ກຽມຄວາມພ້ອມຮັບມືກັບໂຄວິດ-19

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 21/09/2020 16:18:43 ຈຳ​ນວນ​​ຢ້ຽມ​ຊົມ 1560 ຄັ້ງ

ລົງນາມຮ່ວມມືເພື່ອກຽມຄວາມພ້ອມຮັບມື
ກັບຄວາມສ່ຽງຈາກໂຄວິດ-19
ອົງການ​ຈັດ​ຕັ້ງ​ສາກົນເພື່ອ​ ການ​ເຄື່ອນ​ຍ້າຍ​ຖິ່ນ​ຖານ International Organization for Migration (IOM) ແລະ​ກະຊວງ​ປ້ອງ​ກັນ​ຄວາມ​ສະຫງົບ (ປກສ) ໄດ້​ຈັດ​ພິທີ​ເຊັນ​ສັນຍາ​ຮ່ວມ​ມື​ ລະຫວ່າງ ກົມ​ຕໍາ​ຫຼວດ ກວດ​ຄົນ​ເຂົ້າ​-​ອອກ​ເມືອງ (ຕມ)ກົມ​ໃຫຍ່​ສັນຕິ​ບານ ກະຊວງ​ ປກສ ແລະ​ ອົງການ​ IOM ພາຍ​ໃຕ້​ໂຄງການ​ຊື່ວ່າ: ກຽມ​ຄວາມ​ພ້ອມ​ໃນ​ການ​ຮັບ​ມື​ກັບ​ຄວາມ​ສ່ຽງ​ຈາກ ໂຄ​ວິດ-19 ຢູ່​ດ່ານ​ຊາຍ​ແດນ ແລະ ​ ສະໜາມ​ບິນ​ສາກົນ ຢູ່​ສາທາລະນະ​ລັດ ປະຊາທິປະໄຕ ປະຊາຊົນລາວ ຂຶ້ນ​ເມື່ອ​ບໍ່​ດົນ​ຜ່ານ​ມານີ້,
ທີ່​ໂຮງແຮມລາວ​ພ​ລາ​ຊາ ນະຄອນຫຼວງ​ວຽງ​ຈັນ. ຮ່ວມ​ລົງ​ນາມ​ໂດຍ​ທ່ານ ພັນ​ເອກ ສາຍ​ສະໝິງ ສີວິໄລ​ ຫົວໜ້າ​ກົມ ຕຳຫຼວດ​ກວດ​ຄົນ​ເຂົ້າ​-​ອອກ​ເມືອງ, ກົມ​ໃຫຍ່​ສັນຕິ​ບານ, ກະຊວງ ປກສ ແລະ​ ທ່ານ ນາງ ຊີ​ນ່າ​ແວນ ແບ​ມເມວ ​ໂຟກ​ເນີ (Ms Zena Van Bemmel) ຮັກສາ​ການ​ຫົວໜ້າ​ຫ້ອງການ​ອົງການ IOM ປະ​ຈໍາ ລາວ ໂດຍ​ມີທ່ານ ພົນ​ຕີ ກົງ​ທອງ ພົງ​ ວິຈິດ ຮອງ​ລັດຖະມົນຕີ​ກະຊວງ​ ປ້ອງ​ກັນ​ຄວາມ​ສະຫງົບ ພ້ອມ​ ດ້ວຍຂະແໜງການ​ກ່ຽວຂ້ອງ​ ທັງ​ສອງ​ຝ່າຍ​ເຂົ້າ​ຮ່ວມ​ເປັນ ສັກຂີ​ພິຍານ.
