ວັນທີ 4 ພະຈີກ 2020 ຜ່ານ​ມາ ​ທີ່ບ້ານນາຫຼາ ເມືອງໄຊຍະບູລີ ໄດ້ຈັດພິທີໂອນໜ່ວຍພັກທີ່ຂຶ້ນກັບຄະນະພັກຮາກຖານບ້ານນາຫຼາ ໄປຂຶ້ນກັບການຊີ້ນຳ-ນໍາພາໂດຍກົງ ຂອງຄະນະບໍລິຫານງານພັກເມືອງໄຊຍະບູລີ. ເປັນກຽດເຂົ້າຮ່ວມຂອງສະຫາຍຄຳຜາຍ ແກ້ວບົວ ຮອງເລຂາພັກເມືອງ ຜູ້ຊີ້ນຳວຽກງານການເມືອງແນວຄິດ, ວຽກພັກພະນັກງານຂັ້ນເມືອງ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ເລຂາຄະນະພັກຮາກຖານ, ເລຂາໜ່ວຍພັກ ພ້ອມດ້ວຍສະມາຊີກພັກເຂົ້າຮ່ວມ.

ສະຫາຍ ຄຳພຽນ ປັນຍາວົງ ຄະນະປະຈຳພັກເມືອງ ຫົວໜ້າຫ້ອງການຄະນະຈັດຕັ້ງເມືອງໄດ້ຂຶ້ນຜ່ານມະຕິຕົກລົງຂອງຄະນະປະຈຳພັກເມືອງ ສະບັບເລກທີ 601/ຄພມ.ຊຍ ລົງວັນທີ 15 ຕຸລາ 2020 ວ່າດ້ວຍການໂອນບັນດາໜ່ວຍພັກທີ່ຂຶ້ນກັບຄະນະພັກຮາກຖານບ້ານນາຫຼາໄປຂຶ້ນກັບການຊີ້ນຳ-ນຳພາໂດຍກົງຂອງຄະນະບໍລິຫານງານພັກເມືອງໄຊຍະບູລີ. ຊຶ່ງ​ປະ​ກອບ​ດ້ວຍ: ໜ່ວຍພັກໂຮງຮຽນປະຖົມນາຫຼາ, ໜ່ວຍພັກໂຮງຮຽນປະຖົມນາຄູນ, ໜ່ວຍພັກໂຮງຮຽນປະຖົມນາທ່ອນ, ໜ່ວຍພັກໂຮງຮຽນປະຖົມນາແລ້ງນ້ອຍ ແລະ ໜ່ວຍພັກໂຮງໝໍນ້ອຍນາຫຼາ.

ຈາກນັ້ນ, ສະຫາຍຄຳຜາຍ ແກ້ວບົວ ໄດ້ໃຫ້ກຽດໂອ້ລົມຊຶ່ງທ່ານໄດ້ເນັ້ນໝັກໃຫ້ບັນດາໝ່ວຍພັກທີ່ໄດ້ໂອນ​ດັ່ງ​ກ່າວ​ນັ້ນ ຕ້ອງໄດ້ເຊື່ອມຊືມແນວທາງນະໂຍບາຍ, ກົດລະບຽບພັກ, ກົດໝາຍໃຫ້ຫຼາຍຕື່ມ, ກຳນົດທິດທາງ ແລະ ໜ້າວຽກຂອງໜ່ວຍພັກ, ນໍາພາກວດກາຈັດຕັ້ງປະຕິບັດໃຫ້ມີຜົນສຳເລັດ, ປັບປຸງກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນດ້ານການເມືອງ, ແນວຄິດ, ການຈັດຕັ້ງ, ແບບແຜນວິທີນຳພາ ແລະ ປະຕິບັດໜ້າທີ່ການເມືອງປະຕິບັດລະບຽບພັກໃຫ້ເຂັ້ມງວດ.

ຂ່າວ-ພາບ: ສົມພົງສີສະຫວັດ