ສາທາເຊກອງ ສະຫຼຸບວຽກ 6 ເດືອນຕົ້ນປີ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 22/09/2020 09:55:56 ຈຳ​ນວນ​​ຢ້ຽມ​ຊົມ 1449 ຄັ້ງ

ກອງ​ປະຊຸມ​ສະຫຼຸບການ ຈັດຕັ້ງ​ປະຕິບັດ​ວຽກ​ງານສາທາ ລະນະ​ສຸກ​ທົ່ວ​ແຂວງ​ເຊກອງ 6 ເດືອນ​ຕົ້ນ​ປີ ແລະ ວາງ​ແຜນ ການ 6 ເດືອນ​ທ້າຍ​ປີ 2020   ໄດ້​ຈັດ​ຂຶ້ນ​ເມື່ອບໍ່​ດົນຜ່ານ​ມາ ທີ່​ພະ​ແນ​ກ​ສາທາລະ ນະ​ສຸກ​ແຂວງເຊ​ກອງ ໂດຍ​ການ​ເປັນ​ປະທານ​ຂອງ​ທ່ານ ພອນ​ເພັດ ຄິວ​ລະ​ວົງ ປະທານ​ສະພາ​ປະຊາຊົນ​ແຂວງ, ມີ​ຫົວ​ໜ້າ​-​ຮອງ​ພະ​ແນກ, ຫ້ອງການ​ສາທາລະນະ​ສຸກ​ເມືອງ, ຄະ​ນະ​ອໍາ​ນວຍ​ການ​ໂຮງໝໍ ແລະ ວິຊາ​ການ​ກ່ຽວຂ້ອງ​ເຂົ້າ​ຮ່ວມ.
   ທ່ານ ຄໍາ​ໄຫຼ ສັນຕິ​ພູມ ວ່າການ​ຫົວໜ້າ​ພະ​ແນ​ກ​ສາ ທາລະນະ​ສຸກ​ແຂວງ​ກ່າວ​ວ່າ: ເພື່ອ​ຜັນ​ຂະຫຍາຍ​ມະຕິ X ຂອງ​ສູນ​ກາງ​ພັກ ທີ່​ຖື​ເອົາ​ວຽກ​ງານ​ກັນ​ພະຍາດ ແລະ ສົ່ງເສີມ​ສຸ ຂະພາບ​ເປັນ​ວຽກ​ງານ​ສໍາ​ຄັນ, ຖື​ເອົາ​ການ​ບໍລິການ​ປິ່ນປົວ​ທີ່​ມີ​ຄຸນ​ນະ​ພາບ​ທົ່ວ​ເຖິງ ແລະ ເປັນ​ທໍາ, ສູ້​ຊົນ​ປະຕິບັດ 11 ຕົວ​ຊີ້​ວັດ​ໃຫ້​ບັນລຸ​ໄດ້​ຕາມ​ຄາດໝາຍ​ທີ່​ວາງ​ໄວ້ ແລະ ຮັບປະກັນ​ໃຫ້​ປະຊາຊົນ​ບັນດາເຜົ່າ​ໄດ້​ເຂົ້າ​ເຖິງ​ການ​ບໍລິການ​ສຸຂະພາບ​ໄດ້​ຢ່າງ​ທົ່ວ​ເຖິງ ແລະ ຍຸ​ຕິ​ທໍາ  ຊຶ່ງ ໃນ 6 ເດືອນ​ຜ່ານ​ມາ ຂະແໜງ​ສາທາລະນະ​ສຸກ​ໄດ້​ຜັນ​ຂະ ຫຍາຍ ແລະ ຈັດ​ຕັ້ງ​ປະຕິບັດ​ແຜນ​ພັດທະນາ​ສາທາລະນະ​ສຸກ​ຕາມ 8 ແຜນ​ງານ 42 ແຜນ​ງານ​ຍ່ອຍ 96 ໂຄງການ ຕາມ​ກອບ​ຍຸດທະສາດ​ປະຕິ​ຮູບ​ສາ​ທາ​ລະ​​ນະ​ສຸກ​ໄລຍະ II ທີ່​ສຸມ​ໃສ່​ປະຕິ​ຮູບ​ວຽກ​ງານ​ສາທາລະນະ​ສຸກ​ໃນ 5 ດ້ານ​ຄື: ດ້ານ​ຊັບພະຍາກອນ​ມະນຸດ, ບໍລິການ​ຄຸ້ມ​ຄອງ, ການ​ເງິນ​ສາທາລະນະ​ສຸກ, ການ​ບໍລິການ​ສາທາລະນະ​ສຸກ ແລະ ດ້ານ​ຂໍ້​ມູນ​ຂ່າວສານ​ສາທາລະນະ​ສຸກ.
