ການເງິນຫຼວງນຳ້ທາ ສະຫຼຸບການປະຕິບັດ ແຜນງົບປະມານ 8 ເດືອນ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 21/09/2020 16:51:20 ຈຳ​ນວນ​​ຢ້ຽມ​ຊົມ 1488 ຄັ້ງ

ພະແນກການ​ເງິນ​ແຂວງ​ຫຼວງ​ນໍ້າ​ທາ​ ໄດ້​ສະຫຼຸບ​ການ​ປະຕິບັດ​ແຜນ​ງົບປະມານ 8 ເດືອນ ແລະ ວາງ​ແຜນການ​ງົບປະມານ 4 ເດືອນ​ທ້າຍ​ປີ 2020 ຂຶ້ນ​ຫວ່າງບໍ່​ດົນຜ່ານ​ມາ​ນີ້ ທີ່​ສະໂມສອນ​ແຂວງ​ຫຼວງ​ນໍ້າ​ທາ ໂດຍ​ການ​ໃຫ້​ກຽດ​ເຂົ້າ​ຮ່ວມ​ຂອງ ທ່ານ ບູນ​ເຫຼືອ ສີນ​ໄຊ​ວໍ​ຣະ​ວົງ ຮອງ​ລັດຖະມົນຕີ ກະຊວງ​ການ​ເງິນ ທ່ານ ຄໍາ​ໄຫຼ ສີ​ປະເສີດ ເລຂາ​ຄະນະ​ບໍລິຫານ​ງານ​ພັກ​ແຂວງ ແລະ ພາກສ່ວນ​ທີ່​ກ່ຽວ​ຂ້ອງ​ເຂົ້າ​ຮ່ວມ.
ທ່ານ ອ່ອນ​ຈັນ ຄໍາ​ພາ​ວົງ ກໍາ​ມະ​ການ​ປະ​ຈໍາ​ພັກ​ແຂວງ ຫົວໜ້າ​ພະແນກການ​ເງິນ​ແຂວງ ໄດ້​ຜ່ານ​ບົດ​ລາຍ​ງານ​ສະພາບ​ການຈັດຕັ້ງ​ປະຕິບັດ​ແຜນ​ງົບປະມານ 8 ເດືອນ​ປີ 2020 ແລະ ຄາດ​ຄະເນ​ການຈັດຕັ້ງ​ປະຕິບັດ​ແຜນ 4 ເດືອນ​ທ້າຍ​ປີ 2020. ດ້ານ​ລາຍ​ຮັບ​ງົບປະມານ​ສູນ​ກາງ ແລະ ທ້ອງຖິ່ນ ແຜນການ​ປີ 2020 ມີ​ຈຳນວນ 496.863 ຕື້​ກີບ, ແຜນ​ດັດແກ້ 367.971 ຕື້​ກີບ, ປະຕິບັດ 8 ເດືອນ​ໄດ້ 234.350 ຕື້​ກີບ ເທົ່າ​ກັບ 63,69% ຂອງ​ແຜນ​ດັດ​ແກ້. ລາຍ​ຮັບ​ພູດ​ສູນ​ກາງ: ແຜນການ​ປີ 353.663 ຕື້​ກີບ, ແຜນ​ດັດແກ້ 254.213 ຕື້​ກີບ, ປະຕິບັດ 8 ເດືອນ​ໄດ້ 179.867 ຕື້​ກີບ ເທົ່າ​ກັບ 70,75% ຂອງ​ແຜນ​ດັດແກ້, ທຽບໃສ່​ໄລຍະ​ດຽວ​ກັນ​ຂອງ​ປີຜ່ານມາ​ຫຼຸດ​ລົງ 15,93% ຍ້ອນ​ການ​ລະບາດ​ຂອງ​ພະຍາດ​ໂຄ​ວິດ-19 ເຮັດ​ໃຫ້​ການ​ນໍາ​ເຂົ້າ-​ສົ່ງ​ອອກ​ສິນຄ້າ ຢູ່​ດ່ານ​ຊາຍ​ແດນ​ຕ່າງໆ ມີ​ການ​ຢຸດ​ເຊົາ, ໄດ້​ມີ​ການ​ຈຳກັດ​ຄົນ​ເຂົ້າ​-​ອອກ​ດ່ານ, ເຄື່ອງ​ທີ່​ມາ​ແຈ້ງ​ເສຍ​ພາ ສີ​ປົກກະຕິ​ຫຼຸດ​ລົງ, ຍ້ອນ​ມີ​ຄວາມ​ຫຍຸ້ງຍາກ​ໃນ​ການ​ຂົນສົ່ງ, ຊຶ່ງ​ເປັນ​ສາເຫດ​ໜຶ່ງ​ໃນ​ການ​ນຳ​ເຂົ້າ​ສິນຄ້າ​ປະເພດ​ນ້ຳມັນ​ເຊື້ອ​ໄຟ​ໄດ້​ຫຼຸດ​ລົງ ແລະ ການ​ປະຕິບັດ​ມາດ​ຕະການ​ປ້ອງ​ກັນ​ຂອງ​ແຕ່​ລະ​ປະເທດ​ການ​ນຳ​ເຂົ້າ​ສິນຄ້າ​ເຄື່ອງ​ຂອງ ສ່ວນ​ຫຼາຍ​ແມ່ນ​ສິນ​ຄ້າ​ນໍາ​ເຂົ້າ​ຕາມ​ໂຄງການ​ຂອງ​ລັດ ແລະ ນໍາ​ເຂົ້າ​ຕາມ​ນະໂຍບາຍ ສົ່ງເສີມ​ການ​ລົງທຶນ​ພາຍ​ໃນ ແລະ ຕ່າງປະເທດ ການ​ດຳເນີນ​ທຸລະ​ກິດ​ຂອງ​ຜູ້​ປະກອບ​ການ​ຕ່າງໆ ພາຍ​ໃນ​ແຂວງ ແລະ ບັນດາ​ເມືອງ ກໍ​ໄດ້​ປະຕິບັດ​ມາດ​ຕະການ​ຂອງ​ຄະນະ​ສະເພາະ​ກິດ​ຕ້ານ ແລະ ສະກັດ​ກັ້ນ​ພະຍາດ​ໂຄ​ວິດ-19 ຢ່າງ​ເຂັ້ມ​ງວດ ຊຶ່ງ​ໄດ້​ມີ​ການ​ຢຸດ​ເຊົາ​ການ​ດໍາ​ເນີນ​ທຸລະ​ກິດ, ຍົກເວັ້ນ​ການ​ເກັບ​ອາກອນ​ລາຍ​ໄດ້ ຈາກ​ເງິນເດືອນ​ຂອງ​ຜູ້​ອອກແຮງ​ງານ​ທັງ​ພາກ​ລັດ ແລະ ເອກະ​ຊົນ ທີ່​ມີ​ລາຍ​ຮັບ 1 ລ້ານ​ກີບ​ລົງ​ມາ, ນະໂຍບາຍ​ຍົກເວັ້ນ​ອາ ກອນ​ລາຍ​ໄດ້ ຂອງ​ຈຸນ​ລະວິ​ສາ​ຫະ​ກິດ​ໃນ​ໄລຍະ 3 ເດືອນ, ເດືອນ 4 - 6 ປີ 2020. ດ້ານ​ລາຍ​ຈ່າຍ​ງົບປະມານ​ແຜນການ​ປີ 357.637 ຕື້​ກີບ, ແຜນ​ດັດແກ້ 334.184 ຕື້​ກີບ, ປະຕິບັດ 8 ເດືອນ​ໄດ້ 221. 931 ຕື້​ກີບ, ເທົ່າ​ກັບ 66,41% ຂອງ​ແຜນ​ດັດ​ແກ້. ລາຍ​ຈ່າຍ​ປົກກະຕິ ແຜນ​ລາຍ​ຈ່າຍ​ປົກກະຕິ 342.659 ຕື້​ກີບ, ແຜນ​ດັດແກ້ 322.706 ຕື້​ກີບ, ປະຕິບັດ 8 ເດືອນ​ໄດ້ 216.051 ຕື້​ກີບ ເທົ່າ​ກັບ 66,95% ຂອງ​ແຜນ​ດັດແກ້​ລາຍ​ຈ່າຍ​ວິຊາ​ການ, ແຜນ​ປີ 14.978 ຕື້​ກີບ, ແຜນ​ດັດແກ້ 11.478 ຕື້​ກີບ, ປະຕິບັດ 8 ເດືອນ​ໄດ້ 5.880 ຕື້​ກີບ ເທົ່າ​ກັບ 51,23% ຂອງ​ແຜນ​ດັດແກ້, ການ​ດຸນ​ດ່ຽງ​ງົບປະມານ​ແຜນການ​ປີ 