ຄຳມ່ວນ ຜັນຂະຫຍາຍວຽກງານຊຸມຊົນເປັນເຈົ້າດ້ານສຸຂະອະນາໄມ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 22/09/2020 09:54:22 ຈຳ​ນວນ​​ຢ້ຽມ​ຊົມ 1436 ຄັ້ງ

   ຫວ່າງບໍ່​ດົນຜ່ານ​ມານີ້, ສູນ​ນໍ້າ​ສະອາດ ແລະ ອະນາ ໄມ​ສິ່ງແວດລ້ອມ ກະຊວງ​ສາ ທາລະນະ​ສຸກ ຮ່ວມ​ກັບ ພະ​ແນ​ກ​ສາທາລະນະ​ສຸກ​ແຂວງ​ຄຳ​ມ່ວນ ແລະ ບັນດາ​ອົງການ​ຈັດ​ຕັ້ງ​ເພື່ອ​ການ​ພັດທະນາ ໄດ້​ຈັດ​ກອງ​ປະຊຸມ ຜັນ​ຂະຫຍາຍ​ວຽກ​ງານ​ຊຸມ​ຊົນ​ເປັນ​ເຈົ້າ​ດ້ານ​ສຸ​ຂະ​ອະນາໄມ ຊຶ່ງ​ໄດ້​ຈັດ​ຂຶ້ນ​ທີ່​ຫ້ອງ​ປະຊຸມ​ຂອງ​ສະຫະພັນ​ແມ່ຍິງ​ແຂວງ ຄຳ​ມ່ວນ ໂດຍ​ການ​ເປັນ​ປະທານ​ຂອງ​ທ່ານ ແກ້ວ​ອຸດອນ ບຸດ​ສິງຂອນ ຮອງ​ເຈົ້າແຂວງ​ຄຳ​ມ່ວນ, ມີ​ບັນດາ​ຮອງ​ເຈົ້າ ເມືອງ, ພະແນກການ​ກ່ຽວຂ້ອງ, ຫົວໜ້າ​ຫ້ອງການ​ສາທາລະນະ​ສຸກ 10 ​ເມືອງ ແລະ ພະນັກງານ​ວິຊາ​ການທີ່​ກ່ຽວຂ້ອງ​ເຂົ້າ​ຮ່ວມ.
ກອງ​ປະຊຸມ​ແມ່ນ​ໄດ້​ຮັບ​ຟັງ​ການ​ເຜີຍແຜ່​ນະໂຍບາຍ ແລະ ຍຸດທະສາດ​ການຈັດຕັ້ງ​ປະຕິບັດ​ວຽກ​ງານ​ສາທາລະນະ​ສຸກ ກ່ຽວ​ກັບ​ວຽກ​ງານ​ສູນ​ນ້ຳ​ສະອາດ ແລະ ອະນາໄມ​ສິ່ງ ແວດລ້ອມ, ບາດກ້າວ ແລະ ວິທີ​ການ​ຂອງ​ວຽກ​ງານ​ຊຸມ​ຊົນ​ເປັນ​ເຈົ້າ​ດ້ານ​ສຸ​ຂະ​ອະນາໄມ ແລະ ວຽກ​ງານ​ຊຸມ​ຊົນ​ເປັນ​ເຈົ້າ​ດ້ານ​ສຸ​ຂະ​ອະນາໄມ​ເຂດ​ຊົນນະບົດ ແນໃສ່​​ຢຸດຕິ​ການ​ຖ່າຍຊະຊາຍ​ໃນ​ບັນດາ​ເມືອງ ແລະ ບ້ານ​ຕ່າງໆ​ໃນ​ທົ່ວ​ແຂວງ ທັງ​ເປັນ​ການ​ປັບປຸງ​ການຈັດຕັ້ງ​ປະຕິບັດ​ວຽກ​ງານ​ຊຸມ​ຊົນ​ເປັນ​ເຈົ້າ​ດ້ານ​ສຸ​ຂະ​ອະນາໄມ ໃຫ້​ເປັນຄວາມ​ຮັບຜິດຊອບ​ຂອງ​ທຸກ​ຂະແໜງການ​ໄດ້​ມີ​ສ່ວນ​ຮ່ວມ ເພື່ອ​ເຮັດ​ໃຫ້​ວຽກ​ງານ​ດັ່ງກ່າວ​ບັນລຸ​ຕາມ​ຄາດໝາຍ​ທີ່​ໄດ້​ກຳນົດ​ໄວ້.
ໂອກາດ​ດັ່ງກ່າວ, ທ່ານ ຮອງ​ເຈົ້າແຂວງ​ຄຳ​ມ່ວນ, ພະ​ແນກ​​ສາທາລະນະ​ສຸກ ແລະ ຮອງ​ເຈົ້າເມືອງ​ທັງ 10 ​ເມືອງ ຍັງ​ໄດ້​ຮ່ວມ​ລົງ​ນາມ ເຊັນ​ຮັບ ຮອງ​ເອົາ​ບັນດາ​ຄາດໝາຍສູ້​ ຊົນ ເພື່ອ​ມອບ​ໝາຍ​ຄວາມ​ຮັບຜິດຊອບ​ໃຫ້​ແຕ່​ລະເມືອງ ໄດ້​ນຳພາ​ຈັດ​ຕັ້ງ​ປະ ຕິບັດ​ບັນດາ​ຄາດໝາຍ​ທີ່​ໄດ້​ກຳນົດ​ໃຫ້​ບັນລຸ ແລະ ເປັນ​ເອກະ​ພາບ​​ໃນ​ລວງ​ດຽວ​ກັນ ທີ່​ກະຊວງສາທາລະນະ​ສຸກ​ວາງ​ອອກ. ເພື່ອ​ແນໃສ່​ເຮັດ​ໃຫ້​ແຂວງ​ຄຳ​ມ່ວນ ໄດ້​ຮັບ​ການ​ປະກາດ ແລະ ຢັ້ງຢືນ​ເປັນ​ແຂວງ​ຢຸດຕິ​ການ​ຖ່າຍ​ຊະຊາຍ ໃນ​ປີ 2024 ເວົ້າ​ລວມ​ກໍຄື​ການ​ບັນລຸຕາມ​ຍຸດທະສາດ​ແຫ່ງ​ຊາດ ດ້ານ​ການ​ສະ​ໜອງ​ນໍ້າ​ສະອາດ, ສຸຂາພິບານ ແລະ ອະນາໄມ ເພື່ອ​ລຶບລ້າງ​ການ​ຖ່າຍ​ຊະຊາຍ​ໃນ​ທົ່ວ​ປະເທດ​ພາຍ​ໃນ​ປີ 2025. 
(ຂ່າວ: ກອງ​ຄຳ)

 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110