ເປີດສະໂມສອນນັກການທູດລາວ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 13/10/2020 09:00:05 ຈຳ​ນວນ​​ຢ້ຽມ​ຊົມ 417 ຄັ້ງ

ເມື່ອບໍ່​ດົນຜ່ານ​ມາ ສະ​ຖາ​ບັນ​ການ​ຕ່າງປະເທດ ກະຊວງ​ການ​ຕ່າງປະເທດໄດ້​ຈັດ​ພິທີ​ເປີດ​ສະໂມສອນ​ນັກການທູດ​ລາວ, ໃຫ້​ກຽດ​ເຂົ້າ​ຮ່ວມ ແລະ ເປັນ​ປະທານເປີດພິທີ ໂດຍ ທ່ານ ສະເຫຼີມ​ໄຊ ກົມມະ​ສິດ ລັດຖະມົນຕີ​ກະຊວງການ​ຕ່າງປະເທດ, ທ່ານ ສົມ​ສະຫວາດ ເລັ່ງ​ສະ​ຫວັດ ອະດີດ​ກົມ​ການເມືອງ​ສູນ​ກາງ​ພັກ ອະດີດ​ຮອງ​ນາຍົກລັດຖະມົນຕີ ອະດີດລັດຖະມົນຕີ​ກະຊວງ​ການ​ຕ່າງປະເທດ, ມີ​ບັນດາ​ຄະນະ​ນຳກະ ຊວງ​ການ​ຕ່າງປະເທດ, ອະດີດ​ຄະນະ​ນຳ​ກະຊວງ​ການ​ຕ່າງປະເທດ, ຄະນະກົມ, ບັນດາ​ທ່ານ​ທູດ​ອາວຸໂສ​ບຳນານ ແລະ ພະນັກງານ​ກະຊວງ​ການ​ຕ່າງປະເທດເຂົ້າ​ຮ່ວມ​ປະມານ 70 ທ່ານ.

ຈຸດປະສົງ​ຂອງ​ການ​ສ້າງຕັ້ງ​ສະໂມສອນ​ນັກ​ການ​ທູດ​ລາວແມ່ນ​ເພື່ອ​ເຕົ້າໂຮມ​ບັນດາ​ອະດີດ​ເອກ​ອັກ​ຄະ​ລັດ​ຖະ​ທູດ ແລະ ບັນດາ​ນັກ​ການ​ທູດ​ລາວ ເພື່ອ​ເປັນ​ເວທີ​ປຶກສາ​ຫາລື, ແລກປ່ຽນ​ຄຳ​ຄິດ​ຄຳ​ເຫັນ, ຕີລາຄາ​ຕໍ່​ສະພາບ​ການ​ທີ່​ພົ້ນ​ເດັ່ນ​ຢູ່​ໃນ​ພາກ​ພື້ນ ແລະ ສາກົນທີ່​ມີ​ການ​ຜັນ​ແປ​ໄປ​ຢ່າງ​ໄວ​ວາ. ນອກຈາກ​ນີ້ ຍັງ​ເພື່ອ​ເປັນ​ຖານ​ຂໍ້​ມູນ​ທີ່​ເປັນ​ປະໂຫຍດ​ໃຫ້​ແກ່​ ພະນັກງານ​ກະຊວງ​ການ​ຕ່າງປະເທດໄດ້​ນຳໄປ​ໝູນ​ໃຊ້​ເຂົ້າ​ໃນ​ການ​ຄົ້ນຄວ້າ​ວິໄຈ ແລະ ເປັນ​ຂໍ້​ມູນ​ລາຍ​ງານ​ຄະນະນຳກະຊວງ​ການ​ຕ່າງ​ປະ​ເທດ. ພ້ອມ​ນັ້ນ, ສະໂມສອນ​ນັກການ​ທູດ​ລາວຍັງ​ຈະ​ເປັນ​ເວທີ​ໃນ​ການ​ສ້າງ​ກິດຈະກຳ​ຕ່າງໆ ເພື່ອ​ ສົ່ງເສີມ​ຄວາມຮັກແພງສາມັກຄີ, ແລກປ່ຽນ​ຄວາມ​ຮູ້ ແລະ ປະສົບ​ການ ລະຫວ່າງນັກການທູດ​ອາວຸໂສ​ບຳນານ ແລະ ນັກການ​ ທູດ​ຮຸ່ນ​ໜຸ່ມ​ນ້ອຍກໍຄືພະນັກ ງານ​ກະຊວງ​ການ​ຕ່າງ​ປະ​ເທດ.

