ກອງປະຊຸມລະດັບ ລມຕ ຂອງຂະບວນການບໍ່ຮ່ວມກຸ່ມໃນໄລຍະກອງປະຊຸມ ສປຊ ຄັ້ງທີ 75

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 14/10/2020 09:13:37 ຈຳ​ນວນ​​ຢ້ຽມ​ຊົມ 960 ຄັ້ງ

   ໃນ​ໄລຍະ​ກອງ​ປະຊຸມສະ ມັດຊາ​ໃຫຍ່​ອົງການ​ສະຫະ​ປະ ຊາຊາດ (ສປຊ) ຄັ້ງ​ທີ 75, ທ່ານ ສະເຫຼີມ​ໄຊ ກົມ​ມະ​ສິດ ລັດຖະມົນຕີກະຊວງການຕ່າງ ປະເທດ, ໄດ້​ເຂົ້າ​ຮ່ວມ ແລະ ກ່າວ​ບົດ​ປາ​ໄສ​ຕໍ່​ກອງ​ປະຊຸມ​ທາງໄກ​ປະຈຳ​ປີ​ລະດັບ​ລັດຖະ ມົນຕີ ຂອງ​ຂະບວນ​ການ​ບໍ່​ຮ່ວມ​ກຸ່ມ ພາຍ​ໃຕ້​ຫົວຂໍ້ “ບັນ​ດຸງ +65 ຂະບວນ​ການ​ບໍ່​ຮ່ວມ​ກຸ່ມ​ທີ່​ມີ​ຄຸນຄ່າ, ມີ​ຄວາມ​ເປັນ​ເອກະ​ພາບ ແລະ ມີ​ປະສິດ​ທິ​ຜົນ​ຫຼາຍ​ຍິ່ງ​ຂຶ້ນ​ໃນ​ການ​ຮັບ​ມືກັບ​ສິ່ງ​ທ້າ​ທາຍ​ສາກົນ​ທີ່​ເກີດ​ຂຶ້ນ​ລວມ​ທັງ​ພະຍາດ​ໂຄ​ວິດ-19 ຊຶ່ງ​ຈັດ​ຂຶ້ນ​ເມື່ອບໍ່​ດົນ​ຜ່ານ​ມານີ້, ພາຍ​ໃຕ້​ການ​ເປັນ​ປະທານ​ຂອງ​ປະ ເທດ​ອາ​ແຊັກ​ໄບ​ຊານ.
   ກອງ​ປະຊຸມ​ໄດ້​ຈັດ​ຂຶ້ນ​ ເພື່ອ​ປຶກສາ​ຫາລື ແລະ ແລກ ປ່ຽນ​ຄວາມ​ຄິດ​ເຫັນ​ກ່ຽວກັບ​ສິ່ງ​ທ້າ​ທາຍ​ຕ່າງໆ​ທີ່​ເກີດ​ຂຶ້ນ​ໃນ​ພາກ​ພື້ນ ແລະ ສາ​ກົນ ໃນ​ການ​ປະກອບ​ຄຳ​ເຫັນ​ຂອງ​ຄະນະ​ຜູ້​ແທນ​ແມ່ນ​ໄດ້​ຢ້ຳ​ຄືນ​ບັນດາ​ຄວາມ​ໝາຍ​ໝັ້ນ ແລະ ຫຼັກການ​ຂອງ​ຂະບວນ​ການ​ບໍ່​ຮ່ວມ​ກຸ່ມ ແລະ ສົ່ງເສີມ​ການ​ຮັດ​ແໜ້ນ​ການ​ຮ່ວມ​ມື​ຂອງ​ບັນດາ​ປະເທດ​ສະມາຊິກ ເພື່ອ​ຮ່ວມ​ມື​ກັນ​ແກ້​ໄຂ​ບັນຫາ ແລະ ສິ່ງ​ທ້າ​ທາຍ​ຕ່າງໆ. ກອງ​ປະຊຸມ​ໄດ້​ຮັບຮອງ​ເອົາ​ຖະແຫຼງການ​ທາງ​ດ້ານ​ການເມືອງ​ລະດັບ​ລັດຖະມົນຕີ​ວ່າ​ດ້ວຍ​ຫຼັກການ​ບັນ​ດຸ​ງ​ຄົບ ຮອບ 65 ປີ ຂະບວນ​ການ​ບໍ່​ຮ່ວມ​ກຸ່ມ​ທີ່​ມີ​ຄຸນຄ່າ, ມີ​ຄວາມ​ເປັນ​ເອກະ​ພາບ ແລະ ມີ​ປະສິດ​ທິ​ຜົນ​ຫຼາຍ​ຍິ່ງ​ຂຶ້ນ​ໃນ​ການ​ຮັບ​ມື​ກັບ​ສິ່ງ​ທ້າ​ທາຍ​ສາກົນ​ທີ່​ເກີດ​ຂຶ້ນ​ລວມ​ທັງ​ການ​ແຜ່​ລະບາດ​ພະຍາດໂຄ​ວິດ-19.
