ຈະສົ່ງເສີມປະຊາຊົນ 2 ເມືອງປູກຝັງ - ລ້ຽງສັດ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 12/10/2020 09:34:40 ຈຳ​ນວນ​​ຢ້ຽມ​ຊົມ 1047 ຄັ້ງ

   ພິທີ​ເຊັນ​ບົດ​ບັນທຶກຄວາມ ​ເຂົ້າໃຈ​ຂອງ​ໂຄງການ​ປັບປຸງ​ ຊີວິດ​ການ​ເປັນ​ຢູ່​ຂົງເຂດ​ພັດ ທະນາ 10 ບ້ານ​ເປົ້າ​ໝາຍຢູ່​ 2 ເມືອງ​ຄື: ເມືອງ​ຜາ​ອຸດົມ ແລະ ເມືອງ​ຫ້ວຍ​ຊາຍ ແຂວງ​ບໍ່​ແກ້ວ ເມື່ອບໍ່​ດົນ​ຜ່ານ​ມານີ້ ທີ່​ພະແນກ​ກະ​ສິ​ກຳ ​-​ ປ່າໄມ້​ແຂວງ ລະ ຫວ່າງ ທ່ານ ສີ​ບຸນ​ເຮືອງ ພັນທຸ​ລັກ ຫົວໜ້າ​ພະ​ແນ​ກ​ກະສິກຳ ແລະ ປ່າໄມ້​ແຂວງ ແລະ ນາງ ພອນ​ໄຊ ມະນີ​ວັງ​ໄຊ ປະທານ​ສະມາຄົມ​ຄຳ​ຄິດ ຫົວໜ້າ​ພະ​ແນກ, ຮອງ​ພະ​ແນກ, ຫົວໜ້າ​ຂະແໜງການ, ພະນັກງານ​ວິຊາ​ການ​ທີ​່ກ່ຽວຂ້ອງ​ເຂົ້າ​ຮ່ວມ.

   ທ່ານ ນາງ ພອນ​ໄຊ ມະນີ​ວັງ​ໄຊ ປະທານ​ສະມາຄົມ​ຄຳ​ຄິດ​ໃຫ້​ຮູ້​ວ່າ: ໂຄງການ​ດັ່ງກ່າວ​ນີ້​ແມ່ນ​ເພື່ອ​ສົ່ງ​ເສີມ​ຊາວບ້ານ​ໃນ​ບ້ານ​ເປົ້າ​ໝາຍ​ໃຫ້​ຮັບ​ຮູ້ ແລະ ເຂົ້າໃຈວິທີ​ລ້ຽງ​ແບ້​ໃຫ້​ຖືກ ຕ້ອງ ແລະ ວິທີ​ປູກ​ເຄື່ອງ​ປ່າ​ຂອງ ​ດົງ ເພື່ອສ້າງ​ໃຫ້​ຄອບຄົວ​ຢູ່​ເຂດ​ຫ່າງ​ໄກ​ສອກຫຼີກ​ໄດ້​ມີ​ລາຍ​ຮັບຈາກ​ການ​ປູກ ແລະ ການ​ລ້ຽງ​ສາມາດ​ສົ່ງ​ອອກ​ຂາຍ​ເປັນ​ສິນຄ້າ, ທັງ​ນີ້​ເພື່ອ​ໃຫ້​ປະຊາຊົນ​ຢູ່​ໃນ​ກຸ່ມ​ເປົ້າ​ໝາຍ​ດັ່ງກ່າວ​ຫຼຸດ​ພົ້ນ​ຈາກ​ຄວາມທຸກ​ຍາກມີ​ຊີວິດ​ດີ​ຂຶ້ນ​ເທື່ອ​ລະ​ກ້າວ ຊຶ່ງ​ໂຄງການ​ນີ້​ແມ່ນ​ນອນ ຢູ່​ໃນ 2 ເມືອງ​ຂອງແຂວງ​ບໍ່​ແກ້ວຄື: ເມືອງ​ ຜາ​ອຸດົມ ມີ 8 ບ້ານ ບ້ານກອນ​ຊອດ, ບ້ານ​ຖິນ,ບ້ານ ​ໃໝ່, ບ້ານ​ເດືອ, ບ້ານ​ກະ​ລົມ, ບ້ານ​ຫາດ​ໂຊນ, ບ້ານ​ຫາດຫ້ອມ ແລະ ບ້ານ​ພູ​ສູງ ແລະ​ເມືອງ ​ຫ້ວຍ​ຊາຍ ມີ 2 ບ້ານ​ ບ້ານ​ນໍ້າ​ຈ້ວມ ແລະ ບ້ານ​ລະ​ໂກນ ໂຄງ ການ​ນີ້​ແມ່ນເລີ່ມ​ລົງມື​ນັບ​ແຕ່​ມື້​ລົງ​ລາຍ​ເຊັນ​ເປັນຕົ້ນ​ໄປໃຊ້​ເວລາ 3 ປີ 2020 - 2023 ຈຶ່ງ​ສຳເລັດ ໃຊ້​ມູນ​ຄ່າ​ທັງ​ໝົດ 419,615,000 ກີບ.

(ຂ່າວ - ພາບ:ບຸນ​ເພັດ ໄຊ​ຍະ​ວົງ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110