ກອງ​ປະຊຸມ​ຜ່ານ​ຮ່າງ​ບົດ​ລາຍ​ງານ​ການເມືອງ ແລະ ຮ່າງ​ບົດ​ສຳຫຼວດ​ການ​ຊີ້​ນຳ​-​ນຳພາ​ຂອງ​ຄະນະ​ບໍລິຫານ​ງານ​ພັກ​ກະຊວງ​ຖະ​ແຫຼງ​ຂ່າວ, ວັດທະນະທຳ ແລະ ທ່ອງ​ທ່ຽວ (ຖວທ) ສະໄໝ​ທີ IV ເພື່ອ​ກະກຽມ​ໃຫ້​ແກ່​ກອງ​ປະຊຸມ​ໃຫຍ່​ ຄັ້ງ​ທີ V ຂອງ​ອົງຄະ​ນະ​ພັກ​ກະຊວງ ຖວທ ໄດ້​ຈັດ​ຂຶ້ນ​ໃນ​ວັນ​ທີ 9 ພະຈິກ​ນີ້​ທີ່​ກະຊວງ ຖວທ ໂດຍ​ການ​ເປັນ​ປະທານ​ຂອງ ສະຫາຍ ກິ​ແກ້ວ ໄຂ​ຄຳ​ພິທູນ ຄະນະ​ເລຂາທິການ​ສູນ​ກາງ​ພັກ ເລຂາ​ຄະນະ​ບໍລິຫານ​ງານ​ພັກ ລັດຖະມົນຕີ ກະຊວງ ຖວທ, ຮອງ​ລັດຖະມົນຕີ, ບັນດາ​ຫົວໜ້າ​ກົມ, ຮອງ​ກົມ, ຫົວໜ້າ​ພະ​ແນກຮອງ​ພະ​ແນ​ກ​ອ້ອມ​ຂ້າງ​ກະຊວງ​ເຂົ້າ​ຮ່ວມ​ຢ່າງ​ພ້ອມ​ພຽງ.

   ໃນ​ກອງ​ປະຊຸມ​ຄັ້ງ​ນີ້ ສະຫາຍ ວັນ​ສີ ກົວ​ມົວ ກຳມະ ການ​ພັກ​ກະຊວງ ຮອງ​ລັດ ຖະມົນຕີ ກະຊວງ ຖວທ ໄດ້​ຜ່ານ​ຮ່າງ​ບົດ​ລາຍ​ງານ​ຕີ​ລາຄາ​ການຈັດຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່​ອົງຄະ​ນະ​ພັກ ກະຊວງ ຖວທ ຄັ້ງ​ທີ IV (2016-2020), ທິດ​ທາງ​ລວມ ແລະ ໜ້າທີ່​ຕົ້ນຕໍ​ໃນ​ການ​ນຳ​ພ​າຂອງ​ອົງຄະ​ນະ​ພັກ​ກະຊວງ ຖວທ 5 ປີ (2021-2025). ເປັນຕົ້ນ​ແມ່ນ​ວຽກ​ງານ​ປັບປຸງ​ກໍ່ສ້າງ​ພັກ​-​ພະນັກງານ, ການ​ນຳພາ​ວຽກ​ງານ​ວິຊາ​ສະເພາະ, ວຽກ​ງານ​ວັດ​ທະ​​ນະທຳ, ວຽກ​ງານ​ທ່ອງ​ທ່ຽວ, ວຽກ​ງານ​ເສ​ນ​າທິ​ການ ແລະ ອື່ນໆ

