ເມືອງ​ພຽງ ​ເນັ້ນ​ຄວາມ​ສຳ​ຄັນ​ວັນ​ອາ​ຫານ​ໂລກ ແລະ ສັບ​ປະ​ດາ​ລຶບ​ລ້າງ​ຄວາມ​ທຸກ​ຍາກ

ເມືອງພຽງ ແຂວງໄຊຍະບູລີ ຈັດພິທີສະເຫຼີມສະຫຼອງວັນອາຫານໂລກ ຄົບຮອບ 40 ປີ ລະນຶກວັນສາກົນ ແລະ ວັນສັບປະດາແຫ່ງຊາດເພື່ອລຶບລ້າງຄວາມທຸກຍາກຄົບຮອບ 28 ປີ ຂຶ້ນໃນວັນທີ 4 ພະຈິກ 2020 ​ຜ່ານ​ມາ ທີ່ຫ້ອງປະຊຸມໃຫຍ່ຂອງເມືອງໂດຍການເປັນປະທານ ແລະ ໃຫ້ກຽດປາຖະກະຖາຂອງທ່ານ ເສີດ ແສງສຸລິນ ກຳມະການພັກແຂວງ ເລຂາພັກເມືອງ ເຈົ້າເມືອງພຽງ, ມີບັນດາຄະນະປະຈຳພັກເມືອງ, ກຳມະການພັກເມືອງ, ຫົວໜ້າ , ຮອງຫົວໜ້າຫ້ອງການ, ພະນັກງານ ທະຫານຕຳຫຼວດ, ລັດວິສາຫະກິດ, ບໍລິສັດ, ນັກທຸລະກິດ ແລະ ເລຂາພັກບ້ານ ບ້ານອ້ອມຂ້າງເມືອງເຂົ້າຮ່ວມ.

ທ່ານ ເສີດ ແສງສຸລິນ ໄດ້ໃຫ້ຮູ້ເຖິງຄວາມໝາຍ, ຄວາມສຳຄັນຂອງວັນອາຫານໂລກ 16 ຕຸລາ ຄົບຮອບ 40 ປີ ວັນລະນຶກສາກົນ ແລະ ວັນສັບປະດາແຫ່ງຊາດ ເພື່ອລົບລ້າງຄວາມທຸກຍາກ 17-24 ຕຸລາ ຄົບຮອບ 28 ປີ ຊຶ່ງ​ໄດ້ຍົກໃຫ້ເຫັນຄວາມທຸກຍາກ ແລະ ໄພອຶດຫິວໄດ້ເປັນບັນຫາໃຫຍ່ຂອງໂລກ ມາເປັນເວລາຫຼາຍສັດຕະວັດແລ້ວ, ຕະຫຼອດໄລຍະຜ່ານມາ ໂລກຂອງພວກເຮົາຍັງໄດ້ພົບກັບຫຼາຍບັນຫາ ແລະ ສິ່ງທ້າທາຍຕ່າງໆເຊັ່ນ: ໄພພິບັດທາງທຳມະຊາດ, ການປ່ຽນແປງດິນຟ້າອາກາດ, ການລະບາດຂອງພະຍາດ, ຄວາມວຸ້ນວາຍທາງສັງຄົມ, ເສິກສົງຄາມຕະຫຼອດຮອດວິກິດການຕ່າງໆ, ປະກົດການດັ່ງກ່າວນັ້ນໄດ້ເປັນການເພີ່ມທະວີໃຫ້ມີຄວາມທຸກຍາກ ແລະ ໄພອຶດຫິວຫຼາຍຂຶ້ນ, ດ່ັງນັ້ນອົງການອາຫານ ແລະ ການກະເສດຂອງສະຫະປະຊາຊາດໄດ້ກຳນົດເອົາວັນທີ 16 ຕຸລາ ຂອງທຸກໆປີ ເປັນວັນອາຫານໂລກຊຶ່ງເລີ່ມແຕ່ປີ 1980, ຕໍ່ມາສະຫະປະຊາຊາດໄດ້ກຳນົດເອົາ ວັນທີ 17 ຕຸລາ ເປັນວັນສາກົນເພື່ອລຶບລ້າງຄວາມທຸກຍາກໂດຍເລີ່ມແຕ່ປີ 1992 ເປັນຕົ້ນມາ, ເຫັນໄດ້ຄວາມສຳຄັນນັ້ນ ມາຮອດປີ 2003 ລັດຖະບານແຫ່ງ ສປປລາວ ກໍ່ໄດ້ກຳນົດເອົາວັນທີ 17-24 ຕຸລາ ເປັນສັບປະດາແຫ່ງຊາດ ເພື່ອລຶບລ້າງຄວາມທຸກຍາກ  ຈຸດປະສົງເພື່ອແນໃສ່ເຮັດໃຫ້ຜູ້ເຂົ້າຮ່ວມໄດ້ຮັບຮູ້ເຂົ້າໃຈກ່ຽວກັບການເພີ່ມພູນຜະລິດຜົນຮັບປະກັນໂພ​ຊະນະການໃຫ້ມີຄວາມຍືນຍົງ ແລະ ທົ່ວເຖີງ, ການພັດທະນາດ້ານກະສິກຳທີ່ສະອາດເພື່ອເປັນການຄ້ຳປະກັນສະບຽງອາຫານ ເວົ້າສະເພາະກໍ່ຄືເມືອງພຽງໃຫ້ພຽງພໍ, ສົ່ງເສີມບົດບາດຍິງ-ຊາຍ ກົນໄກເພີ່ມພູນຜະລິດຜົນ ເສດຖະກິດຄອບຄົວ ຮັບປະກັນຄຸນນະພາບ, ການຂະຫຍາຍເຕັກນິກ, ການຈັດການຄຸ້ມຄອງທີ່ດິນແບບຍືນຍົງ ເຮັດໃຫ້ຄອບຄົວທຸກຍາກຫຼຸດລົງ ປັບປຸງຊີວິດການເປັນຢູ່ຂອງປະຊາຊົນບັນດາເຜົ່າໃຫ້ມີການພັດທະນາດີຂຶ້ນ.

