JDB ທົບທວນຜົນການດຳເນີນທຸລະກິດ 9 ເດືອນຜ່ານມາ ແລະ ຄາດຄະເນ 3 ເດືອນທ້າຍປີ 2020

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 13/10/2020 09:05:25 ຈຳ​ນວນ​​ຢ້ຽມ​ຊົມ 1102 ຄັ້ງ

ທະນາຄານ​ຮ່ວມ​ພັດທະນາ  (JDB) ໄດ້​ເປີດ​ກອງປະຊຸມ​ ທົບ​ທວນ​ຜົນ​ການດໍາເນີນທຸລະ​ກິດ 9 ເດືອນ ແລະ ຄາດ​ຄະເນ 3 ເດືອນ​ທ້າຍປີ 2020  ຂຶ້ນ​ເມື່ອບໍ່​ດົນຜ່ານ​ມາ​ນີ້   ທີ່​ສໍານັກ​ງານ​ໃຫຍ່  JDB ໂດຍການເປັນ​ ປະທານ​ຂອງທ່ານ  ເອກະ​ພັນ ພະ​ພິທັກ  ປະທານ​ສະພາ​ບໍລິຫານ JDB, ມີ​ຄະນະ​ສະພາ​ຜູ້ບໍ ລິຫານ, ຜູ້​ອໍາ​ນວຍ​ການໃຫຍ່, ຄະນະ​ອໍາ​ນວຍ​ການ, ຄະນະພະ​ແນກ, ຕະຫຼອດ​ເຖິງ​ຫົວໜ້າ​ສູນ ​ບໍລິການ  ແລະ  ໜ່ວຍ​ບໍລິການ ເຂົ້າ​ຮ່ວມ.
ກອງ​ປະຊຸມ​ໄດ້​ສະຫຼຸບຜົນ​ການ​ດໍາ​ເນີນ​ທຸລະ​ກິດ ໃນ​ໄລຍະ 9 ເດືອນ ​ຜ່ານ​ມາ ແລະ ຄາດ​ຄະເນ 3 ເດືອນ 2020 ເຫັນວ່າໄດ້​ຕາມ​ແຜນການ​ທີ່​ວາງ​ໄວ້ຢ່າງ​ໜ້າ​ເພິ່ງ​ພໍໃຈ ເຖິງ​ວ່າ​ຈະມີ​ສະພາບ​ການ​ແຜ່​ລະບາດຂອງ​ໂຄ​ວິດ-19 ກໍ​ຕາມ ຊຶ່ງ​ເຮັດ​ໃຫ້​ລາຍ​ຮັບ​ຈາກ​ການ​ນໍາ​ໃຊ້​ບັດ  ATM, VISA, Master Card, UPI, JDB Yes, ເຄື່ອງ​ຮູດ​ບັດ EDC ແລະ  ຜະລິດ​ຕະ​ພັນ​ອື່ນໆຫຼຸດ​ລົງ ຍ້ອນ​ບໍ່​ມີ​ນັກ​ທ່ອງ​ທ່ຽວເຂົ້າ​ມາ​ໃນ​ປະເທດ​ຂອງ​ພວກ​ເຮົາ. 
ທ່ານ ວິໄລ ສີ​ພະ​ພອນ ຜູ້​ອໍາ​ນວຍ​ການ​ໃຫຍ່ ທະນາຄານ​ຮ່ວມ​ພັດທະນາ ພ້ອມ​ດ້ວຍ​ຜູ້​ບໍລິຫານ​ທຸກ​ຄົນ ພາຍ​ໃຕ້​ການ​ຊີ້​ນໍາ​ຂອງ​ທ່ານ ເອກະ​ພັນ ພະ​ພິທັກ ໄດ້​ຫັນ​ວິ​ກິດ​ໃຫ້​ເປັນ​ໂອກາດ ໂດຍ​ການ​ເລັ່ງ​ປ່ອຍ​ສິນ​ເຊື່ອ​ເຂົ້າ​ໃນ​ການ​ຟື້ນ​ຟູ​ເສດຖະກິດ, ໄດ້​ອອກ​ຜະລິດ​ຕະ​ພັນ​ສິນ​ເຊື່ອ ໂດຍ​ສະໜອງ​ຄວາມ​ຕ້ອງການໃຫ້​ເຂົ້າ​ເຖິງ​ກຸ່ມ​ລູກ​ຄ້າ​ເປົ້າ​ໝາຍ​ທັງ​ພາກ​ລັດ ແລະ ເອກະ​ຊົນ. ເງິນ​ກູ້​ເພື່ອ​ ນັກ​ສຶກສາ​ພາຍ​ໃນ ແລະ ຕ່າງ ປະເທດ, ເງິນ​ກູ້​ພະນັກງານ- ລັດຖະກອນ, ເງິນ​ກູ້​ຫັນຊັບ​ເປັນທຶນ, ເງິນ​ກູ້ SME, ເງິນ​ກູ້ Corporate ແລະ ອື່ນໆ. ຄາດ​ວ່າ 3 ເດືອນ​ທ້າຍ​ປີ 2020 ຈະ​ໃຫ້​ມີ​ຜົນ​ກໍາ​ໄລບັນລຸ​ເປົ້າ​ໝາຍ​ທີ່​ກໍາ​ນົດ​ໄວ້​ໃນ​ແຜນການ ປີ 2020.
