ຄະນະຜູ້ແທນຂັ້ນສູງພັກ-ລັດ ເດີນທາງໄປວາງພວງມາລາ ໄວ້ອາໄລ ສະຫາຍ ເລຂາ ຟຽວ ອະດີດເລຂາທິການໃຫຍ່ ຄະນະບໍລິຫານງານ ສູນກາງພັກກອມມູນິດຫວຽດນາມ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 17/08/2020 09:18:36 ຈຳ​ນວນ​​ຢ້ຽມ​ຊົມ 1044 ຄັ້ງ

ໃນ​ຕອນ​ເຊົ້າ​ຂອງ​ວັນ​ທີ 14 ສິງຫາ 2020, ຄະນະ​ຜູ້​ແທນ​ຂັ້ນ​ສູງ ພັກ, ລັດ ນໍາ​ໂດຍ ສະຫາຍ ທອງ​ລຸນ ສີ​ສຸ​ລິດ ກໍາ​ມະ​ການ​ກົມ​ການເມືອງ​ສູນ​ກາງ​ພັກ ນາຍົກລັດຖະມົນຕີ​ແຫ່ງ ສາທາລະນະ​ລັດ ປະຊາ ທິປະໄຕ ປະຊາຊົນ​ລາວ ໄດ້​ເດີນທາງ​ໄປ​ວາງ​ພວງມາລາ​ໄວ້​ອາໄລ ສະຫາຍ ເລຂາ​ຟຽວ ອະດີດ​ເລຂາທິການ​ໃຫຍ່ ຄະນະ​ບໍລິຫານ​ງານ​ສູນ​ກາງ​ພັກ​ກອມ​ມູ​ນິດ​ຫວຽດນາມ ຊຶ່ງ​ໄດ້​ເຖິງ​ແກ່​ມໍລະນະ​ກໍາ​ເມື່ອວັນ​ທີ 7 ສິງຫາຜ່ານ​ມາ. ພາຍຫຼັງ​ພິທີ​ໄວ້​ອາໄລ​ທາງ​ການ​ແລ້ວ, ສະຫາຍ ທອງ​ລຸນ ສີ​ສຸ​ລິດ ກໍ​ໄດ້​ຕາງໜ້າ ຄະນະ​ບໍລິຫານ​ງານ​ສູນ​ກາງ​ພັກ ປະຊາຊົນ​ປະຕິວັດ​ລາວ, ສະພາ​ແຫ່ງ​ຊາດ, ລັດຖະບານ, ສູນ​ກາງ​ແນວ​ລາວ​ສ້າງ​ຊາດ ຂຽນ​ຄວາມ​ຮູ້ສຶກ​ລົງ​ໃນ​ປື້​ມ​ໄວ້​ອາໄລ ຊຶ່ງ​ມີ​ເນື້ອ​ໃນ​ບາງ​ຕອນ​ວ່າ: “ຄະນະ​ບໍລິຫານ​ງານ​ສູນ​ກາງ​ພັກ​ປະຊາຊົນ ປະຕິວັດ​ລາວ, ສະພາ​ແຫ່ງ​ຊາດ, ລັດຖະບານ, ສູນ​ກາງ​ແນວ​ລາວ​ສ້າງ​ຊາດ ມີ​ຄວາມ​ໂສກເສົ້າ​ເສຍດາຍ​ເປັນ​ຢ່າງ​ຍິ່ງ ເມື່ອ​ໄດ້​ຮັບ​ຂ່າວ​ການ​ຈາກ​ໄປ​ຂອງ ສະຫາຍ ເລຂາ​ຟຽວ ອະດີດ​ເລຂາທິການ​ໃຫຍ່ ຄະນະ​ບໍລິຫານ​ງານ​ສູນ​ກາງ​ພັກ​ກອມ​ມູ​ນິດ​ຫວຽດນາມ ຢ່າງ​ບໍ່​ມີ​ວັນ​ຫວນ​ກັບ​ມາ.  