ງານໂຮມຊຸມນຸມສະເຫຼີມສະຫຼອງ ວັນສ້າງຕັ້ງແນວລາວສ້າງຊາດ ຄົບຮອບ 70 ປີ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 14/08/2020 09:19:14 ຈຳ​ນວນ​​ຢ້ຽມ​ຊົມ 620 ຄັ້ງ

ພິທີ​ໂຮມ​ຊຸມນຸມ​ສະເຫຼີມ ສະຫຼອງ​ວັນ​ສ້າງຕັ້ງ​ແນວ​ລາວ​ສ້າງ​ຊາດ​ຄົບຮອບ 70 ປີ (13/8/1950-13/8/2020) ໄດ້​ຈັດ​ຂຶ້ນໃນ​ວັນ​ທີ 13 ສິງຫາ 2020 ທີ່​ຫໍ​ປະຊຸມ​ແຫ່ງ​ຊາດ ໃຫ້​ກຽດ​ເຂົ້າ​ຮ່ວມ​ມີ ພະ​ເຖ​ລາ ນຸ​ເຖລະ ທ່ານ ບຸນ​ຍັງ ວໍລະ​ຈິດ ປະທານ​ປະເທດ,  ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ພ້ອມ​ດ້ວຍ​ກໍາ​ມະ​ການ​ກົມ​ການເມືອງ​ສູນ​ກາງ​ພັກ​ ຄະນະ​ເລຂາທິການ​ ສູນກາງພັກ ອະ​ດີດການ​ນໍາ​ພັກ​-​ລັດ, ລັດຖະມົນຕີ, ຮອງ​ລັດຖະມົນຕີ ກະ​ຊວງ​-​ອົງການ​ທຽບ​ເທົ່າ

​ຜູ້​ແທນ​ແນວ​ລາວ​ສ້າງ​ຊາດ,  ພະ ນັກງານ​ປະຕິວັດ​ອາວຸໂສ ແລະ ແຂກ​ຖືກ​ເຊີນ.
ໃນ​ພິທີ ທ່ານ ໄຊ​ສົມ​ພອນ ພົມວິຫານ ປະທານ​ສູນ​ກາງ​ແນວ​ລາວ​ສ້າງ​ຊາດ ໄດ້​ຜ່ານ​ບົດ​ລາຍ​ງານ​ຫຍໍ້​ມູນເຊື້ອ ແລະ ຜົນງານ​ແນວ​ລາວ​ສ້າງ​ຊາດ​ໄລຍະ 70 ປີ ໂດຍ​ມີ​ບາງ​ຕອນ​ວ່າ: ພາຍຫຼັງ​ປະເທດ​ຊາດ​ໄດ້​ຮັບ​ການ​ປົດ​ປ່ອຍ​ຢ່າງ​ສົມບູນ ແນວ​ລາວ​ສ້າງ​ຊາດ​ໄດ້​ປະຕິບັດ​ໜ້າທີ່​ປຸກລະດົມ ຂົນຂວາຍ​ສຶກສາ​ອົບຮົມປະຊາຊົນ​ຢ່າງ​ກວ້າງຂວາງ ປະຕິບັດ​ສອງ​ໜ້າທີ່​ຍຸດທະສາດ ແລະ ພາ ລະກິດ​ປ່ຽນແປງ​ໃໝ່​ຢ່າງ​ມີ​ໄຊ ສືບຕໍ່​ເຕົ້າໂຮມ​ທຸກ​ກໍາ​ລັງ​ປະຕິບັດ​ແຜນ​ນະໂຍບາຍ​ພັດທະນາ​ຊົນນະບົດ​ແກ້​ໄຂ​ຄວາມທຸກ​ຍາກ​ຕິດ​ພັນ​ກັບ​ການ​ສ້າງ​ຂະບວນ​ການ​ແຂ່ງຂັນ​ຮັກ​ຊາດ ຮັກ​ພັດທະນາ​ຕ່າງໆ​ຫັນ​ລົງ​ກໍ່ສ້າງ​ຮາກ​ຖານ​ການເມືອງ ແລະ ຈຸດ​ສຸມ​ພັດທະນາ​ຕາມ 4 ເນື້ອ​ໃນ 4 ຄາດໝາຍ ສ້າງ​ບ້ານ ແລະ ກຸ່ມ​ບ້ານ​ພັດທະນາ ເພື່ອ​ສ້າງ​ເປັນ​ຕົວ​ເມືອງ​ນ້ອຍ​ໃນ​ຊົນນະບົດ ແນໃສ່​ສ້າງ​ການ​ຫັນປ່ຽນ​ຢ່າງ​ແຂງແຮງ ເພື່ອ​ຫຼຸດຜ່ອນ​ຄວາມ​ດ້ອຍ​ພັດທະນາ​ໃນ​ອະນາຄົດ ສັງ​ລວມ​ແລ້ວ​ຕະຫຼອດ​ໄລຍະ 70 ປີຜ່ານມາ ຍາມ​ໃດ​ກໍ່​ໄດ້​ເອົາໃຈໃສ່​ປັບປຸງ​ຕົນ​ເອງ​ຕາມ​ແຕ່​ລະສະ​ໄໝ​ຂອງ​ການ​ປະຕິວັດ ປັບປຸງ​ກົງ ຈັກ​ການຈັດຕັ້ງ​ໃຫ້​ໜັກແ​ໜ້ນ​ເຂັ້ມແຂງ ມີ​ລະບົບ​ຄະນະ​ປະ​ ຈໍາ ຄະນະ​ທີ່​ປຶກສາ​ຕ່າງໆສ້າງ ​ສູນຝຶກ ອົບຮົມບໍາ​ລຸງ​ສ້າງ ​ພະນັກງານ​ໃຫ້​ເຕີບ​ໃຫຍ່​ໃນ​ຂະບວນ​ການ​ວຽກ​ງານ​ຕົວ​ຈິງ​ທາງ​ດ້ານ​ປະລິມານ ແລະ ຄຸນ​ນະ​ພາບ ເພີ່ມ​ຈໍາ​ນວນ​ກໍາ​ມະ​ການ​ແນວ​ລາວ​ສ້າງ​ຊາດ​ໃນ​ຂົງເຂດ​ພັກ​-​ລັດ ເອກະ​ຊົນ ຊັ້ນ​ຄົນ ຊົນເຜົ່າ ສາສະໜາ ເພດ​ໄວ ແລະ ຄົນ​ເຊື້ອ​ຊາດ​ລາວ​ຢູ່​ຕ່າງປະເທດ ໄດ້​ເອົາໃຈໃສ່​ປະຕິບັດ​ວຽກ​ງານ​ການ​ທູດ​ປະຊາຊົນ​ຕາມ​ແນວທາງ​ການ​ຕ່າງປະເທດ​ຂອງ​ພັກ​ໃນ​ຂົງເຂດ​ແນວ​ລາວ​ສ້າງ​ຊາດ ພ້ອມ​ນັ້ນ​ໄດ້​ຮ່ວມ​ມື​ກັບ​ກຸ່ມ ບໍລິສັດ ພົງ​ສະຫວັນ ດໍາ​ເນີນ​ໂຄງການ​ສ້າງ​ຄອບຄົວ ແລະ ບ້ານ​ສາມັກຄີ ຕິດ​ພັນ​ກັບ​ການ​ແກ້​ໄຂ​ຄວາມທຸກ​ຍາກ​ຂອງ​ປະຊາຊົນ​ບັນດາເຜົ່າ ຢູ່​ເມືອງ​ລ້ອງ​ຊານ ແຂວງ​ໄຊ​ສົມບູນ ຊຸກຍູ້​ການ​ສ້າງ​ກອງ​ທຶນ​ສາມັກຄີ​ແນວ​ລາວ​ສ້າງ​ຊາດ​ຕິດ​ພັນ​ກັບ​ການ​ສ້າງ​ຕົວ​ແບບ​ການ​ຜະລິດ ປຸງ​ແຕ່ງ​ກະ​ສິ​ກໍາ​ເປັນ​ສິນຄ້າ​ຢູ່​ແຂວງ​ໄຊ​ສົມບູນ ສະຫວັນ​ນະ​ເຂດ ຄໍາ​ມ່ວນ ຫົວພັນ ແລະ ແຂວງ​ອື່ນໆ​ຈໍາ​ນວນ​ໜຶ່ງ ປະກອບສ່ວນ​ພັດທະນາ​ຊົນນະບົດ ແກ້​ໄຂ​ຄວາມທຸກ​ຍາກ​ຕາມ​ນະ ໂຍບາຍ​ຂອງ​ພັກ​-​ລັດ ປັບ ປຸງ​ສາຍ​ໄຍ​ການຈັດຕັ້ງ​ຮອດ​ທ້ອງຖິ່ນ​ຮາກ​ຖານ ຈາກ​ຄຸນ​ນະ​ພາບ​ນີ້​ໄປ​ສູ່​ຄຸນ​ນະ​ພາບ​ໃໝ່​ທີ່​ເປັນ​ລະບົບ​ລະບຽບ​ກວ່າ​ເກົ່າ ເພື່ອ​ເຮັດ​ຫຼ້ອນ​ໜ້າທີ່​ການເມືອງ​ທີ່​ພັກ​ປະຊາຊົນ​ປະຕິວັດ​ລາວ​ມອບ​ໃຫ້.
ໃນ​ພິທີ​ໂຮມ​ຊຸມນຸມ​ທ່ານ​ບຸນ​ຍັງ​ວໍລະ​ຈິດ​ໄດ້​ໃຫ້​ກຽດ​ປະດັບ​ຫຼຽນ​ຄໍາ​ແຫ່ງ​ຊາດ ຊຶ່ງ​ເປັນ​ຫຼຽນ​ສູງ​ສຸດ ໃຫ້​ແກ່​ອົງການ​ແນວ​ລາວ​ສ້າງ​ຊາດ, ປະດັບ​ຫຼຽນ​ໄຊ​ອິດສະຫຼະ​ຊັ້ນ I ໃຫ້​ແກ່​ປະທານ​ສູນ​ກາງ​ແນວ​ລາວ​ສ້າງ​ຊາດ ປະດັບ​ຫຼຽນ​ໄຊ​ພັດທະນາ​ຊັ້ນ I ໃຫ້​ແກ່​ນັກທຸລະກິດ​ດີເດັ່ນ ຈໍາ​ນວນ 1 ທ່ານ.
ໃນ​ພິ​ທີ​ດັ່ງ​ກ່າວ  ທ່ານ ບຸນ​ຍັງ ວໍ​ລະຈິດ ໄດ້​ກ່າວ​ສະ​ແດງ ຄວາມ​ຍ້ອງ​ຍໍ​ຊົມ​ເຊີຍ​ຕໍ່​ຜົນ​ງານ  ທີ່​ອົງ​ການ​ແນວ​ລາວ​ສ້າງ​ຊາດ ຍາດ​ມາ​ໄດ້​ຕະ​ຫຼອດ 70 ປີ ຜ່ານ​ມາ,  ອົງການ​ແນວ​ລາວ​ສ້າງ​ຊາດ​ຂັ້ນ​ຕ່າງໆ​ໃນ​ທົ່ວ​ປະເທດ​ໄດ້​ຮັບ​ການ​ປັບປຸງ​ບູລະນະ​ຢ່າງ​ເຕີບ​ໃຫຍ່​ເຂັ້ມແຂງ​ນັບ​ທັງ​ດ້ານ​ປະລິມານ ແລະ ຄຸນ​ນະ​ພາບ ໄດ້​ປະກອບສ່ວນ​ຢ່າງ​ສຳຄັນ​ໃຫຍ່​ຫຼວງ​ເຂົ້າ​ໃນ​ພາລະກິດ​ແຫ່ງ​ການ​ຕໍ່ສູ້​ກູ້​ຊາດ​ໃນ​ເມື່ອ​ກ່ອນ​ກໍ​ຄື​ໃນ​ພາລະກິດ​ແຫ່ງ​ການ​ປົກ​ປັກ​ຮັກສາ ແລະ ພັດທະນາ​ສ້າງສາ​ປະເທດ​ຊາດ​ໃນ​ໄລຍະ​ໃໝ່ ສະແດງ​ຄວາມ​ຍ້ອງຍໍ​ສັນ ລະເສີນ​ຕໍ່​ອົງການ​ແນວ​ລາວ​ສ້າງ​ຊາດ​ຂັ້ນ​ຕ່າງໆ ພີ່ນ້ອງ​ຮ່ວມ​ຊາດ​ທຸກ​ຊົນເຜົ່າ ທຸກ​ຊັ້ນ​ຄົນ ເພດ​-​ໄວ ໃນ​ທົ່ວ​ປະເທດ​ທີ່​ໄດ້​ເຊີດ​ຊູ​ນ້ຳໃຈ​ຮັກ​ຊາດ ຮັກ​ລະບອບ​ໃໝ່ ສາມັກຄີ​ເປັນ​ອັນ​ໜຶ່ງ​ອັນ​ດຽວ​ກັນ​ຢູ່​ອ້ອມ​ຂ້າງ​ສູນ​ກາງ​ພັກ ແລະ ລັດ ຜ່ານ​ຜ່າ​ຄວາມ​ຫຍຸ້ງຍາກ​ລຳບາກ ອຸທິດ​ສະຕິປັນຍາ ກຳລັງວັງຊາ ເສຍ​ສະຫຼະ​ທຸກ​ສິ່ງ​ທຸກ​ຢ່າງ ເພື່ອ​ຜົນ​ປະໂຫຍດ​ລວມ​ຂອງ​ປະເທດ​ຊາດ​ອັນ​ແສນ​ຮັກ​ຂອງ​ພວກ​ເຮົາ​ຕະຫຼອດ​ໄລຍະ​ທີ່​ຜ່ານ​ມາ ແລະ ໃນ​ຊຸມ​ປີ​ຕໍ່ໜ້າ​ນີ້​ແນວ​ລາວ​ສ້າງ​ຊາດ​ຂັ້ນ​ຕ່າງໆ​ໃນ​ທົ່ວ​ປະເທດ ຈົ່ງ​ສືບຕໍ່​ເສີມ​ຂະຫຍາຍ​ມູນເຊື້ອ​ອັນ​ສະຫງ່າ​ງາມ​ໃນ​ຕະຫຼອດ​ໄລຍະ 70 ປີຜ່ານມາ ອອກ​ແຮງ​ເຄື່ອນ​ໄຫວ​ຢ່າງ​ຫ້າວຫັນ​ຕາມ​ພາລະ​ບົດບາດ ແລະ ໜ້າທີ່​ການເມືອງ​ທີ່​ພັກ​ມອບ​ໝາຍ​ໃຫ້ ໃນ​ນັ້ນ​ຕ້ອງ​ເອົາໃຈໃສ່​ຍົກ​ສູງ​ຄັນ​ທຸງ​ເຕົ້າໂຮມ​ຄວາມ​ສາມັກຄີ​ທົ່ວ​ປວງ​ຊົນ​ບົນ​ພື້ນຖານ​ພັນ​ຕະ​ພາບ ກຳ​ມະ​ກອນ​-​ຊາວ​ກະສິກອນ ແລະ ນັກຮຽນ​ຮູ້​ປັນຍາ​ຊົນ​ປະຕິວັດ​ທີ່​ເປັນ​ຫຼັກ​ແຫຼ່ງ​ພາຍ​ໃຕ້​ການ​ນຳພາ​ຂອງ​ພັກ ພ້ອມ​ທັງ​ສຶກສາ​ອົບຮົມ​ເຂົາເຈົ້າ​ໃຫ້​ມີ​ຄວາມ​ຮັບ​ຮູ້​ເຂົ້າ ໃຈ​ຢ່າງ​ຖືກຕ້ອງ​ບັນດາແນວ ທາງ​ນະໂຍບາຍ ແລະ ລະບຽບ​ ກົດໝາຍ​ຂອງ​ລັດ.
   (ຂ່າວ: ມະ​ລິ+ພາບ: ຍຸ​ພິນ)

 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110