ເປີດຮ້ານວາງຂາຍສິນຄ້າໂອດັອບເພື່ອຕ້ອນຮັບກອງປະຊຸມໃຫຍ່ຂອງພັກ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 22/09/2020 10:29:25 ຈຳ​ນວນ​​ຢ້ຽມ​ຊົມ 1519 ຄັ້ງ

ຫວ່າງບໍ່​ດົນ​ຜ່ານ​ມາ​ນີ້ ທີ່​ຫ້ອງການ​ສະພາ​ການ​ຄ້າ​ສົ້ນ​ຂົວ​ນ້ຳ​ຊັນ ບ້ານ​ສີວິໄລ ​ເມືອງ​ປາກ​ຊັນ ພະ​ແນກອຸດ​ສາຫະ​ກຳ ແລະ ການ​ຄ້າ​ແຂວງ​ຮ່ວມ​ກັບ​ສະພາ​ການ​ຄ້າ​ແຂວງ​ບໍ​ລິ​ຄຳ​ໄຊ ເປີດ​ຮ້ານ​ຄ້າ​ຮ່ວມ​ໃຈ​ຂາຍ​ສິນຄ້າ​ຕ້ອນຮັບ​ກອງ​ປະຊຸມ​ໃຫຍ່​ອົງຄະ​ນະ​ພັກ​ແຂວງ​ບໍ​ລິ​ຄຳ​ໄຊ ຊຶ່ງ​ຈະ​ເປີດ​ຂຶ້ນ​ໃນ​ມໍ່ໆ​ນີ້ ໂດຍ​ການ​ເຂົ້າ​ຮ່ວມ​ຂອງ​ທ່ານ ໄກ​ທອງ ອະນຸ​ສິນ ຄະນະ​ຫ້ອງ​ວ່າການ​ແຂວງ,  ທ່ານ ຄອນສະ ຫວັນ ສຸກຂະເສີມ ຄະນະ​ພະ​ແນກ​ອຸດສາຫະກຳ ແລະ ການ​ຄ້າ, ທ່ານ ໄຊ​ຍະ​ເພັດ ຈັນ​ທິ​ສອນ ປະທານ​ສະພາ​ການ​ຄ້າ​ແຂວງ ແລະ ພາກສ່ວນ​ທີ່​ກ່ຽວຂ້ອງ​ຂັ້ນ​ແຂວງ​-​ເມືອງ​ເຂົ້າ​ຮ່ວມ.
ທ່ານ ຄອນ​ສະຫວັນ ສຸກ​ຂະ​ເສີມ ໄດ້​ກ່າວ​ຈຸດປະສົງ ແລະ ກ່າວ​ເປີດ​ງານ​ຕະຫຼາດນັດ​ຂາຍ​ສິນຄ້າ​ດັ່ງກ່າວ​ໃນ​ຄັ້ງ​ນີ້​ວ່າ: ເພື່ອ​ເປັນ​ການ​ສ້າງ​ຂະບວນ​ການ​ຕ້ອນຮັບ​ກອງ​ປະຊຸມ​ໃຫຍ່​ອົງຄະ​ນະ​ພັກ​ແຂວງ​ບໍ​ລິ​ຄຳ​ໄຊ​ຄັ້ງ​ທີ 7 ທີ່​ຈະ​ເປີດຂຶ້ນໃນມໍ່ໆ​ນີ້ ກໍ​ໄດ້​ຖື​ໂອກາດ​ດັ່ງກ່າວຈັດ ​ງານ​ຕະຫຼາດນັດ​ຂາຍ​ສິນຄ້າ​ເພື່ອ​ເປັນ​ການ​ເປີດ​ໂອກາດ​ຊ່ອງ ​ທາງ​ໃຫ້​ແກ່​ພໍ່​ແມ່​ປະຊາຊົນບັນດາ ເຜົ່າ​ຕະຫຼອດ​ຮອດ​ຜູ້​ປະກອບ​ການ​ດຳເນີນ​ທຸລະ​ກິດ​ຕ່າງໆ​ໄດ້​ນຳ​ເອົາ​ຜົນ​ຜະລິດ ແລະ ຜະ ລິດ​ຕະ​ພັນ​ທີ່​ເປັນ​ພູມ​ປັນຍາ​ຂອງ​ຊາວບ້ານ​ເຂົ້າ​ມາ​ຮ່ວມ​ວາງສະແດງ ແລະ ຈຳໜ່າຍ ພ້ອມ​ທັງ​ເປັນ​ການ​ເປີດ​ໂອກາດ​ໃຫ້​ແກ່​ຜູ້​ປະກອບ​ການ​ໄດ້​ມີ​ການ​ພົບ​ປະ​ແລກປ່ຽນ​ຮຽນ​ຮູ້​ດ້ານ​ການ​ພັດທະນາ​ສິນຄ້າ​ຂອງ​ຕົນ​ໃຫ້​ນັບ​ມື້​ນັບ​ໂດດເດັ່ນ​ ທາງ​ດ້ານ​ປະລິມານ ແລະ ຄຸນ​ນະ​ພາບ​ສູງ​ຂຶ້ນ​ທັງ​ພາຍ​ໃນ ແລະ ຕ່າງ​ປະ​ເທດ. ໂດຍ​ມີ​ຮ້ານ​ຂາຍ​ສິນຄ້າ​ຫັດຖະກຳ​ຂອງ​ບັນດາ​ກຸ່ມ​ຜະລິດ​ຕະ​ພັນ​ໂອ​ດັອບ, ຮ້ານ​ຂາຍ​ຜັກ​ປອດ​ສານພິດ, ຮ້ານ​ຂາຍເຄື່ອງ​ພືດ​ຜັກ​ສວນ​ຄົວ​ຂອງ​ແຕ່​ລະ​ຟາ​ມ​ທີ່ຢູ່​ພາຍ​ໃນ​ແຂວງ​ນຳ​ເຂົ້າ​ຮ່ວມ​ວາງ​ຂາຍ​. 
(ຂ່າວ: ຄຳ​ຟອງ)
 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110