ສຳມະນາກ່ຽວກັບການພັດທະນາລະບົບ ກວດກາສິນຄ້າຖິ່ນກຳເນີດຂອງລາວ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 15/10/2020 09:46:02 ຈຳ​ນວນ​​ຢ້ຽມ​ຊົມ 424 ຄັ້ງ

ກົມ​ຊັບ​ສິນ​ທາງ​ປັນຍາ​ກະຊວງ​ວິທະຍາສາດ ​ແລະ​ເຕັກ​ໂນ​ໂລ​ຊີ (ກວ​ຕ) ໄດ້​ຈັດ​ກອງ​ປະ​ຊຸມ​ສໍາ​ມະ​ນາ​ກ່ຽວ​ກັບ​ການ​ພັດທະນາ​ລະບົບ​ກວດກາ​ສິນຄ້າ​ຖິ່ນ​ກໍາ​ເນີ​ດ​ຂອງ ສປປ ລາວ ຂຶ້ນ​ໃນ​ລະຫວ່າງ​ວັນ​ທີ 12-14 ຕຸລານີ້ ທີ່​ຫ້ອງ​ປະຊຸມ​ຂອງ ກວຕ ພາຍ​ໃຕ້​ການ​ເປັນ​ປະທານ​ໂດຍ ທ່ານ ນາງ ຂັນ​ລາສີ ແກ້ວ​ບຸນ​ພັນ ຫົວໜ້າ​ກົມ​ຊັບ​ສິນ​ທາງ​ປັນ​ຍາ.

ຈຸດປະສົງ​ຂອງ​ກອງ​ປະ ຊຸມ​ຄັ້ງ​ນີ້​ແມ່ນ​ເພື່ອ​ປຶກສາ​ຫາລື​ກ່ຽວ​ກັບ​ການ​ພັດທະນາ​ລະບົບ​ກວດກາ​ສິນຄ້າ ຖິ່ນ​ກໍາ​ເນີ​ດ​ຂອງ ສປປ ລາວ ແລະ ແລກປ່ຽນ​ບົດຮຽນ ກ່ຽວ​ກັບ​ວຽກ​ງານ​ກວດກາ​ທີ່​ຈັດ​ຕັ້ງ​ປະຕິບັດ​ຢູ່​ຕ່າງປະ​ເທດ​ ຈໍາ​ນວນ​ໜຶ່ງ.ກອງ​ປະຊຸມ​ໄດ້​ ດໍາ​ເນີນ​ຜ່ານ​ທາງ​ອອນ​ລາຍ ໂດຍ​ມີ ທ່ານ ສະ​ເຕ​ຟານ ປາດ ​ເຊີ​ຣີ ຊ່ຽວຊານ​ສາກົນ​ກ່ຽວ​ກັບ​ຖິ່ນ​ກໍາ​ເນີດຈາກ​ອົງການ​ອາ ຫານ ແລະ ການ​ກະ​ສິ​ກໍາ ແລະ ທ່ານ ຊະນະ​ພົນ ນ້ອຍ​ຄຽງ ຊ່ຽວຊານວຽກ​ງານ​ກວດກາ ແລະ ຢັ້ງຢືນຈາກ​ ບໍລິສັດ ໄບ​ໂອ​ອາ​ກຣີ​ເຊີດ ປະ ເທດ​ໄທ ເປັນ​ວິທະຍາກອນ, ກອງ​ປະຊຸມ​ດັ່ງກ່າວ​ດຳເນີນ​ໄປ​ເປັນ​ເວລາ 2 ວັນ ຊຶ່ງ​ພາຍ​ຫຼັງ​ສໍາ​ເລັດ​ກອງ​ປະຊຸມເຮັດ​ໃຫ້​ຜູ້​ເຂົ້າ​ຮ່ວມ​ກອງ​ປະຊຸມ​ ໂດຍ​ສະ ເພາະ​ແມ່ນ ສະມາຄົມ​ສົ່ງເສີມ​ສິນຄ້າ​ຖິ່ນ​ກໍາ​ເນີດ ຜ້າໄໝ​ຫຼວງ​ ພະ​ບາງ, ຜ້າໄໝ​ຫົວພັນ, ຊາ​ກໍ່​ແມນ, ຊາ​ປາກ​ຊ່ອງ, ກາເຟ​ບໍ​ລະ​ເວນ ແລະ ເຂົ້າ​ໄກ່​ນ້ອຍ ມີ​ຄວາມ​ເຂົ້າໃຈ​ຫຼາຍ​ຂຶ້ນ​ກ່ຽວ​ກັບ​ລະບົບ​ການ​ກວດກາ​ສິນຄ້າ​ຖິ່ນ​ກໍາ​ເນີດ ແລະ ສາມາດ​ຈັດ​ຕັ້ງ​ປະຕິບັດ​ວຽກ​ງານ​ກວດກາ​ພາຍ​ໃນ​ແນໃສ່​ເຮັດ​ໃຫ້​ສະມາຊິກ​ຂອງ​ສະ​ມາ​ຄົມ​ດໍາ​ເນີນ​ການ​ຜະ​ລິດ​-​ຄ້າຂາຍ​ສິນຄ້າ​ຖິ່ນ​ກໍາ​ເນີດ ຖືກຕ້ອງ​ຕາມ​ຂໍ້​ກໍາ​ນົດ​ທາງ​ດ້ານ​ມາດຕະຖານ​ຂອງ​ສິນຄ້າ​ຖິ່ນ​ກໍາ​ເນີ​ດ. ພ້ອມ​ນັ້ນ, ທຸກ​ພາກສ່ວນ​ທີ່​ເຂົ້າ​ຮ່ວມ ຍັງ​ໄດ້​ ຖອດ​ຖອນ​ບົດຮຽນ​ກ່ຽວ​ກັບ​ວຽກ​ງານ​ກວດກາ​ສິນຄ້າ​ຖິ່ນ​ກໍາ​ເນີ​ດ​ຂອງ​ຕ່າງປະເທດ ເພື່ອ​ນໍາ​ມາ​ໝູນ​ໃຊ້​ໃຫ້​ເກີດ​ຜົນ​ກັບ​ລະບົບ​ກວດກາ​ສິນຄ້າ​ຖິ່ນ​ກໍາ​ເນີ​ດ​ຂອງ ສປປ ລາວ.

