ສະຫາຍ ບຸນຍັງ ວໍລະຈິດ ສົນທະນາທາງໄກກັບ ສະຫາຍ ຫງວຽນຟູຈ້ອງ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 14/08/2020 09:21:19 ຈຳ​ນວນ​​ຢ້ຽມ​ຊົມ 834 ຄັ້ງ

ສະຫາຍ ບຸນ​ຍັງ ວໍລະຈິດ ເລຂາທິການ​ໃຫຍ່​ຄະນະ​ບໍລິ ຫານ​ງານ​ສູນ​ກາງ​ພັກ ປະທານ​ປະເທດ​ແຫ່ງ ສປປ ລາວ ໄດ້​ສົນທະນາ​ທາງໄກກັບສະຫາຍ ຫ​ງວຽນ ຟູ ຈ້ອງ ເລຂາທິການ ​ໃຫຍ່​ຄະນະ​ບໍ​ລິຫານງານສູນ​ ກາງ​ພັກກອມ​ມູ​ນິດ​ຫວຽດນາມ, ປະທານ​ປະເທດ​ແຫ່ງ ສສ ຫວຽດນາມ ໃນ​ຕອນ​ບ່າຍຂອງ ​ວັນ​ທີ 13 ສິງຫາ​ນີ້ ທີ່​ນະຄອນ ຫຼວງ​ວຽງ​ຈັນ.
ໃນ​ການ​ສົນທະນາ​ຄັ້ງ​ນີ້, ສະຫາຍ ບຸນ​ຍັງ ວໍລະ​ຈິດ ໄດ້​ສະແດງ​ຄວາມ​ປິ​ຕິ​ຊົມ​ຊື່ນທີ່​ໄດ້​ມີ​ໂອກາດ​ສົນທະນາ​ທາງໄກ​ກັບ​ສະຫາຍ ຫ​ງວຽນ ຟູ ຈ້ອງ ແລະ  ຖື​ໂອກາດ​ດັ່ງກ່າວ​ສະແດງ​ຄວາມ​ເສົ້າ​ໂສກ​ເສຍ​ໃຈ ແລະ ອາໄລ​ອາ​ວອນ​ຢ່າງ​ສຸດ​ຊຶ້ງ​ ຮ່ວມ​ກັບ ພັກ, ລັດ ແລະ ປະຊາຊົນ​ຫວຽດນາມ​ອ້າຍ​ນ້ອງ ຕໍ່​ການ​ຈາກ​ໄປ​ຂອງ ສະຫາຍ ເລຂາ ຟຽວ ອະດີດ​ເລຂາທິການ​ໃຫຍ່​ຄະນະ​ບໍລິຫານ​ງານ​ສູນ​ກາງ​ ພັກ​ກອມ​ມູ​ນິດ​ຫວຽດນາມ.

ການ​ຈາກ​ໄປ​ຂອງ ​ສະຫາຍ ເລຂາ ຟຽວ ເປັນ​ການ​ສູນ​ເສຍ​ທີ່​ໃຫຍ່​ຫຼວງ​ຂອງ​ພັກ, ລັດ ແລະ ປະຊາຊົນ ຫວຽດນາມ ອ້າຍ ນ້ອງ,  ສູນ​ເສຍ​ຜູ້ນຳ​ປະຕິວັດ ທີ່​ກ້າແກ່ນ, ເດັດດ່ຽວ​ໜຽວ​ແໜ້ນ​ຂອງ​ປະຊາຊົນ ຫວຽດນາມ.
ສະຫາຍ ບຸນ​ຍັງ ວໍລະ​ຈິດ ຍັງ​ໄດ້​ສະແດງ​ຄວາມ​ຊົມເຊີຍ ແລະ ຕີ​ລາຄາ​ສູງ​ຕໍ່​ຜົນສຳເລັດ​ອັນ​ໃຫຍ່​ຫຼວງ, ຮອບດ້ານ ທີ່​ປະຊາຊົນ ຫວຽດນາມ ອ້າຍ​ນ້ອງ ຍາດ​ມາ​ໄດ້​ໄລຍະ​ຜ່ານ​ມາ​ກໍ​ຄື​ຕີ​ລາຄາ​ຜົນສຳເລັດ​ໃນ​ການ​ຮັບ​ມື, ສະກັດ​ກັ້ນ ແລະ ຄວບ​ຄຸມ​ການ​ແຜ່​ລະບາດ ຂອງ​ພະຍາດ ໂຄ​ວິດ-19ໃນ​ຮອບ​ທີ 1 ຜ່ານ​ມາ ແລະ ສະແດງ​ຄວາມ​ເຊື່ອ​ໝັ້ນ​ວ່າ​ພັກ, ລັດຖະບານ ຫວຽດນາມ ຈະ​ສືບຕໍ່​ຍາດ​ໄດ້​ ໄຊຊະນະ​ໃນ​ການ​ຕ້ານ, ຄວບ ​ຄຸມພະ​ຍາດ​ດັ່ງກ່າວ​ທີ່​ພວມ​ ລະບາດ​ຮອບ ​2 ​ຢູ່​ຫວຽດ ນາມ, ສະແດງ​ຄວາມ​ຊົມເຊີຍ ຕໍ່​ຜົນສຳເລັດ​ຂອງ ສສ ຫວຽດ ນາມ ໃນ​ການ​ເປັນ​ປະທານ​ອາ​ຊຽນ ໃນ​ປີ 2020 ນີ້ ແລະ ຍັງ​ໄດ້​ອວຍພອນ​ໃຫ້​ປະຊາຊົນ ຫວຽດນາມ ອ້າຍ​ນ້ອງ ພາຍໃຕ້​ ການ​ນຳພາ​ຂອງ​ພັກ​ກອມ​ມູ​ນິດ​ຫວຽດນາມ ຈະ​ສືບຕໍ່​ຍາດ​ໄດ້ຜົນ​ສຳເລັດ​ໃໝ່​ໃຫຍ່​ຫຼວງ​ກວ່າ​ເກົ່າ ໃນ​ພາລະກິດ​ແຫ່ງ​ການ​ປ່ຽນແປງ​ໃໝ່, ສືບຕໍ່​ປະຕິ ບັດ​ມະຕິ​ກອງ​ປະຊຸມ​ໃຫຍ່​ ຄັ້ງ​ທີ XII ຂອງ​ພັກ​ວາງ​ອອກ​ໃຫ້​ປະກົດ​ເປັນ​ຈິງ ເພື່ອ​ກ້າວ​ໄປ​ສູ່​ການ​ດຳເນີນ​ກອງ​ປະຊຸມ​ໃຫຍ່​ຄັ້ງ​ທີ XIII ຂອງ​ພັກ​ໃນ​ຕໍ່​ໜ້າ.
ສະຫາຍ ບຸນ​ຍັງ ວໍລະ​ຈິດ ຍັງ​ໄດ້​ສະແດງ​ຄວາມ​ຂອບໃຈ ທີ່​ຫວຽດນາມ ໄດ້​ບິ​ແບ່ງ​ບົດຮຽນ ແລະ ໃຫ້ການ​ຊ່ວຍເຫຼືອ​ລາວ ເພື່ອ​ຮັບ​ມື​ກັບ​ການ​ແຜ່​ລະ ບາດ​ຂອງ​ພະຍາດ ໂຄ​ວິດ-19 ຢ່າງ​ທັນ​ການ​ຊຶ່ງ​ເປັນ​ການ​ປະ ກອບສ່ວນຊ່ວຍເຫຼືອ ສປປ  ລາວ ໃນ​ການ​ສະກັດ​ກັ້ນຕ້ານ ​ການ​ແຜ່​ລະບາດ​ຂອງ​ເຊື້ອ​ພະ ຍາດ ໂຄ​ວິດ-19 ຢ່າງ​ມີ​ປະສິດ​ທິ​ຜົນ​ໃນ​ໄລຍະ​ຜ່ານ​ມາ.
