ທ່າແຕງ ຈະພັດທະນາຕາດໝາໄນໃຫ້ເປັນແຫຼ່ງທ່ອງທ່ຽວ ທາງທຳມະຊາດ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 29/09/2020 14:34:16 ຈຳ​ນວນ​​ຢ້ຽມ​ຊົມ 1533 ຄັ້ງ

ແຫຼ່ງ​ທໍາ​ມະ​ຊາດ​ຕາດ​ໝາ​ໄນ ຕັ້ງ​ຢູ່​ເມືອງທ່າ​ແຕງ ​ແຂວງ ເຊ​ກອງ ຈະ​ພັດທະນາ​ເປັນ​ແຫຼ່ງ​ທ່ອງ​ທ່ຽວ​ທາງ​ທຳ​ມະ​ຊາດ​ອີກ​ແຫ່ງ​ໜຶ່ງ​ ໃນ​ຂະນະ​ທີ່ ບໍລິສັດ​ແກ້ວ​ທະວີ​ຊັບກໍ່ສ້າງ ແລະ ສ້ອມແປງ ຂົວ​-​ທາງ​ ຈຳກັດ​ຜູ້​ດຽວ​ ໄດ້​ສະເໜີ​ເຈດ​ຈຳນົງ​ເພື່ອ​ພັດທະນາ ໂດຍ​ຫຼ້າ​ສຸດ​ໃນ​ວັນ​ທີ 24 ກັນຍາຜ່ານ​ມາ​ ທີ່​ຫ້ອງ​ປະຊຸມ​ຫ້ອງການ​ຖະແຫຼງ​ຂ່າວ, ວັດ​ທະ​ນະ​ທໍາ ແລະ ທ່ອງ​ທ່ຽວ​ເມືອງທ່າ​ແຕງ ໄດ້​ຈັດ​ກອງ​ປະ ຊຸມ​ປຶກສາ​ຫາລື​ຄວາມ​ເປັນ​ໄປ​ໄດ້​ໃນ​ການ​ພັດທະນາ​ໂດຍ​ມີ​ຫ້ອງການ ແລະ ຂະແໜງການ​ກ່ຽວຂ້ອງ​ເຂົ້າ​ຮ່ວມ.
ທ່ານ ນາງ ແກ້ວ​ລາ​ວັນ ແກ້ວ​ລາດ​ຊະ​ວົງ​ໄຊ ເຈົ້າ​ຂອງ​ບໍລິສັດ ແກ້ວ​ທະວີ​ຊັບ ກໍ່ສ້າງ ແລະ ສ້ອມແປງຂົວ​-​ທາງ ​ຈໍາ​ກັດ​ຜູ້​ດຽວ​ ຊີ້​ແຈງ​ວ່າ: ການ​ພັດ​ທະ​ນາ​ນໍ້າ​ຕົກ​ຕາດ​ໝາໄນ ເປັນ​ສະຖານທີ່​ທ່ອງ​ທ່ຽວ​ຈະ​ພັດທະນາ​ໃຫ້​ໄດ້​ຕາມ​ຮູບ​ແບບ ໃນ​ມູນ​ຄ່າ​ການ​ລົງທຶນ​ທັງ​ໝົດ 5 ຕື້​ກີບ ຊຶ່ງ​ປະກອບ​ມີ​ຫຼາຍ​ກິດຈະກຳ​ເຊັ່ນ: ບຸກເບີກ​ເສັ້ນທາງ, ປູກ​ຕົ້ນໄມ້ 7 ຊັ້ນ (ຕົ້ນໄມ້​ປາລະມີ), ກໍ໋​ສ້າງ​ໂຮມ​ສະ​ເຕ, ລີ​ສອດ, ໄຟຟ້າ, ນໍ້າ​ປະປາ, ການ​ຕົບແຕ່ງ​ພາຍ​ໃນ​ຕາດ ແລະ ອື່ນໆ.
