ໜັງສືພິມ ປະຊາຊົນ

ບໍລິສັດ ເກັ່ງການກະເສດ ຂໍອະນຸຍາດສ້າງຕັ້ງລານມັນຕົ້ນຢູ່ເມືອງທ່າແຕງ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 23/09/2020 09:29:25 ຈຳນວນຢ້ຽມຊົມ 6177 ຄັ້ງ

ກອງປະຊຸມປຶກສາຫາລື ພິຈາລະນາຄຳສະເໜີຂໍອະນຸ ຍາດສ້າງຕັ້ງລານມັນຕົ້ນ ຂອງ ບໍລິສັດເກັ໋ງການກະເສດຂາອອກ-ຂາເຂົ້າ ຈຳກັດຜູ້ດຽວ (ບ້ານຈະກຳໃຫຍ່ ເມືອງທ່າແຕງ ແຂວງເຊກອງ) ເມື່ອບໍ່ດົນຜ່ານມາ ທີ່ຫ້ອງການອຸດສາຫະກຳ ແລະ ການຄ້າເມືອງທ່າແຕງ ໂດຍມີທ່ານ ສຸພົນ ໄຊສະຫງ່າ ຮອງເຈົ້າເມືອງທ່າແຕງ, ທ່ານ ແພງສີ ສີດາວີ ຫົວໜ້າພະແນກ ອຸດສາຫະກຳ ແລະ ການຄ້າແຂວງພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມດັ່ງກ່າວໄດ້ຮັບຟັງການໃຫ້ຄຳຄິດເຫັນຂອງບັນດາພາກສ່ວນກ່ຽວຂ້ອງ ໂດຍລວມແມ່ນເນັ້ນໃຫ້ຜູ້ປະກອບການສ້າງຕັ້ງລານມັນຕົ້ນ ກໍຄືບໍລິສັດຕ້ອງປະຕິບັດຕາມລະບຽບການທຸກຂັ້ນຕອນເຊັ່ນ: ບົດວິພາກເສດຖະກິດ, ທະບຽນອະນຸຍາດດຳເນີນທຸລະກິດ ແລະ ລະບຽບການອື່ນທີ່ກ່ຽວກັບການສ້າງຕັ້ງລານມັນຕົ້ນ ເພື່ອຄວາມສະດວກໃນການຄຸ້ມຄອງ, ຕິດຕາມ, ກວດກາ ແລະ ພັນທະອາກອນໃຫ້ແກ່ລັດ. ພ້ອມທັງຮັບປະກັນບໍ່ໃຫ້ມີຜົນກະທົບທາງດ້ານສິ່ງແວດລ້ອມ ແລະ ສຸຂະພາບຂອງປະຊາຊົນທີ່ຢູ່ອ້ອມຂ້າງລານມັນດັ່ງກ່າວ.
ທ່ານ ສຸພົນ ໄຊສະຫງ່າ ມີຄຳເຫັນວ່າ: ການສ້າງຕັ້ງລານມັນໃໝ່ຕ້ອງໃຫ້ຮັດກຸມ ແລະ ເຂົ້າສູ່ລະບຽບການຄຸ້ມຄອງຢ່າງເຂັ້ມງວດ, ທັງຮັບປະກັນບໍ່ໃຫ້ມີຫາງສຽງຈາກສັງຄົມຂະ ນະທີ່ທ່ານ ແພງສີ ສີດາວີ ຫົວ ໜ້າພະແນກອຸດສາຫະກຳ ແລະ ການຄ້າແຂວງ ໄດ້ຮຽກຮ້ອງ ໃຫ້ຫ້ອງການກ່ຽວຂ້ອງພາຍ ຫຼັງທີ່ອະນຸຍາດສ້າງຕັ້ງລານມັນແລ້ວ, ຕ້ອງໄດ້ຕິດຕາມກວດ ກາບັນດາຊິງຊັ່ງໃຫ້ໄດ້ມາດ ຕະ ຖານ ເພື່ອຮັບປ ະ ກັນຄວາມຍຸຕິທຳລະຫວ່າງຜູ້ຊື້ ແລະ ຜູ້ຂາຍ. (ຂ່າວ: ເຈີນ ແດນວົງວິຈິດ)