ທ່ານ ນາງ ເຜີງລີ້ຢວນ ຊົມເຊີຍລາງວັນສຳລັບເດັກຍິງ-ແມ່ຍິງຂອງ UNESCO ຄັ້ງທີ 5

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 14/10/2020 10:26:24 ຈຳ​ນວນ​​ຢ້ຽມ​ຊົມ 962 ຄັ້ງ

ຂ່າວສານຊີອາໄອລາຍງານວ່າ: ວັນ​ທີ 12 ຕຸ​ລາ​ຜ່ານມາ, ທ່ານ ​ນາງ ​ເຜີງ​ລີ້ຢວນ ທູດ​ພິ​ເສດ​ເພື່ອ​ສົ່ງ​ເສີມ​ການ​ສຶກ​ສາ​ສຳ​ລັບເດັກ​ຍິງ​ ແລະ ​ແມ່​ຍິງ​ຂອງ​ອົງ​ການ​ອຸຍ​ເນັ​ສ​ໂກ (UNESCO​) ໄດ້​ກ່າວ​ສະແດງຄວາມຊົມ​ເຊີຍ​ຕໍ່​ລາງວັນ​ການ​ສຶກ​ສາ​​ສຳ​ລັບເດັກ​ຍິງ ​ແລະ ​ແມ່​ຍິງ ​ຂອງ​ອົງ​ການ​ອຸຍ​ເນັ​ສ​ໂກ​ ຄັ້ງ​ທີ 5 ຜ່ານ​ທາງວິ​ດີ​ໂອ.

