ຖວທ ຫົວພັນ ລົງຊຸກຍູ້ວຽກງານສື່ມວນຊົນ ຢູ່ສາມເມືອງລຽບນໍ້າມ່າ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 23/09/2020 09:29:31 ຈຳ​ນວນ​​ຢ້ຽມ​ຊົມ 1641 ຄັ້ງ

ທ້າຍ​ອາທິດ​ຜ່ານ​ມາ​ນີ້, ທ່ານ ແສງ​ສຸວັນ ວົງ​ຄຳ ຮອງ​ຫົວໜ້າ​ພະ​ແນກ ຖະແຫຼງ​ຂ່າວ, ວັດທະນະທຳ ແລະ ທ່ອງ​ທ່ຽວ (ຖວທ) ແຂວງ ຫົວພັນ ຜູ້​ຊີ້ນຳ​ ວຽກ​ງານ​ຖະແຫຼງ​ຂ່າວ​-​ສື່ມວນ​ຊົນ ພ້ອມ​ດ້ວຍ​ຄະນະ​ໄດ້​ລົງ​ເຄື່ອນ​ໄຫວ​ຊຸກຍູ້​ວຽກງານຖະ ແຫຼງ​ຂ່າວ​-​ສື່​ມວນ​ຊົນ​ ຢູ່ ເມືອງ​ສົບ​ເບົາ, ເມືອງ​ຊຽງ​ຄໍ້ ແລະ  ເມືອງ​ແອດ ໂດຍ​ໃຫ້ການ ຕ້ອນ ຮັບ​ຈາກ​ບັນດາ​ທ່ານຫົວໜ້າ​ ຫ້ອງການ ພ້ອມ​ດ້ວຍ ພະນັກ ​ງານ​-​ລັດ​ຖະກອນ​ຫ້ອງ​ການ ຖວທ ເມືອງ.
ການ​ລົງ​ເຄື່ອນ​ໄຫວ​ເຮັດ​ວຽກ​ຄັ້ງ​ນີ້, ທ່ານ ຮອງ​ຫົວໜ້າ​ພະ​ແນກ ຖວທ ແຂວງ ໄດ້​ຮັບ​ຟັງ​ການ​ລາຍ​ງານ​ສະພາບ​ການຈັດຕັ້ງ​ປະຕິບັດ​ວຽກ​ງານ​ຖະແຫຼງ​ຂ່າວ - ສື່​ມວນ​ຊົນ​ຈາກ​ທ່ານຫົວໜ້າ​ຫ້ອງການ ຖວທ ພາຍ​ໃນ​ສາມ​ເມືອງ​ໃຫ້​​ທ່ານ ໄດ້​ຮັບ​ຊາບ ກ່ຽວ​ກັບ​ຜົນງານ​ດ້ານ​ດີ​ທີ່​ຍາດ​ມາ​ໄດ້​ໃນ​ໄລຍະ​ຜ່ານ​ມາ ແລະ ບາງ​ບັນຫາ​ທີ່​ທ້າ​ທາຍ​ຕໍ່​ການ​ພັດທະນາ​ວຽກ​ງານ​ຖະແຫຼງ​ຂ່າວ​-​ສື່​ມວນ​ຊົນ ໂດຍ​ສະເພາະ​ແມ່ນ​ບັນຫາ​ການ​ຂາດເຂີນ​ບຸກ​ຄະ​ລາ​ກອນ​ສື່​ມວນຊົນ, ອຸປະກອນ​ຮັບ​ໃຊ້​ສື່ ມວນຊົນ​ມີ​ສະພາບ​ເກົ່າ​ແກ່, ບໍ່​ພຽງພໍ ແລະ ບໍ່​ຕອບ​ສະໜອງ​ໄດ້​ກັບ​ຄວາມ​ຮຽກຮ້ອງ​ຕ້ອງການ​ຂອງ​ການ​ພັດທະນາ​ສື່​ແບບ​ໃໝ່.
ເພື່ອ​ເຮັດ​ໃຫ້​ວຽກ​ງານ​ຖະແຫຼງ​ຂ່າວ - ສື່​ມວນ​ຊົນ​ຢູ່​ຮາກ​ຖານ​ໄດ້​ຮັບ​ການຈັດຕັ້ງ​ປະຕິບັດ​ໃຫ້​ໄດ້​ຮັບ​ຜົນ​ດີ, ບັນລຸ​ຕາມ​ແຜນ​ພັດທະນາ​ວຽກ​ງານ​ຖະແຫຼງ​ຂ່າວ​-​ສື່​ມວນ​ຊົນ ວິໄສ​ທັດ 2030, ຍຸດທະສາດ​ຮອດ​ປີ 2025 ແລະ ກໍາ​ນົດ​ແຜນ​ພັດທະນາ​ວຽກ​ງານ​ຖະແຫຼງ​ຂ່າວ ແລະ ສື່​ມວນ​ຊົນ 2016-2020 ພາຍ​ໃຕ້​ຈຸດໝາຍ​ທີ່​ວ່າ: ສ້າງ​ໃຫ້​ວຽກ​ງານ​ຖະແຫຼງ​ຂ່າວ​-​ສື່​ມວນ​ຊົນ​ໃຫ້​ມີ​ຄຸນ​ນະ​ພາບ, ທັນ​ສະໄໝ, ວ່ອງໄວ, ທັນ​ເຫດການ, ເປັນ​ອາວຸດ​ອັນ​ແຫຼມ​ຄົມ​ຂອງ​ພັກ, ລັດ ທັງ​ລວງ​ເລິກ ແລະ ລວງ​ກວ້າງ, ເຂັ້ມແຂງ, ກຸ້ມ​ຕົນ​ເອງ​ເທື່ອ​ລະ​ກ້າວ,  ເຊື່ອມ​ໂຍງ​ກັບ​ສາກົນ, ຮັບປະກັນ​ຄວາມ​ປອດ​ໄພ ແລະ ມີ​ສະຖຽນ​ລະ​ພາບ​ດ້ານ​ຂໍ້​ມູນ​ຂ່າວສານ, ມີ​ບຸກ​ຄະລາ​ກອນ​ທີ່​ມີ​ມາດຕະຖານ ສົມ​ຄູ່​ກັບ​ຍຸກ​ສະ​ໄໝ. 