ໂອກາດ​ດັ່ງກ່າວ​ທ່ານ  ພູ​ຂັນ ຈັນທະ​ວົງ ຮອງ​ຫົວໜ້າ​ ພະ​ແນ​ກ​ສາທາລະນະ​ສຸກແຂວງ ໄດ້​ລາຍ​ງານ​ບົດ​ສະຫຼຸບ​ປະ​ຈໍາ 6 ເດືອນ​ຕົ້ນ​ປີ ແລະ ທິດທາງ​ ແຜນການ 6 ເດືອນ​ທ້າຍ​ປີ 2020 ວ່າ: ສໍາ​ລັບ​ອັດຕາ​ສ່ວນ​ຕົວ​ຊີ້​ວັດ​ທີ່​ສາມາດ​ບັນລຸ​ມີ 6 ອັດຕາ​ສ່ວນ​ຄື: ອັດຕາ​ສ່ວນເດັກ​ ລຸ່ມ 5 ປີ​ທີ່​ມີ​ນໍ້າ​ໜັກ​ຕໍ່າ​ກວ່າ​ມາດຕະຖານ, ອັດຕາ​ສ່ວນເດັກ​ ລຸ່ມ 5 ປີ​ທີ່​ມີ​ລວງ​ສູງ​ຕໍ່າ​ກວ່າ​ມາດຕະຖານ, ອັດຕາ​ສ່ວນ​ການ​ຕາຍ​ຂອງ​ເດັກນ້ອຍ​ລຸ່ມ 1 ປີ, ອັດຕາ​ສ່ວນ​ການ​ຕາຍ​ຂອງ​ເດັກນ້ອຍ​ລຸ່ມ 5 ປີ, ອັດຕາ​ສ່ວນ​ການ​ຕາຍ​ຂອງ​ແມ່, ອັດຕາ​ສ່ວນ​ປົກ​ຄຸມ​ປະກັນ​ສຸຂະພາບ​ທົ່ວ​ປວງ​ຊົນ; ອັດຕາ​ສ່ວນ​ທີ່​ມີ​ໂອກາດ​ຈະ​ບັນລຸ​ອີກ 6 ເດືອນ​ທ້າຍ​ປີ 2020, ມີ 2 ອັດຕາ​ສ່ວນ​ຄື: ອັດຕາ​ສ່ວນ​ການ​ເກີດ​ລູກ​ມີ​ແພດ​ຊ່ວຍ, ອັດຕາ​ສ່ວນ​ການ​ສັກ​ຢາ​ກັນ​ພະຍາດ​ໃຫ້​ເດັກ​ລຸ່ມ 1 ປີ; ສໍາ​ລັບ​ອັດຕາ​ສ່ວນ​ທີ່​ຍັງ​ບໍ່​ທັນ​ບັນລຸ​ປະກອບ​ມີ ອັດຕາ​ສ່ວນ​ການ​ນໍາ​ໃຊ້​ນໍ້າ​ສະອາດ, ອັດຕາ​ສ່ວນ​ການ​ນໍາ​ໃຊ້​ວິດຖ່າຍ​ຄອບຄົວ, ອັດຕາ​ສ່ວນ​ຮັບຮອງ ແລະ ປະກາດ​ບ້ານ​ແບບຢ່າງ​ສາທາລະນະ​ສຸກ.
   ສ່ວນ​ທິດ​ທາງ​ແຜນການ 6 ເດືອນ​ທ້າຍ​ປີ 2020 ຈະ​ສືບຕໍ່​ປະຕິບັດ​ມາດ​ຕະການ​ປ້ອງ​ກັນ​ພະຍາດ​ໂຄ​ວິດ-19, ໄຂ້ຍຸງ​ລາຍ ແລະ ພະຍາດ​ອື່ນໆ, ປັບປຸງ​ຍົກ​ລະດັບ​ສະຖານ​ບໍລິການ ແລະ ພະນັກງານ​ແພດ​ - ​ໝໍ​ໃຫ້​ໄດ້​ມາດຕະຖານ​ສາ​ມາດ​ນໍາ​ໃຊ້ອຸ ປະກອນ​ເຕັກ​ໂນ​ໂລ​ຊີ​ທັນ​ສະ ໄໝ, ຍົກ​ລະດັບ​ການຈັດຕັ້ງ​ປະ ຕິບັດ​ປະ​ເມີນ​ນະໂຍບາຍ 5 ດີ 1 ພໍໃຈ, ສືບຕໍ່​ປຸກລະດົມ​ທົ່ວ​ປວງ​ຊົນ​ໃຫ້​ເຂົ້າ​ຮ່ວມ​ເປັນ​ເຈົ້າ​ການ​ຮັກສາ​ສຸຂະພາບ​ຂອງ​ຕົນ ແລະ ໂຄສະນາ​ສຶກສາ​ອົບຮົມ​ອື່ນໆ.  
 (ຂ່າວ : ສັນຍາ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110