ກອງ​ປະຊຸມ​ຄັ້ງ​ນີ້, ໄດ້ປັບປຸງ​ການຈັດຕັ້ງ​ໃໝ່ຂອງທະນາຄານ​ຮ່ວມ​ພັດທະນາໃຫ້​ ແທດເໝາະ​ກັບ​ການ​ຂະ ຫຍາຍ ຕົວຂອງ​ທະນາຄານ​ ໂດຍ​ປະຕິບັດ​ຕາມ​ກອງ​ປະຊຸມ​ຜູ້​ຖື​ຮຸ້ນ ໄດ້​ແຕ່ງຕັ້ງ ທ່ານ ເອກະ​ພັນ ພະ​ພິທັກ ເປັນ​ປະທານ​ສະພາ​ບໍລິຫານ​ອີກ​ວາລະ​ໜຶ່ງ ແລະ ໄດ້​ແຕ່ງຕັ້ງ​ຜູ້​ກວດ​ສອບມາ​ຈາກ​ຂ້າງ​ນອກ 1 ທ່ານ. ມາ​ເປັນ​ສະ ມາຊິກ​ສະພາ​ບໍລິຫານເພື່ອ​ໃຫ້​ຖືກຕ້ອງ​ຕາມ​ກົດໝາຍ, ໄດ້​ແຕ່ງຕັ້ງ​ທ່ານ ຮອງ​ຜູ້​ອໍາ​ນວຍ​ການ​ໃຫຍ່ເພີ່ມ​ອີກ 1 ທ່ານ ເພື່ອ​ຊ່ວຍ​ວຽກ​ບໍລິຫານ​ຕ່າງໆ ແລະ ໄດ້​ແຕ່ງຕັ້ງ​ປັບປຸງ​ສະພາ​ບໍລິຫານ​ຂອງ JDB ໃຫ້​ດີ​ຂຶ້ນ​ກວ່າ​ເກົ່າ ເພື່ອ​ຊີ້​ນໍາ-ນໍາ​ພາທະນາຄານ​ຮ່ວມ​ພັດທະນາໃຫ້ ກ້າວ​ໄປ​ຢ່າງ​ບໍ່​ຢຸດ​ຢັ້ງ. 
ປັດຈຸບັນ JDB ໄດ້​ຮ່ວມ​ມື​ກັບ​ຫຼາຍ​ອົງ​ກອນ ແລະ ຫຼາຍ​ບໍລິສັດ ເພື່ອ​ບໍລິການ​ດ້ານ​ການ​ເງິນທີ່​ຄົບ​ວົງ​ຈອນ ໃຫ້​ກັບ​ລູກ​ຄ້າ​ທຸກ​ລະດັບ​ຢ່າງ​ເທົ່າ​ທຽມ​ກັນ ປະຕິບັດ​ນະໂຍບາຍ​ຕ່າງ​ຝ່າຍ​ຕ່າງ​ມີ​ຜົນ​ປະໂຫຍດ​ຕາມ​ຄໍາ​ຂວັນ​ທີ່​ວ່າ: “ເຕີບ​ໃຫຍ່​ໄປ​ພ້ອມ​ກັນ”. 
(ຂ່າວ​-​ພາບ: ຄໍາ​ຕົ້ນ ວໍລະ​ຈັກ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110