ທ່ານ ຮອງ​ຫົວໜ້າ​ພະ​ແນກ ຖວທ ຍັງ​ໄດ້​ຮຽກຮ້ອງ​ໃຫ້​ຫ້ອງການ ຖວທ ທັງ 3 ເມືອງ​ພ້ອມ​ກັນ​ອົດທົນ​ຜ່ານ​ຜ່າ​ຂໍ້​ຫຍຸ້ງ​ຍາ​ກ​ສຸມ​ໃສ່​ພັດທະນາ​ວຽກ​ງານ​ຖະແຫຼງ​ຂ່າວ - ສື່​ມວນ​ຊົນ​ຢູ່​ຂັ້ນ​ເມືອງ​ເປັນຕົ້ນ ແມ່ນ​ການ​ກໍ່ສ້າງ ແລະ ພັດທະນາ​ດ້ານ​ຄວາມ​ຮູ້, ຄວາມ​ສາມາດ​ຂອງ​ພະນັກງານ​ນັກ​ຂ່າວ, ໂຄສົກ, ເຕັກນິກ, ສ້າງ​ຕາໜ່າງ​ນັກ​ຂ່າວ​ຢູ່​ບັນດາ​ຫ້ອງການ, ສຳນັກງານ, ນັກ​ຂ່າວ​ຂັ້ນ​ບ້ານ, ເພີ່ມ​ການ​ເກັບ​ກຳ​ຂ່າວ​-​ຂຽນ​ຂ່າວ, ບົດ ແລະ ສົ່ງ​ຂ່າວ​ໃຫ້​ຫຼາຍ, ຊັດ​ເຈນ ວ່ອງໄວ​ຂຶ້ນ​ກວ່າ​ເກົ່າ, ຫັນ​ເຂົ້າ​ສູ່​ການ​ອອກ​ຂ່າວ​ຜ່ານ​ສື່​ສັງຄົມ​ອອນ​ລາຍ, ເອົາໃຈໃສ່​ແນະນຳ​ການ​ນຳ​ໃຊ້​ໂທລະ​ໂຄ່ງ​ຂັ້ນ​ເມືອງ​-​ຂັ້ນ​ບ້ານ​ໃຫ້​ເປັນ​ປົກກະຕິ ເພື່ອ​ໃຫ້​ປະຊາຊົນ​ໄດ້​ຮັບ​ຟັງ​ຂໍ້​ມູນ​ຂ່າວສານ, ສາລະ​ໜ້າ​ຮູ້​ຕ່າງໆ​ຢ່າງ​ທົ່ວ​ເຖິງ ແລະ ຖື​ສຳຄັນ​ຂອດ​ປະສານ​ງານ​ລະຫວ່າງ​ບັນດາ​ພາກສ່ວນ​ທີ່​ກ່ຽວຂ້ອງ ເພື່ອ​ຍາດ​ແຍ່ງ​ການ​ສະໜັບສະໜູນ​ຈາກ​ສັງຄົມ ແນໃສ່​ເຮັດ​ໃຫ້​ວຽກ​ງານ​ຖະແຫຼງ​ຂ່າວ​-​ສື່​ມວນ​ຊົນ ສາມາດ​ປະ ຕິບັດ​ພາລະ​ບົດບາດ ເປັນ​ກະ ບອກ​ສຽງ​ອັນ​ແຫຼມ​ຄົມ​ຂອງ​ພັກ​-​ລັດ​ໃນ​ໄລຍະ​ໃໝ່​ໄດ້​ຢ່າງ​ເຕັມ​ສ່ວນ.
ໂອກາດ​ດຽວ​ກັນ​ນີ້, ຍັງ​ໄດ້​ນຳ​ເອົາ USB ສະປອດ​ໂຄສະນາ​ວຽກ​ງານ​ສຸ​ຂະ​ສຶກສາ, ໂພຊະ​ນາ​ການ, ຕ້ານ​ການ​ໃຊ້​ຄວາມ​ຮຸນ​ແຮງ​ຕໍ່​ແມ່ຍິງ ແລະ ເດັກນ້ອຍ​ໃນ​ການ​ທຳ​ຄວາມ​ສະອາດ​ໃນ​ຮ່າງກາຍ​ເພື່ອ​     ຫຼີກ​ລ່ຽງ​ການ​ຕິດແປດ​ພະຍາດ​ຕ່າງໆ ​ໂດຍ​ສະເພາະ​ແມ່ນ​ພະ ຍາດ​ໂຄ​ວິດ-19 ຈຳນວນໜຶ່ງ​ ມອບ​ໃຫ້ຫ້ອງການ ຖວທ 3 ເມືອງ​ລົງ​ໄປ​ເຜີຍແຜ່​ໃຫ້​ປະຊາ ຊົນ​ໄດ້​ຮັບ​ຟັງ​ຕື່ມ​ອີກ.
(ຂ່າວ​: ໄອ​ແກ້ວ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110