ສ້າງຄວາມເຂັ້ມແຂງປັບ¬ປຸງ ແລະ ພັດທະນາລະບົບຖານຂໍ້ມູນ ວຽກງານ ຖວທ ໃຫ້ເປັນທັນສະໄໝ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 13/08/2020 09:12:59 ຈຳ​ນວນ​​ຢ້ຽມ​ຊົມ 2037 ຄັ້ງ

   ກະຊວງ​ຖະແຫຼງ​ຂ່າວ, ວັດທະນະທຳ ແລະ ທ່ອງ​ທ່ຽວ (ຖວທ) ຮ່ວມ​ກັບ​ບໍລິສັດ​ລາວ​ເພ້​ວຽງ​ຈັນ​ຈຳກັດ​ຜູ້​ດຽວ ໄດ້​ຈັດພິທີເຊັນ​ບົດ​ບັນທຶກ​ຄວາມ​ເຂົ້າ ໃຈ​ວ່າ​ດ້ວຍ​ໂຄງການ​ປັບປຸງ ແລະ ພັດທະນາ​ລະບົບ​ຖານ​ຂໍ້​ມູນ​ຂອງ​ວຽກ​ງານ ຖວທ ຂຶ້ນ​ໃນ​ວັນ​ທີ 12 ສິງຫາ​ນີ້, ທີ່​ໂຮງແຮມ​ຫູ​ໜານ​ນະຄອນຫຼວງ​ວຽງ​ຈັນ, ຮ່ວມ​ລົງ​ນາມ​ໃນ​ຄັ້ງ​ນີ້​ມີ​ທ່ານ ສົມ​ສະຫວາດ ພົງສາ ຫົວໜ້າ​ກົມ​ສື່​ມວນ​ຊົນ ກະຊວງ ຖວທ ແລະ ທ່ານ ພູໄຊ​ຊະນະ ໄຊ​ສົມ ບັດ​  ປະທານ​ບໍລິສັດ​ລາວ​ເພ້​ວຽງ​ຈັນ ຈຳກັດ​ຜູ້​ດຽວ ໂດຍ​ການ​ເຂົ້າ​ຮ່ວມ​ເປັນ​ສັກຂີ​ພິຍານ​ຂອງ​ທ່ານ ສະຫວັນ​ຄອນ ​ຣາ​ຊ​ມຸນ​ຕຣີ ຮອງ​ລັດຖະມົນຕີ​ກະຊວງ ຖວທ ພ້ອມ​ດ້ວຍ​ພະນັກງານ​ທັງ​​ສອງຝ່າຍເຂົ້າ​ຮ່ວມ.
   ໃນ​ພິທີ​ຮ່ວມ​ລົງ​ນາມ​ໃນ​ຄັ້ງ​ນີ້ ແມ່ນ​ເພື່ອ​ເປັນ​ການ​ສຶກສາ, ສໍາ​ຫຼວດ, ອອກ​ແບບ ຄວາມ​ເປັນ​ໄປ​ໄດ້​ໃນ​ການ​ສ້າງ​ໂຄງການ​ປັບປຸງ ແລະ ພັດທະນາ​ລະບົບ​ຖານ​ຂໍ້​ມູນ​ຂອງ​ວຽກ​ງານ​ຖະແຫຼງ​ຂ່າວ, ວັດ​ທະ​ນະ​ທໍາ ແລະ ທ່ອງ​ທ່ຽວ ໃຫ້​ສໍາ​ເລັດ​ໂດຍ​ໄວ ແລະ ສອດຄ່ອງ​ກັບ​ສະພາບ​ແວດ​ລ້ອມ​ຕົວ​ຈິງ, ຖານ​ຂໍ້​ມູນ​ທຸກ​ຢ່າງ​ຈະ​ເປັນ​ການ​ຮວບຮວມ​ເອົາ​ທຸກ​ຢ່າງ​ກ່ຽວ​ກັບ​ການທ່ອງທ່ຽວ, ຄົນ​ເຂົ້າ​-​ອອກ, ສະຖານທີ່​ທ່ອງ​ທ່ຽວ, ຮ້ານ​ອາຫານ, ໂຮງແຮມ​ແຫຼ່ງ​ວັດທະນະທຳ, ວັດ​ຖຸ​-​ບູຮານ ຊຶ່ງ​ຈະ​ເປັນ​ບ່ອນ​ຮວບຮວມ​ເອົາ​ໝົດ​ທຸກ​ຂໍ້​ມູນ​ເຂົ້າ​ມາ​ຮວມ​ຕົວ​ເອີ້ນ​ໄດ້​ວ່າ​ເປັນ​ບ່ອນ​ເກັບ​ກຳ​ສະຖິຕິ​ຂໍ້​ມູນ​ເຂົ້າ​ໄວ້​ໃນ​ຖານ​ຂໍ້​ມູນ​ຂອງ​ຊາດ ນີ້​ແມ່ນ​ຂໍ້​ດີ​ຂອງ​ການ​ຫັນ​ເປັນ​ຖານ​ຂໍ້​ມູນ ເພື່ອ​ຄວາມ​ສະດວກ​ໃນ​ການ​ສຶກສາ​ຄົ້ນຄວ້າ ເຮັດ​ການ​ບໍລິການ ແລະ  ອີກ​ເປົ້າ​ໝາຍ​ໜຶ່ງ​ກໍ່​ເພື່ອ​ອໍາ​ນວຍ​ຄວາມ​ສະດວກ ໃນ​ການ​ເຂົ້າ​ເຖິງ​ຂໍ້​ມູນ​ຂ່າວສານ​ທີ່​ຈໍາ​ເປັນ ແລະ ກ່ຽວຂ້ອງ​ກັບ​ການ​ພັດທະນາ​ລະບົບ​ຖານ​ຂໍ້​ມູນ. ຕິດຕາມ​ກວດກາ ແລະ ຊຸກຍູ້​ພາກສ່ວນ​ທີ່​ກ່ຽວຂ້ອງ ໃຫ້ການ​ສະໜັບສະໜູນ ຮ່ວມ​ມື ກັບ ບໍລິສັດ ລາວ​ເພ້ ວຽງ​ຈັນ ຈໍາ​ກັດ​ຜູ້​ດຽວ ແລະ ລາຍ​ງານ ຄວາມ​ຄືບ​ໜ້າ ໃຫ້​ແກ່​ແກນ​ນໍາ​ກະຊວງ​ເປັນ​ແຕ່​ໄລ​ຍະ.
    ບົດ​ບັນທຶກ​ຄວາມ​ເຂົ້າໃຈ (MOU) ສະບັບ​ນີ້ ມີ​ກໍາ​ນົດ ເລີ່ມ​ໃຊ້​ໄດ້​ແຕ່​ວັນ​ທີ 12/8/2020 ເຖິງ​ວັນ​ທີ 12/8/2021.
(ຂ່າວ: ພູ​ວັນ)
 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110