ການ​ເປີດ​ສະໂມສອນໃນ​ຄັ້ງ​ນີ້​ຍັງ​ເປັນ​ຂີດ​ໝາຍ​ອັນ​ສຳ ຄັນ​ທາງ​ດ້ານ​ປະຫວັດສາດແຫ່ງ​ ການ​ເຕີບ​ໃຫຍ່​ຂະຫຍາຍຕົວ​ຂອງ​ຂະແໜງການ​ຕ່າງປະເທດ ຂອງ ສປປ ລາວ ໂດຍ​ມີທ່ານ ສົມ​ສະຫວາດ ເລັ່ງ​ສະ​ຫວັດ ເປັນ​ປະທານ​ກິ​ດຕິ​ມະ​ສັກ, ນອກນັ້ນຍັງ​ມີ​ບັນດາທ່ານທູດອາວຸ ໂສ​ບຳນານ​ເປັນ​ປະທານ ແລະ ຮອງ​ປະທານ​ບໍລິຫານ​ງານຂອງ ສະ​ໂມ​ສອນ​ດ່ັງ​ກ່າວ. ການ​ເປີດ​ສະໂມສອນ​ນັກ​ການ​ທູດ​ລາວ​ມີ​ຄວາມ​ພະຍາຍາມ ແລະ ຈຸດ ປະສົງ​ເປົ້າ​ໝາຍຂອງ​ຄະນະ​ພັກ​-​ຄະນະ​ນຳ​ກະຊວງ​ການ​ຕ່າງປະເທດ ອະດີດ​ການ​ນຳ​ຂອງ​ກະຊວງ​ການ​ຕ່າງປະເທດ​ ພ້ອມ​ດ້ວຍ​ບັນດາ​ທ່ານ​ນັກ​ການ​ທູດ​ອາ​ວຸ​ໂສ​ບໍາ​ນານ. ນອກຈາກ​ນີ້, ຍັງ​ເປັນ​ການ​ສ້າງ​ກິດຈະກຳ ​ເພື່ອ​ຂໍ່າ​ນັບ​ຮັບ​ຕ້ອນ​ກອງ​ປະ ຊຸມໃຫຍ່​ຜູ້​ແທນ​ທົ່ວ​ປະເທດຄັ້ງ​ ທີ XI ຂອງພັກ​ປະຊາຊົນ​ປະຕິ ວັດ​ລາວ​ທີ່​ຈະ​ຈັດ​ຂຶ້ນ​ໃນ​ຕົ້ນ​ປີ ໜ້າ​ນີ້, ຂະບວນ​ການ​ຂໍ່າ​ນັບ​ຮັບ​ຕ້ອນ​ກອງ​ປະຊຸມ​ໃຫຍ່​ ຄັ້ງ​ທີ IV ຂອງ​ອົງຄະ​ນະ​ພັກ​ກະຊວງ​ການ​ຕ່າງປະເທດ​ທີ່​ຈະ​ຈັດ​ຂຶ້ນ​ໃນ​ມໍ່ໆ​ນີ້ ແລະ ສະເຫຼີມສະຫຼອງ​ວັນ​ການ​ທູດ​ລາວ​ ຄົບຮອບ 75 ປີ ໃນ​ວັນ​ທີ 12 ຕຸລາ 2020.

ນອກຈາກ​ນີ້, ສະ​ຖາ​ບັນ​ການ​ຕ່າງປະເທດ ຍັງ​ໄດ້​ເປີດ​​ປຶ້ມ “ແນວ​ຄິດ​ຊີ້​ນຳ​ຕໍ່​ວຽກ​ງານ​ການ​ຕ່າງປະເທດຂອງ​ປະທານ ຄຳ​ໄຕ ສີ​ພັນ​ດອນ”, ການ​ຂຽນ​ປຶ້ມ​ດັ່ງກ່າວ ແມ່ນ​ການລະນຶກ​ເຖິງ​ຄຸນງາມຄວາມດີ ແລະ ການ​ສຶກສາ​ຮຽນ​ຮູ້​ກ່ຽວ​ກັບ​ວິລະ​ກຳ​ອັນ​ປະເສີດ​ບັນດາບົດຮຽນ, ພຶດຕິ​ກຳ​ຕົວ​ຈິງ ແລະ ການນຳພາ​ຊີ້​ນຳຂອງປະທານ ຄຳໄຕ ສີ​ພັນ​ດອນ ໂດຍ​ສະເພາະ​ດ້ານ​ວຽກ​ງານ​ການ​ຕ່າງປະເທດ ເພື່ອ​ແນໃສ່​ໃຫ້​ນັກ​ການ​ທູດ​ລາວ ແລະ ຄົນ​ຮຸ່ນ​ຫຼັງ​ໄດ້​ນຳ​ມາໝູນ ໃຊ້​ໃຫ້​ສອດຄ່ອງ​ກັບ​ຍຸກ​ສະໄໝ ໃໝ່​ຂອງ​ພາກ​ພື້ນ ແລະ ຂອງ​ໂລກ​ປັດ​ຈຸ​ບັນ.

(ຂ່າວ: ສະ​ຖາ​ບັນ​ການຕ່າງປະເທດ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110