ເມື່ອ​ບໍ່​ດົນ​ຜ່ານ​ມາ ໂຮງ ຮຽນ​ທິດ​ສະ​ດີ​ການເມືອງ ແລະ ການ​ປົກຄອງ​ແຂວງ​ຫົວພັນ​ໄດ້​ຈັດ​ພິທີ​ປິດ​ຊຸດ​ຮຽນ​ທິດສະ​ ດີ​ການເມືອງ ແລະ ການ​ປົກ ຄອງລະບົບຊັ້ນກາງຮຸ່ນທີ XI ທີ່​ໂຮງຮຽນ​ດັ່ງກ່າວ ​ໂດຍ​ການ​ເຂົ້າ​ຮ່ວມ ແລະ ມອບໃບປະ ກາສະນີຍະບັດ​ຈົບ​ການ​ຮຽນ​ໃນ​ຄັ້ງ​ນີ້​ໂດຍ​ທ່ານ ຄໍາ​ຜີວ ວົງ​ສະຫວັນ ຮອງ​ເລຂາ​ພັກ​ແຂວງ ປະທານ​ແນວ​ລາວ​ສ້າງ​ຊາດ​ແຂວງ, ມີ​ຄູ​-ອາຈານ, ແຂກຖືກ ​ເຊີນ​ພ້ອມ​ດ້ວຍ​ນັກ​ສຶກສາ​ລະບົບ​ຮຸ່ນ​ທີ XI ແລະ XII ເຂົ້າ​ຮ່ວມ​ນຳ.
ທ່ານ ອົ້ມ ອິນ​ທະລາ ວ່າການ​ຫົວໜ້າ​ໂຮງຮຽນ​ທິດ​ສະ​ດີ​ການເມືອງ  ແລະ  ການ​ປົກຄອງ​ແຂວງ​ໄດ້​ຜ່ານ​ບົດ​ສະຫຼຸບ​ການເຄື່ອນໄຫວ​ສິດ​ສອນ​-ຮໍ່າ​ຮຽນ​ຊຸດ​ທີ  XI  ໂດຍ​ໄດ້​ຍົກ​ໃຫ້​ເຫັນ​ຊຸດ​ຮຽນ​ໃນ​ຄັ້ງ​ນີ້​ມີ​ນັກ​ສຶກສາ​ທັງ​ໝົດ  53  ສະຫາຍ ຍິງ 8 ສະຫາຍ ຊຶ່ງ​ໄດ້​ເລີ່ມ​ຮຽນ​ນັບ​ແຕ່​ຕົ້ນ​ເດືອນພຶດສະພາ ປີ 2019 ເຖິງ ຕົ້ນ​ເດືອນ ສິງຫາ ປີ 2020 ລວມ​ເວລາ​ຮຽນ​ທັງ​ໝົດ 15 ເດືອນ, ມີ 28 ວິຊາ​ທີ່​ປະກອບ​ດ້ວຍ 3 ໝວດ​ຄື: ໝວດ​ວິຊາ​ຄວາມ​ຮູ້​ທົ່ວ​ໄປ​ປະກອບ​ມີ 15 ວິຊາ​ຄື: ພູມ​ສາດ​ການເມືອງ​ໂລກ, ພາສາ​ອັງກິດ, ຄອມ​ພິວ​ເຕີ, ປະຫວັດສາດ​ລາວ, ປະຫວັດສາດ​ພັກ, ປະຊາກອນ​ສາດ, ວັດທະນະທຳ, ຄຸນສົມ ບັດ,  ກົດໝາຍ​ລັດ​ຖະ​ທຳ​ມະນູນ, ກົດໝາຍ​ອາຍາ, ກົດໝາຍ​ແພ່ງ, ທິດ​ສະ​ດີ​ລັດ ແລະ ກົດໝາຍ, ການເມືອງ​ວິທະຍາ, ສັງຄົມ​ສາດ ແລະ ພາສາ​ຫວຽດນາມ; ໝວດ​ວິຊາ​ເຕັກນິກ​ສະເພາະ​ປະກອບ​ມີ 7 ວິຊາ​ຄື: ວິຊາ ປກສ-ປກຊ, ເສດຖະສາດ​ພັດທະນາ, ບໍລິຫານ​ອົງການ, ເຕັກນິກ​ບໍລິຫານ, ຈິດຕະສາດ​ສັງຄົມ, ຄຸ້ມ​ຄອງ​ບຸກ​ຄະລາ​ກອນ ແລະ ວິຊາ​ຄຸ້ມ​ຄອງ​ເສດຖະກິດ; ໝວດ​ວິຊາ​ຫຼັກ​ປະກອບ​ມີ 6 ວິຊາ​ຄື: ປັດ​ຊະ​ຍາ​ມາກ​-​ເລ​ນິນ, ເສດຖະສາດ​ການເມືອງ​ມາກ​-​ເລ​ນິນ, ລັດທິ​ສັງຄົມ​ນິຍົມ​ວິທະຍາສາດ, ການ​ປົກຄອງ, ກໍ່ສ້າງ​ພັກ ແລະ ວິຊາ​ຂົນຂວາຍ​ມະຫາຊົນ ປະກອບ​ມີ 80 ໜ່ວຍ​ກິດ, ໃນ​ການ​ສິດສອນ​ຄູ​-ອາຈານ​ໄດ້​ແຕ່ງ​ບົດ​ສອນ, ສົ່ງ​ຄວາມ​ຮູ້ ກວ້າງຂວາງ, ເລິກເຊິ່ງ, ມີ​ເອກະສານ ແລະ ຂໍ້​ມູນ​ຂ່າວສານ​ໃໝ່​ປະກອບ​ເຂົ້າ​ໃນ​ບົດ​ສອນ ​ພ້ອມ​ທັງ​ໄດ້​ນໍາ​ໃຊ້​ສື່​ເຂົ້າ​ໃນ​ການ​ສິດສອນ ແລະ ປະສານ​ສົມທົບ​ການ​ສອນ​ແບບ​ມູນເຊື້ອ​ກັບ​ການ​ສອນ​ແບບ​ຕັ້ງໜ້າ, ສອນ​ແບບ​ເອົາ​ນັກຮຽນ​ເປັນ​ສູນ​ກາງ,  ສ່ວນ​ນັກ​ສຶກສາ​ ກໍໄດ້​ປະຕິບັດ​ຂໍ້​ກຳນົດ​ກົດ​ລະບຽບ​ຂອງ ໂຮງຮຽນ​ວາງ​ອອກ​ໄດ້​ດີ ຂຶ້ນ​ຫ້ອງ​ທັນ​ໂມງ​ເວລາ ມີ​ທັດສະນະ​ມະຫາຊົນ​ກວ້າງຂວາງ, ຕັ້ງໜ້າ​ສຶກສາ​ຄົ້ນ​ຄວ້າ​ຮໍ່າ​ຮຽນ​ນໍາ​ຄູ​-ອາຈານ, ຄົ້ນຄວ້າ​ດ້ວຍ​ຕົນ​ເອງ ແລະ ຕັ້ງໜ້າ​ປະກອບສ່ວນ​ເຂົ້າ​ໃນ​ວຽກ​ງານ​ຂອງ​ໂຮງຮຽນ, ຜ່ານ​ການ​ຮຽນ​ທັງ​ໝົດ 28 ວິຊາ​ມີ​ນັກ​ສຶກສາ​ທີ່​ມີ​ຄະແນນ​ສະເລ່ຍ​ໄດ້​ເກດ A ຄ່າ​ຄະແນນ 4,00 ມີ 4 ສະຫາຍ ຍິງ 3 ສະຫາຍ​ເທົ່າ​ກັບ 7% ສະເລ່ຍ​ໄດ້​ເກດ B+ ຄ່າ​ຄະແນນ 3,50 ມີ 49 ສະຫາຍ ຍິງ 5 ສະຫາຍ ເທົ່າ​ກັບ 43%, ຜົນ​ຂອງ​ການ​ປ້ອງ​ກັນ​ບົດ​ມີ​ຄື: ປ້ອງ​ກັນ​ບົດ​ໄດ້​ເກດ A ຈັດ​ປະເພດ​ດີເລີດ ມີ 45 ສະຫາຍ  ຍິງ 8 ສະຫາຍ ເທົ່າ​ກັບ 84,90%, ປ້ອງ​ກັນ​ໄດ້​ເກດ B+ ຈັດ​ປະເພດ​ດີ​ຫຼາຍ​ມີ 8 ສະຫາຍ​ເທົ່າ​ກັບ 15,10%.
ຕໍ່​ກັບ​ຜົນ​ການ​ຮຽນ​ມີ​ນັກ​ສຶກສາ​ທີ່​ມີ​ຜົນການ​ຮຽນ​ດີ​ຮຽນ​ເກັ່ງ​ມີ​ວິໄນ​ດີ​ປະເພດ 1 ໄດ້​ຮັບ​ໃບ​ຍ້ອງຍໍ​ທ່ານ​ເຈົ້າແຂວງໆ​ຫົວພັນ ​ຈຳນວນ 18 ສະຫາຍ ຍິງ 5 ສະຫາຍ, ຮັບ​ໃບ​ຍ້ອງຍໍ​ຫົວໜ້າ​ໂຮງຮຽນ​ການເມືອງ ແລະ ການ​ປົກຄອງແຂວງ​ຈຳນວນ 20 ສະຫາຍ ຍິງ 3 ສະ​ຫາຍ.
(ຂ່າວ​-​ພາບ: ນິດຖະ ໜອມ)