ຄູ ແມ່ນເບົ້າ ຫຼໍ່ຫລອມສະຕິປັນຍາ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 07/10/2020 10:12:43 ຈຳ​ນວນ​​ຢ້ຽມ​ຊົມ 1235 ຄັ້ງ

ໂດຍ:ວັນໄຊ ຕະວິນຍານ

   ການພັດທະນາຊັບພະຍາກອນມະນຸດ ເປັນບັນຫາສໍາຄັນ ທີ່ເປັນໃຈກາງຂອງການພັດທະນາເສດຖະກິດ-ສັງຄົມຂອງປະເທດ. ກ່ອນຈະໄດ້ມາຊຶ່ງຊັບພະຍາກອນມະນຸດທີ່ມີຄຸນນະພາບໃນຫຼາຍສາຂາອາຊີບ,ມີຖານະຕໍາແໜ່ງ,ມີແນວຄິດດີ,ມີສະຕິປັນຍາປະກອບສ່ວນວຽກງານຢູ່ທົ່ວທຸກຫົນທຸກແຫ່ງ.ລ້ວນແຕ່ໄດ້ຮັບການຖ່າຍທອດຄວາມຮູ້ຈາກຜູ້ເປັນຄູ.ຈາກບົດບາດອັນສູງສົ່ງ ແລະ ຄວາມຮູ້ບຸນຄຸນທີ່ບໍ່ມີວັນຈືດຈາງຕໍ່ຄູ ສັງຄົມລ້ວນແຕ່ຍ້ອງຍໍສັນລະເສີນ ແລະ ໃຫ້ນາມມະຍົດຕໍ່ຄູໃນຄວາມໜາຍກວ້າງ ແລະ ຄວາມໜາຍແຄບວ່າ: ຄູ ແມ່ນແມ່ພິມຂອງຊາດ, ຄູ ແມ່ນພໍ່ແມ່ ຄົນທີ່ສອງຂອງເດັກນ້ອຍ, ຄູ ແມ່ນດັດສະນີຂອງສັງຄົມ,ຄູແມ່ນວິຊາວະກອນແຫ່ງດວງວິນຍານ,ຄູແມ່ນຜູ້ໃຫ້, ຄູແມ່ນຜູ້ເສຍສະຫລະຄູແມ່ນຜູ້ກໍານົດຮາກຖານແຫ່ງໂຄງສ້າງແນວຄິດຂອງມະນຸດ,ຄູປຽບເໜືອນທຽນໄຂ ທີ່ຍ່ອມເຜົາໄໝ້ຕົນເອງເພື່ອໃຫ້ແສງສະຫວ່າງຕໍ່ຄົນອື່ນ...

   ສະພາບຂອງປະເທດເຮົາ ກໍາລັງຜະເຊີນກັບຍຸກແຫ່ງໂລກາພິວັດ ອຸດສະກໍາກ້າວໜ້າຂະຫຍາຍຕົວ ເຕັກໂນໂລຊີລໍ້າສະໄໝ ການພັດທະນາທາງດ້ານວັດຖຸກ້າວໄປໄວເຫັນໄດ້ຢ່າງປະຈັກຕາ ມີທັງຜົນດີ ແລະ ຜົນສະທ້ອນອັນບໍ່ດີຕາມມາ.ຂະນະດຽວກັນ ການ ພັດທະນາວັດທະນະທໍາ ຄວາມສີວິໄລດ້ານຈິດໃຈ ພັດດໍາເນີນໄປແບບຊັກຊ້າ .ສິ່ງອໍານວຍຄວາມສະດວກຂອງສັງຄົມຈໍານວນໜຶ່ງ ກາຍເປັນຄ່ານິຍົມ ແລະ ຍຶດຕິດໃນຈິດໃຈຂອງກຸ່ມຄົນ ແລະ ໄວໜຸ່ມ-ໄວກໍາລັງສຶກສາ. ໄວໜຸ່ມ-ໄວກໍາລັງສຶກສາຈໍານວນບໍ່ໜ້ອຍ ມີຄວາມນຶກຄິດ ການປະພືດ ລວມທັງການດໍາລົງຊີວິດ ຫຼີ້ນກິນຟຸຍເຟືອຍ ໃຊ້ສິ່ງຂອງລົດລາຄາສູງ ໂດຍທີ່ບໍ່ແມ່ນເງິນທີ່ຕົນຫາໄດ້ເອງ,ບາງຄົນມີຍ້ອນຍາດເຫຼື່ອແຮງງານຂອງພໍ່-ແມ່ ທີ່ຫາໄວ້ໃຫ້, ໃຊ້ຊີວິດແບບສຸກສໍາລານໄປແຕ່ລະມື້ ຮ້າຍແຮງໄປກວ່ານັ້ນໄວໜຸ່ມຈໍານວນໜຶ່ງ ຍັງຕິດຢາເສບຕິດ ສ້າງປະກົດການຫຍໍ້ທໍ້ໃຫ້ສັງຄົມ,ປະລະການຮຽນ ຄັນໄປໂຮງຮຽນພັດບໍ່ຕັ້ງໃຈຮໍ່າຮຽນເອົາວິຊາຄວາມຮູ້ຈາກຄູ....