ສະຫາຍ ຫ​ງວຽນ ຟູ ຈ້ອງ ໄດ້​ຕີ​ລາຄາ​ສູງ​ຕໍ່​ການ​ສົນທະນາ​ທາງໄກ​ກັບ​ສະຫາຍ ບຸນ​ຍັງ ວໍລະ​ຈິດ ໃນ​ຄັ້ງ​ນີ້  ໂດຍ​ໄດ້​ສະ ແດງ​ຄວາມ​ຂອບໃຈ​ມາ​ຍັງ ພັກ, ລັດຖະບານ, ສະພາ​ແຫ່ງ​ຊາດ, ສູນ​ກາງ​ແນວ​ລາວ​ສ້າງ​ຊາດ ແລະ ອົງການ​ຕ່າງໆ ທີ່​ໄດ້​ສົ່ງ​ສານ​ສະແດງ​ຄວາມ​ເສົ້າ​ສະຫຼົດ​ໃຈ​ແບ່ງ​ເບົາ​ຄວາມທຸກ​ໂສກ ຕໍ່​ການ​ຈາກ​ໄປ​ຂອງ​ສະຫາຍ                                                            ເລຂາ ຟຽວ  ອະດີດ​ເລຂາທິການ​ໃຫຍ່ ພັກ​ກອມ​ມູ​ນິດ​ຫວຽດນາມ ທັງ​ຈະ​ມີ​ຄະນະ​ຜູ້​ແທນ​ຂັ້ນ​ສູງ​ພັກ​-​ລັດ ລາວ​ໄປ​ໄວ້​ອາໄລ​ຕື່ມ​ອີກ  ຊຶ່ງ​ເປັນ​ການສະແດງ​ໃຫ້​ເຫັນ​ເຖິງມູນເຊື້ອ​ສາຍ​ພົວພັນ​ມິດຕະພາບ​ອັນ​ຍິ່ງ​ໃຫຍ່, ຄວາມ​ສາມັກຄີ​ພິເສດ  ແລະ  ການ​ຮ່ວມ​ມື​ຮອບດ້ານ ລະຫວ່າງ​ ສອງພັກ ສອງ​ລັດ ແລະ ປະຊາຊົນ​ສອງ​ຊາດ. ສະຫາຍ​ໄດ້​ສະແດງ​ຄວາມ​ຊົມເຊີຍ​ຕໍ່​ຜົນສຳເລັດ​ທີ່​ປະຊາຊົນ​ລາວ ຍາດ​ມາ​ໄດ້​ໄລຍະ​ຜ່ານ​ມາ ແລະ ສະແດງ​ຄວາມ​ເຊື່ອ​ໝັ້ນ​ວ່າ​ພາຍ​ໃຕ້​ການ​ນຳພາ​ຂອງ​ພັກ ປະຊາຊົນ ປະຕິວັດ​ລາວ, ປະຊາຊົນ​ລາວ ບັນດາເຜົ່າ​ຈະ​ສືບຕໍ່​ຍາດ​ໄດ້ຜົນ​ສຳເລັດ​ໃໝ່ ໃຫຍ່​ຫຼວງ​ກວ່າ​ເກົ່າ, ປະຕິບັດ​ສຳເລັດ​ບັນດາ​ເປົ້າ​ໝາຍ​ທີ່​ມະຕິ​ກອງ​ປະຊຸມ​ໃຫຍ່​ຄັ້ງ​ທີ X ຂອງ​ພັກ ວາງ​ອອກ, ກ້າວ​ສູ່​ການ​ກະກຽມ​ດຳ ເນີນ​ກອງ​ປະຊຸມ​ໃຫຍ່​ຄັ້ງ​ທີ XI ຂອງ​ພັກ​ຢ່າງ​ມີ​ໄຊ.