ທ່ານ ​ນາງ ​ເຜີງ​ລີ້ຢວນ ພັນ​ລະ​ຍາ ​ຂອງ​ທ່ານ​ ສີ​ຈິ້ນ​ຜິງ ປະ​ທານ​ປ​ະ​ເທດ​ຈີນ, ​ໄດ້​ສະ​ແດງ​ຄວາມ​ຊົມ​ເຊີຍ​ຢ່າງ​ຈິງ​ໃຈ​ຕໍ່​ຜູ້​ທີ່​ໄດ້​ຮັບ​ລາງ​ວັນ​​ຈາກ​ ປະເທດສີ​ລັງ​ກາ​ ແລະ ​ເຄັນ​ຢາ. ທ່ານ​ ນາງ​ ເຜີງ​ລີ້ຢວນ​ກ່າວ​ວ່າ:  ປີ 2015, ຈີນ​ ໄດ້​ຮ່ວມ​ມື​ກັບ​ອົງ​ການ​ອຸຍ​ເນັ​ສ​ໂກ ​ສ້າງ​ຕັ້ງ​ລາງວັນ​ການ​ສຶກ​ສາ​ສຳ​ລັບ​ເດັກ​ຍິງ​ແລະ ​ແມ່​ຍິງ. ຜູ້​ໄດ້​ຮັບ​ລາ​ງວັນ​ນີ້ ​ໄດ້​ໃຊ້​ການ​ເຄື່ອນ​ໄຫວ​ຕົວ​ຈິງ ​ເພື່ອ​ຊ່ວຍ​ເຫຼືອ​ເດັກ​ຍິງ​ ແລະ ​ແມ່​ຍິງ​ໃຫ້​ໄດ້​ຮັບ​ຄວາມ​ຮູ້ ​ແລະ​ ທັກ​ສະ​ຕ່າງໆ, ​ເປີດ​ໂອ​ກາດ​ໃຫ້ເຂົາ​ເຈົ້າ​ມີ​ຄວາມ​ໃຝ່​ຝັນ​ຕໍ່ຊີ​ວິດ ແລະ ​ໄດ້​ປະ​ກອບ​ສ່ວນ​ເຂົ້າ​ໃນ​ການ​ສົ່ງ​ເສີມ​ຄວາມ​ສະ​ເໝີ​ພາບ​ ລະ​ຫວ່າງ​ ຍິງ-ຊາຍ ​ໃນ​ດ້ານ​ການ​ສຶກ​ສາ ​ແລະ​ ຊຸກ​ຍູ້​ການ​ພັດ​ທະ​ນາ​​ທາງ​ສັງ​ຄົມ. ຢູ່​ຈີນ ກໍ​ມີ​ຜູ້​ຄົນ​ນັບ​ເປັນ​ພັນ​ເປັນ​ໝື່ນ​ໄດ້​ເຮັດ​ວຽກ​ນີ້ຢ່າງຕັ້ງໜ້າ​ ເພື່ອ​ປະ​ກອບ​ສ່ວນ​ເຂົ້າ​ໃນ​ວຽກ​ງານ​ການ​ສຶກ​ສາ​​ສຳ​ລັບເດັກ​ຍິງ​ ແລະ ​ແມ່​ຍິງ​. ມີ​ຄູ​ຍິງ​ຜູ້​ໜຶ່ງ​ຊື່​ວ່າ; ນາງ ຈ່າງ​ກຸ້ຍ​ເ​ມີຍ, ​ໄດ້​ຕັ້ງຫຼັກ​ປັກ​ຖານ​ຢູ່​ເຂດ​ພູ​ດອຍ​ທີ່ທຸກ​ຍາກ​ຂອງ​ແຂວງ​ຢູນ​ນານ​ເປັນ​ເວ​ລາ 40 ກວ່າ​ປີ ຊຶ່ງ​ໄດ້​ຊຸກ​ຍູ້​​ໃຫ້​ມີການ​ສ້າງ​ຕັ້ງ​ໂຮງ​ຮຽນ​ມັດ​ທະ​ຍົມ​ປາຍ​ເພດ​ຍິງ ​ທີ່​ບໍ່​ເກັບ​ຄ່າ​ຮຽນ ແຫ່ງ​ທຳ​ອິດ​ຂອງ​ຈີນ​ ໃນ​ປີ 2008, ນັບ​ແຕ່​ສ້າງ​ຕັ້ງ​ຂຶ້ນ​ເປັນ​ຕົ້ນ​ມາ, ໂຮງ​ຮຽນ​ແຫ່ງ​ນີ້​ ໄດ້​ຊ່ວຍ​ເດັກ​ຍິງ 1.600 ກວ່າ​ຄົນ, ​ບັນ​ລຸ​ຄວາມ​ໄຝ່​ຝັນ​ເສັງ​ເຂົ້າ​ມະ​ຫາ​ວິ​ທ​ະ​ຍາ​ໄລ. ເດັກ​ຍິງ​ ທັງຫຼາຍ​ພາ​ກັນ​ເອີ້ນ​ຄູ​ຈ່າງ​ດ້ວຍ​ຄວາມ​ສະ​ໜິດ​ສະ​ໜົມ​ວ່າ “ແມ່​ຈ່າງ”. ນາງ ​ຈ່າງ​ກຸ້ຍ​ເມີຍ ກໍ​ປຽ​ບ​ເໝືອນ​ແສງ​ສະ​ຫວ່າງ​ແຫ່ງ​ຄວາມ​ຫວັງ​ທີ່​ໄດ້​ເຍືອງ​ທາງ​ໃຫ້​ເດັກ​ນ້ອຍ​ທັງຫຼາຍ​ບົນ​ເສັ້ນ​ທາງ​ສະ​ແຫວງ​ຫາ​ຄວາມ​ໃຝ່​ຝັນ​ຂອງ​ຕົນ.
      ທ່ານ ​ນາງ​ ເຜີງ​ລີ້ຢວນ ​ກ່າວ​ຕື່ມ​ວ່າ: ປີ​ນີ້​ເນື່ອງ​ຈາກ​ໄດ້​ຮັບ​ຜົນ​ກະ​ທົບ​ຈາກ​ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19, ທົ່ວ​ໂລກ​ມີ​ນັກ​ຮຽນ​, ນັກ​ສຶກ​ສາ 1,5 ຕື້​ຄົນ ​ຈຳ​ຕ້ອງ​ໂຈະ​ການ​ຮຽນ ​ໂດຍ​ສະ​ເພາະ​ແມ່ນເດັກ​ຍິງ​. ພວກ​ເຮົາ​ຍິ່ງ​ຄວນ​ຊອກ​ຫາ​ທຸກວິ​ທີ​ທາງ ​ເພື່ອ​ຊ່ວຍ​ເດັກ​ຍິງ​ ໃຫ້​ສາ​ມາດ​ຟື້ນ​ຟູ​ການ​ຮຽນ
ເພື່ອ​ບໍ່​ໃຫ້​ເດັກ​ຍິງ​ ຕົກ​ຍຸກ​ຍ້ອນ​ການ​ແຜ່​ລະ​ບາດ​ຂອງ​ພະ​ຍາດ​.

