ມອບໃບຢັ້ງຢືນອະນຸສິດທິບັດ ລົດອີ່ແຕນ-ຊິ້ງ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 14/10/2020 09:18:25 ຈຳ​ນວນ​​ຢ້ຽມ​ຊົມ 1081 ຄັ້ງ

ໂອກາດ​ທີ່ ທ່ານ ບໍ່​ວຽງ​ຄຳ ວົງ​ດາລາ ລັດຖະມົນຕີກະ ຊວງ​ວິທະຍາສາດ ແລະ ເຕັກ​ ໂນ​ໂລ​ຊີ (ກວຕ) ທັງ​ເປັນ​ປະ ທານ​ສະພາ​ວິທະຍາສາດ​ແຫ່ງ​ຊາດ ມາ​ຮ່ວມ​ງານ​ວາງ​ສີ​ລາ​ລືກ ໂຄງການ​ກໍ່ສ້າງສວນ​ວິ ທະຍາສາດ ແລະ ພຶກສາສາດ ທີ່​ແຂວງ​ວຽງ​ຈັນ ເມື່ອບໍ່​ດົນ ຜ່ານ​ມາ, ກວຕ ໄດ້​ຮັບ​ການ​ສົມ ທົບ​ຈາກ​ອໍາ​ນາດ​ການ​ປົກຄອງ​ແຂວງ​ວຽງ​ຈັນ ພ້ອມ​ກັນ​ຈັດ​ພິ​ທີ​ມອບ​ໃບຢັ້ງຢືນ ອະ ນຸ​ສິດທິ​ບັດ ໃຫ້​ແກ່​ທ່ານ ສຸກ​ກະເສີມ ແສນ​ພູມີ ໃນ​ນາມ​ຜູ້​ປະດິດ ແລະ ເປັນ​ເຈົ້າ​ຂອງ​ສິ່ງ​ປະດິດ “ລົດ​ອີ່​ແຕນ​ຊິ້ງ” ໃຫ້​ກຽດ​ມອບ​ໃບຢັ້ງຢືນ ອະນຸ​ສິດທິ​ບັດ ຄັ້ງ​ນີ້​ໂດຍ​ທ່ານ ບໍ່​ວຽງ​ຄຳ ວົງ​ດາລາ, ມີ​ທ່ານ ຄຳ​ພັນ ສິດທິ​ດຳ​ພາ ເຈົ້າແຂວງ​ວຽງ​ຈັນ ພ້ອມ​ດ້ວຍ​ພາກສ່ວນ​ກ່ຽວຂ້ອງ ເຂົ້າ​ຮ່ວມ​ເປັນ​ສັກຂີ​ພິຍານ.

ທ່ານ ສຸກ​ກະເສີມ ແສນ​ພູມີ ໄດ້​ຍື່ນ​ຄໍາ​ຮ້ອງ​ຂໍ​ຮັບ​ອະນຸ​ສິດທິ​ບັດ ໃນ​ວັນ​ທີ 5 ສິງຫາ 2015 ແລະ ໄດ້​ຮັບ​ເລກ​ທີຄໍາ​ຮ້ອງ ເລກ​ທີ PPT 18, ຜ່ານການ ຄົ້ນຄວ້າ​ທາງ​ດ້ານ​ວິຊາ​ການ​ຂອງ​ກົມ​ຊັບ​ສິນ​ທາງ​ປັນຍາ ກໍ​ຄື​ພະ​ແນ​ກ​ສິດທິ​ບັດ ກ່ຽວ​ກັບ​ເງື່ອນໄຂ​ຂອງ​ການ​ໄດ້​ຮັບ​ອະນຸ​ສິດທິ​ບັດ. ມາ​ຮອດ​ວັນ​ທີ 10 ກໍລະກົດ 2019 ກົມ​ຊັບ​ສິນ​ທາງ​ປັນຍາ ໄດ້​ອອກ​ໃບຢັ້ງຢືນ​ອະນຸ​ສິດທິ​ບັດ “ລົດ​ອີ່​ແຕນ​ຊິ້ງ” ໃຫ້​ແກ່​ຜູ້ກ່ຽວ ຊຶ່ງ​ສິ່ງ​ປະດິດ​ດັ່ງກ່າວ ໄດ້​ມີ​ການ​ປັບປຸງ​ເຕັກນິກ​ໃໝ່ ນັ້ນ​ກໍ​ຄື ການ​ຕໍ່​ເຕີມ​ໂຄງ​ສ້າງ​ຂອງ​ໂຕ​ລົດ ຈາກ​ພື້ນຖານ​ຂອງ​ລົດ​ໄຖ​ນາ​ເດີນ​ຕາມ​ທົ່ວ​ໄປ ທີ່​ມີ​ພຽງ 2 ລໍ້, ເສີມ​ເພົາ​ຂັບ​ທີ່​ເຮັດ​ວຽກ​ຮ່ວມ​ກັບ​ດັ້ງ ເພື່ອ​ໃຫ້​ສາມາດ​ແລ່ນ​ດ້ວຍ 4 ລໍ້ ເຮັດ​ໃຫ້​ລົດ​ອີ່​ແຕນ​ຊິ້ງ ສາມາດ​ເດີນທາງ​ໄປ​ໃນ​ເສັ້ນທາງ​ທີ່​ທຸລະກັນດານ ຊຶ່ງ​ພາຫະນະ​ທົ່ວ​ໄປ​ເຂົ້າ​ເຖິງ​ໄດ້​ຍາກ. “ລົດ​ອີ່​ແຕນ​ຊິ້ງ” ນອກ ຈາກຈະ​ມີ​ລາຄາ​ຖືກ​ກວ່າ​ພາ ຫະນະ​ທີ່​ມີ 4 ລໍ້​ທົ່ວ​ໄປ​ແລ້ວ ຍັງ​ສາ​ມາດ​ນໍາ​ໃຊ້​ເພື່ອ​ຂົນສົ່ງ​ເຄື່ອງມື​ການ​ກະເສດ ແລະ ຜົນ ລະປູກ​ທາງ​ການ​ກະເສດຂອງ ​ຊາວ​ກະສິກອນ ໄດ້​ຢ່າງ​ສະ ດວກ​ສະບາຍ ຊຶ່ງ​ສິ່ງ​ປະດິດ​ນີ້ ສາ​ມາດ​ນໍາ​ໃຊ້​ເຂົ້າ​ໃນ​ການ​ດໍາ​ລົງ​ຊີວິດ​ຂອງ​ປະຊາຊົນ ໄດ້​ດີ​ສົມ​ຄວນ. “ລົດ​ອີ່​ແຕນ​ຊິ້ງ” ໄດ້​ກາຍເປັນ​ສິ່ງ​ປະ​ດິ​ດທໍາ​ອິດ​ຂອງ​ຄົນ​ລາວ ທີ່​ໄດ້​ຮັບ​ການ​ປົກ​ປ້ອງ ແລະ ໄດ້​ຮັບ​ໃບຢັ້ງຢືນ​ອະນຸ​ສິດ ທິ​ບັດ ຊຶ່ງ​ມັນ​ໄດ້​ກາຍເປັນ​ນິມິດ​ໝາຍ​ທີ່​ສໍາ​ຄັນ​ຂອງ​ວຽກ​ງານ​ອະນຸ​ສິດທິ​ບັດ​ຕໍ່​ກັບ​ຄົນ​ລາວ ແລະ ຈະ​ກາຍເປັນ​ໜໍ່​ແໜງ​ໜຶ່ງ​ທີ່​ສໍາ​ຄັນ ເພື່ອ​ເປັນ​ຕົວຢ່າງ​ໃຫ້​ແກ່​ຜູ້​ທີ່​ມີ​ຫົວຄິດ​ປະດິດ​ສ້າງ ໃນ​ການ​ຂໍ​ປົກ​ປ້ອງ​ສິດ​ຊັບ​ສິນ​ທາງ​ປັນຍາ​ທີ່​ຕົນ​ເອງ​ໄດ້​ສ້າງ​ຂຶ້ນ​ມາ.

ໃນ​ໂອກາດ​ສຳຄັນ​ນີ້, ທ່ານ ສຸກ​ກະເສີມ ແສນ​ພູມີ ໄດ້​ກ່າວ​ໃຫ້​ຮູ້​ວ່າ: ຍ້ອນ​ເຫັນ​ໄດ້​ເຖິງ​ຄວາມ​ຫຍຸ້ງຍາກ​ໃນ​ການ​ເດີນ ທາງ​ໄປ​ເຮັດ​ການ​ຜະລິດ​ຢູ່​ໄຮ່, ຢູ່​ນາ, ຢູ່​ສວນ ... ໃນ​ປີ 2015 ຕົນ​ໄດ້​ປະດິດ​ສ້າງຈາກ​ ລົດ​ໄຖ​ເດີນ​ຕາມ ມາ​ເປັນ “ລົດ ​ອີ່​ແຕນ​ຊິ້ງ” ເພື່ອ​ໃຫ້ການ​ໄປ​-​ມາ ເພື່ອ​ເຮັດ​ການ​ຜະລິດ ໄດ້​ມີ​ຄວາມ​ສະດວກ​ສະບາຍ​ຂຶ້ນ ບໍ່​ວ່າ​ຈະ​ເປັນ​ການ​ລາກ​ແກ່ ແລະ ລາຄາ​ກໍ​ເໝາະ​ສົມ​ກັບ​ຊາວ​ກະ ສິກອນ​ລາວ. ສະຖານທີ່​ປະດິດ “ລົດ​ອີ່​ແຕນ​ຊິ້ງ” ຢູ່​ບ້ານໂພນ​ງາມ ເມືອງ​ໝື່ນ ແຂວງ​ວຽງ​ຈັນ, ເຮັດ​ແບບ​ສ້າງ​ເສດຖະກິດ​ຄອບຄົວ, ມີແຮງ​ງານ 10 ຄົນ, ເດືອນ​ໜຶ່ງ​ສາມາດ​ປະດິດ​ໄດ້ 10-20 ຄັນ, ຄັນ​ໜຶ່ງ​ລາຄາ​ປະມານ 17 - 18 ລ້ານ​ກີບ ຊຶ່ງ​ໄດ້​ຈຳໜ່າຍ​ໃນ​ແຂວງ ແລະ ຕ່າງ​ແຂວງ.