ໃນ​ໂອກາດ​ນີ້, ສະຫາຍ ຫ​ງວຽນ ຟູ ຈ້ອງ ໄດ້​ສະແດງ​ຄວາມ​ຂອບໃຈ​ຕໍ່​ ສະຫາຍ ບຸນ​ຍັງ ວໍລະ​ຈິດ ທີ່​ໄດ້ ສະແດງ​ຄວາມ​ເປັນ​ຫ່ວງ​ເປັນ​ໄຍຕໍ່​ກັບ​ສະພາບ​ການຕ້ານ ແລະ ສະກັດ​ກັ້ນ​ການ​ແຜ່​ລະບາດ​ຂອງ​ພະຍາດໂຄ​ວິດ -19 ຢູ່ ສສ ຫວຽດນາມ ໃນ​ປັດຈຸ​ບັນ, ສະແດງ​ຄວາມ​ຂອບໃຈ​ຕໍ່​ຝ່າຍ ລາວ ໃນ​ການ​ປະສານ​ສົມທົບ​ກັບ​ຫວຽດນາມ ໃນ​ກອບ​ການ​ຮ່ວມ​ມື ອາ​ຊຽນ ເພື່ອ​ຍາດ​ເອົາ​ໝາກຜົນ​ອັນ​ຕັ້ງໜ້າ​ຂອງ​ແຕ່​ລະ​ປະເທດ; ສະເໜີ​ໃຫ້​ສອງ​ປະເທດ ສືບຕໍ່​ຮ່ວມ​ມື​ຢ່າງ​ແໜ້ນ​ແຟ້ນ, ຮ່ວມ​ຈິດ​ຮ່ວມ​ໃຈ ຄຽງ​ບ່າ​ຄຽງ​ໄຫຼ່​ກັນເອົາ​ຊະນະ​ໃນ​ການ​ຕ້ານ​ເຊື້ອ​ພະຍາດ ໂຄ​ວິດ-19 ເພື່ອ​ເຮັດ​ໃຫ້​ສອງ​ປະເທດ​ມີ​ຄວາມ​ສະຫງົບ​ສຸກ ສືບຕໍ່​ພັດທະນາ​ເສດ​ຖະ​ກິດ​-​ສັງຄົມ ແລະ ຍົກ​ສູງ​ຊີວິດ​ການ​ເປັນ​ຢູ່​ຂອງ​ປະຊາຊົນ​ສອງ​ປະເທດ​ໃຫ້​ດີ​ຂຶ້ນ​ເລື້ອຍໆ.
ສະຫາຍ ຫ​ງວຽນ ຟູ ຈ້ອງ ແລະ ສະຫາຍ ບຸນ​ຍັງ ວໍລະ​ ຈິດ ໄດ້​ແຈ້ງ​ໃຫ້​ກັນຊາບກ່ຽວ ​ກັບ​ສະພາບ​ການພົ້ນ​ເດັ່ນຂອງ​ແຕ່​ລະ​ພັກ, ແຕ່​ລະ​ປະເທດ, ແລກປ່ຽນ​ຄວາມ​ຄິດ​ຄວາມ​ເຫັນ​ກ່ຽວ​ກັບ​ການພົວພັນ​ຮ່ວມ ​ມື​ລະຫວ່າງ​ສອງ​ປະເທດ, ແລກປ່ຽນ​ສະພາບ​ການ​ໃນ​ຂົງເຂດ ແລະ ສາກົນ​ທີ່​ຕ່າງ​ຝ່າຍ​ມີ​ຄວາມ​ສົນໃຈ, ໄດ້​ຕີ​ລາຄາ​ສູງ​ເຖິງ​ການ​ພົວພັນ​ຮ່ວມ​ມື​ລະຫວ່າງ​ສອງ​ພັກ, ສອງ​ລັດ​ໃນ​ໄລຍະ​ຜ່ານ​ມາ ທີ່​ໄດ້​ຮັບ​ການ​ປັບປຸງ ແລະ ຂະຫຍາຍຕົວ​ໃນ​ທຸກ​ຂົງເຂດ​ວຽກ​ງານ, ປະກອບສ່ວນ​ເຂົ້າ​ໃນ​ການ​ຮັກສາ​ສະຖຽນ​ລະ​ພາບ​ດ້ານ​ການເມືອງ ແລະ ການ​ພັດທະນາ​ເສດຖະກິດ​ສັງຄົມ​ຢູ່​ແຕ່​ລະ​ປະເທດ, ພ້ອມ​ທັງ​ຢືນຢັນ​ຈະ​ພ້ອມ​ກັນ​ສືບຕໍ່​ປົກ​ປັກ​ຮັກສາ ແລະ ເພີ່ມ​ພູນ​ຄູນ​ສ້າງ​ສາຍ​ພົວພັນ​ມິດຕະພາບ​ທີ່​ຍິ່ງ​ໃຫຍ່, ຄວາມ​ສາມັກຄີ​ພິເສດ ແລະ ການ​ພົວພັນ​ຮ່ວມ​ມື​ຮອບດ້ານ​ລະຫວ່າງ​ສອງ​ຊາດ ລາວ​-​ຫວຽດນາມ​ໃຫ້​ຈະເລີນ​ງອກ​ງາມ ແລະ ຍືນ​ຍົງ​ຄົງ​ຢູ່​ຕະຫຼອດ​ໄປ.

 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110