ການ​ພັດທະນາ​ລະບົບ​ກວດກາ​ດັ່ງກ່າວ​ແມ່ນ​ເພື່ອ​ໃຫ້​ໄດ້​ຮັບ​ການ​ຢັ້ງຢືນ​ສິນຄ້າ​ຖິ່ນ​ກໍາ​ເນີ​ດ​ຈາກ​ໜ່ວຍງານ​ຢັ້ງຢືນ ຈາກ​ພາຍ​ໃນ ຫຼື ຕ່າງປະເທດ ຈຶ່ງ​ຈະ​ເຮັດ​ໃຫ້​ສິນຄ້າ​ຖິ່ນ​ກໍາ​ເນີດທີ່​ຈົດ​ທະບຽນ​ກັບ​ກົມ​ຊັບ​ສິນ​ທາງ​ປັນຍາ​ສາມາດ​ຕິດ​ກາ​ໝາຍ​ຖິ່ນ​ກໍາ​ເນີ​ດ​ແຫ່ງ​ຊາດ​ໃສ່​ສະຫຼາກ​ສິນຄ້າ​ໄດ້. ການ​ກວດກາ ແລະ ຢັ້ງຢືນ ສິນຄ້າ​ດັ່ງກ່າວ ຈະ​ເປັນ​ການ​ສ້າງ​ຄວາມ​ໝັ້​ນ​ໃຈ​ຕໍ່​ຜູ້​ບໍລິໂພກ​ກ່ຽວ​ກັບ​ເອກະລັກ​ສະເພາະ​ໜຶ່ງ​ດຽວ ແລະ ທີ່​ມາ​ທີ່ແທ້​ຈິງ​ຂອງ​ສິນ​ຄ້າ. ພ້ອມ​ນັ້ນ, ຍັງ​ເປັນ​ສິ່ງ​ຢັ້ງຢືນ​ເຖິງ​ຄຸນ​ນະ​ພາບ​ພິເສດ, ມີ​ມາດຕະຖານ​ທີ່​ສາມາດ​ກວດ​ສອບ​ຢ້ອນ​ຫຼັງ​ໄດ້ ຊຶ່ງ​ຈະ​ເປັນ​ສິ່ງ​ຊ່ວຍ​ເຮັດ ໃຫ້​ສິນຄ້າ​ມີ​ມູນ​ຄ່າ​ເພີ່ມ​ສູງ​ຂຶ້ນ ແລະ ຈະ​ເປັນ​ເຄື່ອງມື​ຊ່ວຍ​ໃຫ້​ສິນຄ້າ​ຖິ່ນ​ກໍາ​ເນີ​ດ​ຂອງ ສປປ ລາວ ສາມາດ​ສົ່ງ​ອອກ​ຂາຍ​ໃນ​ຕະຫຼາດ​ຕ່າງປະເທດ​ໄດ້.

(ຂ່າວ: ແສງ​ຈັນ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110