ທ່ານ ພັອ ສາຍ​ສະໝິງ ສິວິໄລ ໄດ້​ກ່າວ​ສະແດງ​ຄວາມ​ຂອບໃຈ​ມາ​ຍັງ​ອົງການ IOM ທີ່​ໄດ້​ໃຫ້ການ ສະໜັບສະໜູນ​ດ້ານ​ອຸປະກອນ ແລະ ງົບປະມານ ແລະ ສະແດງຄວາມຍິນດີ​ທີ່​ຮ່ວມ​ມືກັບ​ອົງການ IOM ໃນ​ຕໍ່​ໜ້າ. ທ່ານ​ຍັງ​ກ່າວ​ເນັ້ນ​ອີກ​ວ່າ: ໂຄງການ ດັ່ງກ່າວ​ນີ້​ບໍ່ ພຽງ​ແຕ່​ຈະ​ສ້າງ​ຜົນປະໂຫຍດ ໃຫ້​ກົມ​ຕຳຫຼວດ​ກວດ​ຄົນ​ເຂົ້າ​ອອກ​-​ເມືອງ​ເທົ່າ​ນັ້ນ ແຕ່​ຍັງ​ສາມາດ​ຊ່ວຍເຈົ້າ​ໜ້າທີ່​ປະ ຈຳ​ດ່ານ ອື່ນໆ ໃນ​ການ​ປະຕິ ບັດ​ໜ້າ​ທີ​່ຢູ່​ໜ້າ​ດ່ານ​ດ້ວຍ​ຄວາມ​ ປອດ​ໄພ​. ເນື່ອງ​ຈາກ​ວ່າການ ເດີນທາງ​ເຂົ້າ​-​ອອກ​ຢູ່​ດ່ານ​ຊາຍ​ແດນ ແລະ ສະໜາມ​ບິນ​ສາກົນ​ກ່ຽວຂ້ອງ​ກັບ​ຫຼາຍ​ໜ່ວຍ​ງານ, ດັ່ງນັ້ນ ລັດຖະບານ​ຈຳເປັນ​ຕ້ອງ​ມີ​ແຜນ​ຮັບ​ມື​ກັບ​ຄວາມ​ສ່ຽງ​ໃນ​ການ​ເດີນທາງ​ຜ່ານ​ດ່ານ​ໃນ​ໄລຍະ​ການ​ແຜ່​ລະບາດ​ຂອງ ໂຄ​ວິດ 19. ພາຍ​ໃຕ້​ທຶນ​ສະໜັບສະໜູນ​ຈາກ​ລັດຖະບານ​ປະເທດ ອົສຕ​ຣາ​ລີ ແລະ ກອງ​ທຶນຮ່ວມຂອງອົງ ການ​ສະຫະ​ປະຊາຊາດ ເພື່ອ​ຮັບ​ມື​ກັບ​ພະຍາດ​ໂຄ​ວິດ-19, ອົງການ IOM ຈະ​ຮ່ວມ​ມື ກັບ​ກະຊວງ ປກສ, ກອງ​ເລຂາ​ສະເພາະ​ກິດ​ແຫ່ງ​ຊາດ​ໂຄ​ວິດ 19, ອົງການ WHO, ອົງການ UNODC ແລະ ກະ​ຊວງ​ທີ່​ກ່ຽວຂ້ອງ​ອື່ນໆ ເພື່ອ​ສ້າງ​ແຜນ​ກຽມ​ຄວາມ​ພ້ອມ​ໃນ​ການ​ຮັບ​ມື​ກັບໂຄ​ວິດ-19. ເປົ້າ​ໝາຍທັງ​ໝົດ​ນີ້​ແມ່ນ​ເພື່ອ​ສະໜັບ​ສະ​ໜູນ​ລັດຖະບານ​ລາວ​ໃນ​ການ​ບໍລິຫານ​ດ່ານ, ຄຸ້ມ​ຄອງ​ແຮງ​ງານເຄື່ອນຍ້າຍ​ຜ່ານ​ດ່ານ ແລະ ຊ່ວຍເຫຼືອ​ປະຊາຊົນ​ທີ່​ມີ​ຄວາມ​ສ່ຽງ.ໂຄງການ​ໄລຍະ 6 ເດືອນ​ນີ້​ຈະຊ່ວຍໃນການ ພັດທະນາ​ມາດຕະຖານ​ຂັ້ນ​ຕອນ​ການ​ດຳເນີນ​ງານ ແລະ ຈັດ​ຝຶກ​ອົບຮົມ​ເພື່ອສ້າງ​ຂີດ​ຄວາມອາດສາມາດ​ໃຫ້​ແກ່​ເຈົ້າ​ໜ້າ​ທີ​່ປະຈຳ​ດ່ານ​ຊາຍ​ແດນ ແລະ ສະໜາມ​ບິນ​ສາກົນ​ຢູ່ 10 ດ່ານ ເພື່ອ ກຽມຄວາມ ພ້ອມ​ໃນ​ການ​ຮັບ​ມື​ກັບ​ພະຍາດ ໂຄ​ວິດ-19 ຢູ່ ສປປ ລາວ. ນອກຈາກ​ນີ້, ໂຄງການ​ດັ່ງກ່າວ​ນີ້​ຍັງ ຈະ​ຊ່ວຍ​ໃນ​ການ​ພັດທະນາ​ຊຸດ​ເຄື່ອງມື​ສື່ສານ​ເພື່ອ​ປ້ອງ​ກັນ​ການ​ຕິດ​ເຊື້້ອ​ສຳ​ຫຼັບ​ຜູ້​ເດີນທາງ​ເຂົ້າ - ອອກ ແລະ ແຮງ​ງານເຄື່ອນ​ຍ້າຍ ເປັນ​ຫຼາຍ​ພາ​ສາ. ການຈັດຕັ້ງ​ປະຕິ​ບັດ​ກິດ​ຈະກໍາ​ຈະ​ເນັ້ນໃສ່​ ໃຫ້​ແທດເໝາະ​ກັບ​ຄວາມ​ຈຳ ເປັນ ແລະ​ຄວາມ​ຕ້ອງການ​ດ້ານ​ອຸປະກອນ ແລະ ສະຖານ​ທີ່ດ່ານ​ເປົ້າ​ໝາຍ​ເປັນ​ຫຼັກ.
( ຂ່າວ: ຍຸ​ພິນ; ພາບ: ບຸນ​ອູ້ມ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110