ທ່ານ ​ນາງ ​ເຜີງ​ລີ້​ຢວນ ກ່າວ​ວ່າ: ​ໃນຈຳນວນ​ຜູ້​ໃຫຍ່​​ທີ່​ກືກ​ໜັງສື​ທົ່ວ​ໂລກ​ 63% ​ແມ່ນ​ແມ່ຍິງ. ​ຖ້າແມ່ຍິງ​ບໍ່​ສາມາດ​ໄດ້​ຮັບ​ການ​ສຶກສາ​ທີ່​ດີ, ສັງຄົມມວນ​ມະນຸດກໍ​ຈະ​ບໍ່​ມີ​ຄວາມ​ກ້າວໜ້າ ​ແລະ​ ພັດທະນາ​ໄດ້. ການ​ສຶກສາ​ຂອງ​ເດັກຍິງ ​ແລະ ​ແມ່ຍິງ ​ຕ້ອງ​ຈັດ​ຕັ້ງປະຕິບັດ​ໃນຍຸກ​ປັດຈຸ​ບັນ ​ແລະ​ ຈະ​ໃຫ້​ຜົນ​ໃນ​ໄລຍະ​ຍາວ. ຂ້າພະ​ເຈົ້າ​ຈຶ່ງ​ຂໍຮຽກຮ້ອງ​ໃຫ້​ບັນດາປະ​ເທດ ​ແລະ ບຸກຄົນ​ຈາກ​ວົງ​ການ​ຕ່າງໆ ​ໃຫ້ການສະໜັບສະໜູນ ​ແລະ​​ ເຂົ້າ​ຮ່ວມ​ພາລະກິດ​ອັນ​ຍິ່ງ​ໃຫຍ່​ນີ້ຫຼາຍ​ກວ່າ​ເກົ່າ. ຈີນ ​ຈະ​ສືບ​ຕໍ່​ຮ່ວມ​ມື​ກັບ​ UNESCO ສ້າງ​ລາງ​ວັນ​ການ​ສຶກສາສຳລັບ​ເດັກ​​ຍິງ ​ແລະ​ ແມ່ຍິງ​ໄລຍະ 2 ​ຊຶ່ງຈະ​ເລີ່​ມ​​ແຕ່​ປີ 2021 - 2025 ​ໃຫ້​ດີ, ຊຸກຍູ້​ການ​ແລກປ່ຽນ ​ແລະ​ ການ​ຮ່ວມ​ມືດ້ານ​ການ​ສຶກສາ​ສາກົນ, ປະກອບສ່ວນຫຼາຍ​ກວ່າ​ເກົ່າ​ ຊຸກຍູ້​ວຽກງານການ​ສຶກສາ​ສຳລັບ​ເດັກ​ຍິງ​ ​ແລະ ​ແມ່ຍິງ ກໍ​ຄື​​ເພື່ອບັນລຸ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ ​ຮອດ​ປີ 2030 ຂອງ​ອົງການ​ ສປຊ. ພວກ​ເຮົາ​ຈົ່ງພະຍາຍາມ​ຮ່ວມ​ກັນ, ຊ່ວຍ​ເຫຼືອ​ເດັກ​ຍິງ ​ແລະ ​ແມ່ຍິງ​​ ໃຫ້ມີ​ການ​ສຶກສາ​ທີ່​ດີ​ຢ່າງສະ​ເໝີ​ພາບ ​ແລະ​ ໃຫ້​​ແມ່ຍິງ​ ມີ​ອະນາຄົດ​ທີ່​ດີງາມ.

