ກະຊວງ ຖວທ ສະຫຼອງວັນສື່ມວນຊົນ ແລະ ການພິມຈຳໜ່າຍ ຄົບຮອບ 70 ປີ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 17/08/2020 09:21:22 ຈຳ​ນວນ​​ຢ້ຽມ​ຊົມ 1215 ຄັ້ງ

ກະຊວງ​ຖະແຫຼງ​ຂ່າວ, ວັດທະນະທຳ ແລະ ທ່ອງ​ທ່ຽວ (ຖວທ) ໄດ້​ຈັດ​ພິທີ​ໂຮມ​ຊຸມ ນຸມ​ເພື່ອ​ສະເຫຼີມສະຫຼອງ​ວັນ​ສື່​ມວນ​ຊົນ ແລະ ການ​ພິມ​ຈໍາ​ໜ່າຍ  ຄົບຮອບ 70 ປີ (13/8/ 1950-13/8/2020)  ຂຶ້ນ​ໃນ​ວັນ​ທີ 14 ສິງຫາຜ່ານ​ມານີ້, ທີ່​ຫໍ​ວັດທະນະທຳ​ແຫ່ງ​ຊາດ ໂດຍ​ການ​ໃຫ້​ກຽດ​ເຂົ້າ​ຮ່ວມ ຂອງ​ທ່ານ ທອງ​ລຸນ ສີ​ສຸ​ລິດ ກໍາ​ມະ​ການ​ກົມ​ການເມືອງ​ສູນ​ກາງ​ພັກ ນາຍົກລັດຖະມົນຕີ;  ມີ​ທ່ານ  ກິ​ແກ້ວ ໄຂ​ຄໍາ​ພິທູນ ເລຂາທິ ການ​ສູນ​ກາງ​ພັກ ລັດຖະມົນຕີ​ກະຊວງ ຖວທ, ມີ​ຄະ​ນະ​ນໍາ​ກະຊວງ ຖວທ, ກົມ​-​ກອງ​ວິຊາ​ການ, ພະນັກງານ​ສື່​ມວນ​ຊົນ​-​ການ​ພິມ​ຈໍາ​ໜ່າຍ ທັງ​ພາກ​ລັດ, ເອກະ​ຊົນ ພ້ອມ​ດ້ວຍ​ແຂກ​ຖືກ​ເຊີນ​ເຂົ້າ​ຮ່ວມ.
ທ່ານ ກິ​ແກ້ວ ໄຂ​ຄໍາ​ພິທູນ ກ່າວ​ວ່າ: ການ​ຈັດ​ພິທີ​ໂຮມ​ຊຸມນຸມ​ໃນ​ມື້ນີ້​ຖື​ເປັນ​ມື້ໜຶ່ງ​ທີ່ມີ​ຄວາມ​ໝາຍຄວາມ​ສໍາ​ຄັນ​ທາງ​ດ້ານ​ປະຫວັດສາດທີ່​ໜັກ​ແໜ້ນ    ເພື່ອ​ພ້ອມ​ກັນ​ລະນຶກ 70 ປີ​ວັນສື່​ມວນ​ຊົນ ແລະ ການ​ພິມ​ຈໍາ​ໜ່າຍ ທີ່​ໄດ້​ປະກອບສ່ວນ​ໃນ​ຂະບວນ​ການ​ປະຕິບັດ​ພາ ລະກິດ​ການ​ຕໍ່ສູ້​ປົດ​ປ່ອຍປະ​ເທດ​ຊາດ​ໃນ​ແຕ່​ລະ​ໄລຍະ ນັບ​ແຕ່​ວັນ​ທີ 13 ສິງຫາ 1950 ຈົນ​ເຖິງ​ປັດຈຸ​ບັນ ກໍຄື​ໄລຍະ​ສ້າງສາ ແລະ ພັດທະນາ​ປະເທດ​ຊາດ”.
