ພິທີລົງນາມບົດບັນທຶກການຮ່ວມມືດ້ານວິຊາການ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 14/10/2020 09:25:32 ຈຳ​ນວນ​​ຢ້ຽມ​ຊົມ 489 ຄັ້ງ

ວັນ​ທີ 12 ຕຸລາຜ່ານ​ມາ ຢູ່​ກະຊວງ​ແຮງ​ງານ ແລະ ສະຫວັດດີ​ການ​ສັງຄົມ (ຮສສ) ໄດ້​ມີ​ພິທີ​ລົງ​ນາມ​ບົດ​ບັນທຶກ​ການ​ຮ່ວມ​ມື​ດ້ານ​ວິຊາ​ການ​ລະຫວ່າງ​ກົມ​ຄຸ້ມ​ຄອງ​ແຮງ​ງານ​ຫ້ອງການ​ບໍລິການ​ກວດ​ສຸຂະພາບ​ພາຍ​ໃນ ແລະ ຕ່າງປະເທດ ໂຮງໝໍມະໂຫສົດກະ ຊວງ​ສາທາລະນະ​ສຸກ, ຮ່ວມລົງນາມໃນ​ເອກະສານ​ມີຂຶ້ນ ລະຫວ່າງ ທ່ານ ພົງ​ໄຊ​ສັກ ອິນ​ຖາ​ລາດ ຫົວໜ້າ​ກົມ​ຄຸ້ມຄອງແຮງ​ງານ ກະຊວງ​ແຮງ​ງານ ແລະ ສະຫວັດດີ​ການ​ສັງຄົມ ແລະ ທ່ານນາງ ວຽງ​ສະຫວັນ ຊາ​ມົນຕີ ອຳນວຍການ​ຫ້ອງການ​ບໍລິການ​ກວດ​ສຸຂະພາບພາຍ​ໃນ ແລະ ຕ່າງປະເທດ ມີ​ຕາງໜ້າ​ຈາກ​ທັງ​ສອງ​ກະຊວງ​ເຂົ້າ​ຮ່ວມ​ເປັນ​ສັກຂີ​ພິຍານ.

ໃນ​ບົດ​ບັນທຶກ 2 ຝ່າຍ​ເຫັນ​ດີ​ຮ່ວມ​ມື​ດ້ານ​ວິຊາ​ການ​ນໍາ​ກັນ ໂດຍ​ມີ​ເນື້ອ​ໃນ​ທີ່​ກໍາ​ນົດ​ໜ້າທີ່ ແລະ ຄວາມ​ຮັບຜິດຊອບ​ຕົ້ນຕໍ​ຂອງ​ແຕ່​ລະ​ຝ່າຍ​ຄື: ກົມ​ຄຸ້ມ​ຄອງ​ແຮງ​ງານ​ໃຫ້​ຕິດຕາມ​ຊີ້​ນຳ ແລະ ເຂົ້າ​ຮ່ວມ​ໃນ​ກໍລະນີ​ຈຳເປັນ ໃນ​ການຈັດຕັ້ງ​ປະຕິບັດ​ວຽກ​ງານ​ຂອງ​ຫ້ອງການ​ບໍລິ ການ​ກວດ​ສຸຂະພາບ​ພາຍ​ໃນ ແລະ ຕ່າງປະເທດ ໃຫ້​ເປັນ​ໄປ​ ຕາມ​ຈຸດປະສົງ​ຂອງ​ການກວດ ​ສຸຂະພາບ​ແຮງ​ງານ ໂດຍ​ສະ ເພາະ​ແມ່ນ​ການ​ປະຕິບັດ​ໃຫ້​ສອດຄ່ອງ​ຕາມ​ລະບຽບ​ການ ກັບ​ວຽກ​ງານ​ສຸຂະພາບ​ແຮງງານ ແລະ ບັນຊີ​ພະຍາດ​ອາ ຊີບຢູ່ ສປປ ລາວ ໃຫ້​ຄຳ​ປຶກ ສາ​ດ້ານ​ກົດໝາຍລະບຽບການ ແລະ ວິຊາ​ການ​ດ້ານວຽກ​ງານ​ ສຸຂະພາບ​ແຮງ​ງານ ແລະ ພະ ຍາດ​ອາຊີບ ຢູ່ ສປປ ລາວ ເຜີຍ ແຜ່ ແລະ ບັງຄັບ​ໃຫ້​ໃຊ້​ກົດໝາຍ ລະບຽບ​ການ​ຂອງ​ລັດ​ກ່ຽວ​ກັບ​ຄວາມ​ປອດ​ໄພ ແລະ ສຸຂະພາບ​ແຮງ​ງານ ໂດຍ​ສະເພາະ​ແມ່ນ​ການ​ກວດ​ສຸຂະພາບ​ແຮງ​ງານ ນຳ​ໃຊ້ ສະເໜີ​ປັບປຸງ ແລະ ບຳ ລຸງ​ສະຖານ​ຂໍ້​ມູນ​ສຸຂະພາບ​ແຮງ​ງານ​ທີ່​ຫ້ອງການ​ບໍລິການ​ກວດ​ສຸຂະພາບ​ພາຍ​ໃນ ແລະ ຕ່າງປະເທດ ສະໜອງ​ໃຫ້​ເກັບ​ຮັກສານຳ​ໃຊ້ ແລະ ເຜີຍແຜ່​ຂໍ້​ມູນ​ດ້ານ​ສຸຂະພາບ​ແຮງ​ງານ​ຕາມ​ຄວາມ​ເໝາະ​ສົມ.