   ສະຫາຍ ບົວ​ເງິນ ຊາ​ພູ​ວົງ ຮອງ​ເລຂາ​ຄະນະ​ພັກ ຮອງ​ລັດຖະມົນຕີ​ກະຊວງ ຖວທ ກໍໄດ້​ຂຶ້ນ​ຜ່ານ​ບົດ​ສຳຫຼວດການ ​ນຳພາ​ລວມ​ຂອງ​ຄະນະ​ບໍລິ ຫານ​ງານ​ພັກ​ກະຊວງ​ວ່າ: ກອງ​ປະຊຸມ​ໃຫຍ່​ອົງຄະ​ນະ​ພັກ ​ກະຊວງ ຖວທ ຄັ້ງ​ທີ IV ໄດ້​ເປີດ​ຂຶ້ນ​ໃນ​ວັນ​ທີ 18 ທັນວາ 2015 ແລະ ໄດ້​ເລືອກ​ຕັ້ງ​ເອົາ​ຄະນະ​ບໍລິຫານ​ງານ​ພັກ​ກະ​ຊວງ​ຈໍາ​ນວນ 21 ສະຫາຍ ຍິງ 4 ສະຫາຍ ໂດຍ​ມີ​ຄະນະ​ປະ​ຈໍາ​ພັກ 7 ສະຫາຍ, ຍິງ 1 ສະຫາຍ, ໃນ​ນັ້ນ​ມີ​ເລຂາ​ຄະນະ​ພັກ 1 ສະຫາຍ ແລະ ຮອງ​ເລຂາ​ຄະນະ​ພັກ 1 ສະຫາຍ; ຄະນະ​ພັກ​ຊຸດ​ນີ້​ປະກອບ​ມີ ​ຮຸ່ນ​ໜຸ່ມ​ອາຍຸ 45-50 ປີ ກວມ​ເອົາ 9,52%; ຮຸ່ນ​ກາງ​ອາຍຸ 51-60 ປີ ກວມ​ເອົາ 76,19%; ຮຸ່ນ​ອາວຸໂສ​ອາຍຸ 61-67 ປີ ກວມ​ເອົາ 14,28%. ມາ​ຮອດ​ເດືອນ ພະຈິກ 2019 ກົມ​ການເມືອງ​ສູນ​ກາງ​ພັກ ໄດ້​ຕົກລົງ​ໃຫ້ ສະຫາຍ​ເລຂາ​ຄະນະ​ພັກ​ຜູ້​ເກົ່າ ເຂົ້າ​ຮັບ​ເບ້ຍ​ບໍາ​ນານ ແລະ ແຕ່ງຕັ້ງ​ເລຂາ​ຄະນະ​ພັກ​ກະຊວງ​ຜູ້​ໃໝ່ແທນ; ຮອດ​ ທ້າຍ​ປີ 2020 ກໍມີ​ຄະນະ​ພັກ​ ກະ​ຊວງ​ຈໍາ​ນວນ​ໜຶ່ງ​ພັກຜ່ອນ​ຮັບເບ້ຍ​ບໍາ​ນານ. ສະນັ້ນ, ມາ​ ຮອດ​ປັດຈຸບັນ ຄະນະ​ບໍລິຫານ ​ງານ​ພັກ​ກະຊວງ ສະໄໝ​ທີ IV ມີ 14 ສະ​ຫາຍ.

   ສະຫາຍ ລັດຖະມົນຕີ ໄດ້​ຮຽກຮ້ອງ​ໃຫ້ ບັນດາ​ສະຫາຍ​ສະມາຊິກ​ພັກ ຈົ່ງ​ພ້ອມ​ກັນ​ເປັນ​ເຈົ້າ​ການ​ປະກອບ​ຄຳ​ຄິດ ຄຳ​ເຫັນຢ່າງ​ກົງ​ໄປກົງ​ມາ ແລະ ມີ​ຄວາມ​ຮັບ​ຜິດ​ສູງ ເພື່ອ​ເຮັດ​ໃຫ້​ບົດ​ຮ່າງ​ລາຍການ​ເມືອງ​ມີ​ຄວາມ​ສົມບູນ ແລະ ຄົບ​ຖ້ວນ ເພື່ອ​ຈະ​ຜ່ານ ແລະ ໃຫ້​ກອງ​ປະຊຸມ​ໃຫຍ່ຄັ້ງ​ທີ V ຂອງ​ອົງຄະ​ນະ​ພັກ​ກະຊວງ ຖວທ ຮັບຮອງ.

(ຂ່າວ​-​ພາບ: ບຸນ​ອູ້ມ)