ໃນ​ໂອກາດ​ດຽວ​ກັນ, ທ່ານ ສະຫວັນ​ຄອນ ຣາ​ຊ​ມຸນຕຣີ  ຮອງ​ລັດຖະມົນຕີ​ກະຊວງ ຖວທ ປະທານ​ສະມາຄົມ​ນັກ​ຂ່າວ​ແຫ່ງ​ ສປປ​ ລາວ  ກໍໄດ້​ຂຶ້ນ​ລາຍ​ງານ​ໃຫ້​ຮູ້​ເຖິງ​ປະຫວັດ​ມູນເຊື້ອ ແລະ ຜົນງານ​ອັນ​ພົ້ນ​ເດັ່ນ​ແຫ່ງ​ການ​ກໍາ​ເນີດ ແລະ ເຕີບ​ໃຫຍ່​ຂະຫຍາຍຕົວ ຂອງ​ສື່​ມວນ​ຊົນ ແລະ ການ​ພິມ​ຈໍາ​ໜ່າຍ​ຕະຫຼອດ​ໄລຍະ 70 ປີຜ່ານມາ ​ຊຶ່ງ​ໄດ້​ມີ​ຫຼາຍ​ຜົນງານ​ອັນ​ພົ້ນ​ເດັ່ນ​ໃນການ​ປະກອບສ່ວນ​ໃນ​ພາລະກິດ​ຕໍ່ສູ້​ປົດ​ປ່ອຍ​ຊາດ; ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ຊາດ. ໃນ​ໄລຍະ​ໃໝ່ສື່​ມວນ​ຊົນ ແລະ ການ​ພິມ​ຈໍາ​ໜ່າຍ​ລາວ ຍັງ​ສາ ມາດ​ຮັກສາ​ບົດບາດ​ການ​ເປັນ​ ກະບອກ​ສຽງ​ອັນ​ແຫຼມ​ຄົມ​ຂອງ​ພັກ​-​ລັດ, ເປັນ​ຜູ້​ໂຄສະນາ ແລະ ສ້າງ​ຄວາມ​ເຂົ້າໃຈ​ທີ່​ຖືກຕ້ອງ​ໂດຍ​ໄດ້​ຮັບ​ຄວາມ​ເຊື່ອ​ຖື​ໃນ​ການ​ສະໜອງ​ຂໍ້​ມູນ​ຂ່າວສານ, ສາລະ​ຄວາມ​ຮູ້, ສາລະ​ບັນເທີງ​ໃຫ້​ແກ່​ປະຊາຊົນ​ໃນ​ສັງຄົມ ພ້ອມທັງ​ສາມາດ​ເຊື່ອມ​ຕໍ່​ຂໍ້​ມູນ ຂ່າວສານ​ໃນ​ພາກ​ພື້ນ ແລະ ສາກົນ.
ຈາກ​ນັ້ນ, ທ່ານ  ກິ​ແກ້ວ ໄຂ​ຄໍາ​ພິທູນ ໄດ້​ໃຫ້​ກຽດ​ຂຶ້ນ​ມອບ​ລາງວັນ​ແກ່​ບັນດາ​ອົງການ​ສື່​ມວນ​ຊົນ ແລະ ການ​ພິມ​ຈໍາ​ໜ່າຍ ທີ່​ມີ​ຜົນງານ​ດີເດັ່ນ​ໃນ​ການ​ປະກອບສ່ວນ​ເຂົ້າ​ໃນ​ການ​ໂຄສະນາ ຕ້ານ​ໄພພິບັດ​ລະດັບ​ຊາດ ໃນ​ໄລຍະ​ຜ່ານ​ມາ ຊຶ່ງ​ມີ​ທັງ​ໝົດ 46 ພາກ​ສ່ວນ.
