ​ມະ​ເຮັງ, ການ​ສຳ​ຜັດ​ກັບ​ທາດ​ໄຍ​ຫີນ​ເປັນ​ສາ­ເຫດ​ຂອງ​ການ​ເກີດ​ໂ​ຣກ​ມະ​ເຮັງ​ທີ່​ພົບ​ຫຼາຍ​ທີ່​ສຸດ ແລະ ເຮັດ​ໃຫ້​ເສຍ​ຊີ­ວິດ​ຍ້ອນ​ພະ­ຍາດ​ມະ​ເຮັງ​ປອດ, ຫຼອດ​ສຽງ ຫຼື ມະ​ເຮັງ​ເຫຍື່ອ​ຫຸ້ມ​ປອດ, ກຳ­ມະ­ກອນ​ທີ່​ເຮັດ​ວຽກ​ຢູ່​ໃນ​ໂຮງ­ງານ​ທີ່​ນຳ​ໃຊ້​ທາດ​ໄຍ​ຫີນ ແລະ ຊຸມ​ຊົນ​ທີ່​ອາ​ໄສ​ຢູ່​ໃກ້​ຄຽງ​ມີ​ຄວາມ​ສ່ຽງ​ເປັນ​ພະ­ຍາດ​ດັ່ງ­ກ່າວ ສະ­ມາ­ຊິກ​ຄອບ­ຄົວ​ກໍ​ມີ​ຄວາມ​ສ່ຽງ​ຍ້ອນ​ຝຸ່ນ​ໄຍ​ຫີນ​ທີ່​ຕິດ​ໄປ​ນຳ​ເຄື່ອງ­ນຸ່ງ​ຂອງ​ເຂົາ ເຈົ້າ, ຜູ້​ທີ່​ເຮັດ​ວຽກ​ກ່ຽວ​ກັບ​ທາດ​ໄຍ​ຫີນ​ຕ້ອງ​ໃສ່​ອຸ­ປະ­ກອນ​ປ້ອງ​ກັນ​ແບບ​ສະ­ເພາະ​ກ່ອນ​ເຮັດ​ວຽກ​ກັບ​ວັດ​ສະ​ດຸ​ທີ່​ມີ​ສ່ວນ​ປະ ສົມ​ຂອງ​ທາດ​ໄຍ​ຫີນ, ຕ້ອງ​ຫົດ​ນ້ຳ​ໃສ່​ກະ­ເບື້ອງ​ທີ່​ແຕກ ແລະ ສິ່ງ​ເສດ​ເຫຼືອ​ທີ່​ມີ​ທາດ​ໄຍ​ຫີນ​ເພື່ອ​ຫຼຸດ­ຜ່ອນ​ການ​ເກີດ​ຝຸ່ນ​ລະ­ອອງ, ສຳ​ລັບ​ ສປປ ​ລາວ​ ຍັງ​ນຳ​ໃຊ້​ທາດ​ໄຍ​ຫີນ​ຢູ່ ແລະ ນຳ​ໃຊ້​ຫຼາຍ​ກວ່າ​ໝູ່​ແມ່ນ​ຢູ່​ປະ­ເທດ​ຣັດ​ເຊຍ.
ເພື່ອ​ຫຼຸດ­ຜ່ອນ​ການ​ເກີດ​ພະ­ຍາດ​ມະ​ເຮັງ​ໃນ​ຂັ້ນ​ຕໍ່​ໄປ​ພວກ​ເຮົາ​ຄວນ​ຫຼີກ­ເວັ້ນ​ສະ ຖານ­ທີ່​ກໍ່­ສ້າງ ຫຼື​ ອາ­ຄານ​ທີ່​ມີ​ການ​ສ້ອມ­ແປງ ທຸບ, ເລື່ອຍ, ຕັດ, ເຈຍ​ວັດ​ສະ​ດຸ​ທີ່​ມີ​ສ່ວນ​ປະ­ສົມ​ຂອງ​ທາດ​ໄຍ​ຫີນ, ຄວນ​ເລືອກ​ໃຊ້​ສິນ­ຄ້າ​ທີ່​ມີ​ເຄື່ອງ­ໝາຍ​ຮັບ­ຮອງ​ວ່າ​ບໍ່​ມີ​ສ່ວນ​ປະ­ສົມ​ຂອງ​ທາດ​ໄຍ​ຫີນ, ປັດ­ຈຸ­ບັນ​ມີ​ວັດ​ສະ​ດຸ​ທົດ​ແທນ​ທາດ​ໄຍ​ຫີນ​ເຊັ່ນ: Polyvinyl Alcohal          ( PVA )  ໄຍ​ແກ້ວ​ ຊຶ່ງ​ມີ​ລາ­ຄາ​ບໍ່​ແພງ​ດັ່ງ​ທີ່​ຄິດ ຄຸນ​ນະ​ພາບ​ທຽບ​ເທົ່າ​ກັບ​ທາດ​ໄຍ​ຫີນ ທີ່​ສຳ­ຄັນ​ປອດ​ໄພ​ຈາກ​ສານ​ກໍ່​ມະ​ເຮັງ.
(ຂ່າວ​-​ພາບ: ພູ​ວັນ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110