ປຶກສາຫາລື 3 ຝ່າຍ ກ່ຽວກັບການຜະລິດ ແລະ ການເກັບຊື້ ຢູ່ພາຍໃນເມືອງຫົງສາ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 23/09/2020 09:28:49 ຈຳ​ນວນ​​ຢ້ຽມ​ຊົມ 1577 ຄັ້ງ

   ຫ້ອງການອຸດສາຫະກຳ ແລະ ການ​ຄ້າ​ເມືອງ​ຫົງ​ສາ ແຂວງ​ໄຊ​ຍະ​ບູ​ລີ ໄດ້​ຈັດ​ກອງ​ປະຊຸມ​ປຶກສາ​ຫາລື 3 ຝ່າຍ​ຄື: ພາກ​ລັດ, ຜູ້​ປະກອບ​ການ ແລະ ຜູ້​ຜະລິດ ຂຶ້ນ​ເມື່ອບໍ່​ດົນຜ່ານ​ມາ​ທີ່​ສະໂມສອນ​ຂອງ​ເມືອງ ເພື່ອ​ໃຫ້​ມີ​ຄວາມ​ເປັນ​ເອກະ​ພາບ ແລະ ຄວາມ​ຍຸຕິ​ທຳ ລະຫວ່າງ ຜູ້​ຜະລິດ ແລະ ຜູ້​ເກັບ​ຊື້ ໂດຍ​ການ​ເປັນ​ປະທານ​ຂອງ​ທ່ານ ຈັນ​ເພັງ ອູ່​ທອງຄຳ ຮອງ​ເຈົ້າເມືອງ​ຫົງ​ສາ ຜູ້​ຊີ້​ນຳ​ວຽກ​ງານ​ເສດຖະກິດ​ຂອງ​ເມືອງ, ມີ ຄະນະ​ປະຈຳ​ພັກ​ເມືອງ, ກຳມະການ​ພັກ​ເມືອງ, ຫົວ​ໜ້າ​-​ຮອງ​ຫົວໜ້າ​ຫ້ອງການ ທີ່​ກ່ຽວຂ້ອງ, ມີ​ບັນດາ​ທ່ານ​ຜູ້​ປະກອບ​ການ​ຈາກ​ກຸ່ມ​ເກັບ​ຊື້​ຢູ່​ພາຍ​ໃນ​ເມືອງ ແລະ ຕົວ​ແທນ​ຜູ້​ຜະລິດ​ເຂົ້າ​ຮ່ວມ.
ທ່ານ ສິງ​ຄຳ ພານິດ ຫົວ​ໜ້າຫ້ອງການອຸດສາຫະກຳ ແລະ ການ​ຄ້າ​ເມືອງ​ຫົງ​ສາ ກໍ​ໄດ້​ຂຶ້ນ​ຜ່ານ​ບົດ​ລາຍ​ງານການ ເຄື່ອນໄຫວ​ວຽກ​ງານຊຸກຍູ້, ສົ່ງເສີມ​ການ​ຜະລິດ​ກະສິກຳ​ເປັນ​ສິນຄ້າ ເພື່ອ​ສົ່ງ​ອອກ ປະຈຳ​ປີ 2019-2020 ຊຶ່ງ​ຕີ​ລາຄາ​ດ້ານ​ດີ, ດ້ານ​ອ່ອນ ແລະ ຂໍ້ຄົງຄ້າງ ສະແດງ​ໃຫ້​ເຫັນ​ຄື: ພາຍ​ໃນ​ເມືອງ​ຫົງ​ສາ ໄດ້​ມີ​ຫົວໜ່ວຍ​ທຸລະ​ກິດ​ເກັບ​ຊື້​ຢູ່​ພາຍ​ໃນ​ທັງ​ໝົດ 17 ຫົວໜ່ວຍ ແລະ ໄດ້​ສ້າງ​ເປັນ 1 ກຸ່ມ ຊິຶ່ງ​ໄດ້​ແບ່ງ​ເຂດ​ການ​ລົງທຶນ​ຢ່າງ​ລະອຽດ​ຈະແຈ້ງ ເພື່ອ​ຊຸກຍູ້ ສົ່ງເສີມ​ພໍ່​ແມ່​ປະຊາຊົນ​ຜະລິດ​ເປັນ​ສິນຄ້າຕິດ​ພັນ​ກັບການ​ເກັບ​ຊື້​ເຄື່ອງ​ປ່າ​ຂອງ​ດົງ​ຕາມ​ລະດູ​ການ ໜຶ່ງ​ປີຜ່ານມາ​ກຸ່ມ​ໄດ້​ປ່ອຍ​ສິນ​ເຊື່ອ​ໃຫ້​ປະຊາຊົນ ຈຳນວນ 7 ບ້ານ ມີ​ມູນ​ຄ່າ​ທັງ​ໝົດ 653 ລ້ານ​ກີບ ໃນ​ນັ້ນ, ມີ​ແນວ​ພັນ​ພືດ 4,7 ໂຕນ ມູນ​ຄ່າ 72 ລ້ານ​ກີບ; ຢາ​ຄຸມ​ຫຍ້າ 270 ລ້ານ​ກີບ; ເຂົ້າສານ 105 ລ້ານ​ກີບ; ອຸປະກອນ​ການ​ກໍ່ສ້າງ ມູນ​ຄ່າ 136 ລ້ານ​ກີບ ແລະ ເງິນສົດ ຈຳນວນ 70 ລ້ານ​ກີບ ສາມາດ​ເກັບ​ຊື້​ຜົນ​ຜະລິດ​ຄືນ​ຈາກ​ປະຊາຊົນ​ໄດ້​ທັງ​ໝົດ 552 ໂຕນ ມູນ​ຄ່າ 1 ຕື້ 90 ລ້ານກີບ ໃນ​ນັ້ນ ສາລີ 470 ໂຕນ ມູນ​ຄ່າ 752 ລ້ານ​ກີບ; ໝາກເດືອຍ 52 ໂຕນ ມູນ​ຄ່າ 338 ລ້ານ​ກີບ ຮັບ​ຟັງ​ການ​ລາຍ​ງານ ກ່ຽວ​ກັບວຽກ​ງານ​ສົ່ງເສີມ​ການ​ປູກ​ພືດ​ເປັນ​ສິນຄ້າ ປະຈຳ​ປີ 2020 ແລະ ແຜນການ​ປີ 2021 ຈາກ​ທ່ານ  ພູ​ວົງ  ກອງ​ຊັບ ຫົວໜ້າ​ຫ້ອງການ ກະສິກຳ ແລະ ປ່າໄມ້​ເມືອງ​ຫົງ​ສາ.  ພ້ອມ​ນີ້,  ບັນດາ​ຜູ້​ເຂົ້າ​ຮ່ວມ​ກໍ​ໄດ້​ປະກອບ​ຄຳ​ຄິດ​ຄຳ​ເຫັນ ເພື່ອ​ຄວາມ​ເປັນ​ເອກະ​ພາບ​ກັນ​ໃນ​ການ​ປັບປຸງ​ສັນຍາ​ຜູກ​ພັນ 2 ສົ້ນ ລະຫວ່າງ ຜູ້​ລົງທຶນ ກັບ​ຕົວ​ແທນ​ຜູ້​ເຮັດ​ການ​ຜະລິດ ເພື່ອ​ຊຸກຍູ້, ສົ່ງເສີມ​ການ​ຜະລິດ​ກະສິກຳ​ເປັນ​ສິນຄ້າຢູ່​ພາຍ​ໃນ​ເມືອງ​ໃຫ້​ມີ​ຄວາມ​ເຂັ້ມ​ແຂງ.
ໃນ​ໂອກາດ​ນີ້, ທ່ານ ຈັນ​ເພັງ ອູ່​ທອງຄຳ ກໍ​ໄດ້​ເນັ້ນ​ໜັກ​ໃຫ້​ຄະນະ​ຮັບຜິດຊອບໃນ​ການ​ຮ່າງ​ສັນຍາ​ໃຫ້​ສອດຄ່ອງ​ກັບ​ນິຕິ​ກຳ​ຕົວ​ຈິງ, ຮຽກຮ້ອງ​ໃຫ້​ທຸກ​ພາກສ່ວນ​ທັງ​ພາກ​ລັດ, ການຈັດຕັ້ງ​ບ້ານ ແລະ ຜູ້​ປະກອບ​ການ ຈົ່ງ​ພ້ອມ​ກັນ​ຄຸ້ມ​ຄອງ​ການ​ເກັບ​ຊື້​ໃຫ້​ມີ​ຄວາມ​ເປັນ​ເອກະ​ພາບ​ກັນ​ຢູ່​ພາຍ​ໃນ​ເມືອງ ແລະ ຫັນ​ເຂົ້າ​ສູ່​ລະບຽບ​ການ​ໃຫ້​ຖືກຕ້ອງ​ຕາມ​ລະບຽບ​ກົດ​ໝາຍ.
ທັງນີ້ ກໍ​ເພື່ອ​ປະຕິບັດ​ຕາມ​ແນວທາງ​ນະໂຍບາຍ​ຂອງ​ພັກ ແລະ ລັດຖະບານ ໃນ​ການ​ຊຸກຍູ້, ສົ່ງເສີມການ​ຜະລິດ​ກະສິກຳ​ເປັນ​ສິນຄ້າ ເພື່ອ​ນຳພາ​ປະຊາຊົນ​ບັນດາເຜົ່າ​ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ​ເທື່ອ​ລະ​ກ້າວ ເວົ້າ​ລວມ ເວົ້າ​ສະເພາະ ​ກໍ​ຄືການ​ປະຕິບັດ​ແຜນ​ຍຸດທະສາດ​ຂອງ​ກະຊວງ​ອຸດສາຫະກຳ ແລະ ການ​ຄ້າ​ວາງ​ອອກໃນ​ການ​ຊຸກຍູ້, ສົ່ງເສີມ​ການ​ຜະລິດ​ກະສິກຳ​ເປັນ​ສິນຄ້າ ເພື່ອ​ສະໜອງ​ຢູ່​ພາຍ​ໃນ ແລະ ສົ່ງ​ອອກ. (ພາບ​-​ຂ່າວ: ກິດ​ຕິ​ສັກ ບົວ​ໄລ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110