ທ່ານ ນາງ ອາ​ດ ອາ​ຊູ​ເລ ຜູ້ອຳນວຍການ​ໃຫຍ່​ UNESCO ​ໄດ້​ຕີ​ລາຄາ​ສູງ​ ​ແລະ​ ສະ​ແດງ​ຄວາມຂອບ​ໃຈ​ຕໍ່ລັດຖະບານ​ຈີນ ທີ່​ໄດ້​ໃຫ້ການ​ສະໜັບສະ​ໜູນ​ລາງ​ວັນການ​ສຶກສາ​ສຳລັບເດັກ​ຍິງ ​ແລະ​ແມ່ຍິງ ​ຊຶ່ງ​ໄດ້​ປະກອບສ່ວນ​ຢ່າງ​ຕັ້ງໜ້າ​ເຂົ້າ​ໃນ​ການ​ສ້າງຄວາມ​ສະ​ເໝີ​ພາບ ລະຫວ່າງ​ ຍິງ-ຊາຍ ​​ໃນດ້ານ​ການ​ສຶກສາ, UNESCO ຍິນ​ດີ​ພະຍາຍາມ​ຮ່ວມ​ກັບ​ບັນດາ​ຝ່າຍ, ຊຸກຍູ້​ໃຫ້​ເດັກ​ຍິງ ​ແລະ ​ແມ່​ຍິງ ​ໃນ​ທົ່​ວ​ໂລກ​ ມີ​ໂອກາດ​ການ​ສຶກສາ​ຢ່າງ​ສະ​ເໝີ​ພາບ ​ແລະ​ ມີ​ອະນາຄົດ​ທີ່​ສົດ​ໃສ.

ລາງ​ວັນ​ການ​ສຶກສາ​ສຳລັບ​ເດັກຍິງ ​ແລະ ​ແມ່ຍິງ​ຂອງ UNESCO ​ແມ່ນ​ເພື່ອ​ຍ້ອງຍໍ​ອົງການ ​ແລະ​ ບຸກຄົນ​ທີ່​ໄດ້​ປະກອບສ່ວນ​ຢ່າງ​ພົ້ນ​ເດັ່ນ​ເຂົ້າ​ໃນ​ການຊຸກຍູ້​ວຽກ​ງານ​ການ​ສຶກສາ​ສຳລັບ​ເດັກຍິງ ​ແລະ​ແມ່ຍິງ, ສະ​ແດງ​​ໃຫ້​ເຫັນ​ເຖິງບົດ​ບາດ​ສຳຄັນ​ຂອງ​ການ​ສຶກສາ​ທີ່​ມີ​ຕໍ່​ການ​ປ່ຽນ​ແປງ​ຊາຕາກຳ​ຂອງ​ເດັກ​ຍິງ ​ແລະ​ ແມ່ຍິງ ​​ເພື່ອ​ກະຕຸກຊຸກຍູ້ໃຫ້​ມີ​ຄົນຫຼາຍ​ກວ່າ​ເກົ່າ​ ປະກອບສ່ວນ​ເຂົ້າ​ໃນ​ພາລະກິດ​ຄວາມ​ສະ​ເໝີ​ພາບລະຫວ່າງ​ ຍິງ-ຊາຍ ​ໃນ​ດ້ານ​ການ​ສຶກສາ.


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110