ແຂ່ງຂັນກິລາກັອຟ ຊີງຂັນ ທ່ານທີ່ປຶກສາຄະນະບໍໍໍລິຫານງານສູນກາງພັກ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 30/09/2020 11:47:47 ຈຳ​ນວນ​​ຢ້ຽມ​ຊົມ 1345 ຄັ້ງ

ການແຂ່ງຂັນກິລາກັອຟ ຊີງຂັນ ທ່ານ ສົມສະຫວາດ ເລັ່ງສະຫວັດ ທີ່ປຶກສາຄະນະບໍລິຫານງານສູນກາງພັກ ແລະ ເພື່ອຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ 8 ຜູ້ແທນອົງຄະນະພັກແຂວງ ຫຼວງພະບາງ ໄດ້ຈັດຂຶ້ນເມື່ອບໍ່ດົນ ຜ່ານມາ ທີ່ສະໜາມກິລາກັອຟ ແຂວງຫຼວງພະບາງ ມີການນຳຈາກສູນກາງ, ນັກກິລາຈາກນະຄອນຫຼວງວຽງຈັນ, ແຂວງໄຊຍະບູລີ, ແຂວງຫຼວງພະບາງ ແລະ ແຂວງອຸດົມໄຊ ເຂົ້າຮ່ວມ ທັງໝົດ 93 ຄົນ, ແບ່ງອອກເປັນ 16 ກ້ວນ, ກ້ວນລະ 6 ຄົນ ລວມທັງໝົດ 3 ສາຍຄື: ສາຍວີໄອພີ (VIP) ສາຍ A ແລະສາຍ B. ການແຂ່ງຂັນດຳເນີນໄປດ້ວຍ ບັນຍາກາດເບີກບານມ່ວນຊື່ນ ແລະ ຖືກຕ້ອງຕາມລະບຽບ ຜົນຂອງການແຂ່ງຂັນມີຄື: ສາຍ VIP ທີ 1 ທ່ານ ສາຍສະໝອນ ຄົມທະວົງ, ທີ 2 ທ່ານ ພົງສະຫວັນ ສິດທະວົງ ແລະ ທີ 3 ທ່ານ ວົງສະຫວັນ ເທບພະຈັນ; ສາຍ A ທີ 1 ທ່ານ ຕວນທອງ, ທີ 2 ທ່ານ ຄໍາມົນ ຈັນມະວົງ ແລະທີ 3 ທ່ານ ຕຸ້ຍ ຄໍາວັນດີ, ສາຍ B ທີ 1 ທ່ານ ສີສົມບັດ, ທີ 2 ທ່ານ ພອນໄຊ ດວງພະຈັນ ແລະ ທີ 3 ທ່ານ ບຸນເລື່ອມ ມະນີວົງ. ສ່ວນຜົນການຕີໃກ້ທຸງ ແມ່ນ ທ່ານ ຈັນສະໝອນ ສິດທິພົງ ແລະ ຕີໄກທີ່ສຸດ ແມ່ນທ່ານ ຂັນທອງ ໃຫ້ກຽດມອບຂັນ ແລະ ເງິນລາງວັນໂດຍແມ່ນ ທ່ານ ສົມສະຫວາດ ເລັ່ງສະຫວັດ ທີ່ປຶກສາຄະນະບໍລິຫານງານສູນກາງພັກ. ໂອກາດນີ້ ທ່ານ ສຸລິສັກ ພົມມາລີ ກຳມະການພັກແຂວງ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ ທັງເປັນຫົວໜ້າຄະນະຮັບຜິດຊອບຂະບວນການຂັ້ນແຂວງ ໄດ້ໃຫ້ສຳພາດວ່າ: ແຂ່ງຂັນກິລາກັອຟ ຊີງຂັນ ທີ່ປຶກສາຄະນະບໍລິຫານງານສູນກາງພັກຄັ້ງນີ້ ເພື່ອຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ 8 ຜູ້ແທນອົງຄະນະພັກແຂວງ ຫຼວງພະບາງ ໃຫ້ມີບັນຍາກາດເບີກບານມ່ວນຊື່ນ ແລະ ປຸກລະດົມການປະກອບສ່ວນກອງປະຊຸມໃຫຍ່ໃຫ້ສຳເລັດຕາມແຜນການ, ນອກຈາກການແຂ່ງຂັນກິລາກັອຟ ແມ່ນໄດ້ປຸກລະດົມໃຫ້ມີຂະບວນການອີກຫຼາຍດ້ານ ໂດຍສະເພາະແມ່ນການປະດັບປະດາຕົວເມືອງ, ການຊຸກຍູ້ຂະບວນການຜະລິດລະດູຝົນ ແລະ ອື່ນໆ.

ການແຂ່ງຂັ້ນຄັ້ງນີ້ ນັກກິລາທີ່ເຂົ້າຮ່ວມ ໄດ້ພ້ອມກັນປະກອບສ່ວນວັດຖຸ-ປັດໄຈ ຊຸກຍູ້ການດຳເນີນ ກອງປະຊຸມໃຫຍ່ ຄັ້ງທີ 8 ຜູ້ແທນອົງຄະນະພັກແຂວງ ຫຼວງພະບາງ ຕື່ມອີກ.

ຂ່າວ: ແຫຼ້ ສຸລີນພອນ


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110