ໜັງສືພິມ ປະຊາຊົນ

ຫ້ອງການ KFW ຕິດຕາມໂຄງການກໍ່ສ້າງ ນາໍ້ປະປາ 7 ບ້ານເປົ້າໝາຍ

ເຜີຍແຜ່ໂດຍ: ທ່ານ ຈັນທະໄມຕຣີ ເທບສີເມືອງ ເວລາ: 24/09/2020 10:29:44 ຈຳນວນຢ້ຽມຊົມ 579 ຄັ້ງ

ເມື່ອບໍ່ດົນຜ່າມາ, ທ່ານ ຈານ ເວຈີມັນ ຫົວໜ້າຫ້ອງ ການປັບປຸງລະບົບນ້ຳປະປາ ເຂດຕົວເມືອງນ້ອຍ (KFW) ປະຈຳ ສປປ ລາວ ພ້ອມດ້ວຍຜູ້ປະສານງານໂຄງການ ແລະ ຄະນະຮັບຜິດຊອບໂຄງການ, ກົມນ້ຳປະປາ, ທ່ານ ໜູຜາດ ທິລະວົງ ປະທານບໍລິສັດໜູຄຳກໍ່ສ້າງ ຈຳກັດ ແລະ ພາກ ສ່ວນກ່ຽວຂ້ອງໄດ້ລົງຕິດຕາມໂຄງການກໍ່ສ້າງນ້ຳປະປາໃນ 7 ບ້ານເປົ້າໝາຍຂອງເມືອງນອງ ແຂວງສະຫວັນນະເຂດ.
ໂຄງການຂະຫຍາຍພື້ນ ຖານໂຄງລ່າງນ້ຳສະອາດ ແລະໂພຊະນາການ, ການປັບປຸງລະ ບົບນ້ຳປະປາເຂດຕົວເມືອງນ້ອຍ ຫຼື KFW ໄດ້ຮັບທຶນຊ່ວຍເຫຼືອຈາກສະຫະພາບເອີ ຣົບ ໂດຍຜ່ານທະນາຄານພັດ ທະນາເຢຍລະມັນ ຈາກນີ້ກໍມີ ທຶນສົມທົບຈາກກະຊວງໂຍທາ ທິການ ແລະ ຂົນສົ່ງ 10% ແລະ ທຶນສົມທົບຂອງແຂວງອີກຈຳ ນວນ 5% ຊຶ່ງໄດ້ໃຫ້ທຶນກໍ່ສ້າງລະບົບນ້ຳປະປາ ໃນ 6 ເມືອງຂອງແຂວງສະຫວັນນະເຂດຄື: ໄຊພູທອງ, ອຸທຸມພອນ, ອາດສະພອນ, ພີນ, ເຊໂປນ ແລະ ເມືອງນອງ ເປົ້າໝາຍຂອງໂຄງການກໍເພື່ອສະໜອງນ້ຳສະອາດໃຫ້ຕົວເມືອງຊົນນະບົດ ຊຶ່ງເມືອງນອງກໍແມ່ນເມືອງໜຶ່ງທີ່ນອນຢູ່ໃນເປົ້າໝາຍຂອງໂຄງການ ໂດຍປະກອບມີ 7 ບ້ານຄື: ບ້ານນອງວິໄລ, ປູນຍາງ, ປູນຕົງ, ປູນຊີເຢີງ, ຫີນສະຫວ່າງ, ດົງນາສານ ແລະ ບ້ານສະດິ. ປັດຈຸບັນທາງໂຄງການແມ່ນໄດ້ຂຸ້ນຂ້ຽວການກໍ່ສ້າງ ຊຶ່ງໜ້າວຽກທີ່ປະຕິບັດແມ່ນກໍ່ສ້າງອ່າງ ເກັບນ້ຳລະບົບສູບສົ່ງນ້ຳບາດານຈາກບໍ່ຂຶ້ນໃສ່ອ່າງ, ການກໍ່ສ້າງລະບົບທໍ່ນ້ຳ, ແຈກຢາຍ ທໍ່ນ້ຳໃຫ້ຄົວເຮືອນພໍ່ແມ່ປະ ຊາຊົນ ພ້ອມທັງຕິດຕັ້ງກົງເຕີນ້ຳມູນຄ່າການກໍ່ສ້າງທັງໝົດ 9,57 ຕື້ກີບ. ສຳລັບຄວາມຄືບ ໜ້າຂອງໂຄງການມຮອດປັດ ຈຸບັນສຳເລັດໄປໄດ້ 20%; ຖ້າຫາກໂຄງການດັ່ງກ່າວກໍ່ສ້າງສຳເລັດ 100% ຈະສາມາດຕອບ ສະໜອງໃຫ້ພໍ່ແມ່ປະຊາຊົນ ພາຍໃນ 7 ບ້ານເປົ້າໝາຍໃນຈຳ ນວນ 836 ຄົວເຮືອນໄດ້ຊົມໃຊ້ນ້ຳປະປາຢ່າງສະດວກສະບາຍຂຶ້ນກວ່າເກົ່າ ຊຶ່ງຈະເປັນອີກເງື່ອນໄຂສຳຄັນ ໃນການແກ້ໄຂຄວາມທຸກຍາກຂອງປະຊາຊົນໃຫ້ຫຼຸດໜ້ອຍຖອຍລົງໄປເທື່ອລະກ້າວ.
(ຂ່າວ: ຕຸກຕຸກ)