ກອງປະຊຸມໃຫຍ່ຜູ້ແທນອົງຄະນະພັກແຂວງບໍລິຄຳໄຊ ຄັ້ງທີ VII

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 24/09/2020 16:48:20 ຈຳ​ນວນ​​ຢ້ຽມ​ຊົມ 1394 ຄັ້ງ

ກອງ​ປະຊຸມ​ໃຫຍ່​ຜູ້​ແທນ​ອົງຄະ​ນະ​ພັກ ແຂວງ ບໍ​ລິ​ຄໍາ​ໄຊ ຄັ້ງ​ທີ VII ໄດ້​ເປີດ​ຂຶ້ນ​ຢ່າງ​ເປັນ​ທາງ​ການ ໃນ​ຕອນ ເຊົ້າ​ວັນ​ທີ 24 ກັນຍາ 2020 ນີ້, ທີ່​ຫໍ​ປະຊຸມ​ໃຫຍ່​ຂອງ​ແຂວງ, ພາຍ​ໃຕ້​ການ​ເປັນ​ປະທານ ຂອງ ສະຫາຍ ກອງ​ແກ້ວ ໄຊ​ສົງຄາມ ກໍາ​ມະ​ການ​ສູນ​ກາງ​ພັກ ເລຂາ​ພັກ​ແຂວງ ເຈົ້າແຂວງ ບໍ​ລິ​ຄໍາ​ໄຊ ໂດຍ​ໃຫ້​ກຽດ​ເຂົ້າ​ຮ່ວມ ຂອງ​ສະຫາຍ ບຸນ​ທອງ ຈິດ​ມະນີ ກໍາ​ມະ​ການ​ກົມ​ການເມືອງ​ສູນ​ກາງ​ພັກ ຄະນະ​ເລຂາທິການ​ສູນ​ກາງ​ພັກ ຮອງນາຍົກລັດຖະມົນຕີ, ປະທານ​ຄະນະ​ກວດກາ​ສູນ​ກາງ​ພັກ ປະທານ​ອົງການ​ກວດກາ​ລັດຖະບານ ຫົວໜ້າ​ອົງການ​ຕ້ານການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ;  ມີ​ບັນດາ​ສະຫາຍ​ການ​ນໍາ​ຂັ້ນ​ສູນ​ກາງ, ພະນັກງານ​ປະຕິວັດ​ອາວຸໂສ ແລະ ຜູ້​ແທນ ສົມບູນ 237 ສະຫາຍ, ຍິງ 26 ສະຫາຍຊຶ່ງ​ເປັນ​ຕົວ​ແທນ​ໃຫ້​ແກ່​ສະມາ ຊິກ​ພັກ​ທົ່ວ​ອົງຄະ​ນະ​ພັກ​ແຂວງ ພ້ອມ​ແຂກ​ຖືກ​ເຊີນ​ເຂົ້າ​ຮ່ວມ.