214.437 ຕື້​ກີບ, ແຜນ​ດັດແກ້ 220.426 ຕື້​ກີບ ປະຕິບັດ 8 ເດືອນ​ໄດ້ 167.448 ຕື້​ກີບ, ເທົ່າ​ກັບ 78,09% ຂອງ​ແຜນການ​ປີ, ແຜນ​ດັດແກ້​ດ້ານ​ລາຍ​ຈ່າຍ​ງົບປະມານ​ແມ່ນ​ໄດ້​ສຸມ​ໃສ່​ການ​ອະນຸມັດ ແລະ ເບີກ​ຈ່າຍ​ເງິນເດືອນ, ເງິນ​ນະໂຍບາຍ​ເປັນ​ບຸລິມະສິດ​ຕາມ​ທິດ​ຊີ້​ນຳ​ຂອງ​ຂັ້ນ​ເທິງ, ມາ​ຮອດ​ປັດຈຸບັນ​ໄດ້​ເບີກ​ຈ່າຍ​ເງິນເດືອນ, 8 ເດືອນ ປີ 2020 ສຳເລັດ​ໃນ​ທົ່ວ​ແຂວງ 100%.
ສໍາ​ລັບ​ແຜນການ​ຈັດ​ຕັ້ງ​ປະຕິບັດ​ແຜນ​ງົບປະມານ 4 ເດືອນ​ທ້າຍ​ປີ ແລະ ຄາດ​ຄະເນ​ປະຕິບັດ​ໝົດປີ 2020 ລາຍ​ຮັບ​ງົບປະມານ​ລວມ​ລາຍ​ຮັບ​ສູນ​ກາງ ແລະ ທ້ອງຖິ່ນ ຄາດ​ຄະເນ ໃຫ້​ໄດ້ 116.306 ຕື້​ກີບ, ຄາດ​ຄະເນ​ປະຕິບັດ​ໝົດ​ປີ 2020 ໃຫ້​ໄດ້ 350.656 ຕື້​ກີບ ເທົ່າ​ກັບ 95,29% ຂອງ​ແຜນ​ດັດແກ້, ການ​ສ້າງ​ແຜນ​ລາຍ​ຮັບ​ລາຍ​ຈ່າຍ​ງົບປະມານ​ແຫ່ງ​ລັດ​ຂອງ​ແຂວງ​ປີ 2021 ລາຍ​ຮັບ​ງົບປະມານ ພຸດ​ທ້ອງຖິ່ນ 125.230 ຕື້​ກີບ, ທຽບໃສ່​ແຜນ​ດັດແກ້ ປີ 2020 ເພີ່ມ​ຂຶ້ນ 10,08%. ໃນ​ນີ້, ສ່ວຍ​ສາ​ອາກອນ 117.630 ຕື້​ກີບ, ທຽບໃສ່​ແຜນ​ດັດແກ້ ປີ 2020 ເພີ່ມ​ຂຶ້ນ 11,44%, ຊັບ​ສິນ 7.600 ຕື້​ກີບ, ທຽບໃສ່​ແຜນ​ດັດແກ້ ປີ 2020 ຫຼຸດ​ລົງ 7,23%, ລາຍ​ຈ່າຍ​ງົບປະມານ ທັງ​ໝົດ 350.209 ຕື້​ກີບ, ທຽບໃສ່​ແຜນ​ດັດແກ້ ປີ 2020 ເພີ່ມ​ຂຶ້ນ 4,80%. ໃນ​ນີ້, ລາຍ​ຈ່າຍປົກກະຕິ 338.744 ຕື້​ກີບ, ທຽບໃສ່​ແຜນ​ດັດແກ້ ປີ 2020 ເພີ່ມ​ຂຶ້ນ 4,97% ລາຍ​ຈ່າຍວິຊາ​ການ 11.465 ຕື້​ກີບ, ທຽບໃສ່​ແຜນ​ດັດແກ້ ປີ 2020 ຫຼຸດ​ລົງ 0,11%.
(ຂ່າວ: ອຸ້ມ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110