ໃນ​ໂອ​ກາດ​ດັ່ງ​ກ່າວ​, ທ່ານຍັງໄດ້ຜ່ານແຈ້ງການຂອງທ່ານ ເຈົ້າແຂວງໄຊຍະບູລີ ກ່ຽວກັບການລະດົມທຶນເພື່ອຊ່ວຍເຫຼືອຄອບຄົວທຸກຍາກໃນທົ່ວແຂວງ ແລະ ແຈ້ງການຂອງທ່ານເຈົ້າແຂວງ ກ່ຽວກັບການຈັດຕັ້ງສະເຫຼີມສະຫຼອງວັນອາຫານໂລກວັນສາກົນ ແລະ ວັນສັບປະດາແຫ່ງຊາດ ເພື່ອລຶບລ້າງຄວາມທຸກຍາກປະຈຳປີ 2020 ແລະ ຮັບຟັງການຜ່ານບົດສະຫຼຸບ ລາຍຮັບ-ລາຍຈ່າຍ ລະດົມທຶນແກ້ໄຂຄວາມທຸກຍາກຮ່ວງເກົ່າ ແລະ ແຜນການເຄື່ອນໄຫວລະດົມທຶນຮ່ວງໃໝ່ຕື່ມອີກ. ພ້ອມດຽວກັນນີ້, ກໍ​ໄດ້ມີການມອບ-ຮັບເງິນເພື່ອປະກອບສ່ວນ​ໃນ​ການ​ລະ​ດົມ​ທຶນ​ດັ່ງ​ກ່າວ ຈາກບັນດາຫ້ອງການ, ກົມກອງ, ບໍລິສັດ, ນັກທຸລະກິດ, ລັດວິສາຫະກິດ ປະຈຳປີ 2020.

ຕອນ​ທ້າຍທ່ານເຈົ້າເມືອງ ຍັງໄດ້ມີຄຳເຫັນຊີ້ນຳໃຫ້ພາກສ່ວນກ່ຽວຂ້ອງຕາງໜ້າອົງການຈັດຕັ້ງທຸກຂັ້ນທຸກພາກສ່ວນ ທຸລະກິດຜູ້ປະກອບການຕະຫຼອດຮອດປະຊາຊົນບັນດາເຜົ່າພ້ອມກັນສົ່ງແຮງໃຈ ແລະ ສະໜັບສະໜູນໄປເຖິງຜູ້ທຸກຍາກ ຄົ້ນຄວ້າຊອກຫາວິທີການ ແລະ ມາດຕະການເພື່ອສູ້ຊົນຈັດຕັ້ງຜັນຂະຫຍາຍ ໃຫ້ປະກົດຜົນເປັນຈິງ ແລະ ທ່ານ​ຍັງໄດ້ເຊີນຊວນທຸກພາກສ່ວນປະກອບສ່ວນທຶນຮອນ ວັດຖຸປັດໄຈເຂົ້າໃນການແກ້ໄຂຄວາມທຸກຍາກເພື່ອເປັນການສະເຫຼີມສະຫຼອງວັນອາຫານໂລກ, ວັນລະ​ນຶກສາກົນ ແລະ ວັນສັບປະດາແຫ່ງຊາດເພື່ອລຶບລ້າງຄວາມທຸກຍາກໃນຄັ້ງນີ້ໃຫ້ເປັນຂະບວນການພົດພື້ນ.

ຂ່າວ-ພາບ: ແສງສຸດາ ກິ່ງສະຫວັດ.