ໃນ​ພິທີ​ອັນ​ມີ​ຄວາມ​ໝາຍ​ສຳຄັນ​ນີ້ ທ່ານ ທອງ​ລຸນ ສີ​ສຸ​ລິດ ໄດ້​ໃຫ້​ກຽດ​ໂອ້​ລົມ​ຕໍ່​ພິທີ ຊຶ່ງ​ກ່ອນ​ອື່ນ​ທ່ານ​ໄດ້​ກ່າວ​ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່​ບັນດາ​ນັກຮົບ​ສື່​ມວນ​ຊົນ ແລະ ການ​ພິມ​ຈຳໜ່າຍ​ທຸກ​ພາກສ່ວນ​ທີ່​ໄດ້​ອຸທິດ​ເຫື່ອແຮງ​ສະຕິປັນຍາ​ຂອງ​ຕົນ​ເຮັດ​ສຳເລັດ​ພາລະກິດ​ທີ່​ມີ​ກຽດ​ສະຫງ່າ​ງາມ ເພື່ອ​ເປັນ​ການ​ເສີມ​ຂະຫຍາຍ​ມູນເຊື້ອ​ຜົນງານ ແລະ ແກ້​ໄຂ​ຈຸດ​ອ່ອນ​ຂໍ້ຄົງຄ້າງ ໃນ​ການເຄື່ອນໄຫວ​ວຽກ​ງານ, ທ່ານ​ນາຍົກລັດຖະມົນຕີ ຍັງ​ໄດ້​ເນັ້ນ​ໜັກ​ໃຫ້​ສື່​ມວນ​ຊົນ ແລະ ການ​ພິມ​ຈໍາ​ໜ່າຍ ສືບຕໍ່​ເອົາໃຈໃສ່​ວຽກ​ງານ​ທີ່​ສຳ​ຄັນ​ຈໍາ​ນວນ​ໜຶ່ງ ເພື່ອ​ພ້ອມ​ກັນ​ເຮັດ​ສໍາ​ເລັດ​ໜ້າທີ່​ການເມືອງ ກໍຄື​ຄວາມ​ຮຽກຮ້ອງ​ຕ້ອງການ​ຂອງ​ການ​ພັດທະນາ​ໃນ​ໄລຍະ​ໃໝ່, ດ້ວຍ​ຄຸນ​ນະ​ພາບ​ໃໝ່.ໃນ​ໂອກາດ​ດຽວ​ກັນ​ນີ້​ບັນດາ​ຄະນະ​ຜູ້​ແທນ​ທີ່​ເຂົ້າ​ຮ່ວມ​ງານ​ຍັງ​ໄດ້​ໄປ​ຢ້ຽມ​ຊົມ ການວາງສະແດງ​ຜົນງານ​ການເຄື່ອນໄຫວ​ຂອງ​ສື່​ມວນ​ຊົນ ແລະ ການ​ພິມ​ຈໍາ​ໜ່າຍ​ດັ່ງກ່າວ​ຕື່ມ​ອີກ ການວາງສະແດງ​ຜົນງານ​ຄັ້ງ​ນີ້​ຊຶ່ງ​ມີ 20 ກວ່າ​ພາກສ່ວນ​ເຂົ້າ​ຮ່ວມ ເພື່ອ​ເປັນ​ການ​ທົບ​ທວນ​ຫວນ​ຄືນ​ມູນເຊື້ອ, ເຕົ້າໂຮມ​ຄວາມ​ສາມັກຄີ​ພາຍ​ໃນ, ເພີ່ມ​ຄວາມ​ຮັບ​ຮູ້ ແລະ ເຂົ້າໃຈ​ທີ່​ຖືກຕ້ອງ​ຕໍ່​ບົດບາດ, ໜ້າທີ່, ມູນເຊື້ອ ແລະ ຜົນງານ​ຂອງ​ສື່​ມວນ​ຊົນ ແລະ ການ​ພິມ​ຈໍາ​ໜ່າຍ, ທັງ​ເປັນ​ການ​ປຸກລະດົມ​ທົ່ວ​ສັງຄົມ​ປະກອບສ່ວນ​ຮ່ວມ​ສ້າງ​ຄວາມ​ເຂັ້ມແຂງ​ໃນ​ວຽກ​ງານ​ສື່​ມວນ​ຊົນ ແລະ ການ​ພິມ​ຈໍາ​ໜ່າຍ​ລາວ ກ້າວໜ້າ​ໄປ​ເລື້ອຍໆ.       
 (ຂ່າວ: ພູ​ວັນ​-​ພາບ: ສຳ​ນານ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110