   ທ່ານ ສະເຫຼີມ​ໄຊ ກົມ​ມະ​ສິດ ໄດ້​ກ່າວ​ບົດ​ປາ​ໄສ​ໃນ​ກອງ​ປະຊຸມ​ໂດຍ​ເນັ້ນ​ເຖິງ​ຄວາມ​ສຳຄັນ​ຂອງ​ການ​ຢຶດ​ຖື​ຫຼັກການ​ບັນ​ດຸ​ງ​ທີ່​ເປັນ​ຫຼັກການ​ຕົ້ນ​ກຳເນີດ​ຂອງ​ຂະບວນ​ການ​ບໍ່​ຮ່ວມ​ກຸ່ມ​ຄື: ເພື່ອ​ສັນຕິພາບ, ເອກະລາດ, ອະທິປະ​ໄຕ, ຄວາມ​ສະເໝີພາບ ແລະ ການ​ບໍ່​ແຊກ​ແຊງ​ເຂົ້າ​ກິດຈະການ​ພາຍ​ໃນ​ຂອງ​ກັນ ແລະ ກັນ ພ້ອມ​ທັງ ຊົມເຊີຍ 65 ປີ​ຂອງ​ຫຼັກການ​ດັ່ງ​ກ່າວ. ພ້ອມ​ດຽວ​ກັນ​ນັ້ນ, ໄດ້​ກ່າວ​ເຖິງ​ຄວາມ​ສຳຄັນ​ໃນ​ການ​ປັບປຸງ​ອົງການ​ສະຫະ​ປະຊາຊາດ ​ເພື່ອ​ໃຫ້​ສາມາດ​ຮັບ​ມື​ກັບ​ສິ່ງ​ທ້າ​ທາຍ​ທີ່​ເກີດ​ຂຶ້ນ​ໃນ​ຍຸກ​ປັດຈຸບັນ ທ່າມກາງ​ການ​ສະເຫຼີມສະຫຼອງ​ການ​ສ້າງຕັ້ງ​ອົງການ​ສະຫະ​ປະຊາຊາດ​ຄົບ ຮອບ 75 ປີ. ນອກ​ນັ້ນ, ໄດ້​ຕີ​ລາ ຄາ​ຜົນ​ກະທົບ​ຂອງ​ພະຍາດລະ ບາດໂຄ​ວິດ-19 ແລະ ເນັ້ນ​ໜັກ​ໃສ່​ການ​ຮັດ​ແໜ້ນ​ຄວາມ​ສາມັກຄີ​ຂອງ​ສາກົນ​ໃນ​ການ​ຮ່ວມ​ມື​ຕໍ່ສູ້​ກັບ​ພະຍາດ​ດັ່ງກ່າວ​ຢ່າງ​ມີ​ປະສິດ​ທິ​ຜົນ.
    ຂະບວນ​ການ​ບໍ່​ຮ່ວມ​ກຸ່ມ (Non-Aligned Movement NAM) ໄດ້​ຮັບ​ການ​ສ້າງຕັ້ງ​ຂຶ້ນ​ໃນ​ປີ 1961 ໂດຍ​ບັນດາ​ປະເທດ​ກຳລັງ​ພັດທະນາ​ທີ່​ບໍ່​ຕ້ອງການ​ຮ່ວມ​ກຸ່ມ ຫຼື ເປັນ​ປໍ​ລະ​ປັກ​ກັບ​ຝ່າຍ​ໃດ​ໃນ​ໄລຍະ​ສົງຄາມ​ເຢັນ, ຈຸດປະສົງ​ຫຼັກ​ຂອງ NAM ແມ່ນ​ເພື່ອ​ຮັກສາ​ຄວາມ​ເປັນ​ເອກະລາດ, ສະຖຽນ​ລະ​ພາບ, ອະທິປະ​ໄຕ ແລະ ຄວາມ​ໝັ້ນຄົງ​ຂອງປະເທດ​ສະ ມາຊິກ ໂດຍການ​ຮ່ວມມືປະ ຕິບັດ​ຕາມ​ຫຼັກການ​ບັນ​ດຸງ (Bandung Principle) ທີ່​ສົ່ງເສີມ​ການ​ຮ່ວມມື ແລະ ສັນ ຕິພາບ​ຂອງ​ໂລກ ຊຶ່ງ​ປັດຈຸບັນ​ມີ​ປະເທດ​ສະມາຊິກ​ທັງ​ໝົດ 125 ປະເທດ.
(ຂ່າວ: ກະຊວງ​ການ​ຕ່າງປະເທດ) 


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110