ວຽກ​ງານ​ອະນຸ​ສິດທິ​ບັດ ເປັນ​ວຽກ​ງານ​ຊັບ​ສິນ​ທາງ​ປັນ ຍາ​ປະເພດ​ໜຶ່ງ ທີ່​ໄດ້​ຈັດ​ຕັ້ງ​ປະ ຕິບັດ​ຢູ່ ສປປ ລາວ ເພື່ອ​ປົກ​ປ້ອງ​ສິ່ງ​ປະດິດ​ທີ່​ມີ​ການ​ປັບປຸງ​ທາງ​ດ້ານ​ເຕັກນິກ ຊຶ່ງ​ເປັນ​ຫົວ​ໃຈ​ສໍາ​ຄັນ​ຂອງ ອະນຸ​ສິດທິ​ບັດ ທີ່​ເປັນ​ການ​ຈົດ​ທະບຽນ​ປະດິດ​ສິ່ງ​ໃໝ່ ເພື່ອ​ຕອບ​ສະໜອງ​ຄວາມ​ຮຽກຮ້ອງ​ຕ້ອງການ ໃນ​ການດໍາ​ລົງ​ຊີວິດ ຊຶ່ງ​ເປັນ​ປັດ​ໄຈ​ຫຼັກ​ໃນ​ການ​ຊຸກຍູ້​ເສດຖະກິດ​ພາຍ​ໃນ​ຂອງ​ຕົນ ໃຫ້​ມີ​ການ​ຂະຫຍາຍຕົວ​ຂຶ້ນ​ໄປ​ຢ່າງ​ບໍ່​ຢຸດ​ຢັ້ງ, ກະຕຸກ​ຊຸກຍູ້​ການ​ພັດທະນາ​ຂອງ​ເສດຖະກິດ​ແຫ່ງ​ຊາດ. ການ​ຈົດ​ທະບຽນ​ສິ່ງ​ປະດິດ​ໃນ​ຄັ້ງ​ນີ້ ຈະ​ເປັນ​ການ​ປະກອບສ່ວນ​ເຮັດ​ໃຫ້​ເສດຖະກິດ​ຂອງ​ຊາດ ເວົ້າ​ລວມ, ເວົ້າ​ສະເພາະ ແມ່ນ​ເສດຖະກິດ​ຂອງ​ແຂວງ​ວຽງ​ຈັນ ມີ​ບາດກ້າວ​ຂະຫຍາຍຕົວ​ຂຶ້ນ​ຕື່ມ ພ້ອມ​ທັງ​ເປັນ​ການ​ກະຕຸກ​ຊຸກຍູ້ ໃຫ້​ປະຊາຊົນ​ຜູ້​ທີ່​ມີ​ຫົວຄິດ​ປະດິດ​ສ້າງ ເຫັນ​ໄດ້​ເຖິງ​ຄວາມ​ສໍາ​ຄັນ ແລະ ປະໂຫຍດ​ໃນ​ການ​ຈົດ​ທະບຽນ ເພື່ອ​ປົກ​ປ້ອງ​ແນວ​ຄວາມ​ຄິດ​ຂອງ​ຕົນ​ຫຼາຍ​ຂຶ້ນ​ຕື່ມ​ອີກ​ໃນ​ອະ​ນາ​ຄົດ.

ໃນ​ໂອກາດ​ດຽວ​ກັນ​ນີ້, ເພື່ອ​ເປັນ​ການ​ຊຸກຍູ້​ສົ່ງເສີມ​ວຽກ​ງານ​ດ້ານ​ຊັບ​ສິນ​ທາງ​ປັນ ຍາ ເວົ້າ​ສະເພາະ, ເວົ້າ​ລວມ​ກໍ​ແມ່ນ​ວຽກ​ງານ​ວິທະຍາສາດ ຂອງ​ພະ​ແນ​ກວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ແຂວງ​ວຽງ​ຈັນ ກົມ​ຊັບ​ສິນ​ທາງ​ປັນຍາ ກໍ​ໄດ້​ມອບ​ລົດຈັກ ຍີ່​ຫໍ້​ຮອນ​ດ້າ ​-​ເວບ 100 ຈຳນວນ 1 ຄັນ ແລະ ຄອມ​ພິວ​ເຕີ​ຕັ້ງ​ໂຕະ ຈຳນວນ 1 ຊຸດ ພ້ອມ​ດ້ວຍ​ປິ​ນ​ເຕີ 1 ໜ່ວຍ ໃຫ້​ພະ​ແນ​ກວິ​ທະ​ຍາ​ສາດ ແລະ ເຕັກ​ໂນ​ໂລ​ຊີ ແຂວງ​ວຽງ​ຈັນ.

(ຂ່າວ​-​ພາບ: ສຸກ​ສະຫວັນ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110