    ແນວທາງນະໂຍບາຍຂອງພັກ ແລະ ລັດຖະບານ ໄດ້ວາງອອກຢ່າງຊັດເຈນ ກ່ຽວກັບການພັດທະນາວ່າ: ການພັດທະນາປະເທດ ຈະຕ້ອງດໍາເນີນໄປຢ່າງສອດຄ່ອງ ສົມຄູ່ກັນ ລະຫວ່າງການພັດທະນາທາງດ້ານວັດຖຸ ແລະ ການພັດທະນາທາງດ້ານຈິດໃຈ.ເພື່ອພັດທະນາການສຶກສາຂອງປະເທດໃຫ້ຈະເລີນກ້າວໜ້າ ກະຊວງສຶກສາທິການແລະ ກິລາ ຍັງໄດ້ນົດ 3 ລັກສະນະ 5 ຫຼັກມູນການສຶກສາຂອງປະທດ ຊຶ່ງປະກອບໄປດ້ວຍ. ລັກສະນະຊາດ, ວິທະຍາສາດ-ທັນສະໄໝ ແລະ ລັກສະນະມະຫາຊົນ.ສ່ວນ 5 ຫຼັກມູນການສຶກສາລາວ ປະກອບດ້ວຍຄຸນສົມບັດສຶກສາ,ປັນຍາສຶກສາ,ແຮງງານສຶກສາ,ພາລະສຶກສາ ແລະ ສິລະປະສຶກສາ.

    ການພັດທະນາຊັບພະຍາກອນມະນຸດ ຕົ້ນຕໍແມ່ນເລັ່ງໃສ່ ກໍາລັງຊາວໜຸ່ມ -ເຍົາວະຊົນ ຊຶ່ງເປັນໄວທີ່ກໍາລັງແຂງແກ່ນ,ມີສະຕິປັນຍາວ່ອງໄວ ເປັນກໍາລັງສືບທອດອານາຄົດຂອງປະເທດຊາດ. ພາລະກິດອັນໃຫ່ຍທີ່ສຸດ ແມ່ນການກໍ່ສ້າງຊັບພະຍາກອນມະນຸດໃຫ້ມີຄຸນນະພາບ.ຈິງຢູ່ວ່າ ບໍ່ມີໃຜສ້າງໃຫ້ຄົນກາຍເປັນຄົນດີໄດ້ໜົດ ແຕ່ຂໍໃຫ້ຄົນດີ ຫຼາຍກວ່າຄົນບໍ່ດີໃນສັງຄົມ. ສະນັ້ນ ຈຶ່ງເປັນພາລະອັນໜັກໜ່ວງ ສໍາລັບຄູອາຈານ ກໍ່ຄື ສັງຄົມ ຈະຕ້ອງເປັນແບບຢ່າງ ກາຍເປັນ ແມ່ພິມຂອງຊາດ,ເປັນຜູ້ ຫຼໍ່ຫຼອມ ປູກຝັງທັດສະນະຄະຕິ ຄວາມຮັກຊາດ,ຮັກລະບອບໃໝ່ຢ່າງດູດດື່ມເລິກເຊິ່ງ,ມີຄຸນສົມບັດ,ສິນທໍາປະຕິວັດ,ມີວິໄສທັດ,ເກີດຈີນຕະນາການ,ມີຄວາມສີວິໄລທາງດ້ານວັດທະນະທໍາ ກໍ່ຄື ເຮັດໃຫ້ການສຶກສາມີຄຸນນະພາບ...


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110