ສ່ວນ​ຫ້ອງການ​ບໍລິການ​ກວດ​ສຸຂະພາບ​ພາຍ​ໃນ ແລະ ຕ່າງປະເທດ ໃຫ້​ປະຕິບັດຕາມ ​ກົດໝາຍລະບຽບ​ການ​ທີ່ກ່ຽວ ຂ້ອງ​ກັບ​ການ​ດຳເນີນ​ກິດຈະການ​ຂອງ​ຕົນ ຮັບປະກັນ​ຄຸນ​ນະ​ພາບ​ຂອງ​ການ​ບໍລິການ ປະກອບ​ບຸກ​ຄະລາ​ກອນ​ທີ່​ມີ ຄວາມຊ່ຽວຊານ​ດ້ານ​ແຮງງານ ໂດຍ​ສະເພາະ​ແມ່ນດ້ານ​ການ​ວິເຄາະ​ພະຍາດອາຊີບ ແລະ ສາເຫດ​ຂອງການກໍ່ໃຫ້ເກີດ​ພະຍາດ​ໃນ​ສະຖານທີ່​ເຮັດ​ວຽກ ມີ​ຖານ​ຂໍ້​ມູນ​ດ້ານ​ສຸຂະພາບ​ແຮງ​ງານ​ທີ່​ລະອຽດ ສາມາດ​ເກັບ​ມ້ຽນ​ໄວ້​ໄດ້​ຍາວ​ນານຖານ ​ຂໍ້ມູນ​ດັ່ງກ່າວແມ່ນໃຫ້ມີຢູ່ຫ້ອງ ການ​ຂອງ​ຕົນ ແລະ ສະໜອງ​ ໃຫ້​ກົມ​ຄຸ້ມ​ຄອງ​ແຮງ​ງານຊ່ວຍ ​ຊຸກຍູ້ດ້ານງົບປະມານໃຫ້ແກ່​ ການ​ຝຶກ​ອົບຮົມພະນັກງານ ການ​ສ້ອມແປງ ແລະ ປັບປຸງ​ຖານ​ຂໍ້​ມູນ​ໃຫ້​ຢູ່​ໃນ​ສະພາບ​ພ້ອມ​ນຳ​ໃຊ້​ໄດ້ ຫຼື ພັດທະນາ​ໃຫ້​ດີ​ຂຶ້ນ ລວມ​ທັງ​ພິມ​ເຜີຍແຜ່​ຂໍ້​ມູນ​ຕາມ​ຄວາມ​ເໝາະ​ສົມ​ຕາມ​ການສ​ະເໜີ​ຂອງ​ກົມ​ຄຸ້ມ​ຄອງ​ ແຮງ​ງານສຳລັບ​ບົດ​ບັນທຶກ​ສະ ບັບ​ນີ້ແມ່ນ​ມີ​ອາຍຸ​ນຳ​ໃຊ້ 3 ປີ ນັບ​ແຕ່​ມື້​ລົງ​ລາຍ​ເຊັນ​ເປັນຕົ້ນ​ໄປ.

(ຂ່າວ: ເປີ້ນ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110