ຍ້ອນ​ເຫັນ​ໄດ້​ວ່າ​ມີ​ສະ ຖານທີ່​ທ່ອງ​ທ່ຽວສອງ​ແຫ່ງ​ທີ່ ຢູ່​ໃກ້​ກັບ​ນໍ້າ​ຕົກ​ຕາດ​ໝາໄນ, ຫ່າງ​ກັນ​ປະມານ 3 ກິໂລແມັດ ຊຶ່ງ​ເໝາະ​ແກ່​ການ​ສ້າງ​ເປັນ​ແຫຼ່ງ​ທ່ອງ​ທ່ຽວ​ແຫ່ງ​ໃໝ່​ໃຫ້​ຕໍ່​ເນື່ອງ​ຢູ່​ພາຍ​ໃນ​ເມືອງທ່າ​ແຕງ ເພື່ອ​ເຮັດ​ໃຫ້​ການ​ດໍາ​ເນີນ​ງານ​ເປັນ​ໄປ​ຢ່າງ​ມີ​ປະສິດທິພາບ, ຖືກຕ້ອງ​ຕາມ​ລະບຽບ​ຫຼັກການ​ຂອງ​ຂະແໜງການ​ກ່ຽວຂ້ອງ​ໃນ​ການ​ພັດທະນາ​ແຫຼ່ງ​ທ່ອງ​ທ່ຽວ​ທາງ​ທໍາ​ມະ​ຊາດ​ນໍ້າ​ຕົກ​ຕາດ​ໝາໄນ​ແຫ່ງ​ໃໝ່​ຂອງ​ເມືອງທ່າ​ແຕງ ໂດຍ​ລວມ​ຜູ້​ເຂົ້າ​ຮ່ວມ​ໄດ້​ປະ​ກອບ​ຄໍາ​ຄິດ​ເຫັນ​ຢ່າງ​ກົງ​ໄປ​ກົງ​ມາ ຊຶ່ງ​ທຸກ​ພາກສ່ວນ​ເຫັນ​ດີ​ເປັນ​ເອກ​ກະ​ພາບ​ໃຫ້​ບໍລິສັດ ແກ້ວ​ທະວີ​ຊັບ ກໍ່ສ້າງ ແລະ ສ້ອມແປງ​ຂົວ​-​ທາງ​ ຈໍາ​ກັດ​ຜູ້​ດຽວ ເປັນ​ຜູ້​ພັດທະນາ​ຕາດ​ດັ່ງ​ກ່າວ.
ເມືອງທ່າ​ແຕງ ເປັນ​ບ່ອນ​ໄດ້​ຮັບ​ການ​ຍົກ​ລະດັບ​ໃຫ້​ເປັນ​ແຫຼ່ງ​ທ່ອງ​ທ່ຽວ​ທີ່​ໄດ້​ຮັບ​ຄວາມ​ນິຍົມ​ຈາກ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງປະເທດ, ຄຽງ​ຄູ່​ກັນ​ນັ້ນ ກໍຍັງ​ມີ​ທຳ​ມະ​ຊາດ​ທີ່​ໜ້າ​ສົນໃຈ​ອີກ​ຫຼາຍ​ບ່ອນ ທີ່​ຍັງ​ບໍ່​ທັນ​ໄດ້​ຮັບ​ການ​ບູລະນະ​ເທື່ອ. ຕາດ​ໝາໄນ ແມ່ນ​ໜຶ່ງ​ໃນ​ຫຼາຍໆ​ຕາດ​ທີ່​ຍັງ​ບໍ່​ທັນ​ໄດ້​ຮັບ​ການ​ບຸກເບີກ ແລະ ພັດທະນາ​ໃຫ້​ກາຍເປັນ​ແຫຼ່ງ​ທ່ອງ​ທ່ຽວ ທີ່​ດຶງ​ດູດ​ນັກ​ທ່ອງ​ທ່ຽວ​ໃຫ້​ຫຼາຍ​ຂຶ້ນ.
(ຂ່າວ​-​ພາບ: ພອນ ບຸນ​ອຸທິດ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110