ສະຫາຍ ກອງ​ແກ້ວ ໄຊ​ສົງຄາມ ໄດ້​ໃຫ້​ກຽດ​ກ່າວ​ເປີດ​ກອງ​ປະຊຸມ ແລະ ຜ່ານ​ບົດລາຍ ​ງານ​ການເມືອງ ຕີ​ລາຄາ​ຜົນ​ການຈັດຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່​ຜູ້​ແທນອົງຄະ​ນະ​ພັກ​ແຂວງ ຄັ້ງ​ທີ VI (2016-2020) ແລະ ທິດ​ທາງ​ແຜນການ 5 ປີ (2021-2025) ໂດຍ​ໄດ້​ຍົກ​ໃຫ້​ເຫັນ​ຜົນ​ສໍາ​ເລັດ​ຕົວ​ຈິງ​ໃນ​ທຸກ​ຂົງເຂດ​ວຽກ​ງານ ເປັນຕົ້ນ:  ຂົງເຂດ​ປ້ອງ​ກັນ​ຊາດ​-​ປ້ອງ​ກັນ​ຄວາມ​ສະຫງົບ, ຂົງເຂດ​ເສດຖະກິດ, ຂົງເຂດ​ວັດ​ທະ​ນາ​ທໍາ-​ສັງຄົມ, ຂົງເຂດ​ນິຕິ​ບັນ ຍັດ, ຂົງເຂດ​ຕຸລາການ ແລະ ວຽກ​ງານ​ຍຸ​ຕິ​ທໍາ, ຂົງເຂດ​ແນວ​ລາວ​ສ້າງ​ຊາດ, ອົງການ​ຈັດ​ຕັ້ງ​ມະຫາຊົນ, ວຽກ​ງານ ພົວພັນ ແລະ ຮ່ວມ​ມື​ສາກົນ, ວຽກ​ງານ​ພັກ​-​ພະນັກງານ ແລະ ວຽກ​ງານ​ອື່ນໆ. ໃນ​ສະພາບ​ການ​ທີ່​ພົບ​ຄວາມ​ຫຍຸ້ງ​ຍາກ ແລະ​ສິ່ງ​ທ້າ​ທາຍ​ຫຼ້າຍ​ຢ່າງ​ທີ່​ສົ່ງ​ຜົນ​ກະທົບ​ຕໍ່​ການ​ພັດທະນາ​ເສດ​ຖະ​ກິດ​-​ສັງຄົມ, ແຕ່​ພາຍ​ໃຕ້​ການ​ນໍາ​ພາ​-​ຊີ້​ນຳ ຢ່າງ​ໃກ້​​ຊິດ​ຂອງ​ກົມ​ການເມືອງ​ສູນ​ກາງ​ພັກ, ດ້ວຍ​ຄວາມ​ຮັບຜິດຊອບ​ສູງ ຕໍ່ໜ້າ​ທີ່​ການເມືອງ ແລະ ຄວາມ​ຕັດສິນ​ໃຈ​ແກ້​ໄຂ​ຂອງ​ຄະນະ​ບໍລິຫານ​ງານ​ພັກ​ແຂວງ, ການ​ສະໜັບສະໜູນ, ຕື່ນ​ຕົວ​ເຂົ້າ​ຮ່ວມ​ຂອງ​ສະມາຊິກ​ພັກ, ພະນັກງານ, ກໍາ​ລັງ​ປະກອບ​ອາວຸດ ແລະ ປະຊາຊົນບັນດາ ເຜົ່າ​ຊາວ​ແຂວງ​ບໍ​ລິ​ຄຳ​ໄຊ ກໍ​ໄດ້​ພ້ອມ​ກັນ​ຈັດ​ຕັ້ງ​ຜັນ​ຂະ ຫຍາຍທິດ​ທາງ​ລວມ, ບັນດາ​ຄາດໝາຍ​ໃຫຍ່, ໜ້າທີ່​ຈຸດ​ສຸມ ແລະ ວິໄສ​ທັດ​ຂອງ​ແຂວງ ທີ່​ໄດ້​ຮັບຮອງ​ໃນ​ກອງ​ປະຊຸມ​ໃຫຍ່​ອົງຄະ​ນະ​ພັກ​ແຂວງ ຄັ້ງ​ທີ VI ແລະ ແຜນ​ພັດທະນາ​ເສດ​ຖະ​ກິດ​-​ສັງຄົມ 5 ປີ ຄັ້ງ​ທີ IV (2016 - 2020) ດ້ວຍ​ຈິດໃຈ​ບຸກ​ທະລຸ​ຢ່າງ​ແຂງແຮງ, ການ​ແກ້​ໄຂ​ບັນ ຫາ 4 ເຖື່ອນ ແລະ 9 ຫົວຂໍ້​ວິທະຍາສາດ ເຂົ້າ​ສູ່​ວຽກ​ງານ​ຕົວ​ຈິງ​ຢູ່​ແຕ່​ລະ​ຂະແໜງການ ແລະ ເມືອງ, ຈິ່ງ​ສາມາດ​ຍາດ​ໄດ້​ຜົນ​ສໍາ​ເລັດ​ທີ່​ສໍາ​ຄັນ​ເປັນ​ພື້ນຖານ​ຫຼາຍ​ດ້ານ ເຮັດ​ໃຫ້​ແຂວງ​ບໍ​ລິ​ຄໍາ​ໄຊ ມີ​ການ​ຫັນປ່ຽນ​ຢ່າງ​ຕັ້ງໜ້າ, ຢູ່​ໃນ​ຕົວ​ເມືອງ​ກໍ່​ຄື​ຊົນນະບົດ ລ້ວນ​ແຕ່​ໄດ້​ຮັບ​ການ​ສ້າງສາ​ພັດທະນາ ເຮັດ​ໃຫ້​ຕົວ​ເມືອງ ແລະ ຊົນນະບົດ​ຍັບ​ເຂົ້າ​ໃກ້​ກັນ, ເສດຖະກິດ​ມີ​ການ​ຂະຫຍາຍຕົວ​ຢ່າງ​ຕໍ່​ເນື່ອງ, ສັງຄົມ​ມີ​ຄວາມ​ສະຫງົບ ແລະ ເປັນ​ລະບຽບ​ຮຽບຮ້ອຍ, ລະບົບ​ການເມືອງ ມີ​ຄວາມ​ເຂັ້ມແຂງ, ໜັກແໜ້ນ, ປະຊາຊົນ​ບັນດາ ເຜົ່າ​ມີ​ຄວາມ​ສາມັກຄີ​ປອງ​ດອງ ເຊື້ອ​ໝັ້ນ​ຕໍ່​ການ​ນຳພາ​ຂອງ​ພັກ, ວັດ​ທະ​ນະ​ທໍາ-​ສັງຄົມ ໄດ້​ຮັບ​ການ​ພັດທະນາ, ຊີວິດ​ການ​ເປັນ​ຢູ່​ຂອງ​ປະຊາຊົນ​ທາງ​ດ້ານ​ວັດຖຸ ແລະ ຈິດໃຈ ໄດ້​ຮັບ​ການ​ປັບປຸງ​ປົວແປງ​ດີ​ຂື້ນ​ກວ່າ​ເກົ່າ, ການ​ຂະຫຍາຍຕົວ ເສດຖະກິດ​ສະເລ່ຍ 6,5%; ປີ 2020 ລວມ​ຍອດ​ຜະລິດ​ຕະ​ພັນ​ພາຍ​ໃນ​ບັນລຸ 5.878 ຕື້​ກີບ, ລາຍ​ຮັບ​ຕໍ່​ຫົວ​ຄົນ 18 ລ້ານ​ກວ່າກີບ ຫຼື 2.000 ກວ່າ​ໂດ​ລາ ໃນ​ນັ້ນ ຂະແໜງ​ກະ​ສິ​ກໍາ ກວມ 26%, ອຸດ​ສາ​ຫະ​ກໍາ 48,9% ແລະ ການ​ບໍລິການ 25,1% ຂອງ GDP; ການ​ລົງທຶນ​ບັນລຸ 7.914 ຕື້​ກີບ ກວມ 29,8% ຂອງ​ລວມ​ຍອດ​ຜະລິດ​ຕະ​ພັນ​ພາຍ​ໃນ 5 ປີ; ການ​ຈັດ​ເກັບ​ລາຍ​ຮັບ​ເຂົ້າ​ງົບປະມານ ໄດ້​ຕາມ​ແຜນທີ່​ວາງ​ໄວ້;  ການ​ຈັດ​ສັນ​ເຕົ້າໂຮມ​ບ້ານ, ສ້າງ​ບ້ານ​ໃຫຍ່​ໃຫ້​ກາຍເປັນ​ຈຸດ​ໃຈກາງ​ພັດທະນາ ແລະ ການ​ເປັນ​ສີສັນ​ຕົວ​ເມືອງ​ນ້ອຍ ໃຫ້​ມີ​ຄວາມ​ເຂັ້ມແຂງ ແລະ ໜັກ​ແໜ້ນ ເຮັດ​ໃຫ້​ທົ່ວ​ແຂວງ​ມີ​ຄອບຄົວ​ພົ້ນ​ທຸກ ກວມ 98,2%, ບ້ານ​ພົ້ນ​ທຸກ 89%, ເມືອງພົ້ນ ທຸກ 6 ເມືອງ, ຄອບຄົວ​ພັດທະ ນາ 86,73%, ບ້ານ​ພັດທະນາ 70,44%.   ຂົງເຂດ​ວັດ​ທະ​ນະ​ທໍາ-​ສັງຄົມ ສືບຕໍ່​ໄດ້​ຮັບ​ການ​ພັດທະນາ ແລະ ປັບປຸງ​ດີ​ຂຶ້ນ​ຫຼາຍ​ດ້ານບັນລຸ​ໄດ້​ຄາດໝາຍ​ສູ້​ຊົນ​ການ​ພັດທະນາ​ແບບ​ຢືນ​ຍົງ. ໃນ​ນີ້ ຈໍາ​ນວນ​ໜຶ່ງ​ປະຕິບັດ​ນະໂຍບາຍ​ປະຕິ​ຮູບ​ລະບົບ​ການສຶກສາ​ຢ່າງ​ຕໍ່​ເນື່ອງ, ເຮັດ​ໃຫ້​ຄຸນ​ນະ​ພາບ​ການ​ສຶກສາ​ດີ​ຂຶ້ນ, ພື້ນຖານ​ໂຄງ​ລ່າງ​ການສຶກ ສາ​ຊັ້ນ​ຕ່າງໆ​ຂະຫຍາຍໄປ​ສູ່​ ເຂດ​ຊົນນະບົດຫ່າງ​ໄກສອກ ຫຼີກ​ກວມ​ເອົາ​ທຸກ​ບ້ານ, ສາມາດ​ ປະກາດ​ແຂວງ​ຈົບ​ຊັ້ນ​ມັດທະ ຍົມ​ຕອນ​ຕົ້ນ​ເປັນ​ອັນດັບ 5 ຂອງ​ປະເທດ; ວຽກ​ກິລາ​ກາ​ຍະ​ກຳ​ໄດ້​ຮັບ​ການ​ເສີມ​ຂະຫຍາຍ ແລະ ສ້າງ​ຂະບວນ​ການ​ຢ່າງ​ຕໍ່​ເນື່ອງ. ຕາໜ່າງສາທາລະນະ​ສຸກ​ໄດ້​ຂະຫຍາຍ​ລົງ​ສູ່​ເຂດ​ຫ່າງ​ໄກ​ສອກຫຼີກ ຕິດ​ພັນ​ກັບ​ການ​ສົ່ງເສີມ​ສຸຂະພາບ ແລະ ປິ່ນປົວ​ພະຍາດຂັ້ນ​ພື້ນຖານ, ໂຮງໝໍ ແລະ ພະນັກງານ​ແພດ​ໜໍ​ແຕ່​ລະ​ຂັ້ນ​ໄດ້​ຮັບ​ການ​ປັບປຸງ​ຍົກ​ລະດັບ, ເຮັດ​ໃຫ້ການ​ບໍລິການ ດີ​ຂຶ້ນ​ກວ່າ​ເກົ່າ​ຄວບ​ຄຸມ ແລະ ປ້ອງ​ກັນ​ພະຍາດ​ລະບາດ​ຕາມ​ລະດູ​ການ ແລະ ພະຍາດ​ໂຄ​ວິດ-19 ໄດ້​ທັນ​ເວລາ, ສ້າງ​ບ້ານ​ແບບຢ່າງ​ສາທາລະນະ​ສຸກ​ໄດ້ 93%;ໄດ້​ຍົກ​ສູງ​ຄຸນ​ນະ​ພາບ​ການ​ສະໜອງ​ຂໍ້​ມູນ​ຂ່າວສານ ຜ່ານ​ພາຫະນະສື່​ມວນ​ຊົນທຸກ​ ປະເພດ; ນໍາ​ໃຊ້​ສື່​ຂອງແຂວງ  ແລະ ສູນ​ກາງ​ກະຕຸກຊຸກຍູ້​ ປະຊາຊົນ​ບັນດາເຜົ່າ​ປະກອບ ສ່ວນ​ເຂົ້າໃນ​ຂະບວນ​ການ ແລະ ວຽກ​ງານ​ເຄື່ອນ​ໄຫວ​ອື່ນ; ມີ​ບ້ານ​ວັດ​ທະ​ນະ​ທໍາ​ກວມ 91,06% ແລະ ຄອບຄົວ​ກວມ 84,62% ເອກະລັກ​ວັດ​ທະ​ນະ​ທໍາ​ທີ່​ເປັນ​ມູນເຊື້ອ​ໄດ້​ຮັບ​ການ​ຟື້ນ​ຟູ,ສົ່ງເສີມ ແລະ ພັດທະນາ​ຕິດ​ພັນ​ກັບ​ການ​ທ່ອງ ທຽ່ວ. ຄຸ້ມ​ຄອງ​ການ​ນໍາ​ໃຊ້​ແຮງ​ງານ​ຈາກ​ຕ່າງປະເທດ​ໄດ້​ເປັນ​ຢ່າງ​ດີ, ຊຸກຍູ້ ແລະ ຂະຫຍາຍ​ປະກັນ​ສັງຄົມ​ລົງ​ສູ່​ພາກວິ​ສາ​ຫະ​ກິດ ແລະ ປະຊາຊົນ​ຢ່າງ​ກວ້າງ​ຂວາງ.
ແຕ່​ຄ່ຽງ​ຄູ່​ກັບ​ຜົນງານ​ດ້ານ​ຕັ້ງໜ້າ​ ກໍ​ຍັງ​ມີ​ບາງ​ຂໍ້ຄົງຄ້າງທີ່​ຈະ​ຕ້ອງ​ໄດ້​ກໍາ​ນົດ​ທິດ​ທາງ​ຈຸດ​ສຸມ​ຂອງ​ຄະນະ​ບໍ​ລິຫານງານ ​ພັກ​ແຂວງ ຊຸດ​ທີ VII ຕາມຄໍາ​ຂວັນ​ທີ່​ວ່າ: “ ເພີ່ມ​ທະວີ​ສ້າງ​ຄວາມ​ເຂັ້ມແຂງການ​ ນໍາ​ພາ​ຂອງ​ພັກ ໃຫ້​ມີ​ຄຸນ​ນະ​ພາບ​ໃໝ່ ເພື່ອ​ນໍາ​ພາ​-​ຊີ້​ນໍາ​ເຮັດ​ສໍາ​ເລັດ​ໜ້າ​ທີ​່ພັດທະນາ​ແຂວງ​ໃຫ້​​ໜັກ​ແ​ໜ້ນ” ເປັນຕົ້ນ​ແມ່ນ​ສືບຕໍ່​ຮັກສາ​ສະຖຽນ​ລະ​ພາບ​ທາງ​ການເມືອງ ໃຫ້​ໜັກ​ແໜ້ນ, ສັງຄົມ​ມີ​ຄວາມ​ສະຫງົບ​ປອດ​ໄພ, ເຂັ້ມແຂງ ແລະ ມີ​ແບບແຜນ​ທັນ​ສະໄໝ, ຖື​ເອົາ​ການ​ພັດທະນາ​ເປັນໃຈ​ກາງ ແລະ ມີ​ການ​ຂະຫຍາຍຕົວ​ແບບ​ຍືນ​ຍົງ, ສ້າງ​ກົນ​ໄກ​ເຊື່ອມ​ໂຍງ, ເຊື່ອມ​ຈອດ​ທາງ​ດ້ານ​ເສດຖະກິດ ກັບ​ຂົງເຂດ ແລະ ພາກ​ພື້ນ, ຫັນ​ເປັນ​ອຸດ​ສາ​ຫະ​ກໍາ​ປຸງ​ແຕ່ງ, ນໍາ​ໃຊ້​ທ່າແຮງ​ພາກ ສ່ວນ​ເສດຖະກິດ ເຂົ້າ​ຮ່ວມ​ການ​ພັດທະນາ, ຍູ້​ແຮງ​ການ​ຜະລິດ​ເປັນ​ສິນຄ້າ ຕິດ​ພັນ​ກັບ​ການ​ຈັດ​ສັນ​ອາຊີບ​ໝັ້ນຄົງ ແລະ ສ້າງ​ລາຍ​ຮັບ​ໃຫ້​ແກ່​ປະຊາຊົນ, ຮອດ​ປີ 2025 ສູ້​ຊົນ​ໃຫ້​ເສດຖະກິດ​ຂະຫຍາຍຕົວ​ຢ່າງ​ຕໍ່​ເນື່ອງ ໝັ້ນ​ທ່ຽງ ໂດຍ​ສະເລ່ຍ 5% ຂຶ້ນ​ໄປ, ລວມ​ຍອດ​ຜະລິດ​ຕະ​ພັນ​ພາຍ​ໃນ (GDP) ບໍ່​ໃຫ້​ຫຼຸດ 9.233 ຕື້​ກວ່າ​ກີບ, ລາຍ​ຮັບ​ສະເລ່ຍ 2.800 ໂດ​ລາ/ຄົນ/ປີ​ຂຶ້ນ​ໄປ; ໂຄງ​ປະກອບ​ເສດຖະກິດ: ກະ​ສິ​ກໍາ ໃຫ້​ກວມ 22%, ອຸດ​ສາ​ຫະ​ກໍາ-​ກໍ່ສ້າງ ໃຫ້​ກວມ 48% ແລະ ບໍລິການ ໃຫ້​ກວມ 30%; ເກັບ​ລາຍ​ຮັບ​ເຂົ້າ​ງົບປະມານ ໃຫ້​ໄດ້ 8,9% ຂອງ GDP; ສຸມ​ໃສ່​ແກ້​ໄຂ​ຄວາມທຸກ​ຍາກ​ຂອງ​ປະຊາຊົນ​ບັນດາເຜົ່າ ໃຫ້​ໄດ້​ໂດຍ​ພື້ນຖານ ແລະ ຍືນ​ຍົງ, ພັດ ທະນາ​ຊົນນະບົດ ຢ່າງ​ມີ​ຈຸດ​ສຸມ, ສ້າງ​ບ້ານ, ກຸ່ມ​ບ້ານ​ພັດທະນາ ຕາມ​ທິດ 3 ສ້າງ, ສ້າງ​ກົນ​ໄກ​ແກ້​ໄຂ​ຂໍ້​ຫຍຸ້ງຍາກ​ທາງ​ດ້ານ​ເສດຖະກິດ​ໃຫ້​ໂລ່ງ​ລ່ຽນ, ການ​ພັດທະນາຕ້ອງ​ຕິດ​ແໜ້ນ​ກັບ​ວຽກ​ງານປ້ອງ​ກັນ​ຊາດ​-​ປ້ອງ​ກັນ​ຄວາມ​ສະຫງົບ ແລະ ຮັກສາ​ສະພາບ​ແວດ​ລ້ອມ​ທີ່​ຍືນ​ຍົງ, ເອົາ​ການ​ພັດທະນາ​ຊັບ​ພະຍາ ກອນ​ມະນຸດ ເປັນ​ຂໍ​ກຸນແຈ​ຕາມ​ທິດ​ບຸກ​ທະລຸ 4 ດ້ານ ເຮັດ​ໃຫ້​ປັດໄຈ​ຄົນກາຍເປັນ​ແມ່​ແຮງ​ທາງ​ດ້ານ​ການ​ພັດທະນາຢ່າງ​ແທ້​ຈິງ, ເພີ່ມ​ທະວີ​ການ​ນໍາ​ພາ​ຂອງ​ພັກ, ສ້າງ​ພັກ​ໃຫ້​ປອດ​ໃສ, ເຂັ້ມແຂງ, ໜັກ​ແໜ້ນ; ດໍາ​ລົງ​ບົດບາດ​ເປັນແກນ​ນໍາ ໃນ​ລະບົບ​ການເມືອງ​ຢ່າງ​ແທ້​ຈິງ, ການ​ນໍາ​ພາ​-​ຊີ້​ນຳ ບັນຊາ​ວຽກ​ງານ​ຕ້ອງສູ່​ສະພາວະ​ເພີ່ມ​ທະວີ, ເສີມ​ສ້າງ​ຄວາມ​ສາມັກຄີ​ປະຊາຊົນ​ບັນດາເຜົ່າ​ໃຫ້​ເປັນ​ປຶກ​ແຜ່ນ ໃຕ້​ການ​ນໍາ​ພາ​ຂອງ​ພັກ, ເສີມ​ຂະຫຍາຍ​ສິດ​ເປັນ​ເຈົ້າ ຂອງ​ປະຊາຊົນ, ບໍລິຫານ​ລັດ​ຖືກຕ້ອງ​ຕາມ​ກົດໝາຍ, ສ້າງ​ສັງຄົມ​ສີວິໄລ ແລະ ຍຸ​ຕິ​ທໍາ, ເພີ່ມ​ທະວີ​ເປີດ​ກວ້າງ ເຊື່ອມ​ໂຍງ​ສາກົນ, ພົວພັນ​ຮ່ວມ​ມື​ກັບ​ປະເທດ​ເພື່ອນ​ມິດ ແລະ ອົງການ ຈັດ​ຕັ້ງ​ສາກົນ ຕາມ​ແນວທາງ​ການ​ຕ່າງ ປະເທດ​ຂອງ​ພັກ ຢ່າງ​ເປັນ​ເຈົ້າ​ການ, ສາມັກຄີ​ພິເສດ​ຮ່ວມ​ມື​ກັບ​ແຂວງ​ແຮກສ່ຽວ ແລະ ບັນດາ​ແຂວງ ສສ ຫວຽດນາມ.
ກອງ​ປະຊຸມ​ໃນ​ຄັ້ງ​ນີ້, ຜູ້​ເຂົ້າ​ຮ່ວມ​ຍັງ​ໄດ້​ຮັບ​ຟັງ​ການ​ຜ່ານ​ຮ່າງ​ແຜນ​ພັດທະນາ ເສດ​ຖະ​ກິດ​-​ສັງຄົມ​ຂອງ​ແຂວງ 5 ປີ​ຄັ້ງ​ທີ V (2021-2025); ຮັບ​ຟັງ​ການ​ຜ່ານ​ບົດ​ສໍາ​ຫຼວດ​ການ​ນໍາ​ພາ​ລວມ​ຂອງ​ຄະນະ​ບໍລິຫານ​ງານ​ພັກ​ແຂວງ ສະໄໝ​ທີ VI ການ​ປະ​ກອບ​ຄໍາ​ເຫັນ​ຂອງ​ຂົງເຂດ​ວຽກ​ງານ​ຕ່າງໆ, ພ້ອມ​ກັນ​ນີ້​ກອງ​ປະ​ຊຸມ​ຍັັງ​ຈະ​ໄດ້​ດໍາ​ເນີນ​ການ​ປ່ອນ​ບັດ ເລືອກ​ຕັ້ງ ເອົາ​ຄະນະ​ບໍລິຫານ​ງານ​ພັກ​ແຂວງ ຊຸດ​ທີ VII ແລະ ປ່ອນ​ບັດ​ເລືອກ​ເອົາ​ຜູ້​ແທນ​ສົມບູນ​ໄປ​ເຂົ້າ​ຮ່ວມ ກອງ​ປະຊຸມ​ໃຫຍ່ ຄັ້ງ​ທີ XI ຂອງ​ສູນ​ກາງ​ພັກ​ທີ່​ຈະ​ຈັດ​ຂຶ້ນ​ໃນຕໍ່ໜ້າ​ນີ້.
  (ຂ່າວ: ແສງ​ເພັດ ແຊ່​ຈ່າວ)
 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110