ການ​ຈາກ​ໄປ​ຂອງສະຫາຍ ເລຂາ ​ຟຽວ ເປັນ​ການ​ສູນ​ເສຍ​ອັນ​ໃຫຍ່​ຫຼວງ​ຂອງ ພັກ, ລັດ ແລະ ປະຊາຊົນ​ຫວຽດນາມ, ສູນ​ເສຍ​ນັກ​ປະຕິວັດ​ຜູ້​ອົງອາດ​ກ້າຫານ​ບໍ່​ຍອມ​ຈຳນົນ, ຜູ້ນຳ​ທີ່​ເຄົາລົບ​ຮັກ​ຂອງ ພັກ, ລັດ ແລະ ປະຊາຊົນ​ຫວຽດນາມ​ອ້າຍ​ນ້ອງ. ຕະຫຼອດ​ໄລຍະ​ຫຼາຍ​ທົດ​ສະ​ວັດ​ທີ່​ຜ່ານ​ມາ ສະຫາຍ ເລຂາ ​ຟຽວ ໄດ້​ມີ​ການ​ປະກອບສ່ວນ​ຢ່າງ​ໃຫຍ່​ຫຼວງ​ເຂົ້າ​ໃນ​ພາລະກິດ​ສ້າງສາ​ພັດທະນາ ແລະ ​ປົກ​ປັກ​ຮັກສາ​ປະເທດ​ຊາດ​ຫວຽດນາມ ເຮັດ​ໃຫ້​ປະເທດ​ຊາດ​ຫວຽດນາມ ມີ​ການ​ພັດທະນາ​ຢ່າງ​ບໍ່​ຢຸດ​ຢັ້ງ. ການ​ຈາກ​ໄປ​ຂອງ​ສະຫາຍ ຍັງ​ເປັນ​ການ​ສູນ​ເສຍ​ເພື່ອນ​ຮ່ວມ​ຮົບ​ປະຕິວັດ​ຜູ້​ອາດ​ຫານ, ສູນ​ເສຍ​ສະຫາຍ​ທີ່​ສະໜິດສະໜົມ ແລະ ໃກ້ຊິດ​ທີ່​ສຸດ​ຂອງ ພັກ, ລັດ ແລະ ປະຊາຊົນ​ລາວ. ສະຫາຍ​ເປັນ​ຜູ້​ໜຶ່ງ​ທີ່​ໄດ້​ມີ​ການ​ປະກອບສ່ວນ​ສຳຄັນ​ເຂົ້າ​ໃນ​ການ​ເສີມ​ຂະຫຍາຍ ແລະ ເພີ່ມ​ພູນ​ຄູນ​ສ້າງ​ສາຍ​ພົວພັນ​ມິດຕະພາບ​ອັນ​ຍິ່ງ​ໃຫຍ່, ຄວາມ​ສາມັກຄີ​ພິເສດ  ແລະ  ການ​ຮ່ວມ​ມື​ຮອບດ້ານ​ລະຫວ່າງ​ສອງ​ປະເທດລາວ ແລະ ​ຫວຽດ ນາມ ຕະຫຼອດ​ມາ”.
ໂອກາດ​ດຽວ​ກັນ​ນີ້, ສະ ຫາຍ ທອງ​ລຸນ ສີ​ສຸ​ລິດ ພ້ອມ​ດ້ວຍ​ຄະນະ ຍັງ​ໄດ້​ພົບ​ປະ​ກັບ ສະຫາຍ ຫ​ງວຽນ​ຊວັນ​ຟຸກ ກໍາ​ມະ​ການ​ກົມ​ການເມືອງ​ສູນ​ກາງ​ພັກ ນາຍົກລັດຖະມົນຕີ​ແຫ່ງ ສສ ຫວຽດນາມ. ໃນ​ການ​ພົບ​ປະ​ຄັ້ງ​ນີ້, ສະຫາຍ ທອງ​ລຸນ ສີ​ສຸ​ລິດ ໄດ້​ກ່າວ​ສະແດງ​ຄວາມ​ອາໄລ​ອາ​ວອນ​ຢ່າງ​ສຸດ​ຊຶ້ງ ແລະ ຂໍ​ແບ່ງ​ເບົາ​ຄວາມທຸກ​ໂສກ​ມາ​ຍັງ ຄະນະ​ບໍລິຫານ​ງານ​ສູນ​ກາງ​ພັກ​ກອມ​ມູ​ນິດ​ຫວຽດນາມ, ສະພາ​ແຫ່ງ​ຊາດ, ລັດຖະບານ, ແນວ​ໂຮມ​ປະເທດ​ຊາດ​ຫວຽດນາມ ກໍຄື​ຄອບຄົວ, ຍາດຕິ​ພີ່ນ້ອງ​ຂອງສະຫາຍ ເລຂາ​ ຟຽວ; ຕາງໜ້າ​ໃຫ້ ພັກ, ລັດຖະບານ​ລາວ ສະແດງ​ຄວາມ​ເຫັນໃຈ​ຕໍ່​ສະຫາຍ​ຫວຽດນາມ ທີ່​ໄດ້​ຮັບ​ຜົນ​ກະທົບ​ຈາກ​ການລະບາດພະຍາດ ໂຄ​ວິດ-19 ຮອບ​ໃໝ່ ແລະ ເຊື່ອ​ໝັ້ນ​ວ່າ ດ້ວຍ​ການ​ເອົາໃຈໃສ່​ຢ່າງ​ໃກ້ຊິດ​ຈາກ​ການ​ນຳ ພັກ​-​ລັດ ແລະ ການ​ນໍາ​ໃຊ້​ມາດ​ຕະການ​ທີ່​ເຂັ້ມ​ງວດ, ທັນ​ການ ສສ ຫວຽດນາມ ຈະ​ສາມາດ​ຄວບ​ຄຸມພະ​ຍາດ​ດັ່ງກ່າວ​ນີ້ ໄດ້​ຢ່າງ​ສິ້ນ​ເຊີງ​ໃນ​ໄວໆ​ນີ້; ສະແດງ​ຄວາມ​ຊົມເຊີຍ ສສ ຫວຽດນາມ, ໃນ​ສະພາບ​ການ​ທີ່​ມີ​ຄວາມ​ຫຍຸ້ງຍາກ ພ້ອມ​ຜົນ​ກະທົບ​ຈາກ​ການ​ແຜ່​ລະບາດ​ຂອງ​ພະຍາດ ໂຄ​ວິດ-19, ແຕ່​ກໍໄດ້​ເຮັດ​ໜ້າທີ່ ເປັນ​ສະມາຊິກ​ບໍ່​ຖາວອນ​ສະພາ​ຄວາມ​ໝັ້ນຄົງ ສປຊ ແລະ ປະທານ ອາ​ຊຽນ ຢ່າງ​ຕັ້ງໜ້າ. ໃນ​ການ​ພົບ​ປະ​ຄັ້ງ​ນີ້ ສອງ​ຝ່າຍ​ຍັງ​ໄດ້​ແຈ້ງ​ໃຫ້​ກັນ​ຊາບ ກ່ຽວ​ກັບ​ສະພາບ​ການ​ພົ້ນ​ເດັ່ນ​ຂອງ​ແຕ່​ລະ​ພັກ, ແຕ່​ລະ​ປະເທດ; ແລກ​ປ່ຽນ​ຄໍາ​ຄິດ​ຄໍາ​ເຫັນ​ກ່ຽວ​ກັບ ການ​ຮ່ວມ​ມື​ສອງ​ຝ່າຍ, ບັນຫາ​ທີ່​ພົ້ນ​ເດັ່ນ​ທີ່​ຕ່າງ​ຝ່າຍ​ໃຫ້​ຄວາມ​ສົນໃຈ; ແຈ້ງ​ໃຫ້​ກັນ​ຊາບ​ກ່ຽວ​ກັບ ສະພາບ​ການ​ແຜ່​ລະບາດ, ການ​ປ້ອງ​ກັນ ແລະ ສະກັດ​ກັ້ນ​ການ​ແຜ່​ລະບາດ ໂຄ​ວິດ-19 ຢູ່​ແຕ່​ລະ​ປະ​ເທດ. ສອງ​ຝ່າຍ​ເຫັນ​ດີ​ສືບຕໍ່​ເພີ່ມ​ທະວີ​ການ​ເຮັດ​ວຽກ​ຮ່ວມ​ກັນ ເພື່ອ​ຊຸກຍູ້​ການຈັດຕັ້ງ​ປະຕິບັດ​ບັນດາ​ຂໍ້​ຕົກລົງ​ຕ່າງໆ ຂອງ​ການ​ນໍາ​ຂັ້ນ​ສູງ​ຂອງ​ສອງ ພັກ - ລັດ ໂດຍ​ສະເພາະ​ການ​ຮ່ວມ​ມື​ດ້ານ​ເສດຖະກິດ ທີ່​ສອງ​ນາຍົກ​ໄດ້​ປຶກສາ​ຫາລື​ກັນ​ໃນ​ໂອກາດ​ພົບ​ປະ ຢູ່​ນະຄອນ​ດາ​ນັງ ໃນ​ເດືອນ ກໍລະກົດ ແລ້ວນີ້ ແລະ ໃນ​ອາທິດ​ຜ່ານ​ມາ ສອງ​ຄະ​ນະ​ກໍາ​ມາ​ທິ​ການ​ຮ່ວມ​ມື​ທັງ​ສອງ​ປະເທດ ກໍໄດ້​ມີ​ກອງ​ປະຊຸມ​ກາງ​ສະໄໝ​ທາງໄກ​ຮ່ວມ​ກັນ​ແລ້ວ ເພື່ອ​ຜັນ​ຂະຫຍາຍ​ຜົນ​ການ​ຕົກລົງ​ໃຫ້​ເປັນ​ຮູບ​ປະ​ທຳ, ນໍາ​ເອົາ​ໝາກຜົນ​ຕົວ​ຈິງ​ມາສູ່​ສອງ​ຝ່າຍ. (ຂ່າວ: ຄະ​ນະ​ພົວ​ພັນ​ຕ່າງປະ​ເທດ​ສູນ​ກາງ​ພັກ)

 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110